លោក ហ៊ុន សែន ព្រមានក្រុមហ៊ុនដែលផ្ដល់កម្ចីបែបជញ្ជក់ឈាម
កាលពីម្សិលមិញ លោកនាយករដ្ឋមន្ត្រី ហ៊ុន សែន បានគំរាមចាប់ខ្លួនអ្នកនយោបាយនៅនឹងកន្លែងចំពោះការសន្យាលុបចោលបំណុលរបស់ប្រជាពលរដ្ឋ ដោយនេះជាអ្វីដែលលោកធ្លាប់បានរិះគន់ទៅលើគណបក្សសង្គ្រោះជាតិនៅមុនការបោះឆ្នោតជ្រើសតាំងតំណាងរាស្ត្រឆ្នាំ២០១៣។
ក្នុងសុន្ទរកថានៅឯសន្និសីទប្រចាំឆ្នាំស្តីពីវិស័យមីក្រូហិរញ្ញវត្ថុនៅការិយាល័យរបស់លោកក្នុងរាជធានីភ្នំពេញ លោកនាយករដ្ឋមន្ត្រីបានមានប្រសាសន៍ថា អ្នកនយោបាយដែលមិនបញ្ចេញឈ្មោះបានអះអាងថា រដ្ឋាភិបាលអាចលុបចោលបំណុលរបស់ប្រជាពលរដ្ឋបាន ដោយសារតែបំណុលរបស់ពួកគាត់ជារបស់រដ្ឋ។
លោកបានថ្លែងថា “អញ្ចឹងសូមផ្តាំទៅបក្សនយោបាយនានា សូមកុំធ្វើអំពើថោកទាបដើរទៅបោកប្រជាពលរដ្ឋថា បើសិនជាឈ្នះឆ្នោតគឺគេនឹងលុបចោលនូវបំណុល។ ខ្ញុំថាសកម្មភាពបែបនេះ ថតឱ្យជាប់ ចាប់ខ្លួនតាហ្មង។ អានេះជាការបំពានលើបញ្ញត្តិហិរញ្ញវត្ថុ និយាយអញ្ចឹងតាហ្មង ចាប់ខ្លួននៅហ្នឹងកន្លែងតាហ្មង តំណាងរាស្ត្រក៏ត្រូវចាប់ដែរ ព្រោះអាហ្នឹងចាប់លើបទល្មើសជាក់ស្តែង”។
លោកនាយករដ្ឋមន្ត្រីមិនបានបញ្ចេញឈ្មោះអ្នកនយោបាយដែលបានធ្វើការសន្យាបែបនេះបណ្ដាលឲ្យលោកខឹងនោះទេ។ ទោះជាយ៉ាងណា អំឡុងសុន្ទរកថាមួយកាលពីខែឧសភា ឆ្នាំ២០១៣ លោក ហ៊ុន សែន បានប្រៀបប្រដូចគណបក្សសង្គ្រោះជាតិទៅនឹងខ្មែរក្រហម ដោយសារតែគណបក្សនេះមានគម្រោងលុបចោលបំណុល។
លោកបានមានប្រសាសន៍នៅពេលនោះថា “ពួកគេនិយាយបើកចំហផង និងខ្សឹបខ្សៀវផងថា នៅពេលខ្លួនឈ្នះឆ្នោត ខ្លួននឹងលុបចោលបំណុលរបស់ប្រជាពលរដ្ឋគ្រប់គ្នា។ ពួកគេត្រូវធ្វើដូច ប៉ុល ពត ហើយបំផ្លាញធនាគារ និងច្បាប់ទាំងអស់។ ពួកគេត្រូវបំផ្លាញធនាគារដើម្បីរំដោះអ្នកជាប់បំណុល។ ទោះជាយ៉ាងណា បើពួកគេមិនធ្វើវាមានន័យថា ពួកគេកុហកប្រជាពលរដ្ឋ”។
មន្ត្រីគណបក្សសង្គ្រោះជាតិនៅពេលនោះបានបដិសេធថា ខ្លួនមិនបានធ្វើការសន្យាបែបនេះឡើយ។ អត្ថបទមួយចុះផ្សាយដោយសំឡេងប្រជាធិបតេយ្យ (VOD) សុន្ទរកថាចុងក្រោយរបស់លោក ហ៊ុន សែន បានគូសបញ្ជាក់ថា ព្រះអង្គម្ចាស់ នរោត្តម រណឫទ្ធិ ប្រធានគណបក្សហ្វុ៊នស៊ិនប៉ិច បានធ្វើការសន្យាលុបចោលបំណុលរបស់ប្រជាពលរដ្ឋអំឡុងសន្ទរកថាមួយនៅខេត្តបន្ទាយមានជ័យ កាលពីខែមិថុនា។
លោក សាយ ហាក់ អ្នកនាំពាក្យ និងជាអគ្គលេខាធិការគណបក្សហ្វុ៊នស៊ិនប៉ិច មិនបានបញ្ជាក់ទេ ហើយក៏មិនបានបដិសេធថា ព្រះអង្គម្ចាស់ធ្លាប់បានសន្យាលុបចោលបំណុលរបស់ប្រជារាស្ត្រឡើយ ប៉ុន្តែលើកឡើងថា គណបក្សនឹងអនុវត្តតាមបំណងប្រាថ្នារបស់លោកនាយករដ្ឋមន្ត្រី។
លោក អំ សំអាត អ្នកគ្រប់គ្រងបច្ចេកទេសមកពីអង្គការសិទ្ធិមនុស្សលីកាដូបានមានប្រសាសន៍ថា ពិតណាស់ថា លោក ហ៊ុន សែន កំពុងតែគំរាមកំហែង ហើយការសន្យាលុបចោលបំណុលដែលទោះជាមិនអាចទៅរួចក្តី គឺជាសិទ្ធិរបស់អ្នកនយោបាយ។
លោកបានបន្តថា “ខ្ញុំគិតថា វាគ្រាន់តែជាទស្សនៈរបស់អ្នកនយោបាយមួយរូបដែលធ្វើប្រជាភិថុតប៉ុណ្ណោះ ដូច្នេះគ្មានបទល្មើសទេ ហើយការលើកឡើងបែបនេះមិនបង្កចលាចលឡើយ។ សូមក្រឡេកមើលច្បាប់ វាមិនមែនជាការញុះញង់ទេ”។
នៅឯសន្និសីទកាលពីម្សិលមិញ លោក ហ៊ុន សែន ក៏បានតម្រង់គោលដៅទៅរកស្ថាប័នមីក្រូហិរញ្ញវត្ថុ (MFIs) ដោយចោទប្រកាន់ក្រុមហ៊ុនជាច្រើនថាធ្វើប្រតិបត្តិការដោយគ្មានលិខិតអនុញ្ញាតចាំបាច់ ហើយព្យាយាមផ្ដល់ឥណទានដោយយកអត្រាការប្រាក់ខ្ពស់ដែលជាការបង្ហាញចេតនាចង់ប្រមូលយកវត្ថុបញ្ចាំរបស់ពួកគាត់។
លោក ហ៊ុន សែន បានមានប្រសាសន៍ថា ”ពួកគេយកអត្រាការប្រាក់ខ្ពស់ ហើយប្រើប្រាស់វិធីសាស្ត្រសងប្រាក់កម្ចីកេងប្រវ័ញ្ច ហើយការអនុវត្តការផ្ដល់កម្ចីរបស់ពួកគេរហ័ស និងធូររលង់ ដែលធ្វើឲ្យអ្នកខ្ចីទទួលបានប្រាក់កម្ចីពីពួកគេ។ ជាលទ្ធផលពួកគាត់ភាគច្រើនខកខានក្នុងការបង់ និងគ្មានលទ្ធភាពបង់ ហើយអចលនទ្រព្យរបស់ពួកគាត់ដូចជាដី ផ្ទះ និងចម្ការត្រូវបានអង្គការ សមាគម និងអ្នកចងការប្រាក់ទាំងនេះរឹបអូស។ ពួកគេហាក់ដូចជាមានបំណងរឹបអូសទ្រព្យសម្បត្តិ”។
លោក ហ៊ុន សែន បានជំរុញអាជ្ញាធរមូលដ្ឋានកុំឲ្យរឹបអូសអចលនទ្រព្យ នៅពេលអ្នកណាម្នាក់ខកខានក្នុងការសងប្រាក់ ហើយត្រូវបញ្ជូនករណីនេះទៅតុលាការជាមុនសិន។ លោកបានមានប្រសាសន៍ថា “ក្រសួងសេដ្ឋកិច្ច និងហិរញ្ញវត្ថុ និងធនាគារជាតិត្រូវមើលរឿងហ្នឹងឱ្យច្បាស់។ នេះជាការបំផ្លាញពលរដ្ឋតាមរយៈយកប្រាក់កម្ចីធ្វើជានុយដើម្បីទាញយកនូវផលប្រយោជន៍ គឺធ្វើម៉េចឱ្យគ្រួសារហ្នឹងជំពាក់គ្មានលទ្ធភាពសង។ ដូច្នេះ ខ្ញុំផ្ញើសារទៅអាជ្ញាធរមូលដ្ឋានគ្រប់ជាន់ថ្នាក់ និងនគរបាល៖ បើអ្វីមួយមិនច្បាស់លាស់ កុំទៅរវល់ជួយស្ថាប័នមីក្រូហិរញ្ញវត្ថុដែលមានបំណងរឹបអូសទ្រព្យសម្បត្តិ។ រឿងនេះត្រូវឆ្លងកាត់តុលាការ”។
លោក គុយ សេងមឿន នាយកប្រតិបត្តិរបស់ KAK មានប្រសាសន៍ថា ក្រុមហ៊ុនរបស់លោកមានអ្នកខ្ចីប្រាក់ប្រមាណ១.០០០នាក់ ហើយការប្រឆាំងរបស់លោក ហ៊ុន សែន គឺពាក់ព័ន្ធអ្នកចងការប្រាក់ក្រៅប្រព័ន្ធ មិនមែន IFM ឬអង្គការមិនមែនរដ្ឋាភិបាលដូចនេះទេ។
លោកបន្តថា ”ខ្ញុំមិនដែលឃើញអង្គការ ឬ MFI រឹបអូសទ្រព្យសម្បត្តិរបស់ប្រជាពលរដ្ឋទេ ព្រោះតាមច្បាប់ទ្រព្យសម្បត្តិរបស់ពួកគាត់អាចយកទៅប្រកាសលក់ឡៃឡុងបាន ប្រសិនបើពួកគាត់យល់ព្រម។ ហើយដំណើរការនេះត្រូវតែស្របច្បាប់ដែលមានន័យថា តុលាការអាចធ្វើការសម្រេចបាន ហើយយើងមិនអាច។ អង្គភាពរបស់ខ្ញុំមិនដែលរឹបអូសផ្ទះសំបែងពីប្រជាពលរដ្ឋទេ។ យើងមានតែមួយករណីប៉ុណ្ណោះដែលយើងបានដាក់ពាក្យបណ្តឹងទៅមេឃុំ។ ប៉ុន្តែពាក្យបណ្ដឹងនោះមិនមែនដើម្បីរឹបអូសទ្រព្យសម្បត្តិទេ វាគ្រាន់តែជំរុញឲ្យពួកគាត់សងប្រាក់ប៉ុណ្ណោះ”៕ សុខុម