កាលពីម្សិលមិញ នគរបាលខេត្តរតនគិរីបានបញ្ជាឲ្យអង្គការសិទ្ធិមនុស្សអាដហុកលុបចោលសិក្ខាសាលាដែលបានគ្រោងទុក ក្នុងគោលបំណងជម្រាបជូនសហគមន៍ជនជាតិដើមភាគតិចមូលដ្ឋានអំពីសិទ្ធិរបស់ពួកគាត់ ដោយអះអាងថា អង្គការមិនមែនរដ្ឋាភិបាលនេះមិនទទួលបានការអនុញ្ញាតចំាបាច់ពីអាជ្ញាធរ។
លោក ឆាយ ធី អ្នកសម្របសម្រួលអង្គការសិទ្ធិមនុស្សអាដហុកប្រចាំខេត្តនេះបានមានប្រសាសន៍ថា លោកនិងបុគ្គលិករបស់លោកបានមកដល់មណ្ឌលសហគមន៍ភូមិគ្រៀង ក្នុងស្រុកបរកែវ ក្រោយម៉ោង៨ព្រឹកបន្តិច ហើយថា នគរបាលប្រហែល២០នាក់បានមកដល់ប៉ុន្មាននាទីក្រោយមកឲ្យបិទសិក្ខាសាលានេះ។
លោកថ្លែងថា ”ខណៈដែលយើងហៀបនឹងចងបដាទៅហើយ នគរបាល និងកងរាជអាវុធហត្ថប្រហែល២០នាក់មកពីឃុំ និងស្រុកនេះបានមកដល់ មិនត្រឹមតែរំខានពួកយើងប៉ុណ្ណោះទេ ថែមទាំងរារាំងយើងមិនឲ្យរៀបចំវគ្គបណ្ដុះបណ្ដាលដល់សហគមន៍ជនជាតិដើមភាគតិចទៀតផង”។
នៅពេលទាក់ទងក្រោយមក លោក មាស សារ៉េត អភិបាលស្រុកស្ដីទីមានប្រសាសន៍ថា អង្គការអាដហុកមិនទទួលបានការយល់ព្រមជាមុនសម្រាប់ការរៀបចំសិក្ខាសាលានេះ។
លោកបានថ្លែងថា “ខ្ញុំមិនបានទៅទីនោះដើម្បីរារាំងពួកគាត់ឡើយ ប៉ុន្តែខ្ញុំបានសុំឲ្យលោក ឆាយ ធី ផ្អាកវគ្គបណ្ដុះបណ្ដាលនេះ ពីព្រោះខ្ញុំចង់ឲ្យគាត់សុំការអនុញ្ញាតពីអាជ្ញាធរខេត្តជាមុនសិន។ យើងបានសម្រេចសុំឲ្យផ្អាក ពីព្រោះយើងចង់ឲ្យគាត់ផ្ដល់លិខិតជាលាយលក្ខណ៍អក្សរពន្យល់ពីគោលបំណង និងរបៀបវារៈនៃវគ្គបណ្ដុះបណ្ដាលនេះ”។
នៅពេលសួរថា តើច្បាប់ណាតម្រូវឲ្យមានការយល់ព្រមជាមុនសម្រាប់ការជួបជុំបែបនេះនោះ លោក សារ៉េត បានបដិសេធមិនធ្វើអត្ថាធិប្បាយទេ។
លោកបែរជាលើកឡើងថា ”ខ្ញុំរីករាយដោយគាត់ចូលរួមផ្សព្វផ្សាយច្បាប់ដល់ប្រជាពលរដ្ឋមូលដ្ឋាន ប៉ុន្តែយើងត្រូវការឲ្យគាត់ធ្វើតាមរចនាសម្ព័ន្ធ”។
លោក ឆាយ ធី បានមានប្រសាសន៍ថា អាជ្ញាធរគ្មានសិទ្ធិរារាំងជំនួបដែលជាផ្នែកនៃកម្មវិធីផ្ដល់មូលនិធិដោយសហរដ្ឋអាេមរិកទេ។ លោកបានថ្លែងថា “គ្មានច្បាប់ណាតម្រូវឲ្យយើងសុំការអនុញ្ញាតទេ ពីព្រោះក្រសួងមហាផ្ទៃគ្រាន់តែតម្រូវឲ្យអង្គការណាមួយដែលមានការិយាល័យអចិន្ត្រៃយ៍នៅក្នុងខេត្តជូនដំណឹងទៅអាជ្ញាធរឱ្យបានប្រាំថ្ងៃមុនថ្ងៃរៀបចំសិក្ខាសាលាប៉ុណ្ណោះ”។
លោក ឆាយ ធី បានថ្លែងថា យើងបានបញ្ជូនសេចក្តីជូនដំណឹងទៅអាជ្ញាធរខេត្តរួចហើយ ដោយចម្លងជូនមន្ត្រីស្រុក និងមន្ត្រីឃុំផងដែរកាលពីខែមករា ប៉ុន្តែមិនដែលទទួលបានដំណឹងវិញឡើយ។ លោក សារ៉េត បានថ្លែងថា លោកទើបតែបានឃើញសេចក្ដីជូនដំណឹងនេះកាលពីពេលថ្មីៗប៉ុណ្ណោះ។
លោក ញ៉ែម សំអឿន អភិបាលរងខេត្តបានមានប្រសាសន៍ថា សេចក្ដីជូនដំណឹងនេះមិនគ្រប់គ្រាន់ទេ ពីព្រោះវាខ្វះព័ត៌មានលម្អិតមួយចំនួន។
លោកបានថ្លែងថា “បើទោះជាគាត់បានជូនដំណឹងទៅអាជ្ញាធរខេត្តរួចហើយក៏ដោយ ក៏ចាំបាច់ត្រូវភ្ជាប់មកជាមួយនូវឯកសារដូចជាការពន្យល់អំពីគោលបំណងនៃវគ្គបណ្ដុះបណ្ដាល កម្មវិធី និងចំនួនអ្នកចូលរួមផងដែរ”។
លោកបានបន្ថែមដោយមិននិយាយលម្អិតថា “ចំណុចមួយចំនួនស្ដីពីវគ្គបណ្ដុះបណ្ដាលនេះត្រូវបានអាជ្ញាធរខេត្តលុបចោល ព្រោះវាមិនត្រឹមត្រូវ”។
លោក ឆាយ ធី បានថ្លែងថា លោករំពឹងថា នឹងមានប្រជាពលរដ្ឋពី៨០ទៅ១០០នាក់ចូលរួមក្នុងវគ្គបណ្ដុះបណ្ដាលនេះដែលនឹងដោះស្រាយបញ្ហាសិទ្ធិមនុស្ស សិទ្ធិជនជាតិដើមភាគតិច លទ្ធិប្រជាធិបតេយ្យ និងការតស៊ូមតិ។
លោកបានចាត់ទុកមូលហេតុរបស់អាជ្ញាធរក្នុងការបិទសិក្ខាសាលានេះថា ជាលេសដើម្បីបំភិតបំភ័យ និងបំបិទមាត់សហគមន៍ជនជាតិដើមភាគតិចដែលជាប់ពាក់ព័ន្ធវិវាទដីធ្លីមួយចំនួនជាមួយក្រុមហ៊ុនកសិពាណិជ្ជកម្មមានអំណាច។
លោក Jay Raman អ្នកនាំពាក្យស្ថានទូតអាមេរិកបានលើកឡើងថា លោកបានដឹងព័ត៌មានថា សិក្ខាសាលានេះត្រូវបានរារាំង ប៉ុន្តែបានបដិសេធមិនធ្វើអត្ថាធិប្បាយពីហេតុការណ៍នោះ ឬថាតើសកម្មភាពរបស់រដ្ឋាភិបាលស្របច្បាប់ឬយ៉ាងណានោះឡើយ។
លោកបាននិយាយថា “យើងគិតថា នេះជាកម្មវិធីសំខាន់ ហើយយើងនឹងធ្វើការជាមួយដៃគូអនុវត្តន៍របស់យើង និងរដ្ឋាភិបាលដើម្បីដំណើរការទៅមុខ”៕ សារុន (រាយការណ៍បន្ថែមដោយ Zsombor Peter)