កាលពីម្សិលមិញ ក្រុមហ៊ុនល្បែងអូស្ត្រាលី Tabcorp បានអះអាងថា ខ្លួនកំពុងត្រូវបានសើុបអង្កេតដោយនគរបាលអូស្ត្រាលីជំុវិញការផ្តល់ប្រាក់សំណូកក្នុងឆ្នាំ២០០៩ដល់ក្រុមហ៊ុនពិគ្រោះយោបល់កម្ពុជាដែលមានទំនាក់ទំនងនឹងប្អូនស្រីរបស់លោកនាយករដ្ឋមន្ត្រី ហ៊ុន សែន។
សេចក្តីថ្លែងការណ៍របស់ក្រុមហ៊ុនTabcorp ដែលបានចុះផ្សាយក្នុងគេហទំព័ររបស់ខ្លួនធ្វើឡើងបន្ទាប់ពីមានសេចក្តីរាយការណ៍ព័ត៌មាន របស់ប្រព័ន្ធផ្សព្វផ្សាយព័ត៌មាន Fairfax កាលពីម្សិលមិញដែលអះអាងថា ក្រុមហ៊ុនល្បែងនេះបានផ្តល់ប្រាក់ចំនួន២០០.០០០ដុល្លារដល់ក្រុមហ៊ុនពិគ្រោះយោបល់មិនចេញឈ្មោះមួយ ខណៈស្វែងរកលទ្ធភាពនៃការទទួលបានអាជ្ញាប័ណ្ណបើកល្បែងនៅទីនេះ។
សេចក្តីថ្លែងការណ៍ដដែលនេះមានខ្លឹមសារថា “កាលពីឆ្នាំ២០០៩ ក្រុមហ៊ុនTabcorp បានស្វែងរកឱកាសធ្វើអាជីវកម្មទាក់ទងទីផ្សារភ្នាល់កីឡានៅប្រទេសកម្ពុជា។នៅពេលនោះប្រទេសមួយចំនួនក្នុងតំបន់អាស៊ី កំពុងពិចារណាឈប់ដាក់កម្រិតលើការភ្នាល់កីឡា។ ក្រុមហ៊ុន Tabcorp សម្រេចមិនស្វែងរកឱកាសនេះទេ ហើយអាជីវកម្មមិនដែលដំណើរការឡើយ”។
សេចក្តីថ្លែងការណ៍នេះបន្តថា “ថ្ងៃនេះ យើងទទួលបានការណែនាំពីនគរបាលសហព័ន្ធអូស្ត្រាលី [AFP] ថា ពួកគេបានចាប់ផ្តើមការស៊ើុបអង្កេត ទាក់ទិនបញ្ហានេះ។ក្រុមហ៊ុនTabcorp នឹងសហការយ៉ាងពេញលេញជាមួយការសើុបអង្កេតនេះ”។
AFP បានអះអាងពីការសើុបអង្កេតេនះ ប៉ុន្តែ បានបដិសេធមិនបញ្ចេញឈ្មោះក្រុមហ៊ុននៅកម្ពុជា ដែលតាមព័ត៌មានថា មានការជាប់ពាក់ព័ន្ធនោះឡើយ។
អ្នកនាំពាក្យម្នាក់បានលើកឡើងតាមអីុម៉េលថា ” AFP អាចបញ្ជាក់ថា ខ្លួនកំពុងធ្វើការសើុបអង្កេតការចោទប្រកាន់ពីបទសូកប៉ាន់ក្រៅប្រទេស ទាក់ទងទៅនឹងក្រុមហ៊ុនអូស្ត្រាលី (Tabcorp)។ ខណៈការសើុបអង្កេតកំពុងបន្តនោះ AFP នឹងមិនធ្វើអត្ថាធិប្បាយបន្ថែមទេនៅពេលនេះ”។
នៅក្នុងសេចក្តីរាយការណ៍ព័ត៌មានរបស់ខ្លួន Fairfax បានលើកឡើងថា ខ្លួនបានរកឃើញភ័ស្តុតាងនៃការផ្តល់ប្រាក់តាមរយៈការសើុបអង្កេត របស់ខ្លួនផ្ទាល់ ហើយថា សេចក្តីរាយការណ៍ព័ត៌មានរបស់ខ្លួនភាគច្រើនបានមកពីប្រភពមិនបញ្ចេញឈ្មោះនៅក្នុងឧស្សាហកម្មល្បែងនេះ។ប្រព័ន្ធផ្សព្វផ្សាយនេះបន្តថា ក្រុមហ៊ុននេះបានផ្តល់ប្រាក់តាមគណនីធនាគារសហរដ្ឋអាមេរិក “តាមការណែនាំរបស់បុគ្គល ដែលមានទំនាក់ទំនងជាមួយរដ្ឋាភិបាលលោក ហ៊ុន សែន” បើទោះបីជា មានការណែនាំពីផ្ទៃក្នុងក្រុមហ៊ុនថា វាខុសច្បាប់ក៏ដោយ។
នាយកប្រតិបត្តិក្រុមហ៊ុន Tabcorp នៅពេល ផ្តល់ប្រាក់នោះគឺលោក Elmer Funke Kupper ដែលឥឡូវនេះជាប្រធានផ្សារមូលបត្រអូស្ត្រាលី ហើយធ្លាប់ធ្វើជានាយកគ្រប់គ្រងក្រុមហ៊ុនអាស៊ីប៉ាស៊ីហ្វិកនៅធនាគារ ANZ ។
លោក ម៉ី វណ្ណ ដែលជាប្រធាននាយកដ្ឋានឧស្សាហកម្ម ហិរញ្ញវត្ថុ នៅក្រសួងសេដ្ឋកិច្ច និងហិរញ្ញវត្ថុបានមានប្រសាសន៍ថា លោក មិនបានដឹងពីការផ្តល់ប្រាក់របស់ក្រុមហ៊ុន Tabcorp ដល់ក្រុមហ៊ុននៅកម្ពុជាទេ។
កាលពីឆ្នាំ២០១៣ នាយកដ្ឋាននេះបានឲ្យដឹងថា គេហទំព័រល្បែងតាមប្រព័ន្ធអីុនធឺណិត គឺខុសច្បាប់នៅក្នុងប្រទេសកម្ពុជា។ ប៉ុន្តែ លោក ម៉ី វណ្ណ បានថ្លែងថា រដ្ឋាភិបាលបានចេញសារាចរកាលពីខែមករា អនុញ្ញាតឲ្យក្រុមហ៊ុនតាមប្រព័ន្ធអីុនធឺណិតទទួលបានអាជ្ញាប័ណ្ណ។
លោកបានថ្លែងថា “ពួកគេមិនអាចមកបើកល្បែងតាមប្រព័ន្ធអីុនធឺណិតដោយផ្ទាល់បានទេ។ ម្ចាស់កាស៊ីណូមានសិទ្ធិបើកល្បែងតាមប្រព័ន្ធអីុនធឺណិតបាន។ ដូច្នេះហើយប្រសិនបើក្រុមហ៊ុនដទៃទៀតចង់បើកល្បែងតាមប្រព័ន្ធអីុនធឺណិត ត្រូវទំនាក់ទំនងជាមួយម្ចាស់កាស៊ីណូទាំងនោះ”។
គេមិនអាចទាក់ទងក្រុមមន្ត្រីនៅអង្គភាពប្រឆាំងអំពើពុករលួយដើម្បីសុំអត្ថាធិប្បាយបានទេ៕សារុន