28 C
Phnom Penh

មជ្ឈដ្ឋាន​​​​​​​​​​​​​​​​​ខ្លះ​មាន​មន្ទិល​ ហើយ​​​​​​​​​​​ខ្លះ​​​​​​​​​​​​​​​មាន​​​​​​សង្ឃឹម​​ចំពោះ​​​​​​ការ​រុះរើ​​គណៈ​រដ្ឋមន្ត្រី​​​​​នៅ​ពាក់​​​កណ្តាល​​​​​​អាណត្តិ​​​

ដោយ ឌឹ ខេមបូឌា ដេលី

បទវិភាគ

បន្ទាប់ពី​លោក​នាយក​រដ្ឋមន្ត្រី​ ហ៊ុន សែន ​​​លាត​ត្រដាង​​ឈ្មោះ​​​រដ្ឋមន្ត្រី​ចំនួន​ប្រាំបី​រូប​​​​​កាល​​​ពី​​​​​​ថ្ងៃ​​​​​​សុក្រ​​​​​​ ដែល​ពាក់​ព័ន្ធ​​​នៅ​​​​ក្នុង​ការ​រុះ​រើស​គណៈរដ្ឋមន្ត្រី​ពាក់​កណ្ដាល​អាណត្តិ​មិន​ធ្លាប់​មានបណ្ដា​អ្នក​សង្កេត​ការណ៍ និង​អ្នក​នយោបាយ​​គណបក្ស​ប្រឆាំង​បាន​​ចាត់​ទុក​ចំណាត់​ការ​នេះ​​​កាល​​​​​​ពី​​​ម្សិល​​​មិញ​​​​​​​ថា ​ជា​​​​វិធាន​​​ការ​​​​​​​ឈ្លាសវៃ​​​​​​​​ផ្នែក​​​​​​​​​ទំនាក់​​​ទំនង​​​​​​សាធារណៈ ​​ប៉ុន្តែ​នៅ​តែ​មាន​​មន្ទិល​ចំពោះ​​​​ប្រសិទ្ធ​​​ភាព​​​​ចុង​ក្រោយ​នៃ​ការ​រុះរើ​នេះ​។

លោក ហ៊ុន សែន បាន​ដាក់​សំណើ​​រុះរើ​គណៈរដ្ឋមន្ត្រី​ជូន​​​​​​ទៅ​រដ្ឋសភា​កាលពី​ថ្ងៃពុធ ហើយ​មាន​​​ប្រសាសន៍​​​ថា ការ​បោះ​ឆ្នោត​​នៅ​​​​រដ្ឋ​​​សភា​ដែល​​​​សំឡេង​​​ភាគ​​​​​​​​​​​ច្រើន​​​គ្រប់​​​គ្រង​​​​​​ដោយ​​​​​​គណបក្ស​ប្រជាជន​កម្ពុជា​ នឹង​ត្រូវ​ធ្វើ​ឡើង​នៅ​ថ្ងៃទី៤ ខែ​មេសា។

រដ្ឋមន្ត្រី​​​ដែល​ត្រូវ​ចូល​និវត្ត ឬ​ផ្លាស់​ប្ដូរ​មុខ​ងារ​ទាំង​នោះ​មាន​ដូច​ជា រដ្ឋមន្ត្រី​ក្រសួង​ការ​បរទេស​ រដ្ឋមន្ត្រី​ក្រសួង​រៀបចំ​ដែន​ដី រដ្ឋ​មន្ត្រី​​ក្រសួង​កសិកម្ម រដ្ឋមន្ត្រី​ក្រសួង​ពាណិជ្ជកម្ម រដ្ឋមន្ត្រី​ក្រសួង​សាធារណការ​ រដ្ឋ​មន្ត្រី​ក្រសួង​អភិវឌ្ឍន៍​ជន​បទ រដ្ឋមន្ត្រី​ក្រសួង​​ប្រៃសណីយ៍​ និង​ក្រសួង​ធម្មការ​។ រដ្ឋលេខាធិការ​ថ្មី​ៗចំនួន​១១​រូប​​ក៏​ត្រូវ​បាន​​​​​​ដាក់​​​បញ្ចូល​​​​​​បន្ថែម​​​ដែរ​​​ទៅ​​​​​​​ក្នុង​អង្គ​នីតិប្រតិបត្តិ​​ដែល​បាន​រង​ការ​រិះគន់​ជាយូរ​មក​ហើយ​​ចំពោះ​ការ​ផ្ដល់​អាទិភាព​​លើ​បក្សពួកជាជាង​​​ប្រសិទ្ធភាព​​​​​​ការងារ​​​។

លោក ផៃ ស៊ីផាន ​អ្នក​នាំពាក្យ​ទីស្ដីការ​គណៈរដ្ឋមន្ត្រី​មាន​ប្រសាសន៍​ថា ការ​រុះរើ​នេះ​​​​​​​ធ្វើ​ឡើង​ក្នុង​គោល​បំណង​កែលម្អ​សេវា​សាធា​​​រណៈ ហើយ​​​ថា ​រដ្ឋមន្ត្រី​មួយចំនួន​មិន​បាន​គោរព​តាម​ការ​ព្រមាន​របស់​លោក​នាយក​រដ្ឋមន្ត្រី​កាល​ពីពេល​ថ្មីៗ​នេះ​ឲ្យ​សម្អាត​ក្រសួង​របស់​ខ្លួន​​​​ឡើយ។

លោកបាន​​​​​​​ថ្លែង​​​​ថា “​ការ​រុះរើ​នេះ​គឺ​ដើម្បី​ពង្រឹង​សាមគ្គីភាព និង​​​​​​ផ្ដល់​សេវា​ល្អ​ប្រសើរ​ជូន​ប្រជាពលរដ្ឋ​ពី​សំណាក់​​​​​​ក្រសួង​នីមួយៗ​ដែល​មាន​​ការ​ផ្លាស់​ប្ដូរ​” ហើយ​​​ក៏ដើម្បី​កាត់​បន្ថយ​បក្ខ​ពួក​និយម​​​​ដែរ​។ “​ដោយសារ​តែ​បក្ខ​ពួក​និយម​ រដ្ឋមន្ត្រី​​​​មួយ​​​​​​ចំនួន​​​មិន​អាច​​​ធ្វើ​ឲ្យ​ប្រសើរ​ឡើង​បាន”។

ទោះ​ជាយ៉ាង​ណា លោក​បាន​​អះអាង​ថា ចំណាត់​ការ​នេះ​មិន​មែន​ជា​ការ​ដាក់​ទណ្ឌកម្ម​ទេ ថ្វី​​​បើ​​​លោក ហ៊ុន សែន បាន​បញ្ចេញ​​ឈ្មោះ​​​​​​រដ្ឋមន្ត្រី​​ពីរ​រូប​គឺ​លោក ត្រាំ អុីវតឹក រដ្ឋមន្ត្រី​ក្រសួង​សាធារណការ និង​លោក អ៊ុក រ៉ាប៊ុន ​រដ្ឋមន្ត្រី​ក្រសួង​កសិកម្ម​ថា “ស្ទក់​” ពេក​នៅ​ប៉ុន្មាន​​​​​សប្ដាហ៍​មុន​ការ​រុះរើ​​​​​​នេះ​​​ក្តី​​​​។

លោក​ថ្លែង​​ថា ”​ការ​រុះរើ​មិន​មែន​​​ជា​ការ​ដាក់​​​ទណ្ឌកម្ម​ទេ វា​ជា​ការ​រៀបចំ​ឡើង​វិញ​” ហើយ​​ការ​រុះរើ​​នេះ​​នឹង​ក្លាយជា​សារ​ដាស់​​​​​តឿន​ដល់​​រដ្ឋមន្ត្រី​ទាំង​អស់​។ “​ការ​​​រុះ​​​​​​រើ​​​នេះ​​​ដើម្បី​​​​​​ឲ្យ​​​មាន​​​​​​​​អភិបាល​កិច្ច​ល្អ​ ហើយ​ជា​ការ​សំពង​​​មន្ត្រី​ដើម្ប​​​​​ី​ដាស់​តឿន​ពួកគេ​​កុំ​ឲ្យ​មើល​ងាយ​ការ​”។

ពេល​សាក​សួរ​អំពី​ការ​រុះរើ​នេះ​ លោក សម រង្ស៊ី ប្រធាន​គណបក្ស​ប្រឆាំង​បាន​​​​ឆ្លើយ​​​ថា “​​មាន​មនុស្ស​ចាស់​គំរឹល​ប្រើ​ការ​លែង​កើត​ដែល​មាន​ប្រវត្តិ​គួរ​ឲ្យ​ខ្លាច​ជាច្រើន​នៅ​ឡើយ” ​​​ក្នុង​ជួរ​រដ្ឋាភិបាល។

លោក​​បាន​​​​​​មាន​​​​​​ប្រសាសន៍​​​​ថា ការ​ចូល​រួម​បោះ​ឆ្នោត​​នឹងជា​ “​ការ​ខ្ជះខ្ជាយ​ពេល​វេលា” ​ប៉ុន្តែថា លោក​​​​នឹង​ទុក​​រឿង​នេះ​ឲ្យ​មន្ត្រី​ផ្សេង​ទៀត​នៅ​​ក្នុង​បក្ស​ជាអ្នក​សម្រេច​ថា ​តើ​ត្រូវ​ធ្វើ​ពហិការ​សម័យ​ប្រជុំ​នេះ ​ឬក៏អត់។ “​រដ្ឋា​ភិបាល​នេះ​គ្រាន់​តែចង់​​​​បង្ហាញ​នូវ​ប្រព័ន្ធ​ឯក​បក្ស​​​ដែល​ស្ថិត​ក្រោម​ការ​ត្រួតត្រា​​ដោយ​មនុស្ស​តែ​ម្នាក់​​​ប៉ុណ្ណោះ​”។

ប៉ុន្តែ​ខណៈ​អ្នក​វិភាគ និង​អ្នក​ជំនាញ​ភាគ​ច្រើន​​​​​លើក​​​ឡើង​​​​ថា ការ​រុះរើ​នេះ​​នឹង​មាន​​​​​​ប្រសិទ្ធ​​​ភាព​​​​តិច​តួច​នៅ​ក្នុង​រដ្ឋការ​ដែល​ពោរពេញ​​ដោយ​អំណាច​ប្រមូល​ផ្ដុំ លោក​ សុន ឆ័យ តំណាង​រាស្ត្រ​ និង​ជា​អ្នក​ធ្វើ​គោល​នយោ​បាយ​​​ជាន់​ខ្ពស់​ក្នុង​គណបក្ស​សង្គ្រោះជាតិ​ មាន​សុទិដ្ឋិនិយម​ជាង​នេះ។

លោក​​​​បាន​​​​បញ្ចេញ​ឈ្មោះ លោក ស៊ុន ចាន់ថុល ដែល​នឹង​ផ្លាស់​​ពី​ក្រសួង​ពាណិជ្ជកម្ម​ទៅ​​ក្រសួង​សាធារណការ​​ធ្វើ​ជា​ឧទាហរណ៍​​ថា ​​”​មាន​ការ​ផ្លាស់​ប្ដូរ​វិជ្ជមាន​ខ្លះ យើង​ត្រូវ​មើល​​​ការ​ផ្លាស់​​ប្ដូរ​វិជ្ជមាន​នេះ លើក​នេះ​បុគ្គល​​​​​​គ្រាន់​​​​បើ​ត្រូវ​បាន​តែង​តាំង​​​​ឲ្យ​​​​​​​​កាន់​​​​​ក្រសួង​សំខាន់ៗ​។ ​​​ខ្ញុំ​គិត​ថា លោក ស៊ុន ចាន់ថុល ត្រូវ​បាន​ទទួល​ស្គាល់​ជា​រដ្ឋមន្ត្រី​ល្អ។ ការ​តែង​តាំង​គាត់​ឲ្យ​កាន់​ក្រសួង​សំខាន់​ ខ្ញុំគិត​ថា នេះ​នឹង​​ធ្វើ​ឲ្យ​មាន​ការ​ផ្លាស់​ប្ដូរ​ល្អខ្លះ​​​​សម្រាប់​សុវត្ថិភាព​ផ្លូវ​ថ្នល់ និង​ការ​អភិវឌ្ឍ​ផ្លូវ​ថ្នល់”។

តំណាង​​​​​​រាស្ត្រ​​​​​​​​​រូប​​​​​​នេះ​​​ក៏​បាន​លើក​ឡើង​ដែរ​ថា ការ​តែង​តាំង​រដ្ឋមន្ត្រី​ថ្មីថ្មោង​ពីរ​រូប​​ គឺ​លោក ប៉ាន សូរស័ក្ដិ​ ឲ្យ​កាន់​ក្រសួង​ពាណិជ្ជ​កម្ម និង​លោក វេង សាខុន ​ឲ្យ​កាន់​ក្រសួង​កសិកម្ម គឺ​ជា​សញ្ញា​ល្អ​។ សូម​​​បញ្ជាក់​​​​​​​​​ថា លោក​ ប៉ាន សូរស័ក្តិ គឺ​ជា​រដ្ឋលេខាធិការ​​​ក្រសួង​ពាណិជ្ជកម្ម ចំណែក​ឯ​លោក វេង សាខុន គឺ​ជា​រដ្ឋលេខាធិការ​ក្រសួង​ធនធាន​ទឹក​។ ​​​​​​

លោក​​ថ្លែងថា “​រាល់​​ការ​ផ្លាស់​ប្ដូរ​​នឹង​មាន​ភាព​វិជ្ជមាន​” ហើយ​​​​​​ថា ការ​សម្រេច​របស់​លោក ហ៊ុន សែន នៅ​តែ​​ជំរុញ​ដោយ​ហេតុ​ផល​នយោបាយ នៅពេល​​​​ការ​បោះ​ឆ្នោត​​​​ឃុំ-សង្កាត់​​ឆ្នាំ​២០១៧ និង​ការ​បោះ​ឆ្នោត​ជ្រើស​​​​តាំង​តំណាង​រាស្ត្រ​ឆ្នាំ​២០១៨ ខិត​ជិត​ចូល​មក​ដល់។

លោក​បាន​បន្ត​ថា “​រដ្ឋាភិបាល​​​ត្រូវ​​​ត្រៀម​​មុខមាត់​ថ្មី​ ជា​ពិសេស​ក្រសួង​មួយ​ចំនួន​ដែល​ធ្វើ​ឲ្យប៉ះពាល់​ដល់​មតិ​សាធារណជន​។ បើ​រដ្ឋមន្ត្រី​ថ្មី​ទាំង​នេះ​​ធ្វើ​ការ​ងារបាន​ល្អ​ នាយក​រដ្ឋមន្ត្រី​សង្ឃឹម​ថា គាត់​នឹង​អាច​ទាក់​ទាញ​សន្លឹក​​​ឆ្នោត​បាន​បន្ថែម​ទៀត ហើយ​គាត់​នឹង​​គ្រប់​គ្រង​ប្រទេស​កាន់​តែ​មាន​ប្រសិទ្ធ​ភាព​ បន្ទាប់​ពី​​ការ​បោះ​ឆ្នោត​អាណត្តិក្រោយ”។

លោក សំ អុិន អគ្គលេខាធិការ​គណបក្ស​ប្រជាធិបតេយ្យ​មូលដ្ឋាន​ ​មាន​ប្រសាសន៍​ថា លោក​​ក៏​ចង់​ឃើញ​​ការ​ផ្លាស់​ប្ដូរ​​​នៅ​​​​ក្នុង​ក្រសួង​​​សុខាភិបាល​ និង​ក្រសួង​យុត្តិធម៌​ដែរ​ ប៉ុន្តែ​សង្ឃឹមថា ការ​​ធ្វើ​កំណែទម្រង់​គណៈរដ្ឋមន្ត្រី​នេះ​​នឹង​ក្លាយ​ជា​សារ​​រំឭក​ដាស់​តឿន​។ លោក​​​​​​លើក​​​ឡើង​​​​​​​​​​ថា “​កំណែទម្រង់​នេះ​ក៏​ជា​ការ​ល្អ​ដែរ​ដើម្បី​​ព្រមាន​ក្រសួង​ផ្សេងៗ​ទៀត​ឲ្យ​ខិតខំ​​ធ្វើ​ការ​​​​ងារ​​​ដើម្បី​​​​ជាតិ​ និង​ប្រជាពលរដ្ឋ ជា​ពិសេស​សេវា​សាធារណៈ​”។

លោក​បន្ថែម​ថា លោក​មាន​សុទិដ្ឋិនិយម​​​​ចំពោះ​លោក ស៊ុន ចាន់ថុល ​ដែល​នឹង​កាន់​​ក្រសួង​សាធារណការ​ និង​លោក ជា សុផារ៉ា ​រដ្ឋមន្ត្រី​​ក្រសួង​អភិវឌ្ឍន៍​ជនបទ​ដែល​នឹង​ផ្លាស់​មក​កាន់​ក្រសួង​រៀបចំ​ដែន​ដី​។ ”​ខ្លួន​ខ្ញុំ​ផ្ទាល់​សង្កេត​ឃើញ​ថា លោក ជា សុផារ៉ា ​ជា​បុគ្គល​ដែល​ធ្វើ​ការងារ​​​​​បាន​យ៉ាង​ល្អ​ទាក់​​​ទិន​​​​ការ​គ្រប់គ្រង​របស់​គាត់​ ហើយ​​ការ​ដឹកនាំ​​របស់​​គាត់​ល្អ​ដោយ​សារ​តែ​គាត់​មាន​បទ​ពិសោធន៍​​​​ធ្លាប់ធ្វើ​ជា​អភិបាល​​រាជធានី​ភ្នំពេញ”។ ​

ទោះ​ជាយ៉ាង​ណា លោក គល់ បញ្ញា នាយកប្រតិបត្តិ​នៃ​គណៈកម្មាធិការ​​ដើម្បី​ការ​បោះ​ឆ្នោត​ដោយ​សេរី និង​យុត្តិធម៌​នៅ​កម្ពុជា​ (ខុមហ្វ្រែល​) ​មាន​ប្រសាសន៍​ថា ​បញ្ហា​​មិន​ស្ថិត​នៅ​ត្រង់​ថា ​អ្នក​ណា​គ្រប់គ្រង​ក្រសួង​ទាំង​នេះ​ឡើយ ​ពីព្រោះ​លោក ហ៊ុន សែន នឹង​នៅ​តែ​ជា​អ្នក​សម្រេច​ដដែល​។ ​

លោក​បាន​លើក​ឡើង​ថា “​ប្រព័ន្ធ​បញ្ហា​ដី​ធ្លី​មិន​ស្ថិត​នៅ​ត្រង់​ថា រដ្ឋមន្ត្រី​រូប​ណា​អាច​ដោះ​​​​​ស្រាយ​បញ្ហា​នេះ​​​បាន​​​​ទេ វា​ជា​បញ្ហា​ដែល​មាន​​​​លក្ខណៈ​ជា​ប្រព័ន្ធ។ ខ្ញុំ​គិត​ថា បើ​នាយក​​​រដ្ឋមន្ត្រី​​​​​ឬ​រដ្ឋាភិបាល​ទាំង​មូល​ប្ដេជ្ញា នឹង​​​​អាច​ដោះ​ស្រាយ​បញ្ហា​នេះ​បាន​។ ពេល​ខ្លះ​រដ្ឋមន្ត្រី​គ្មាន​​​អំណាច​ពិត​ប្រាកដ​ទេ”។

ទោះ​ជាយ៉ាង​ណា លោក​​​បាន​​​​គូស​បញ្ជាក់​ថា មិន​ចាំបាច់​ឆ្ងល់​ឡើយ ​គណបក្ស​កាន់​អំណាច​​​នឹង​ប្រើ​ប្រាស់​ការ​រុះរើ​គណៈរដ្ឋមន្ត្រី​នេះ​ធ្វើ​ជា​ភ័ស្តុតាង​​​បង្ហាញ​ពី​រដ្ឋការ​ដែល​មាន​គំនិត​ធ្វើ​កំណែទម្រង់​។ ”គេ​​​​​​​មាន​​​​​​ការ​ឃោសនា​​​​មួយ​​​​​ចំនួ​​​ន​​​​​​​​​​​​​​​​​​​​​​​​​​​ថា គេ​នឹង​បង្កើន​ប្រសិទ្ធភាព​ការ​ងារ​ជាមួយ​​រដ្ឋមន្ត្រី​ថ្មី​ ប៉ុន្តែ​ខ្ញុំ​គិត​ថា សាធារណជន​នឹង​មិន​ទទួល​ស្គាល់​នេះ​​ថា​ជា​កំណែទម្រង់​​ពិត​​​ប្រាកដ​​ទេ ពីព្រោះ​ពួកគាត់​​មិន​ឃើញ​មាន​ការ​​​​ផ្លាស់​ប្ដូរ​ច្បាស់​លាស់​​​​​​​​​អ្វីឡើយ”។

លោក​​បន្ត​​​​​​​ថា មូលហេតុ​សំខាន់​សម្រាប់​​​សំណើ​នេះ​គឺ​ដើម្បី​ធ្វើ​​ឲ្យ​ប្រាកដ​ថា មន្ត្រី​ជាន់​ខ្ពស់​របស់​គណបក្ស​ប្រជាជន​កម្ពុជា រួម​ទាំង​អភិបាល​ខេត្ត​ចូល​និវត្ត​ន៍​​​មួយ​ចំនួន​ផង​ មាន​មុខ​តំណែងសុខ​​​​ស្រួល​នៅ​ក្នុង​ជួរ​រដ្ឋាភិបាល​។

លោក​បាន​ធ្វើ​ការ​កត់​សម្គាល់​​​​​ថា ”​ដូច្នេះ​គេ​គ្រាន់​តែ​បង្កើន​ចំនួន​រដ្ឋលេខាធិការ​​ដើម្បី​ឲ្យ​​​មើល​​​​​​ទៅ​​​​​​​គណបក្ស​ប្រជាជន​កាន់​តែ​មាន​ស្ថិរភាព​ផ្នែក​នយោបាយ​សម្រាប់​គណបក្ស​ និង​រដ្ឋាភិបាល​របស់​ខ្លួន វា​ជា​ផល​ប្រយោជន៍​នយោបាយ​ មិន​មែន​សម្រាប់​សាធារណជន​ទេ។ គេ​គ្រាន់​តែ​ផ្លាស់​ប្ដូរ​រដ្ឋមន្ត្រី ហើយ​បង្កើន​​​​​ចំនួន​ដើម្បី​​ឲ្យ​ប្រាកដ​ថា មន្ត្រី​ជាន់​ខ្ពស់​របស់​គណបក្ស​ប្រជាជន​សប្បាយ​ចិត្ត​ចំពោះ​ការ​ផ្លាស់​ប្ដូរ​នេះ”។

លោក អំ សំអាត ប្រធាន​​​​​គ្រប់​​​​​​គ្រង​​​​បច្ចេក​​ទេស​ស៊ើបអង្កេត​នៅ​អង្គការ​សិទ្ធិ​មនុស្ស​លីកាដូ​ បាន​សម្ដែង​ការ​សោក​ស្ដាយ​​ដែល​លោក ត្រាំ​ អុីវតឹក ​​រដ្ឋមន្ត្រី​ក្រសួង​សាធារណ​ការ​ត្រូវ​បាន​​ផ្លាស់​​ឲ្យ​ទៅ​កាន់​ក្រសួង​ទូរគមនា​គមន៍ និង​លោក អ៊ុក រា៉ប៊ុន ​​រដ្ឋមន្ត្រី​ក្រសួង​កសិកម្ម​ដែល​ត្រូវបាន​ផ្លាស់​ឲ្យ​ទៅ​កាន់​ក្រសួង​​​​អភិវឌ្ឍន៍​ជនបទ​។

លោក​បាន​​លើក​ឡើង​​​​ទៀត​ថា ”សម្ដេច​នាយក​​រដ្ឋមន្ត្រី​រិះគន់​ពួកគាត់​ថា ‘ស្ទក់’ ប៉ុន្តែ​ពួកគាត់​គ្រាន់​តែ​ផ្លាស់​ទៅ​​​​កាន់​​​ក្រសួង​ផ្សេង​ប៉ុណ្ណោះ ដូច្នេះ​វា​ហាក់​ដូច​ជា​គ្មាន​ការ​ផ្លាស់​ប្ដូរ​ទេ ខ្ញុំ​គិត​ថា ការ​​​រុះរើ​គណៈរដ្ឋមន្ត្រី​ហាក់​ដូច​ដើម្បី​ធ្វើ​កំណែទម្រង់​ផ្ទៃ​ក្នុង​របស់​បក្ស​ប៉ុណ្ណោះ ប៉ុន្តែ​​​​​​​​វា​​​​​​​​​​​​មិន​អាច​​ធ្វើ​កំណែទម្រង់​របៀប​​ធ្វើ​​​ការ​​​ងារ​​​​​​របស់​​​​​​ក្រសួង​​​នេះ​​​ទេ។ ជាមួយ​ឡាន​ខូច ទោះ​បី​យើង​​រក​តៃកុង​​ថ្មី​ឲ្យ​បើក​ ក៏​វា​នៅ​តែ​មិន​ទៅ​មុខ​ដដែល​​​​។ ដូច្នេះ​វា​ដូច​បញ្ហា​នេះ​អ៊ីចឹង​ ទោះ​បី​​រដ្ឋាភិបាល​ផ្លាស់​ប្ដូរ​រដ្ឋមន្ត្រី​ថ្មី​ក៏​​​​​​ដោយ ក៏​ប្រតិបត្តិការ​នៅ​តែ​ដដែល”៕ សុខុម​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស