ព្រះសង្ឃត្រូវបានចាប់ផ្សឹកពីរអង្គដែលជាប់ចោទថា មានថ្នាំមេតំហ្វេតាមីន ប្រើប្រាស់ឯកសារក្លែង និងគំរាមសម្លាប់ក្មេងវត្តម្នាក់នោះបានបន្តការបើកសវនាការកាលពីម្សិល មិញ នៅសាលាដំបូងរាជធានីភ្នំពេញ ដោយបដិសេធការចោទប្រកាន់ទាំងនេះដែលពួកគាត់អះអាងថាជាហេតុផលនយោបាយ។
លោក ដាវ ទេព អាយុ៣២ឆ្នាំ និង ជា វណ្ណដា អាយុ៣០ឆ្នាំនិយាយថា ការចាប់ខ្លួនពួកគាត់ដែលធ្វើឡើងកាលពីខែសីហា នៅវត្តអង្គតាមិញ ស្ថិតក្នុងខណ្ឌពោធិ័សែនជ័យ ទីដែលនគរបាលនិយាយថា ពួកគេបានរកឃើញម៉ាទឹកកក០,០២ក្រាមនៅក្នុងបន្ទប់របស់ពួកគាត់ ជាមួយនឹងដាវ កូនកាំបិត និងពូថៅ គឺផ្អែកលើជាភ័ស្តុតាងដែលគេយកទៅដាក់ និងជាការធ្វើឡើងដើម្បីតបតចំពោះសកម្មភាពនយោបាយរបស់ពួកគាត់ដែលគាំទ្រគណបក្សសង្គ្រោះជាតិ។
នគរបាលក៏បានរកឃើញស្រោមអនាម័យ លីអូស្ត្រី និងឯកសារក្លែង ដែលក្រសួងធម្មការ និងសាសនាតម្រូវសម្រាប់ការបួសជាសង្ឃ។ការចោទប្រកាន់ទី៣ ពាក់ព័ន្ធការគំរាម ជួន រដ្ឋា អាយុ២២ឆ្នាំ បន្ទាប់ពីលោក ដាវ ទេព មានជម្លោះជាមួយក្មេងវត្តរូបនេះ។
អំឡុងសវនាការកាលពីម្សិលមិញ លោក អឹុម វណ្ណៈ ចៅក្រមប្រធានក្រុមប្រឹក្្សាជំនុំជម្រះបានសួរលោក ដាវ ទេព ថា តើគាត់ស្គាល់របស់ទាំងនេះដែលត្រូវបានរកឃើញនៅក្នុងបន្ទប់របស់គាត់ឬទេ។
ចៅក្រមរូបនេះបានសួរថា “ចុះអំពីសម្លៀក បំពាក់ និងដាវ…ដែលត្រូវបានរកឃើញនៅក្រោមគ្រែវិញ?”។លោក ដាវ ទេព បានឆ្លើយតបថា “ខ្ញុំមិនបានដឹងពីរឿងនេះទេ ហើយខ្ញុំក៏មិនស្គាល់អ្នកចង់ធ្វើបាបខ្ញុំដែរ។ ខ្ញុំមិនឃើញរបស់នេះទេ ហើយនៅពេលនគរបាលបានឆែកឆេរ ខ្ញុំមិនបាននៅទីនោះឡើយ”។
នៅពេលចៅក្រមរូបនេះបានសួរថា ហេតុអ្វីបានជាផ្តិតមេដៃលើរបាយការណ៍នគរបាល ដែលសរសេរថា របស់ទាំងនេះជាកម្មសិទ្ធិរបស់ខ្លួននោះ លោក ដាវ ទេព បាននិយាយថា “ ខ្ញុំមិនបានផ្តិតមេដៃដោយការស្ម័គ្រចិត្តទេ ប៉ុន្តែ នៅពេលខ្ញុំមកដល់អធិការដ្ឋាននគរបាលខណ្ឌ ពួកគេបានបង្ខំឲ្យខ្ញុំផ្តិតមេដៃលើរបាយការណ៍នោះ”។
ចៅក្រម អឹុម វណ្ណៈ បានបន្តចោទសួរលោក ជា វណ្ណដា ពាក់ព័ន្ធម៉ាទឹកកកដែលរកឃើញក្នុងបន្ទប់។ ចៅក្រម វណ្ណៈ បានសួរថា ”តើអ្នកមានអ្វីៗពាក់ព័ន្ធនឹងថ្នាំញៀនឬ?”។ លោក វណ្ណដា បានឆ្លើយថា “ខ្ញុំមិនដឹងពីរឿងនេះទេ សូម្បីបារី ខ្ញុំមិនទាំងចេះជក់ផង”។
បុរសទាំងពីរនាក់នៅតែបដិសេធថា មិនបានក្លែងឯកសារដែលបង្ហាញថា ពួកគេជាសង្ឃដោយប្រាប់តុលាការថា ពួកគេបានបួសត្រឹមត្រូវនៅវត្តពីរផ្សេងគ្នានៅតាមខេត្ត មុនពេលមកកាន់រាជធានីភ្នំពេញ។
លោក ហម ស៊ុនរិទ្ធ មេធាវីតំណាងអតីតព្រះសង្ឃទាំងពីរអង្គនេះ បានជំរុញឲ្យតុលាការលើកលែងការចោទប្រកាន់ទាំងនេះ ដោយលើកឡើងថា មិនមានភ័ស្តុតាងគ្រប់គ្រាន់ក្នុងការដាក់បន្ទុកលើកូនក្តីរបស់លោកទេ ពីព្រោះពួកគាត់មិនមានវត្តមាននៅពេលនគរបាលឆែកឆេរបន្ទប់របស់ពួកគាត់ឡើយ ហើយក៏មិនមានសាក្សីផ្សេងទៀតឃើញការឆែកឆេរនោះដែរ។
លោកបានបន្ថែមថា “តុលាការបានចោទប្រកាន់កូនក្តីរបស់ខ្ញុំ ពីបទក្លែងឯកសារ។ ខ្ញុំចង់មើលថា តើឯកសារអ្វីដែលគាត់បានក្លែងនោះ។ គ្មានភ័ស្តុតាងដែលបង្ហាញថា កូនក្តីរបស់ខ្ញុំបានក្លែងឯកសារឡើយ”។
ចៅក្រម វណ្ណៈ បានមានប្រសាសន៍ថា តុលាការនឹងប្រកាសសាលក្រមនៅថ្ងៃទី១ ខែមេសា៕ សារុន