32 C
Phnom Penh

នគរបាល​ចាប់ខ្លួន​ប្រធាន​សន្តិសុខ​ជន​ជាតិ​ចិន​ម្នាក់​ពីបទចាប់​​​​រំលោភ​​​សន្តិសុខ​ស្រី​នៅក្នុង​រោង​ចក្រ​

ដោយ ឌឹ ខេមបូឌា ដេលី

បទវិភាគ

យោង​​​តាម​​​​​​នគរ​​​បាល​​​បាន​​​ឲ្យ​​​ដឹង​​​កាល​​​ពី ម្សិលមិញ​​​ថា ប្រធាន​​​សន្តិសុខ​​​នៅ​​​រោង​​​ចក្រ​​​កាត់​​​ដេរមួយ​​​​ក្នុង​​​ខេត្ត​​​កណ្តាល​​​ដែល​គ្រប់​​​គ្រង ​​​ដោយ​​​​​​ជន​​​ជាតិ​​​ចិន​​​មក​​​ពី​​​ហុង​​​កុង​​​​​​​​ ត្រូវ​​​បាន​​​ចាប់ខ​​​្លួន​​​កាល​​​ពី​​​ថ្ងៃ​​​ច័ន្ទ ពី​​​បទ​​​រំលោភ​​​សន្តិសុខ​​​អាយុ​​​១៩​​​ឆ្នាំ​​​ម្នាក់​​​នៅ​​​ក្នុង​​​ការិយាល័យ​​​របស់​​​ខ្លួន​​​មួយ​​​ថ្ងៃ​​​មុន​ពេលចាប់ខ្លួន​​​​ ខណៈ​​​មិត្ត​​​ភក្តិ​​​របស់​​​ជន​​​សង្ស័យ​​​ដែលជា​​​ប្រធាន​​​សន្តិសុខ​​​នៅ​​​រោង​​​ចក្រ​​​មួយ​​​ ទៀត​​​ជាប់​គ្នា​​​នោះ​​​ត្រូវ​​​បាន​​​​​​ចាប់​​​ខ្លួន​​​ដោយ​​​សារ​​​ជា​​​អ្នក​​​សមគំនិត​​​។

ជន​​​​​​ចាប់រំលោភ​រូប​​​នេះ​​​ដែល​​​មាន​​​ឈ្មោះ ​​​​​​Xieshao Xuan ជា​​​ជនជាតិ​​​ចិន​​​អាយុ​​​៣៧​​​​ឆ្នាំ​​​ ​ធ្វើ​​​ការ​​​នៅ​​​រោង​​​ចក្រ​​​ Meng Yan ក្នុង​​​ស្រុក​​​ស្អាង​​​បាន​​​ប្រហែល​​​មួួ​យ​​​ឆ្នាំ​​​មក​​​ហើយ ហើយ​​​អំឡុង​​​ពេល​​​នោះ​ជន​​​ជាតិ​ចិន​រូប​​​នេះ​​​​​​បាន​​​​​​ធ្វើ​​​ជា​​​មិត្ត​​​ជាមួយ យូ សុភ័ក្រ​ ជន​​​ជាតិ​​​ខ្មែរ ដែល​​​ធ្វើ​​​ការ​​​នៅ​​​​​​រោង​​​ចក្រ Meng Tong នេះ​​​បើ​​​យោងតាម​​​លោក សេង សុជាតិ​​​ អធិការ​​​នគរ​​​បាល​​​ស្រុក​​​នេះ​​​។

យោង​​​តាម​​​សមាគម​ឧស្សាហកម្ម​​​កាត់​​​ដេរ​​​បាន​​​ឲ្យ​​​ដឹង​​​ថា រោង​​​ចក្រ​​​ដែល​​​នៅ​​​ជាប់​​​គ្នា​​​ទាំង​​​ពីរ​​​នេះ​​​ផលិត​​​​​​ខោ​​​ខូវ​​​ប៊យ​​​ និង​​​សម្លៀក​​​បំពាក់​​​ធ្វើ​​​ពី​​​សាច់​​​ក្រណាត់​​​ខូវប៊យ​​​ផ្សេង​​​ៗ​​​ទៀត ​​​ហើយ​​​មាន​​​​កម្មករ​​​ជាង​​​២.០០០នាក់​​​។​​

លោក សេង​ សុជាតិ​ បានលើកឡើង​ទៀត​​​ថា​​​​​​​ កាល​​​ពី​​​រសៀល​​​ថ្ងៃ​​​អាទិត្យ​ ពេល​​​កម្មករ​​​ចេញ​​​ទៅ​​​ផ្ទះ​​​អស់ ហើយ​​​នៅ​​​សល់​​​តែ​​​បុគ្គលិក​​​សន្តិសុខ​​​ធ្វើ​​​ការ​​​នោះ​​​ Xieshao ​បាន​​​ប្រាប់​​​ យូ សុភ័ក្រ​ ឲ្យ​​​នាំ​​​សន្តិសុខ​​​ស្រី​​​អាយុ​​​១៩​​​ឆ្នាំ​​​​​​រូប​​​នេះ​​​មក​​​កាន់​​​ការិយាល័យ​​​របស់​​​ខ្លួន​​​ដើម្បី ​​​”ជជែក​​​​​​គ្នា​​​លេង​​​” ដោយ​​​ឲ្យ​​​សន្តិសុខ​​​ជន​​​ជាតិ​​​ខ្មែរ​​​រូប​​​នេះ​​​ធ្វើ​​​​​​ជា​​​អ្នក​​​បក​​​ប្រែ។

អធិការនគរបាល​ស្រុក​រូបនេះ​ បាន​​​លើក​​​ឡើង​ដោយរៀបរាប់​អំពី​ហេតុការណ៍ដែល​បាន​កើត​ឡើង​លើ​ជន​រង​គ្រោះ​ថា ​​​”បន្ទាប់​​​មក​​​ជន​​​ជាតិ​​​ចិន​​​រូប​​​នេះ​​​បាន​​​ប្រាប់​​​នាង​​​ថា ខ្លួន​​​ស្រឡាញ់​​​នាង​​​ ហើយ​​​ សុភ័ក្រ​ ក៏​​​បាន​​​ព្យាយាម​​​បញ្ចុះ​​​បញ្ចូល​​​ជន​​​រង​គ្រោះ​​​ឲ្យ​​​ស្រឡាញ់​​​ជន​​​ជាតិ​​​ចិន​​​រូប​​​នេះ​​​វិញ​​​​​​ ដោយ​​​និយាយ​​​ថា ‘អូន​​​នឹង​​​ ​​​ក្លាយ​​​ជា​​​ថៅកែ​​​ធំ បើ​​​អូន​​​ព្រម​​​ស្រឡាញ់​​​គាត់​​​ ‘”។

សន្តិសុខ​​​ស្រី​​​វ័យ​​​ជំទង់​​​រូប​​​នេះ​​​​​​បាន​និយាយ​​​ថា នាង​​​មិន​​​ចាប់​​​អារម្មណ៍​​​ក្នុង​​​​ការ​​​ធ្វើ​​​ជា​​​មិត្ត​​ស្រី​​​របស់​​​ Xieshao ​​​ទេ​​​ ហើយ​​​បាន​​​ចាក​​​ចេញ​​​ពី​​​ការិយាល័យ​​​នោះ ប៉ុន្តែ យូ សុភ័ក្រ​ បាន​​​រត់​​​តាម​​​នាង​​​​​​ ហើយ​​​បាន​​​បង្ខំ​​​ឲ្យ​​​នាង​​​ត្រឡប់​​​​​​​​​​​​មក​បន្ទប់​​​វិញ​​​ ជា​​​កន្លែង​​​ដែល​​​​​​ជន​​​ជាតិ​​​ចិន​​​រូប​​​នេះ​​​បាន​​​រំលោភ​​​នាង​​​។

លោក សេង សុជាតិ បាន​​​លើក​​​ឡើង​​​បន្ថែម​​​ ទៀត​ថា ជន​​​រង​​​គ្រោះ​​​បាន​​​ដាក់​​​ពាក្យ​​​ប្តឹង​​​មក​កាន់​​​នគរ​​​បាល​​​ឃុំ​​​កាល​​​ពី​​​ព្រឹក​​​ថ្ងៃ​​​ច័ន្ទ ហើយ​​​ជន​​​សង្ស័យ​​​ទាំង​​​ពីរ​​​ត្រូវ​​​បាន​​​ចាប់​​​ខ្លួន​​​នៅ​​​ពេល​​​ល្ងាច​​​។

លោក សឿន រិទ្ធី នាយ​​​រង​​​ការិយាល័យ​​​នគរ​​​​​​បាល​ព្រហ្មទណ្ឌ​​​កម្រិត​​​ធ្ងន់​​​ខេត្ត​​​នេះ​​​បាន​​​លើក​​​ឡើង​​​​​​ថា Xieshao និង​​​ យូ សុភ័ក្រ​ ត្រូវ​​​បាន​​​​​​សាក​​​សួរ​​​នៅ​​​​​​សាលា​​​ដំបូង​​​ខេត្ត​​​កាល​​​ពី​​​រសៀល​​​​​​ម្សិលមិញ ប៉ុន្តែ បាន​​​បញ្ជូន​​​ទៅ​​​កន្លែង​​​ឃុំ​​​ខ្លួន​​​របស់​​​នគរ​​​បាល​​​វិញ​​​ដោយ​​​សារ​​​គ្មាន​អ្នក​​​បក​​​ប្រែ។​

លោក​​​បាន​​​បន្ថែម​ថា “ជន​​​សង្ស័យ​​​ជន​​​ជាតិ​​​ចិន​​​រូប​​​នេះ​​​អះអាង​​​ថា ​​​ខ្លួន​​​គ្រាន់​​​តែ​​​យក​​​ម្រាម​​​ដៃ​​​លេង​​​ប្រដាប់​​​ភេទ​​​ប៉ុណ្ណោះ ប៉ុន្តែ នៅ​​​ក្នុង​​​ក្រម​​​ ព្រហ្មទណ្ឌ​​​មិន​​​ថា ប្រើ​​​ម្រាម​​​ដៃ​​​ ឬ​​​ប្រដាប់​​​ភេទ​​​ ទេ​ ​​​គឺ​​ចាត​​​់​​​ទុក​​​ថា ជា​​​ការ​​​រំលោភ​​​ហើយ”​​​៕​​​ ស៊ុយឈាង​​​​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស