លោក ឱម យិុនទៀង ប្រធានអង្គភាពប្រឆាំងអំពើពុករលួយ (ACU) មានប្រសាសន៍ កាលពីម្សិលមិញថា អង្គភាពប្រឆាំងអំពើពុករលួួយបានបើកការប្រកាសទ្រព្យសម្បត្តិដាក់ក្នុងស្រោមសំបុត្របិទជិតដែលដាក់ជូនដោយលោក កឹម សុខា អនុប្រធានគណបក្សប្រឆាំងហើយនឹងមានគម្រោងប្តឹងនរណាដែលបង្ខូចកេរ្តិ៍ឈ្មោះអង្គភាពនេះអំឡុងការសើុបអង្កេតករណីលោក កឹម សុខា ។
យុទ្ធនាការដែលដឹកនាំដោយ ស្រី ចំរើននិស្សិតសាកលវិទ្យាល័យមួួយរូបដែលមានកំហឹងទាក់ទងបញ្ហាសីលធម៌ បានឈានដល់ស្ថានភាពពិបាកដោះស្រាយកាលពីសប្តាហ៍មុននៅពេលលោក ឱម យិុនទៀង បានទទួលយកសំណើរបស់និស្សិតរូបនេះ ដើម្បីពិនិត្យមើលផ្ទះល្វែងចំនួនពីរ និងដីមួយចំនួនដែលតាមការអះអាងថា លោក កឹម សុខា បានទិញឲ្យស្រីកំណាន់ ផ្អែកលើខ្សែអាត់សំឡេងថាជាសំឡេងរបស់លោក កឹម សុខា។
លោក ឱម យិុនទៀង បានលើកឡើងតាមទូរស័ព្ទថា “រហូតមកទល់ពេលនេះយើងមិនទាន់បានផ្ញើលិខិតទៅលោក កឹម សុខា ឲ្យធ្វើការពន្យល់នៅឡើយទេ” ដោយលើកឡើងជាថ្មីថា អង្គភាពប្រឆាំងអំពើពុករលួយកំពុងសើុបអង្កេតយ៉ាងហ្មត់ចត់ថា តើលោក កឹម សុខា ពិតជាបានទិញដីនិងផ្ទះដោយប្រើលុយមិនស្របច្បាប់មែនឬយ៉ាងណា។
លោក កឹម សុខា បានបដិសេធមិនឆ្លើយតបចំពោះការអះអាងដែលថា លោកមានស្រីកំណាន់ឡើយ។ លោក ឱម យិុនទៀង បានបញ្ជាក់ឡើងវិញកាលពីម្ស្ិលមិញថា លោកមិនចាប់អារម្មណ៍ក្នុងការរកឱ្យឃើញថា តើលោក កឹម សុខា ធ្លាប់មានទំនាក់ទំនងក្រៅអាពាហ៍ពិពាហ៍ ឬយ៉ាងណានោះឡើយ។
លោកបានថ្លែងថា “យើងនឹងចាត់វិធានការច្បាស់លាស់ដើម្បីធ្វើឲ្យប្រាកដថា សាធារណជនយល់អំពីវិធានការរបស់យើង ពីព្រោះយើងកត់សម្គាល់ឃើញថា មានមនុស្សមួយចំនួនកំពុងបំពុលបរិយាកាស ហើយធ្វើឲ្យសាធារណជនមានការភាន់ច្រឡំអំពីវិធានរបស់អង្គភាពយើង”។
លោក ឱម យិុនទៀង បានថ្លែងថា អង្គភាពប្រឆាំងអំពើពុករលួយបានបើកការប្រកាសទ្រព្យសម្បត្តិដាក់ក្នុងស្រោមសំបុត្របិទជិតចំនួនបីរបស់លោក កឹម សុខា ហើយ ដែលបានដាក់កាលពីឆ្នាំ២០១១ ឆ្នាំ២០១៣ និងឆ្នាំ២០១៥ ហើយរង់ចាំរហូតដល់ក្រោយកិច្ចប្រជុំរបស់ស្ថាប័នគ្រប់គ្រងនៅអង្គភាពប្រឆាំងអំពើពុករលួួយនៅថ្ងៃព្រហស្បតិ៍ដើម្បីទាក់ទងទៅលោក កឹម សុខា។
លោកបានថ្លែងថា “នៅពេលនេះ យើងបានបើកស្រោមសំបុត្រដែលប្រកាសទ្រព្យសម្បត្តិបិទជិតទាំងបីរបស់លោក កឹម សុខា ហើយ។ ហើយយើងនឹងផ្ញើលិខិតមួយច្បាប់ទៅលោក កឹម សុខា នៅពេលណាមួយបន្ទាប់ពីកិច្ចប្រជុំរបស់ក្រុមប្រឹក្សាជាតិប្រយុទ្ធប្រឆាំងអំពើពុករលួយដើម្បីធ្វើឱ្យករណីនេះស្ងប់ស្ងាត់ ហើយបញ្ឈប់អ្នកដែលនិយាយកុហកដល់សាធារណជន”។
លោក ឱម យិុនទៀង បានបន្ថែមថា “អាចនឹងមានវិធានការផ្លូវច្បាប់ប្រឆាំងអ្នកដែលបរិហារកេរ្តិ៍ ញុះញង់ ឬបង្ខូចកេរ្តិ៍ឈ្មោះរបស់អង្គភាព។ នៅពេលសួរពីអ្នកដែលអាចជាគោលដៅ លោកបាននិយាយថា “អ្នកដែលបានផ្សព្វផ្សាយព័ត៌មានជាសាធារណៈដែលបង្ខូចកេរ្តិ៍ឈ្មោះអង្គភាព”។
ទាំងលោក យ៉ែម បុញ្ញឫទ្ធិ អ្នកនាំពាក្យគណបក្សសង្គ្រោះជាតិ និងលោក អេង ឆៃអា៊ងសមាជិកសភាជាន់ខ្ពស់មិនអាចទាក់ទងបានទេ។ ប៉ុន្តែ លោក អេង ឆៃអ៊ាង បានផ្ញើលិខិតមួយច្បាប់ជូនលោក ហេង សំរិន ប្រធានរដ្ឋសភាកាលពីម្សិលមិញ ជម្រាបលោកថា ញត្តិដែល ស្រី ចំរើន បានដាក់ជូនកាលពីសប្តាហ៍មុន មិនគួរយកចិត្តទុកដាក់ទេ។
ដោយលើកឡើងថា “ត្រង់ចំណុចនេះ វាជាករណីមនុស្សឃាត” និស្សិតរូបនេះបានដាក់ញត្តិកាលពីថ្ងៃសុក្រទៅលោក អេង ឆៃអ៊ាង ប្រធានគណៈកម្មការសិទ្ធិមនុស្សរដ្ឋសភា ហើយលោក ហេង សំរិន បានសុំឲ្យពួកគេសាកសួរលោក កឹម សុខា ចំពោះការសុំឲ្យស្រីកំណាន់យកកូនចេញ។
លោក អេង ឆៃអ៊ាង បានសរសេរលិខិតផ្ញើជូនលោក ហេង សំរិន ដែលមានខ្លឹមសារថា “ទាក់ទងទៅនឹងសំណើញត្តិនេះ ខ្ញុំសូមជម្រាបជូនសម្តេចប្រធានរដ្ឋសភាថា គ្មានមាត្រា ឬបទប្បញ្ញត្តិណាក្នុងរដ្ឋធម្មនុញ្ញ និងបទបញ្ជាផ្ទៃក្នុងរដ្ឋសភាអនុញ្ញាតឲ្យសភាកោះហៅតំណាងរាស្ត្រមកសាកសួរឡើយ”។
ស្រី ចំរើន បាននិយាយតាមទូរស័ព្ទកាលពីម្សិលមិញថា ខ្លួននឹងដឹកនាំក្រុមរបស់ខ្លួននៅថ្ងៃរសៀលនេះដើម្បីដាក់ញត្តិបន្ថែមទៀតទៅរដ្ឋសភា ទីស្នាក់ការកណ្តាលគណបក្សសង្គ្រោះជាតិ និងការិយាល័យសិទ្ធិមនុស្សអង្គការសហប្រជាជាតិប្រចាំរាជធានីភ្នំពេញ ស្នើឲ្យលោក កឹម សុខា និយាយអំពីខ្សែអាត់សំឡេងនេះ។
នៅពេលសួរថា ហេតុអ្វីបានជាលោកជឿថា អង្គការសហប្រជាជាតិចាំបាច់ត្រូវពាក់ព័ន្ធរឿងនេះ ស្រី ចំរើន បាននិយាយថាវាជាបញ្ហាសិទ្ធិមនុស្ស។ និស្សិតរូបនេះនិយាយថា ”ពីព្រោះខ្សែអាត់សំឡេងដែលបែកធ្លាយនេះប៉ះពាល់យ៉ាងខ្លាំងដល់ច្បាប់ ប្រពៃណីទំនៀមទម្លាប់ និងជាគំរូអាក្រក់សម្រាប់យុវជន។ វាជាការរំលោភសិទ្ធិមនុស្ស ដូច្នេះហើយយើងចង់ឲ្យលោក កឹម សុខា គោរពលទ្ធិប្រជាធិបតេយ្យ និងសិទ្ធិមនុស្ស”៕សារុន