ក្នុងដំណាក់កាលចុងក្រោយបំផុតក្នុងកិច្ចប្រឹងប្រែងដើម្បីបណ្តេញចេញកម្មករចំណាកស្រុកខុសច្បាប់ អគ្គនាយកនៃអគ្គនាយកដ្ឋានអន្តោប្រវេសន៍នៃក្រសួងមហាផ្ទៃ បាននិយាយកាលពីថ្ងៃអង្គារថា មន្ត្រីរបស់លោកនឹងចាប់ផ្តើមត្រួតពិនិត្យ២៤ម៉ោងតាមសហគ្រាសនានា ជាពិសេសកន្លែងដែលមានបុគ្គលិកជាជនជាតិវៀតណាមច្រើន។
លោក សុខ ផល ប្រធាននគរបាលអន្តោប្រវេសន៍ បានប្រកាសនៅឯកិច្ចប្រជុំប្រចាំឆ្នាំថា មន្ត្រីអន្តោប្រវេសន៍នឹងចាប់ផ្តើមអនុវត្តគោលនយោបាយថ្មី ដើម្បីធ្វើការពិនិត្យពេលយប់ ដោយផ្តោតលើក្លឹប ភោជនីយដ្ឋាន និងកាស៊ីណូនានាក្នុងក្រុងភ្នំពេញ។
នាយឧត្តមសេនីយ៍ សុខ ផល បានមានប្រសាសន៍ក្នុងកិច្ចប្រជុំប្រចាំឆ្នាំក្នុងក្រុងភ្នំពេញកាលពីថ្ងៃអង្គារថា “ប្រហែល៩៨ភាគរយនៃកម្មករចំណាកស្រុកបរទេសទាំងអស់ដែលធ្វើការក្នុងប្រទេសកម្ពុជាគឺជាជនជាតិវៀតណាម”។
នាយឧត្តមសេនីយ៍រូបនេះបានមានប្រសាសន៍ថា “ខ្ញុំឃើញជនចំណាកស្រុកបរទេសជាច្រើននៅឯកាស៊ីណូណាហ្គា ឬកាសាក្លឹប ប៉ុន្តែយើងមិនទាន់ធ្វើការត្រួតពិនិត្យពេលយប់នៅឡើយទេ។ យើងគ្រាន់តែធ្វើពេលថ្ងៃប៉ុណ្ណោះ ដូច្នេះយើងមិនអាចឆែកបានទេ ប្រសិនបើគេជាកម្មករស្របច្បាប់”។
អគ្គនាយកដ្ឋាននេះក៏បានបញ្ចេញស្ថិតិដែលសរសេរសង្ខេបអំពីកិច្ចការរយៈពេលពីរឆ្នាំក្នុងការទប់ស្កាត់កម្មករបរទេសខុសច្បាប់មួយចំនួនដែលធ្វើការនៅក្នុងប្រទេសកម្ពុជា។
យោងតាមទិន្នន័យ ក្នុងរយៈពេល១១ខែដំបូងនៃឆ្នាំមុន នគរបាលអន្តោប្រវេសន៍ និងមន្ត្រីក្រសួងការងារបានត្រួតពិនិត្យកន្លែងការងារចំនួន២.៦៦៥កន្លែងនៅទូទាំងប្រទេសដើម្បីរកជនបរទេស ហើយបានរកឃើញកម្មករចំណាកស្រុកបរទេសខុសច្បាប់ចំនួន១.៩៣០នាក់។
នាយឧត្តមសេនីយ៍ សុខ ផល បានមានប្រសាសន៍ថា មន្ត្រីដែលឈរជើងតាមព្រំដែនត្រូវប្រឹងប្រែងដើម្បីទប់ស្កាត់កម្មករខុសច្បាប់។
នាយឧត្តមសេនីយ៍រូបនេះបានមានប្រសាសន៍ថា “ខ្ញុំក៏គិតដែរថាមិនមានការធ្វើការងារគ្រប់គ្រាន់នៅតាមព្រំដែនកម្ពុជា វៀតណាម ដើម្បីបញ្ឈប់អន្តោប្រវេសន៍ខុសច្បាប់ទេ”។
លោក សេង សក្កដា ប្រធាននាយកដ្ឋានការងារនៃក្រសួងការងារ បានមានប្រសាសន៍ថា ក្រោយពីការអនុវត្តច្បាប់ជាថ្មីទាក់ទងនឹងកម្មករបរទេស ចំនួនអ្នកដែលមានឯកសារ ដើម្បីបង្ហាញថា គេកំពុងធ្វើការក្នុងប្រទេសកម្ពុជាដោយស្របច្បាប់គឺកើនឡើង។
លោក សក្កដា បាននិយាយថា ចំនួនប័ណ្ណការងារដែលចេញឲ្យក្នុងឆ្នាំ២០១៥បានកើនឡើងជាងទ្វេដងពីឆ្នាំមុន គឺចំនួន៣៥.៩១២ប័ណ្ណ ដែលនាំឲ្យមានកំណើនថ្លៃបង់ដល់រដ្ឋាភិបាលដែរ។
លោកបាននិយាយថា “លុយដែលទទួលបានពីប័ណ្ណការងារ គឺ២លានដុល្លារក្នុងឆ្នាំ២០១៤ ហើយក្នុងឆ្នាំមុន គឺ៥លានដុល្លារ”៕