27 C
Phnom Penh

មន្ត្រី​រដ្ឋសភា​ម្នាក់​និយាយ​ថា​ លោក កឹម សុខា អាច​ត្រូវកោះ​ហៅ​មក​សាក​សួរ​

ដោយ ឌឹ ខេមបូឌា ដេលី

បទវិភាគ

លោក ឡេង​ ប៉េងឡុង​ អ្នកនាំពាក្យ​រដ្ឋសភា​​​បាន​មាន​ប្រសាសន៍​កាលពី​ម្សិលមិញ​ថា សភា​មាន​អំណាច​កោះហៅ​លោក កឹម សុខា អនុ​​​ប្រធាន​គណបក្ស​ប្រឆាំង​​មក​សាក​សួរ​ជុំវិញ​​ការ​សន្ទនាតាម​ទូរស័ព្ទ​ដែល​ត្រូវ​បាន​ថត​ទុក​ជា​ច្រើន​ភាគ​​ហើយ​​​បាន​បែក​​ធ្លាយ​កាល​ពី​ខែ​មុន ដែល​តាម​ចោទ​ថា លោក​កំពុង​និយាយ​ជាមួយ​ស្រីកំណាន់នោះ​​​។

ការ​អត្ថាធិប្បាយទាំង​នេះ​ធ្វើឡើង​​បន្ទាប់​​​ពី​មាន​ការ​ព្រមាន​កាលពី​ថ្ងៃអង្គារ​ដោយ​លោក ឈាង​ វុន​ អ្នកនាំពាក្យ​រដ្ឋសភា​មកពី​គណបក្ស​ប្រជាជន​កម្ពុជា​ថា គណៈកម្មាធិការ​ “ចំពោះកិច្ច​” ​រដ្ឋសភា​​អាច​ត្រូវ​បាន​បង្កើត​​​ឡើង​​​​ដើម្បី​ពិនិត្យ​ការ​អះ​អាង​ដែល​ថា លោកកឹម សុខា​ មាន​ស្នេហា​ក្រៅ​អាពាហ៍ពិពាហ៍​ច្រើន​ ជា​ការ​ចោទប្រកាន់​ដែលលោក​បាន​បដិសេធ​​មិន​ទទួល​ស្គាល់​ជា​សាធារណៈ។

បន្ទាប់ពី​មាន​កិច្ច​ប្រជុំ​របស់​គណៈ​​​កម្មា​​​ធិការ​អចិន្ត្រៃយ៍​សភា ដែលត្រូវ​បាន​គ្រប់​​​គ្រង​​​​ដោយ​គណបក្ស​ប្រជាជន​កម្ពុជា​ និង​ដែល​​​កំណត់​របៀប​វារៈរដ្ឋ​​​សភា​​​​នេះ លោក ឡេង ប៉េង​ឡុង​ អគ្គលេខាធិការ​រដ្ឋ​សភា​បាន​មាន​ប្រសាសន៍​ថា លោក កឹម សុខា​ អាច​ត្រូវ​បាន​កោះ​ហៅ។

ដោយ​លើកឡើង​ពី​មាត្រា​៨៩នៃ​រដ្ឋ​​​ធម្ម​​​នុញ្ញ លោក​បាន​មាន​ប្រសាសន៍​ថា “ប្រសិន​​​បើ​​​​​រដ្ឋសភាគិត​ថា ករណី​លោក​ កឹម សុខា​ សំខាន់ និង​​​ពិសេស​នោះ សមាជិក​មួយ​ភាគដប់​យ៉ាង​តិច​អាច​ធ្វើ​ញត្តិ…​អញ្ជើញ​ និង​កោះ​ហៅ​លោក កឹម សុខា មក​បំភ្លឺ​បាន”។

មាត្រា​៨៩​នៃរដ្ឋធម្មនុញ្ញ​ចែង​​ថា “​​តាម​ការ​សុំ​ពី​សមាជិក​មួយ​ភាគ​ដប់​យ៉ាង​តិចរដ្ឋ​​​សភា​អាច​អញ្ជើញ​ឥស្សរជន​ដ៏​ឧត្តម​ណាមួយ​​មក​បំភ្លឺ​​រដ្ឋសភាអំពី​បញ្ហា​ដែលមាន​សារៈ​​​សំខាន់​ពិសេស​”។

ប៉ុន្តែ​លោក ឡេង​ ប៉េងឡុង បានមាន​ប្រសាសន៍ថា លោក​មិន​បាន​ទទួល​សំណើ​ណាមួយ​ពី​រដ្ឋ​សភាឱ្យ​សាក​សួរ​​ពី​ករណី​លោក កឹម សុខា ដូច​ដែល​ត្រូវ​បាន​ស្នើដោយ​លោក ឈាង វុន​ កាលពី​ថ្ងៃអង្គារ​ឡើយ។

លោក​បាន​ថ្លែង​ថា “ចំពោះ​ករណី​លោក កឹម សុខា ខ្ញុំ​មិនទាន់​បាន​ទទួល​ព័ត៌មាន​ពី​ការ​បង្កើត​​គណៈកម្មាធិការ​ពិសេស​​​​នៅ​​​ឡើយ​​​ទេ ហើយ​ខ្ញុំ​ក៏​មិន​មាន​ព័ត៌មាន​ដែល​ថា សមាជិក​សភាធ្វើ​ញត្តិ​​អំពី​ករណី​នេះ​ដែរ”។

និស្សិត​​មួយ​ក្រុម​ដែល​ដឹកនាំ​យុទ្ធនាការ​​​ទាម​ទារ​ឱ្យលោក​ កឹម សុខា ​​ឆ្លើយ​តប​ចំពោះ​​​ការ​អះ​អាង​នោះ​​ បាន​ដាក់​ញត្តិ​ទៅ​រដ្ឋសភាព​កាលពី​សប្តាហ៍​មុន ហើយ​លោក ឡេង ប៉េង​ឡុង​​ បាន​និយាយ​​ការពារ​​សេចក្តី​សម្រេច​ក្នុងការ​សរសេរ​​លិខិត​ផ្ញើ​ជូន​​លោក កឹម សុខា សុំ​ឱ្យ​គាត់​មក​ពន្យល់​​អំពី​ហេតុ​ការណ៍ដែល​​​បាន​​​កើត​​​ឡើង​​​។

លោក ឡេង ប៉េង​ឡុង​​ បាន​មាន​ប្រសាសន៍​ ថា “​នៅពេល​​យើង​ទទួលបាន​ញត្តិ​ថ្មី យើង​បាន​ផ្ញើ​លិខិត​មួយ​ច្បាប់​ជូនលោក កឹម សុខា ប៉ុន្តែ​មិនមែន​មាន​ន័យ​ថា យើង​បាន​កោះ​ហៅ​​​​ទេ។វា​គ្រាន់តែជាលិខិត​​ជម្រាប​គាត់​ថា មាន​ញត្តិប៉ុណ្ណោះ​​ ហើយ​យើង​ស្វែង​រក​ការ​បំភ្លឺ​ពី​គាត់”។ លោក​បាន​បន្ថែម​ថា “​ប្រសិន​បើ​គាត់​មិន​ឆ្លើយ យើង​មិន​ដឹង​ធ្វើ​ម្តេច​ទេ។ ប៉ុន្តែ​​លិខិត​នេះ​មិនមែន​ជា​ការ​កោះហៅ​ទេ ព្រោះ​យើង​គ្មាន​សិទ្ធិឡើយ”។

នៅពេល​ទាក់ទង​តាម​ទូរស័ព្ទ​កាលពី​ម្សិលមិញ លោក ឈាង​ វុន បាន​បដិសេធ​មិន​ធ្វើ​អត្ថា​ធិប្បាយទេ ពីព្រោះ​លោក​មិន​សប្បាយ​​​​ចិត្ត​នឹង​អត្ថបទ​របស់កាសែត​ ខេមបូឌា ដេលី​ កាល​ពីពេល​ថ្មី​ៗនេះ​ដែលលើកឡើង​ថា លោក​​​​បាន​ប្រើ​ក្បាលលិខិត​​រដ្ឋសភា​​សម្រាប់​បញ្ហា​ផ្ទាល់​ខ្លួន។

ប៉ុន្តែ​នៅខាង​​ក្រៅ​រដ្ឋសភា​កាលពី​ថ្ងៃ​​​អង្គារ ​​​លោក ឈាង វុន បាន​មាន​ប្រសាសន៍​ថា​ ការ​​​សើុប​​​​​​អង្កេត​​​របស​​​់រដ្ឋ​​​សភា​​​លើ​​​ករណី​​​លោក កឹម សុខា អាច​​​មាន​​​ការ​​​ចូល​​​រួម​​​ពី​​​អ្នក​​​ពាក់​​​ព័ន្ធ​​​មួយ​​​ចំនួន​​​ដោយ​លើកឡើង​ពី​​នីតិវិធី​ចោទ​ប្រកាន់​​លោក ប៊ីល គ្លីនតុន អតីត​ប្រធា​​​នា​​​​​​ធិបតី​សហរដ្ឋ​អាមេរិក​​ជា​ឧទាហរណ៍។

លោក​បាន​ថ្លែង​ថា “​ដើម្បី​បំភ្លឺ​​ករណី​នេះ ចាំបាច់ត្រូវ​មាន​​​​សាក្សី​មួយ​ចំនួន​ដែល​ដឹង​អំពី​រឿង​នេះ​មក​ផ្តល់​ចម្លើយ​ដល់​រដ្ឋសភា។ សមា​​​ជិក​សភាបង្កើត​គណៈកម្មាធិការ​ពិសេស​នេះដើម្បី​​​ស៊ើប​អង្កេត​​ នឹង​​អញ្ជើញ​​អ្នក​ពាក់​​​ព័ន្ធ​ទាំង​អស់​​មក​ផ្តល់​ចម្លើយ”។

នៅពេល​សួរ​ថា តើ​​នឹង​ពាក់ព័ន្ធការ​កោះ​ហៅ​​ស្រី​កំណាន់ច្រើននាក់​​​ ដែល​ម្នាក់​ក្នុង​ចំណោម​នោះ​ត្រូវ​បាន​កំណត់​អត្តសញ្ញាណ​ជា​សាធារណៈ​ឬយ៉ាង​ណានោះ​ លោក ឈាង ​​​វុន បាន​ឆ្លើយ​តប​ថា “​​អ្នក​ពាក់ព័ន្ធ​ទាំង​អស់”។

គណបក្ស​សង្គ្រោះ​ជាតិ​បាន​លើកឡើង​ថា គំនិតឱ្យ​មាន​កា​រស៊ើប​អង្កេត​​បែប​នេះគួរ​ឱ្យ​អស់​សំណើច​ ដោយ​គួស​​​បញ្ជាក់​​​ថា រដ្ឋ​សភាមិន​បាន​បង្កើត​គណៈកម្មាធិការ​ដើម្បី​ស៊ើប​អង្កេត​ហេតុ​ការ​ណ៍​មួយ​ចំនួន​ដូច​ជា​​ការ​វាយ​ដំលើ​​​តំណាង​រាស្ត្រ​គណបក្ស​ប្រឆាំង​ពីររូប​នៅមុខ​​​ទ្វារ​របង​​សភាកាលពី​ឆ្នាំមុន​ឡើយ​​​៕​​​សារុន​​​​

 

 

© 2023, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស