កម្មករកម្មការិនីប្រហែល៣០០នាក់នៃរោងចក្រកាត់ដេរ វិន ស៊ីងតិច (Win Shingtex) ដែលបិទទ្វារ បានធ្វើដំណើរទៅកណ្តាលក្រុងភ្នំពេញកាលពីម្សិលមិញ សុំឲ្យលោកនាយករដ្ឋមន្ត្រី ហ៊ុន សែន ជួយដើម្បីបានប្រាក់ ដែលពួកគាត់គិតថា ពួកគាត់សមទទួលបានតាមកិច្ចព្រមព្រៀងការងាររបស់ពួកគាត់។
យោងតាមអ្វីដែលកម្មករនិយាយ គឺការជូនដំណឹងមួយដែលពួកគាត់បានទទួលពីក្រុមអ្នកគ្រប់គ្រងកាលពីថ្ងៃទី៥ខែមីនា ជាថ្ងៃធ្វើការចុងក្រោយរបស់ពួកគាត់ គឺរោងចក្ររបស់ក្រុងហុងកុង ក្នុងខណ្ឌពោធិ៍សែនជ័យ ឲ្យដឹងថា រោងចក្របិទទ្វារព្រោះខ្វះការបញ្ជាទិញ និងថាកិច្ចសន្យារបស់កម្មករប្រហែល៥៥០របស់ខ្លួនបានបញ្ចប់ហើយ។
សេចក្តីជូនដំណឹងមានខ្លឹមសារថា “ក្រុមហ៊ុនរបស់យើងមិនបានទទួលការបញ្ជាទិញថ្មីពីក្រៅប្រទេសនៅឆ្នាំនេះទេ។ ហេតុនេះហើយ រោងចក្រកាត់ដេររបស់យើងមិនអាចបន្តដំណើរការផលិតកម្មបានទេ។ ក្រុមហ៊ុនរបស់យើងមិនអាចបើកប្រាក់ខែឲ្យបុគ្គលិក កម្មករ និងនិយោជិតបានទេ”។
លោក ប៉ាល់ មករា ជាកម្មករនៅរោងចក្រ វិន ស៊ីងតិច និងជាតំណាងនៃសហព័ន្ធសហជីពប្រជាធិបតេយ្យកម្មករកាត់ដេរកម្ពុជានៅរោងចក្រនេះ បាននិយាយថា កម្មករក៏ចង់ឲ្យគេបើកប្រាក់ខែពេញរហូតដល់ថ្ងៃចុងក្រោយនៃកិច្ចសន្យានីមួយៗរបស់ពួកគាត់ ក្នុងនោះមានប្រាក់រង្វាន់ប្រចាំឆ្នាំនិងប្រាក់អតីតភាពការងាររបស់ពួកគាត់ដែរ។
លោក មករា បាននិយាយថា រោងចក្រនេះព្រមបើកប្រាក់ឲ្យពួកគាត់ម្នាក់ៗពាក់កណ្តាលនៃអ្វីដែលពួកគាត់បានស្នើសុំក្នុងកិច្ចប្រជុំមួយ ដែលរៀបចំឡើងដោយអាជ្ញាធរខណ្ឌពោធិ៍សែនជ័យ កាលពីថ្ងៃទី២២ ខែមីនា ប៉ុន្តែថា កម្មករបានបដិសេធមិនទទួលយកសំណើនោះ។
លោកបាននិយាយកាលពីម្សិលមិញថា “យើងមិនអាចទទួលយកបានទេ ពីព្រោះក្រុមហ៊ុនរំលោភច្បាប់ការងារ និងបោកកម្មករ”។
តំណាងសហជីពរូបនេះបាននិយាយថា កម្មករក៏សង្ស័យដែរថា ក្រុមហ៊ុននេះប៉ុនប៉ងផ្លាស់ការងាររបស់ខ្លួនទៅកន្លែងផ្សេង ដោយលោកបានពន្យល់ថា កម្មករមួយចំនួនបានដេញតាមរថយន្តដឹកទំនិញដែលមិនទាន់សម្រេចចេញពីរោងចក្រ វិន ស៊ីងតិច ទៅអគារមួយផ្សេងទៀតដែលគ្មានសញ្ញាសម្គាល់។
លោកបាននិយាយថា កម្មករប្រហែល៣០០នាក់បានឡើងជិះឡាន និងម៉ូតូកាលពីព្រឹកម្សិលមិញ ហើយមានបំណងទៅដល់គេហដ្ឋានលោក ហ៊ុន សែន ដែលនៅក្បែរវិមានឯករាជ្យ ដើម្បីសុំការជួយពីលោកនាយករដ្ឋមន្ត្រី ប៉ុន្តែនគរបាលបានបង្វែរពួកគេឲ្យទៅក្បែរសួនវត្តបុទមវិញ។ លោកបាននិយាយថា នៅទីនោះកម្មករបានជួបជាមួយសមាជិកនៃខុទ្ទកាល័យលោកនាយករដ្ឋមន្ត្រី គឺលោក ប៉ាល់ ច័ន្ទតារា ដែលបានទទួលយកញត្តិពួកគេ។
លោក ច័ន្ទតារា បានមានប្រសាសន៍ថា “ខ្ញុំនឹងទៅរកដំណោះស្រាយជាមួយមន្ត្រីក្រសួងការងារនៅរសៀលនេះ ហើយយើងនឹងប្រាប់បងប្អូននៅថ្ងៃស្អែក ឬថ្ងៃខានស្អែក”។
អ្នកតំណាងនៃក្រុមហ៊ុន វិន ស៊ីងតិច មិនអាចទាក់ទងសុំការបំភ្លឺបានទេ៕និត