យោងតាមមន្ត្រីឲ្យដឹងថា ប្រធានការិយាល័យម្នាក់នៅក្រសួងការបរទេសនឹងប្រឈមមុខនៅតុលាការក្នុងសប្តាហ៍នេះ បន្ទាប់ពីត្រូវអង្គភាពប្រឆាំងអំពើពុករលួយរបស់រដ្ឋាភិបាលចាប់ខ្លួនកាលពីថ្ងៃព្រហស្បតិ៍ ទាក់ទងនឹងការទទួលយកសំណូកក្នុងការរៀបចំបែបបទឯកសាររបស់ក្រុមហ៊ុនបរទេសមួយ។
ការចោទប្រកាន់ត្រូវបានបង្ហាញក្នុងសេចក្តីជូនព័ត៌មានផ្ទៃក្នុងក្រសួងនេះដែលទទួលបានកាលពីថ្ងៃសុក្រ។
សេចក្តីជូនព័ត៌មាន ដែលចុះហត្ថលេខាដោយលោក ហោ ណាំហុង រដ្ឋមន្ត្រីក្រសួងការបរទេស មានខ្លឹមសារថា “សូម ឯកឧត្តម លោកជំទាវ លោក លោកស្រី ថ្នាក់ដឹកនាំ និងមន្ត្រីរាជការទាំងអស់ កុំមានការភ្ញាក់ផ្អើលចំពោះករណី អង្គភាពប្រឆាំងអំពើពុករលួយបានចាប់មន្ត្រីក្រសួងការបរទេសមួយរូបនៅព្រឹកថ្ងៃទី៣១ខែមីនាឆ្នាំ២០១៦នេះ។ មានភ័ស្តុតាងច្បាស់លាស់អំពីការទទួលលុយពីក្រុមហ៊ុនបរទេស ដើម្បីប្រថាប់ត្រាបញ្ជាក់លើឯកសារ ដែលមិនពាក់ព័ន្ធនឹងក្រសួងការបរទេសទេ”។
សេចក្តីជូនព័ត៌មានបានបន្តទៀតថា “អង្គភាពប្រឆាំងអំពើពុករលួយកំពុងធ្វើការស៊ើបអង្កេតបន្តទៀតទាក់ទងនឹងបញ្ហានេះ។ សូមថ្នាក់ដឹកនាំនិងមន្ត្រីរាជការទាំងអស់ រក្សាភាពស្ងប់ស្ងាត់ និងបន្តការងាររបស់ខ្លួនក្នុងស្មារតីទទួលខុសត្រូវខ្ពស់”។
ជំរុញឲ្យផ្តល់ព័ត៌មានពិស្តារអំពីករណីនេះកាលពីថ្ងៃសុក្រ ទាំងក្រសួងការបរទេស ទាំងមន្ត្រីអង្គភាពប្រឆាំងអំពើពុករលួយបានលាក់មិនបញ្ចេញឲ្យដឹង ដោយមិនប្រាប់ឈ្មោះមន្ត្រីជាប់ចោទនោះ ឬប្រាប់ទោសរបស់គាត់ដែលត្រូវចោទនោះទេ។
លោក ជុំ សុន្ទរី អ្នកនាំពាក្យក្រសួងការបរទេស បាននិយាយថា “គាត់ត្រូវបានចាប់ខ្លួននៅម៉ោងប្រហែល១០ព្រឹកនៅក្រសួង”។
ដោយមិនឆ្លើយសំណួរទៀត លោកបាននិយាយបន្ថែមថា “វាពាក់ព័ន្ធនឹងអំពើពុករលួយ ហើយអង្គភាពប្រឆាំងអំពើពុករលួយមានភ័ស្តុតាងគ្រប់គ្រាន់” ដើម្បីបញ្ជាក់ភាពមានទោសរបស់គាត់។
លោក ឱម យ៉ិនទៀង ប្រធានអង្គភាពប្រឆាំងអំពើពុករលួយគ្រាន់តែបាននិយាយថា តាមច្បាប់ ជនសង្ស័យត្រូវគេបញ្ជូនទៅតុលាការក្រុងភ្នំពេញក្នុងពេល៤៨ម៉ោងនៃការចាប់ខ្លួនរបស់គាត់ ក្នុងករណីនេះ គឺត្រឹមថ្ងៃសៅរ៍។
ចំណាត់ការដ៏ប្រយ័ត្នប្រយែងរបស់អង្គភាពប្រឆាំងអំពើពុករលួយលើការចោទប្រកាន់ទទួលសំណូកនេះគឺផ្ទុយគ្នាស្រឡះនឹងរបៀបដែលខ្លួនបានចាត់ការករណីជាច្រើនកន្លងមកពាក់ព័ន្ធនឹងការចោទពុករលួយដែលគ្មានភ័ស្តុតាងបញ្ជាក់។ ក្នុងករណីទាំងនោះ អង្គភាពនេះបានផ្សព្វផ្សាយការចោទប្រកាន់លម្អិត ប៉ុន្តែអនាមិកលើមន្ត្រីរដ្ឋ ដែលអមដោយការឆ្លើយតបហ្មត់ចត់ស្មើភាពពីសំណាក់មន្ត្រីមានឈ្មោះទាំងនោះ។
ភាពប្រយ័ត្នប្រយែងនេះក៏ផ្ទុយនឹងការស៊ើបអង្កេតកំពុងធ្វើរបស់អង្គភាពប្រឆាំងអំពើពុករលួយលើការចោទប្រកាន់ដែលថា លោក កឹម សុខា អនុប្រធានគណបក្សប្រឆាំង បានទិញដីនិងផ្ទះឲ្យស្រីកំណាន់ជាច្រើននាក់ ដោយផ្អែកលើខ្សែអាត់សំឡេងបែកធ្លាយនៃការសាសងតាមទូរស័ព្ទរបស់គាត់ជាមួយស្ត្រីទាំងនោះ។ មុនការបើកការស៊ើបអង្កេតកាលពីសប្តាហ៍មុន អង្គភាពនេះបានធ្វើការប្រជុំពីរលើក បើកឲ្យសាធារណជននិងសមាជិកបណ្តាញសារព័ត៌មានចូលរួម ដែលក្នុងការប្រជុំនោះខ្សែអាត់សំឡេងត្រូវបានលើកយកមកពិភាក្សាយ៉ាងយូរ។
លោក សុន ឆ័យ តំណាងរាស្ត្រជាន់ខ្ពស់គណបក្សប្រឆាំងមួយរូប បាននិយាយថា លោកមិនទុកចិត្តចំពោះកិច្ចការរបស់អង្គភាពប្រឆាំងអំពើពុករលួយទេ ព្រោះអង្គភាពនេះកម្រសើុបអង្កេតមន្ត្រីរដ្ឋាភិបាលដែលមានឋានៈខ្ពស់ណាស់។
លោក សុន ឆ័យ បាននិយាយថា “ខ្ញុំមិនចាប់អារម្មណ៍ពួកគេទេ ពីព្រោះមានករណីពុករលួយច្រើនណាស់ក្នុងប្រទេសកម្ពុជា ហើយមនុស្សមានអំណាចកំពុងប្រព្រឹត្តអំពើពុករលួយរាប់លានដុល្លារ ប៉ុន្តែ ខ្ញុំមិនឃើញពួកគេធ្វើអ្វីមួយទេ។ យើងមិនចាប់អារម្មណ៍ទេ ពីព្រោះយើងមិនជឿលើសកម្មភាពរបស់ពួកគេ”៕និត