យោងតាមទិន្នន័យចេញផ្សាយជាសាធារណៈកាលពីថ្ងៃអាទិត្យ បានឲ្យដឹងថា លោក អង្គ វង្សវឌ្ឍានា រដ្ឋមន្ត្រីក្រសួងយុត្តិធម៌មានជាប់ពាក់ព័ន្ធនៅក្នុងក្រុមហ៊ុនបរទេសមួយឈ្មោះ British Virgin Islands នៅក្នុងអ្វីដែលត្រូវបានចាត់ទុកថា ជាការបែកធ្លាយឯកសារសម្ងាត់ដ៏ធំបំផុតនៅក្នុងប្រវត្តិសាស្ត្រ។
ទោះជាយ៉ាងណា លោក អង្គ វង្សវឌ្ឍានា បានបដិសេធយ៉ាងដាច់អហង្ការចំពោះការចោទប្រកាន់កាលពីម្សិលមិញ ដោយអះអាងថា លោកមិនដែលឮឈ្មោះក្រុមហ៊ុនដែលកំពុងមានបញ្ហានេះឡើយ ហើយបានគំរាមប្តឹងអង្គការដែលចេញផ្សាយឯកសារទាំងនេះ។
កាសែត The “Panama Papers” ជាកន្លែងប្រមូលផ្តុំឯកសារជាង១១លានដែលបែកធ្លាយចេញពីក្រុមហ៊ុនច្បាប់ Mossack Fonseca មានមូលដ្ឋានក្នុងប្រទេសប៉ាណាម៉ា និងដែលកំពុងត្រូវបានវិភាគដោយក្រុមអ្នកកាសែតសើុបអង្កេតអន្តរជាតិ (ICIJ) បានបង្ហាញពីអតិថិជន ក្នុងនោះរួមមានអ្នកនយោបាយចំនួន១៤០នាក់មកពីទូទាំងពិភពលោក ក៏ដូចជាអ្នកមានទ្រព្យសម្បត្តិស្តុកស្តម្ភផ្សេងៗទៀត ដែលក្រុមហ៊ុននេះជួយឲ្យគេចរួចផុតពីការបង់ពន្ធ និងទណ្ឌកម្ម ហើយនៅក្នុងករណីខ្លះលាងលុយដោយប្រើប្រាស់ក្រុមហ៊ុនបរទេស។
ក្រុមអ្នកកាសែតស៊ើបអង្កេតអន្តរជាតិ បានរាយការណ៍ថា ឯកសារបែកធ្លាយទាំងនេះបានបង្ហាញថា លោក អង្គ វង្សវឌ្ឍានា បានចំណាយប្រាក់៥.០០០ដុល្លារសម្រាប់ភាគហ៊ុននៅក្នុងក្រុមហ៊ុន RCD International Limited និងជាមនុស្សម្នាក់ក្នុងចំណោមម្ចាស់ភាគហ៊ុន៥នាក់ ដែលជា “មន្ត្រីអ្នកជំនួញ” ជនជាតិចិន និងជនជាតិខែ្មរ។
ក្រុមហ៊ុន RCD International Limited មានឈ្មោះត្រឹមតែជាង៣ឆ្នាំប៉ុណ្ណោះ បន្ទាប់ពីត្រូវបានចុះបញ្ជីនៅក្នុងដើមឆ្នាំ២០០៧។ ក្រុមហ៊ុននេះត្រូវបានលុបឈ្មោះចេញពីការចុះបញ្ជីមូលដ្ឋាននៅក្នុងខែតុលា ឆ្នាំ២០១០ ហើយលែងដំណើរការនៅក្នុងខែវិច្ឆិកា ក្នុងឆ្នាំដដែលនោះ ហើយគោលបំណងរបស់ក្រុមហ៊ុននេះគេនៅមិនទាន់ដឹងនៅឡើយទេ នេះបើយោងតាមក្រុមអ្នកកាសែតសើុបអង្កេតអន្តរជាតិ។
ក្រុមហ៊ុនបរទេសត្រូវបានប្រើប្រាស់ដើម្បីលាងលុយដែលទទួលបានតាមរយៈមធ្យោបាយខុសច្បាប់ ទោះបីប្រហែលជាមានហេតុផលផ្លូវច្បាប់ដើម្បីចុះបញ្ជីក្រុមហ៊ុនបែបនេះក៏ដោយ។
ទោះជាយ៉ាងណា ក្រោយពេលមានការបង្ហាញអំពីភាគហ៊ុនរបស់លោក អង្គ វង្សវឌ្ឍានា នៅក្នុងក្រុមហ៊ុន RCD International Limited ក្រសួងយុត្តិធម៌បានចេញសេចក្តីថ្លែងការណ៍មួយកាលពីរសៀលម្សិលមិញ ដោយបដិសេធយ៉ាងដាច់អហង្ការថា រដ្ឋមន្ត្រីរូបនេះគ្មានជាប់ពាក់ព័ន្ធនៅក្នុងក្រុមហ៊ុននេះឡើយ។
សេចក្តីថ្លែងការណ៍នេះដែលចុះហត្ថលេខាដោយលោក សាន សោភ័ណ អ្នកនាំពាក្យក្រសួងយុត្តិធម៌នោះមានខ្លឹមសារដូច្នេះថា “ឯកឧត្តមរដ្ឋមន្ត្រីមិនដែលស្គាល់ឈ្មោះក្រុមហ៊ុនខាងលើនេះឡើយ ហើយក៏មិនដែលបានទិញភាគហ៊ុនពីក្រុមហ៊ុនបរទេសមួយនេះដែរ។ ហេតុដូច្នេះព័ត៌មានខាងលើ គឺជាព័ត៌មានមិនពិត ហើយភូតកុហក ដែលធ្វើឲ្យសាធារណជនមានការយល់ច្រឡំហើយធ្វើឲ្យប៉ះពាល់ដល់កេរ្តិ៍ឈ្មោះឯកឧត្តមរដ្ឋមន្ត្រី”។
សេចក្តីថ្លែងការណ៍នេះបានបន្ថែមថា ក្រសួងយុត្តិធម៌កំពុងតែទាក់ទងក្រុមអ្នកកាសែតសើុបអង្កេតអន្តរជាតិដើម្បីទាមទារឲ្យពួកគេផ្តល់ប្រភពឯកសារដែលមានឈ្មោះ លោក អង្គ វង្សវឌ្ឍានា ។
នៅក្នុងកិច្ចសម្ភាសន៍តាមទូរស័ព្ទជាមួយគេហទំព័រព័ត៌មានថ្មីៗ រដ្ឋមន្ត្រីរូបនេះបានព្រមានថា នឹងមានការដាក់ពាក្យបណ្តឹងប្រសិនបើក្រុមអ្នកកាសែតសើុបអង្កេតអន្តរជាតិមិនអាចផ្តល់ភ័ស្តុតាងគ្រប់គ្រាន់ដែលបញ្ជាក់ថា លោកមានភាគហ៊ុននៅក្នុងក្រុមហ៊ុន RCD InternationalLimited នោះ។
លោកបានមានប្រសាសន៍ថា”ខ្ញុំអត់ស្គាល់ក្រុមហ៊ុននោះទេ តើខ្ញុំទិញភាគហ៊ុនម្តេចនឹងកើតទៅ?។ ប្រសិនបើពួកគេផ្តល់ការឆ្លើយតបមិនត្រឹមត្រូវ ខ្ញុំនឹងប្តឹងពួកគេ។ ឥឡូវនេះខ្ញុំចង់ឲ្យពួកគេបង្ហាញភ័ស្តុតាងដាក់បន្ទុក ព្រោះខ្ញុំមិនដឹងអ្វីនោះឡើយ”។
លោក សុន ឆ័យ អនុប្រធានគណៈកម្មការធនាគារ និងហិរញ្ញវត្ថុនៃរដ្ឋសភាបានលើកឡើងថា អង្គភាពប្រឆាំងអំពើពុករលួយតម្រូវឲ្យសើុបអង្កេតក្រុមហ៊ុននេះដើម្បីកំណត់ថា តើមានសកម្មភាពខុសច្បាប់ណាមួយដែរ ឬក៏អត់។
លោកបានមានប្រសាសន៍ថា “ភ័ស្តុតាងត្រូវតែមានការសើុបអង្កេត។ ពេលមានព័ត៌មានបែបនេះ ហើយរឹងមាំបែបនេះនោះ អង្គភាពប្រឆាំងអំពើពុករលួយគួរតែបើកការសើុបអង្កេតភ្លាម។ ពួកគេត្រូវតែធ្វើអ្វីមួយពាក់ព័ន្ធបញ្ហានេះ”។
លោក ព្រាប កុល នាយកប្រតិបត្តិអង្គការតម្លាភាពកម្ពុជាបានលើកឡើងថា ខណៈព័ត៌មានបន្ថែមអំពីការធ្វើជំនួញនេះត្រូវការជាចាំបាច់មុនពេលថ្កោលទោសសកម្មភាពរបស់ លោក អង្គ វង្សវឌ្ឍានា នោះ ការបង្ហាញនេះទោះជាយ៉ាងណាគឺបញ្ហា ដែល”ធ្វើឲ្យមានការព្រួយបារម្ភ”។ លោកបានសរសេរក្នុងអីុម៉េលមួយថា “វាគួរឲ្យព្រួយបារម្ភណាស់ ប្រសិនបើរដ្ឋមន្ត្រីមួយរូបប្រើប្រាស់ក្រុមហ៊ុនបរទេសសម្រាប់ជំនួញរបស់ខ្លួន”។
លោកបានបន្តថា “ក្នុងនាមជាមន្ត្រីរដ្ឋបាលជាន់ខ្ពស់ រដ្ឋមន្ត្រីត្រូវបានគេរំពឹងថា ជាគំរូសម្រាប់សង្គម ហើយមិនត្រូវមានទំនាក់ទំនាក់ជាមួយក្រុមហ៊ុនបរទេសដែលម្ចាស់ក្រុមហ៊ុនត្រូវបានគេលាក់ឈ្មោះជាសម្ងាត់នោះឡើយ”៕ស៊ុយឈាង