លោក ហោ ណាំហុង រដ្ឋមន្ត្រីក្រសួងការបរទេសដែលបម្រើការងារជាយូរមកហើយនោះ ត្រូវបានជំនួសដោយលោក ប្រាក់ សុខុន អតីតរដ្ឋមន្ត្រីក្រសួងប្រៃសណីយ៍ និងទូរគមនាគមន៍ ហើយលោក ស៊ុន ចាន់ថុល រដ្ឋមន្ត្រីក្រសួងពាណិជ្ជកម្មត្រូវបានផ្ទេរទៅកាន់មុខតំណែងចាស់របស់លោកគឺក្រសួងសាធារណការ និងដឹកជញ្ជូនកាលពីម្សិលមិញ ខណៈការផ្លាស់ប្ដូរតួនាទីនៃគណៈរដ្ឋមន្ត្រីរបស់លោកនាយករដ្ឋមន្ត្រី ហ៊ុន សែន ត្រូវបានបោះឆ្នោតអនុម័តនៅក្នុងរដ្ឋសភា។
នៅក្នុងការបោះឆ្នោតដែលបានចាប់ផ្ដើមនៅម៉ោង១០និង៣០នាទីព្រឹក សមាជិកសភា៧០រូបក្នុងចំណោម១០៧រូបដែលមានវត្តមាន បានបោះឆ្នោតអនុម័តលើការផ្លាស់ប្ដូរគណៈរដ្ឋមន្ត្រី២៦រូប រួមទាំងការចូលនិវត្តរបស់លោកឧបនាយករដ្ឋមន្ត្រី គាត ឈន់ ដែលដំបូងឡើយបម្រើការងារក្នុងរដ្ឋាភិបាល ជារដ្ឋមន្ត្រីក្រសួងឧស្សាហកម្ម និងពាណិជ្ជកម្មក្នុងទសវត្សរ៍ឆ្នាំ១៩៦០ក្រោមការដឹកនាំរបស់ព្រះអង្គម្ចាស់ នរោត្តម សីហនុ។
ដោយលោក ប្រាក់ សុខុន ទៅកាន់តួនាទីនៅក្រសួងការបរទេស រដ្ឋសភាក៏បានបោះឆ្នោតអនុម័តតែងតាំងលោក ត្រាំ អុីវតឹក រដ្ឋមន្ត្រីក្រសួងសាធារណការ និងដឹកជញ្ជូន ដែលនឹងចាកចេញពីតំណែង ជារដ្ឋមន្ត្រីក្រសួងប្រៃសណីយ៍ និងទូរគមនាគមន៍ ហើយលោក បា៉ន សូរស័ក្តិ អតីតរដ្ឋលេខាធិការក្រសួងពាណិជ្ជកម្មត្រូវបានជំនួសតំណែងលោក ស៊ុន ចាន់ថុល។
លោក អុឹម ឈុនលឹម រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ដែលនឹងចាកចេញពីតំណែង ត្រូវបានជំនួសដោយលោក ជា សុផារ៉ា អតីតរដ្ឋមន្ត្រីក្រសួងអភិវឌ្ឍន៍ជនបទ ត្រូវបានបង្ហើបឲ្យដឹងថា ជាសមាជិកថ្មីនៃក្រុមប្រឹក្សាធម្មនុញ្ញ។
មុនការបោះឆ្នោត លោក ហ៊ុន សែន បាននិយាយសរសើរបែបចំអកចំពោះការប្រកាសរបស់គណបក្សសង្គ្រោះជាតិកាលពីយប់ថ្ងៃអាទិត្យថា ខ្លួននឹងបោះឆ្នោតជំទាស់ការផ្លាស់ប្ដូរគណៈរដ្ឋមន្ត្រី ដោយសារតែមុខដដែលៗ។
លោក ហ៊ុន សែន បានមានប្រសាសន៍ថា “ខ្ញុំសូមយកឱកាសនេះថ្លែងអំណរគុណចំពោះសមាជិកសមាជិកានៃគណបក្សសង្គ្រោះជាតិដែលបានលើកឡើងថា នឹងមិនបោះឆ្នោតគាំទ្រនោះទេ”។
លោកបានបន្ថែមថា ”សុំអរគុណណាស់ ព្រោះថា គណបក្សប្រជាជនកម្ពុជាមិនត្រូវការសំឡេងរបស់អស់លោកអ្នកនោះទេ។ ប្រសិនបើបោះឆ្នោត នាំតែគណបក្សប្រជាជនកម្ពុជាជំពាក់គុណរបស់ឯកឧត្ដម លោកជំទាវទេ”។
ប៉ុន្តែដោយគណបក្សប្រជាជនកម្ពុជាមានតំណាងរាស្ត្រតែ៦៨រូបក្នុងចំណោមសមាជិកសភា១២៣រូប វាបង្ហាញយ៉ាងច្បាស់ថា ក្រោយការបោះឆ្នោត យ៉ាងហោចណាស់សមាជិកសភាគណបក្សប្រឆាំងពីររូបបានចូលរួមជាមួយគណបក្សប្រជាជនកម្ពុជាគាំទ្រការផ្លាស់ប្ដូរនេះ ដោយបង្ហាញឲ្យឃើញជាលើកដំបូងដែលសមាជិកសភាគណបក្សសង្គ្រោះជាតិបានបំពានយ៉ាងច្បាស់ក្រឡែតចំពោះតួនាទីគណបក្សជាសាធារណៈ។
លោក យឹម សុវណ្ណ អ្នកនាំពាក្យគណបក្សប្រឆាំងបានមានប្រសាសន៍តាមទូរស័ព្ទបន្ទាប់ពីការបោះឆ្នោតដែលជាការសម្ងាត់ថា នឹងមិនមានការចោទប្រកាន់ដាក់គ្នានៅក្នុងគណបក្សលើសមាជិកសភារបស់ខ្លួនឡើយ។
លោកបានថ្លែងថា “គណបក្សសង្គ្រោះជាតិគឺជាគណបក្សប្រជាធិបតេយ្យ ហើយសមាជិកសភាគ្រប់រូបមានសិទ្ធិសម្ដែងមតិរបស់ខ្លួន។ នេះជាសេរីភាពរបស់គណបក្ស។ ប្រសិនបើពួកគាត់គិតថា វាជាសិទ្ធិក្នុងការបោះឆ្នោតគាំទ្រនោះ វាជាសិទ្ធិរបស់ពួកគាត់។ យើងមិនអាចបង្ខំពួកគាត់ដូចគណបក្សដទៃឡើយ”។
ជាមួយនឹងការផ្លាស់ប្ដូរដ្ឋមន្ត្រីប្រាំបីរូបនៅក្នុងការរុះរើគណៈរដ្ឋមន្ត្រី គឺការបន្ថែមមន្ត្រីកាន់តែច្រើនឡើងទៅក្នុងស្ថាប័ននីតិប្រតិបត្តិ រួមទាំងការតែងតាំងលោក អុឹម សួស្ដី អតីតប្រធានគណៈកម្មាធិការជាតិរៀបចំការបោះឆ្នោត (គ.ជ.ប.) ជា “ទេសរដ្ឋមន្ត្រីទទួលបន្ទុកបេសកកម្មពិសេស”។
បើទោះជារងការរិះគន់ជាទូទៅចំពោះការត្រួតពិនិត្យការបោះឆ្នោតជាតិឆ្នាំ២០០៣ ២០០៨ និង២០១៣ក៏ដោយ ក៏លោក អុឹម សួស្ដី បាននិយាយការពារអព្យាក្រឹតភាពរបស់លោកដែរ។
លោក គល់ បញ្ញា នាយកប្រតិបត្តិគណៈកម្មាធិការដើម្បីការបោះឆ្នោតដោយសេរី និងយុត្តិធម៌បានមានប្រសាសន៍ថា ការតែងតាំងលោក អុឹម សួស្ដី ជាសមាជិកជាន់ខ្ពស់នៃរដ្ឋាភិបាលរបស់លោក ហ៊ុន សែន ធ្វើឲ្យមានការសង្ស័យអំពីការបោះឆ្នោតដែលគាត់បានគ្រប់គ្រង។
លោក គល់ បញ្ញា បានមានប្រសាសន៍ថា “វាបញ្ជាក់ឱ្យឃើញពីអ្វីដែលប្រជាពលរដ្ឋសង្ស័យអំពី គ.ជ.ប. និងគណបក្សកាន់អំណាច ពីព្រោះតួនាទីនេះគឺជាមន្ត្រីនយោបាយរបស់រដ្ឋាភិបាល ជាទេសរដ្ឋមន្ត្រី” ដោយលោកកត់សម្គាល់ថា គ.ជ.ប. ត្រូវបានមជ្ឈដ្ឋានទូទៅចាត់ទុកថា ស្ថិតក្រោមការគ្រប់គ្រងរបស់គណបក្សប្រជាជនកម្ពុជា។
លោកបានមានប្រសាសន៍បន្ថែមថា “ពីមុន យន្តការនេះស្ថិតក្រោមគណបក្សកាន់អំណាច ដូច្នេះហើយពួកគេអាចជ្រើសរើសនរណាម្នាក់ដែលនឹងតែងតាំងពួកគេ។ វាបញ្ជាក់ពីអ្វីដែលសាធារណជនមិនជឿជាក់លើ គ.ជ.ប. ហើយវាបង្ហាញថា គាត់មានទំនាក់ទំនងជិតស្និទ្ធបំផុតចំពោះគណបក្ស។
លោក អុឹម សួស្ដី ត្រូវបានបណ្តេញចេញពីប្រធាន គ.ជ.ប. កាលពីឆ្នាំមុន នៅពេលគណៈកម្មាធិការរៀបចំការបោះឆ្នោតថ្មីត្រូវបានបង្កើតឡើងកាលពីខែមេសា ឆ្នាំ២០១៥ ដោយមានតំណាងស្មើគ្នាមកពីគណបក្សប្រជាជនកម្ពុជា និងគណបក្សសង្គ្រោះជាតិស្របតាមកិច្ចព្រមព្រៀងនយោបាយខែកក្កដា ឆ្នាំ២០១៤។ លោក ស៊ឹក ប៊ុនហុក អតីតសមាជិកសភាគណបក្សប្រជាជនកម្ពុជាឥឡូវនេះជាប្រធាន គ.ជ.ប.។
ថ្លែងតាមទូរស័ព្ទ លោក អុឹម សួស្ដី បានបដិសេធមិនធ្វើអត្ថាធិប្បាយទេអំពីបញ្ហាថាតើការតែងតាំងរូបលោកឱ្យកាន់តួនាទីក្នុងជួររដ្ឋាភិបាលនឹងធ្វើឲ្យមានការលើកឡើងជាសំណួរអំពីភាពលម្អៀងរបស់លោកឬយ៉ាងណានោះ។ លោកបានថ្លែងថា “ខ្ញុំគ្មានយោបល់ទេ។ ហេតុអ្វីក៏អស់លោកសួរខ្ញុំពីរឿងនេះ?”។
ការលាលែងពីតួនាទីរបស់លោក ហោ ណាំហុង រដ្ឋមន្ត្រីក្រសួងការបរទេសកត់សម្គាល់ឲ្យឃើញពីការផ្លាស់ប្ដូរលើកដំបូងពីមុខតំណែងនោះចាប់ពីខែវិច្ឆិកា ឆ្នាំ១៩៩៨មក នៅពេលនោះលោកបានជំនួសលោក អុឹង ហួត ដែលជារដ្ឋមន្ត្រីក្រសួងការបរទេស និងជានាយករដ្ឋមន្ត្រីទី១ បន្ទាប់ពីជំនួសតំណែងព្រះអង្គម្ចាស់ នរោត្តម រណឫទ្ធិ ។
ការចូលនិវត្តរបស់លោក គាត ឈន់ ក៏កត់សម្គាល់ពីការបញ្ចប់សករាជផងដែរ ដោយឧបនាយករដ្ឋមន្ត្រីដែលនឹងចាកចេញពីតំណែងរូបនេះបានបម្រើការងារនៅគ្រប់ស្ថាប័នរដ្ឋាភិបាលកម្ពុជាក្នុងសម័យក្រោយអាណានិគមលើកលែង របប លន់ នល់ គាំទ្រដោយអាមេរិក ដែលក្នុងនោះលោកបានជំទាស់ អំឡុងសង្គ្រាមស៊ីវិលទសវត្សរ៍ឆ្នាំ១៩៧០។
ក្រៅពីបម្រើការងារជារដ្ឋមន្ត្រីក្រសួងឧស្សាហកម្មក្នុងទសវត្សរ៍ឆ្នាំ១៩៦០ លោក គាត ឈន់ បានធ្វើជាអ្នកបកប្រែឲ្យ ប៉ុល ពត ក្រោយឆ្នាំ១៩៧៥។ គាត់បានផ្ដាច់ខ្លួនពីខ្មែរក្រហមទៅចូលរួមជាមួយរបប ហ៊ុន សែន ក្នុងពាក់កណ្ដាលទសវត្សរ៍ឆ្នាំ១៩៨០ ហើយបានជំនួសតំណែងលោក សម រង្ស៊ី ដែលឥឡូវ នេះជាមេដឹកនាំគណបក្សប្រឆាំង ជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ក្នុងឆ្នាំ១៩៩៤ ហើយបានបម្រើការងាររហូតដល់ឆ្នាំ២០១៣៕ សារុន