35 C
Phnom Penh

ប្រធាន​ ACU ​​ថា អាច​​មាន​ការ​ស៊ើបអង្កេត​លើ​រដ្ឋមន្ត្រី​​​​ក្រសួង​យុត្តិធម៌​

ដោយ ឌឹ ខេមបូឌា ដេលី

បទវិភាគ

​អង្គភាព​ប្រឆាំង​អំពើ​ពុករលួយ​ (ACU) មិន​​​​ទាន់​​បើក​ការ​ស៊ើបអង្កេត​​លើ​ភាគហ៊ុន​​សម្ងាត់​​​​នៅ​បរទេស​​របស់​លោក​ អង្គ វង្សវឌ្ឍានា រដ្ឋ​មន្ត្រី​​​ក្រសួង​​យុត្តិធម៌​​នៅ​ឡើយ​ទេប៉ុន្តែ​ប្រធាន​អង្គភាព​នេះ​បាន​បញ្ជាក់​កាលពី​ម្សិល​មិញ​ថា អាច​នឹង​មាន​ការ​ស៊ើបអង្កេត​​នៅ​ពេល​ខាង​មុខ។

ពេល​​សួរ​ថា ​តើ​លោក​​បាន​ដឹងពី​ព័ត៌មាន​​ចុះ​​​​ផ្សាយ​ថាលោក អង្គ វង្សវឌ្ឍានា ជា​ម្ចាស់​ភាគ​ហ៊ុន​ក្នុង​​ក្រុម​ហ៊ុន​​មួយ​នៅ​កោះ​​ British Virgin Islands ដែល​​ពេល​នេះ​លែង​មាន​ទៅ​ហើយ​​​​​​ដែរ​ឬទេ លោក ឱម យ៉ិនទៀង បាន​ឆ្លើយ​ថា “​បើ​មិន​សើម​ ក៏​ជ្រាប​ដែរ។​ យើង​បាន​ឮ​”។

ភាគហ៊ុន​​របស់​រដ្ឋមន្ត្រី​​​ក្រសួង​យុត្តិធម៌​​រូប​នេះ​នៅ​ក្នុង​ក្រុមហ៊ុន​ RCD International Limited ​​ដែល​លោក​បាន​ចំណាយ​ប្រាក់​​​​​​​​ទិញ​​​​​​៥.០០០​ដុល្លារ ត្រូវ​បាន​​​លាត​ត្រដាង​​​ជា​ផ្នែក​នៃ​ “​Panama Papers” ដែល​ជា​​​​​​​ការ​​​​​​បែក​​​​​​​​​​​​ធ្លាយ​​​មិន​​​​​​ធ្លាប់​​​មាន​​​នូវ​​​​​ឯក​សារ​​​​​ប្រមាណ​ជាង​១១លាន​​​ចេញពីក្រុម​​​ហ៊ុន​​​​​​​​​​​​ច្បាប់​​ ​​​Mossack Fonseca មាន​មូលដ្ឋាន​នៅ​ប្រទេស​ប៉ាណាម៉ា។ ឯកសារ​ទាំង​នោះ​ត្រូវ​បាន​វិភាគ​​ដោយ​អ្នក​កាសែត​​​រាប់​រយ​នាក់​ដែល​បម្រើ​ការ​ឲ្យ​​បណ្ដាញ​អ្នក​យក​ព័ត៌មាន​​ពិភព​លោក​មួយ​ដែល​មាន​ឈ្មោះ​ថា ”ក្រុម​អ្នក​កាសែត​ស៊ើបអង្កេត​អន្តរជាតិ”​ (ICIJ)។

លោក ឱម យ៉ិនទៀង មាន​ប្រសាសន៍​​កាលពី​ម្សិល​មិញ​​អំឡុង​សន្និសីទ​កាសែត​​​​​​​​ស្តី​​​ពី​​​ការ​អះអាង​ករណី​​អំពើ​ពុករលួយ​ដោយ​ឡែក​​​​​ប្រឆាំង​លោក ស៊ុត ឌីណា ឯកអគ្គ​រាជទូត​កម្ពុជា​ប្រចាំ​កូរ៉េ​ខាង​ត្បូង​ថា ”​ផ្អែក​តាម​ច្បាប់​វា​អាច​ទៅ​រួច​ [ដែល​អង្គភាព​ប្រឆាំង​អំពើ​ពុករលួយ​អាច​ស៊ើបអង្កេត​]។ កុំ​គិត​ថា យើង​មិន​ធ្វើ​ការ​ងារ​លើ​រឿង​ទាំង​នេះ។ យើង​តែង​​​​​តែ​ធ្វើ​ជា​ប្រចាំ​” ហើយ​​​​​​​​​​បន្ថែម​​​​ថា ​​​នឹង​​​​​​​​​ត្រូវ​​​​​​​​​កំណត់​​​​​​​​​ភាព​ពិត​នៃ​ព័ត៌មាន​​ក្នុង​ឯកសារ​ដែល​បែក​​ធ្លាយ​ទាំង​នេះសិន ​​មុននឹង​​បើក​ការ​ស៊ើប​​​អង្កេត​​​​​​ផ្លូវ​ការ​​។

លោក​​​​​​ថ្លែង​​​​ថា ”​យើង​មិន​អាច​ប្រើ​ពាក្យ​ថា ‘ស៊ើបអង្កេត​’ បាន​ទេ​ បើ​មាន​​​វិធានការ​មួយ​ទៀត​ដែល​ត្រូវ​ចាត់​។ វា​ជា​ព័ត៌មាន​​។ តើ​វា​ពិត​ទេ? ​តើ​យើង​អាច​ជឿ​ទុក​ចិត្ត​វា​បាន​​ទេ? គោល​បំណង​​គឺ​​ពិនិត្យ​មើល និង​សម្រេច​​​​​ថា តើបញ្ហា​នេះ​​ត្រូវ​​​​​​​​​​មាន​​​​​​​​​​​ការ​ពិភាក្សា​​គ្នា ឬ​ស៊ើប​​​​​អង្កេត​​​​​​ឬ​​​យ៉ាង​​​ណា​”។

ក្រុម​ហ៊ុន​ RCD International Limited ​មាន​​​​​​​វត្ត​​​មាន​​​ចន្លោះពី​ឆ្នាំ​២០០៧ ដល់​ឆ្នាំ​២០១០ ហើយ​​​ខណៈ​គេ​មិន​ដឹង​ពី​គោល​បំណង​​របស់​ក្រុម​ហ៊ុន​នេះ ជា​ញឹក​ញាប់​ក្រុម​ហ៊ុន​នានា​នៅ​​​​ឯ​បរទេស​​​​​​​​ត្រូវ​បាន​ប្រើ​ប្រាស់​​​​សម្រាប់​​​លាង​លុយ​កខ្វក់​ និង​គោល​បំណង​គេច​ពន្ធ។

​យោង​តាម​ ICIJ ​ឲ្យ​ដឹង​ថា អ្នក​ទទួល​ភ្ញៀវ​ម្នាក់​​នៅ​ក្រុម​ហ៊ុន​ Corporate Management Services Limited មាន​មូលដ្ឋាន​នៅ​ហុង​កុង​ ដែល​បាន​ចុះ​បញ្ជី​​ក្រុម​​​​​​ហ៊ុន RCD International Limited ​កាល​​​​​​​​​ពីឆ្នាំ​២០០៧​ បាន​លើក​​​​​​ឡើង​​​​កាលពី​​ថ្ងៃ​អង្គារ​ថា ក្រុម​ហ៊ុន​​​របស់​គាត់​មាន​គោល​ការណ៍​​​​​បំផ្លាញ​ឯក​​​សារ​​​​​​​របស់​ក្រុម​ហ៊ុន​ដែល​អសកម្ម​។

គាត់​និយាយ​ដោយ​សុំ​មិន​បញ្ចេញ​ឈ្មោះ​​​​ពីព្រោះ​​​​នេះ​ជា​ករណី​រសើប​​ថា ”បើ​វា​​​​​​​លុប​ចេញ​ពីបញ្ជី យើង​គ្មាន​វា​ទេ។ ​ដូច្នេះ យើង​​​​​​មិន​រក្សា​ទុក​ឯកសារ​ទាំង​នោះ​ទៀត​ទេ​។ វា​ក៏​មិន​ពាក់​ព័ន្ធ​នឹង​យើងដែរ​​​”។

នៅ​ក្នុង​សេចក្ដី​​ថ្លែងការណ៍​មួយ​កាលពី​ថ្ងៃ​ច័ន្ទ ក្រសួង​យុត្តិធម៌​​បាន​បដិសេធ​ដាច់​អហង្ការ​​​ថា លោក អង្គ វង្សវឌ្ឍានា មិន​ជាប់​ពាក់​ព័ន្ធ​ក្នុង​ក្រុម​ហ៊ុន RCD International Limited ​ ទេ ដោយ​ចាត់​ទុក​រាល់​ការ​អះអាង​​ដែល​ផ្ទុយ​​​​​​ពី​នេះ​ថាជា​ការ​ “ កុហក”។ ​​​ក្នុង​បទសម្ភាស​ន៍​​ក្នុង​ថ្ងៃ​ដដែល លោក អង្គ វង្សវឌ្ឍានា បាន​គំរាម​ប្ដឹង​ ICIJ។

លោក សាន សោភ័ណ្ឌ អ្នក​នាំពាក្យ​ក្រសួង​​​​យុត្តិធម៌​ដែល​​បាន​លើក​​ទូរស័ព្ទ​​​របស់​​លោក​​​ អង្គ វង្សវឌ្ឍានា កាលពី​ម្សិល​មិញ​បាន​ថ្លែង​ថា ​លោក​ “​មិន​ទាន់​​ទទួល​បាន​​ភ័ស្តុតាង​” ពី​ ICIJ នៅ​ឡើយ​ទេ​ ហើយ​នឹង​រង់ចាំ​មុន​ពេល​​បន្ត​បណ្ដឹង​តាម​ផ្លូវ​ច្បាប់​។

នៅ​សប្ដាហ៍​នេះ ​​​​​​អ្នក​នយោបាយ​​មួយ​រូប​​​បាន​​​​​​​​​ទទួល​​​​​​រង​​​​​​​​​ការ​​​​​​​​​វាយសំពង​​​ដោយ​សារ​ការ​បែក​ធ្លាយ​ឯកសារទាំង​​​នេះ ដោយ​​នាយក​រដ្ឋមន្ត្រី​ ស៊ីកម៉ាន់ដឺ ដេវីត ហ្គាន់ឡូកសុន (Sigmundur David Gunnlaugsson) នៃ​ប្រទេស​អុីស្លង់ ​​​បាន​ចុះ​ចេញពី​តំណែង​កាល​​ពី​ថ្ងៃ​អង្គារ បន្ទាប់​ពី​មាន​​ព័ត៌មាន​ចុះ​ផ្សាយ​ថា ​ក្រុម​ហ៊ុន​​មួយ​នៅ​បរទេស​​ដែល​​​​លោក​​គ្រប់​គ្រង ​​កំពុង​ប៉ុន​ប៉ង​​​​ទាម​ទារ​ប្រាក់​ជួស​មុខ​ឲ្យ​ធនាគារ​ចំនួន​បី​​​​៕ សុខុម​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស