សកម្មជនការពារបរិស្ថាន អាឡិច ហ្គនហ្សាឡេស ដេវីដសុន ដែលត្រូវបាននិរទេស កាលពីខែកុម្ភៈឆ្នាំមុន ត្រូវបានផ្តល់ទិដ្ឋាការទេសចរណ៍រយៈពេលមួយខែតាមរយៈសេវា “ទិដ្ឋាការអេឡិចត្រូនិក” ដែលស្នើសុំតាមអីុនធឺណិតរបស់ក្រសួងការបរទេស ប៉ុន្តែ មន្ត្រីអន្តោប្រវេសន៍មួយរូបបានលើកឡើងកាលពីម្សិលមិញថា គាត់ទំនងជាមិនត្រូវបានអនុញ្ញាតឲ្យប្រើប្រាស់វាទេ។
អីុម៉េលមួយពីសេវាទិដ្ឋាការអេឡិចត្រូនិកដែលផ្ញើជូនលោក ហ្គនហ្សាឡេស ដេវីដសុន កាលពីថ្ងៃពុធបានលើកឡើងថា ពាក្យសុំរបស់គាត់ជោគជ័យហើយ ខណៈច្បាប់ចម្លងនៃទិដ្ឋាការអេឡិចត្រូនិកដែលបង្ហាញដោយសកម្មជនរូបនេះបានលើកឡើង ថា លោកមានសិទ្ធិប្រើវាដោយសេរីនៅមុនថ្ងៃទី៦ខែកក្កដា។
អីុម៉េលនេះមានខ្លឹមសារដូច្នេះថា “យើងសូមជម្រាបអស់លោកអ្នកថា ពាក្យសុំទិដ្ឋាការអេឡិចត្រូនិករបស់អស់លោកអ្នកដើម្បីចូលមកកាន់ព្រះរាជាណាចក្រកម្ពុជាត្រូវបានយល់ព្រមហើយ។ សូមពិនិត្យការណែនាំដូចខាងក្រោមមុនពេលអស់លោកអ្នកចាប់ផ្តើមចេញដំណើរកម្សាន្ត”។
ទោះបីជាយ៉ាងដូច្នេះក្តី តែលោក អ៊ុក ហៃសិលា ប្រធានផ្នែកសើុបអង្កេតនៃនាយកដ្ឋានអន្តោប្រវេសន៍នៅក្រសួងមហាផ្ទៃបានលើកឡើងថា លោកជឿថា លោក ហ្គនហ្សាឡេស ដេវីដសុន នឹងមិនត្រូវបានអនុញ្ញាតឲ្យវិលត្រឡប់មកវិញឡើយ។
ឧត្តមសេនីយ៍ទោ អ៊ុក ហៃសិលា ដែលជាអ្នកចាប់ខ្លួនលោក ហ្គនហ្សាឡេស ដេវីដសុន ដោយផ្ទាល់ មុនពេលមានការនិរទេសសកម្មជនរូបនេះកាលពីឆ្នាំមុននោះ បានលើកឡើងថា “តាមដែលខ្ញុំដឹង គេនឹងមិនអនុញ្ញាតឲ្យគាត់ចូលមកឡើយ ព្រោះគាត់ត្រូវបានកត់ត្រាចូលក្នុងបញ្ជីខ្មៅ”។
តាមពិតទៅលក្ខខណ្ឌដែលអ្នកដាក់ពាក្យសុំនីមួយៗឯកភាពពេលដាក់ពាក្យសុំទិដ្ឋាការអេឡិចត្រូនិកនោះ បានលើកឡើងថា លោក ហ្គនហ្សាឡេស ដេវីដសុន ដែលលិខិត ឆ្លងដែនអេស្ប៉ាញរបស់លោកត្រូវបានបោះត្រាថា “មិនអនុញ្ញាតឲ្យចូលមកកម្ពុជា” នោះ នឹងមិនអនុញ្ញាតឲ្យចូលមកឡើយ។
ពាក្យសុំនេះមានខ្លឹមសារដូច្នេះថា “ខ្ញុំយល់ថា ការមានទិដ្ឋាអេឡិចត្រូនិកមិនផ្តល់សិទ្ធិុស្វ័យប្រវត្តិដល់សាមីខ្លួនក្នុងការចូលមកក្នុងព្រះរាជាណាចក្រកម្ពុជាពេលមកដល់កន្លែងច្រកចូល ប្រសិនបើបុគ្គលនោះមិនត្រូវបានអនុញ្ញាតឲ្យចូល”។
លោក ហ្គនហ្សាឡេស ដេវីដសុន ដែលនិយាយខ្មែរបានយ៉ាងស្ទាត់នោះ បានដឹកនាំយុទ្ធនាការប្រឆាំងគម្រោងទំនប់វារីអគ្គិសនីស្ទឹងឆាយអារ៉ែងក្នុងខេត្តកោះកុងហើយត្រូវបាននិរទេសបន្ទាប់ពីត្រូវបានចោទប្រកាន់ពីបទដាក់របាំងបិទផ្លូវខុសច្បាប់ដើម្បីរារាំងក្បួនរបស់មន្ត្រីរដ្ឋបាលមិនឲ្យចូលទៅកាន់តំបន់គម្រោងទំនប់វារីអគ្គិសនីនេះ កាលពីខែកញ្ញាឆ្នាំមុន។
សកម្មជនរូបនេះចង់វិលត្រឡប់មកវិញដើម្បីចូលរួមសវនាការពាក់ព័ន្ធការចោទប្រកាន់ពីបទឃុបឃិតដែលត្រូវបានដាក់ការចោទដោយសាលាដំបូងខេត្តកោះកុងបន្ទាប់ពីលោកត្រូវបាននិរទេស។ ការចោទប្រកាន់នេះកើតចេញពីការជាប់ពាក់ព័ន្ធរបស់លោកនៅក្នុងយុទ្ធនាការដាច់ដោយឡែកមួយទៀត ប្រឆាំងនឹងក្រុមហុ៊នបូមខ្សាច់ចំនួនពីរ។
កាលពីម្សិលមិញ លោកបានលើកឡើងថា លោកនឹងសរសេរលិខិតផ្ញើជូនលោក ស ខេង រដ្ឋមន្ត្រីក្រសួងមហាផ្ទៃដើម្បីសួរថា តើគេទទួលយកទិដ្ឋាការអេឡិចត្រូនិករបស់លោកឬមិនទទួលយក មុនពេលកក់សំបុត្រយន្តហោះធ្វើដំណើរមកប្រទេសកម្ពុជា។
លោក ហ្គនហ្សាឡេស ដេវីដសុន បានលើកឡើងក្នុងសារមួយថា “ទោះបីជាខ្ញុំសប្បាយ ចិត្តដែលបានឃើញពាក្យសុំទិដ្ឋាការអេឡិចត្រូនិកត្រូវបានយល់ព្រមក៏ដោយ តែខ្ញុំគិតថា នេះប្រហែលជាដោយសារស្មៀនថ្នាក់ទាបមួយចំនួនមិនខ្វាយខ្វល់នឹងការពិនិត្យរកមើលអត្តសញ្ញាណរបស់ខ្ញុំ”។
លោកបានបន្ថែមថា “ខ្ញុំគិតថា ខ្ញុំច្រឡំ តែតាមពិតទៅការវិលត្រឡប់មកវិញរបស់ខ្ញុំត្រូវបានផ្តល់ភ្លើងខៀវហើយ ប៉ុន្តែថា ទិដ្ឋាការ អេឡិចត្រូនិកទំនងជាត្រូវបានយល់ព្រមដោយសារអ្នកទទួលបន្ទុកក្រសួងការបរទេសអសមត្ថភាព”។
លោកបានបន្ថែមទៀតថា “ខ្ញុំមិនចង់ឲ្យគេចាប់ខ្លួន [ពេលមកដល់]នោះទេ ប៉ុន្តែ ប្រសិនបើការចាប់ខ្លួនធានាថា ខ្ញុំនឹងអាចមានវត្តមានអំឡុងការបើកសវនាការដែល នឹងមកដល់ក្នុងពេលខាងមុខនោះ ខ្ញុំត្រៀមខ្លួនរួចជាស្រេចដើម្បីធ្វើដំណើរទៅ។ ការចោទប្រកាន់មកលើរូបខ្ញុំ គឺជាការប្រឌិតទាំងស្រុង ហើយវាគ្មានអ្វីក្រៅពីចង់សងសឹកចំពោះការងារដែលខ្ញុំបានធ្វើកន្លងមកក្នុងខេត្តកោះកុងនោះទេ”៕ស៊ុយឈាង