លោក ឡុង ឌីម៉ង់ អ្នកនាំពាក្យសាលារាជ ធានីភ្នំពេញ និងជាកូនប្រុសរបស់រដ្ឋលេខាធិការមួយរូបនៅក្រសួងការបរទេស ត្រូវបានតែងតាំងឲ្យជំនួសលោក ស៊ុត ឌីណា អតីតឯកអគ្គរាជទូតប្រចាំប្រទេសកូរ៉េខាងត្បូងដែលអបយស។
លោក ស៊ុត ឌីណា ត្រូវបានផ្ដន្ទាទោសដាក់ពន្ធនាគារកាលពីសប្ដាហ៍មុនតាមការចោទប្រកាន់ពីបទពុករលួយ ដោយអង្គភាពប្រឆាំងអំពើពុករលួយអះអាងថា គាត់ប្រមូលបានប្រាក់៣លានដុល្លារកាលពី៣ឆ្នាំកន្លងមកនេះ ហើយបានប្រព្រឹត្តបទល្មើស ជាច្រើនទៀតរួមមានការយកប្រាក់សំណងសម្រាប់ក្រុមគ្រួសារសពពលករចំណាកស្រុកដាក់ហោប៉ៅខ្លួនឯង។
លោក ឡុង ឌីម៉ង់ អាយុ៣៦ឆ្នាំ កូនប្រុសរបស់លោក ឡុង វីសាលោ ជាមន្ត្រីម្នាក់ក្នុងចំណោមមន្ត្រីដ៏មានអំណាចបំផុតនៅក្រសួងការបរទេស។ លោក ឡុង ឌីម៉ង់ ដែលបច្ចុប្បន្ននេះជាអ្នកនាំពាក្យសាលារាជធានី និងជាអនុប្រធានរដ្ឋបាល បានបញ្ចប់ការសិក្សាថ្នាក់អនុបណ្ឌិតផ្នែកទំនាក់ទំនងអន្តរ ជាតិពីសាកលវិទ្យាល័យមួយនៅបារាំងក្នុងឆ្នាំ២០០៤ ហើយចាប់តាំងពីពេលនោះមកបានបម្រើការងារនៅសាលារាជធានី ដែលពីដំបូងជាជំនួយការរបស់លោក កែប ជុតិមា អតីតអភិបាលរាជធានីភ្នំពេញ។
លោកបានចូលរួមជាមួយសមាជិកផ្សេងៗ របស់គណបក្សប្រជាជនកម្ពុជា ដែលបានឡើងឋានៈដ៏ឆាប់រហ័សក្នុងរដ្ឋាភិបាលខណៈដែលគណបក្សកាន់អំណាចស្វះស្វែងធ្វើឲ្យមានតុល្យភាពរវាងការសន្យារបស់ខ្លួនចំពោះកំណែទម្រង់ និងរចនាសម្ព័ន្ធអំណាច។
លោក ឡុង ឌីម៉ង់ បានមានប្រសាសន៍កាលពីម្សិលមិញថា បើទោះជាឪពុករបស់លោកជាអ្នកទូន្មានប្រៀនប្រដៅក៏ដោយ ក៏គាត់មិនទទួលខុសត្រូវចំពោះការដំឡើងតួនាទីនេះដែរ។
លោកបានមានប្រសាសន៍ថា “ឪពុករបស់ខ្ញុំបានអប់រំខ្ញុំច្រើនណាស់ឱ្យបម្រើប្រជាពល រដ្ឋ និងមានទំនាក់ទំនងជាមួយសង្គម។ តាមរយៈបទពិសោធន៍របស់ខ្ញុំនៅសាលារាជធានីភ្នំពេញ ខ្ញុំបានបម្រើប្រជាពលរដ្ឋក្នុងមូល ដ្ឋាន បានដោះស្រាយបញ្ហាជាច្រើនដែលប្រជាពលរដ្ឋកំពុងប្រឈម និងបានរៀបចំប្រព័ន្ធរដ្ឋបាលជាដើម”។
លោកបានថ្លែងថា លោកទទួលបានព័ត៌ មានពីការងារថ្មីនេះតាមរយៈការហៅទូរស័ព្ទ ផ្ទាល់ពីលោកនាយករដ្ឋមន្ត្រី ហ៊ុន សែន កាលពីសប្ដាហ៍មុន។
លោក ឡុង ឌីម៉ង់ បានមានប្រសាសន៍ថា “សម្ដេចតេជោ យល់ថា ខ្ញុំអាចធ្វើការងារនេះបាន។ វាមិនទាក់ទងសាច់ញាតិរបស់ខ្ញុំ ឬឪពុករបស់ខ្ញុំឡើយ”។
លោកបានមានប្រសាសន៍ថា ”ខ្ញុំត្រូវប្រយ័ត្នប្រយែង ពីព្រោះនេះជាកន្លែងថ្មីសម្រាប់ខ្ញុំ។ ប៉ុន្តែ ខ្ញុំមានបទពិសោធន៍មួយចំនួនទាក់ទងទំនងអន្តរជាតិដូចជា ខ្ញុំបានសិក្សាអំពីទ្រឹស្ដី ខ្ញុំមានបទពិសោធន៍ផ្នែករដ្ឋ បាល ជាពិសេសក្នុងទំនាក់ទំនងសាធារណៈជាមួយសង្គម”។
អ្នកមុនលោកដែលកាន់តំណែងក្នុងនាមជាបេសកជនកំពូលប្រចាំប្រទេសកូរ៉េខាងត្បូងបានពីរឆ្នាំត្រូវបានចោទប្រកាន់ពីបទរំលោភអំណាច រួមមានទាំងការព្រមានពីលោក ហោ ណាំហុង អតីតរដ្ឋមន្ត្រីក្រសួងការបរទេសរឿងបក្ខពួកនិយមផងដែរ។
គណបក្សប្រឆាំងក៏បានរិះគន់លោក ស៊ុត ឌីណា ផងដែរចំពោះការប្រើប្រាស់ស្ថានទូតបម្រើឱ្យការងារគណបក្សប្រជាជនកម្ពុជា ហើយបានគំរាមពលករចំណាកស្រុកដែលបានចូលរួមក្នុងការជួបជុំគ្នារបស់គណបក្សសង្គ្រោះជាតិ។
លោក ស៊ុត ឌីណា ដែលមានបទពិសោធន៍ ដំបូងជាសកម្មជននិស្សិត និងជាអ្នករិះគន់រដ្ឋាភិបាល បានចូលរួមជាមួយគណបក្សប្រជាជនកម្ពុជាក្នុងឆ្នាំ២០០៩ ហើយត្រូវបានតែងតាំង ជាអនុរដ្ឋលេខាធិការក្រសួងការបរទេស។ លោកបានក្លាយជាឯកអគ្គរាជទូតប្រចាំប្រទេសកូរ៉េខាងត្បូងក្នុងឆ្នាំ២០១៤។
លោក ឡុង ឌីម៉ង់ បានមានប្រសាសន៍ថា លោកត្រូវសិក្សាពីស្ថានភាពនោះដោយប្រុងប្រយ័ត្នមុនពេលចូលប្រឡូកក្នុងឆាកនយោបាយ។ លោកបានថ្លែងថា ”នេះជាសមរភូមិនយោបាយថ្មីសម្រាប់ខ្ញុំ ដូច្នេះខ្ញុំត្រូវការពេល វេលាដើម្បីសិក្សា ស្រាវជ្រាវ និងដោះស្រាយបញ្ហាទាំងនោះ”។
លោក ជុំ សុន្ទរី អ្នកនាំពាក្យក្រសួងការបរទេសមិនអាចទាក់ទងបានទេកាលពីម្សិល មិញ ប៉ុន្តែលោកបាននិយាយការពារការតែងតាំងលោក ឡុង ឌីម៉ង់ នៅក្នុងបទសម្ភាសន៍ជាមួយគេហទំព័រព័ត៌មាន Fresh News។
លោក ជុំ សុន្ទរី ត្រូវបានដកស្រង់សម្ដីដែលនិយាយថា “ការជ្រើសរើសលោក ឡុង ឌីម៉ង់ ជាឯកអគ្គរាជទូតប្រចាំប្រទេសកូរ៉េខាងត្បូងនេះផ្អែកតាមគុណសម្បត្តិរបស់គាត់ មិនមែនផ្អែកលើទំនាក់ទំនងគ្រួសារ ឬហេតុផលអ្វីផ្សេងឡើយ”។ លោកបានបន្ថែមថា ការងាររបស់គាត់នៅសាលារាជធានីបានធ្វើឲ្យគាត់រៀបចំខ្លួនសម្រាប់ការងារនេះ។
លោកត្រូវបានដកស្រង់សម្តីទៀតថា “គាត់ មានបទពិសោធន៍ក្នុងការទំនាក់ទំនងជាមួយភ្ញៀវអន្តរជាតិ និងគណៈប្រតិភូនៃស្ថានទូតនានាជាដើម”៕ សារុន