35 C
Phnom Penh

រដ្ឋាភិបាល​និយាយ​ថា ទឹក​សមុទ្រ​ខេត្ត​កែប​មាន​សុវត្ថិភាព

ដោយ ឌឹ ខេមបូឌា ដេលី

បទវិភាគ

យោង​តាម​សេចក្តី​ប្រកាស​ព័ត៌មាន​ឲ្យ​ដឹង​ថា បន្ទាប់ពី​ចេញ​ការ​ព្រមាន​ជា​សាធារណៈ​នៅ​ដើម​ខែ​នេះ​សម្រាប់​ខេត្ត​កែប​ដោយសារ​កំណើន​ស្លែ​ក្នុង​ទឹក​តាម​ឆ្នេរ កាលពី​ថ្ងៃ​សុក្រ រដ្ឋាភិបាល​បាន​ដក​បម្រាម​បង្ការ​ជា​មុន​លើ​ការ​ហែល​ទឹក នេសាទ​និង​បរិភោគ​អាហារ​សមុទ្រ​ក្នុង​ខេត្ត​នេះ។

ទឹក​សមុទ្រ​តាម​ឆ្នេរ​មាន​កំណើន​ស្លែ​ច្រើន គឺ​ជា​បាតុភូត​ធម្មជាតិ​ដែល​កើត​មាន​ឡើង​ក្នុង​តំបន់​នោះ​រាល់​ឆ្នាំ ដែល​ធ្វើ​ឲ្យ​មាន​ការ​ព្រួយ​បារម្ភ នៅ​ពេល​ដែល​មួយ​ផ្នែក​នៃ​ជីវិត​ងាប់​ក្នុង​សមុទ្រ​បាន​ចាប់​ផ្តើម​ហូរ​មក​ច្រាំង។

ប៉ុន្តែ​បន្ទាប់ពី​ការ​ធ្វើ​តេស្ត​ទឹក​ពី​ប្រាំពីរ​តំបន់​ដែល​ប៉ះពាល់ ក្រសួង​បរិស្ថាន​បាន​និយាយ​ក្នុង​សេចក្តី​ប្រកាស​ដែល​ចេញ​កាលពី​ថ្ងៃ​សុក្រ​ថា ក្រសួង​រក​មិន​ឃើញ​ភ័ស្តុតាង​ដែល​ថា​ការ​ឡើង​ស្លែ​អាច​ធ្វើ​ឲ្យ​គ្រោះ​ថ្នាក់​ដល់​ជីវិត​មនុស្ស​ឬ​ជីវិត​សត្វ​សមុទ្រ​ទេ។

សេចក្តី​ប្រកាស​ដដែល​បាន​ឲ្យ​ដឹង​ថា “លទ្ធផល​បង្ហាញ​ថា គុណភាព​ទឹក​នៅ​តំបន់​រង​ផល​ប៉ះពាល់​មិន​មាន​ជាតិពុល​ទេ”។

លោក កែន សត្ថា អភិបាល​ខេត្ត​កំពត បាន​មាន​ប្រសាសន៍​កាលពី​ថ្ងៃ​អាទិត្យ​ថា ទឹក​សមុទ្រ​តាម​ឆ្នេរ​គឺ​ក្តៅ​ប្លែក​ពី​ធម្មតា នៅ​ពេល​ដែល​ការ​ឡើង​ស្លែ​បាន​លេច​ឡើង​ដំបូង​នៅ​ថ្ងៃ​ទី​៣១​ខែ​មីនា បណ្តាល​ឲ្យ​ទឹក​ប្រែ​ជា​បៃតង ប៉ុន្តែ​ទឹក​សមុទ្រ​ឡើង​ថ្លា​វិញ ខណៈ​ដែល​ធាតុ​អាកាស​ចុះ​ត្រជាក់​មក​ត្រឹម​កម្រិត​ធម្មតា​៣២​អង្សា។

លោក សត្ថា បាន​និយាយ​ថា “នៅ​ពេល​នោះ សីតុណ្ហភាព​ខ្ពស់​ណាស់ ដែល​បាន​បង្កើន​ចំនួន​ប្លង់តុង​ក្នុង​តំបន់​ទឹក​រាក់ ធ្វើ​ឲ្យ​ខ្វះ​អុកស៊ីហ្សែន​បណ្តាល​ឲ្យ​ងាប់​ជីវិត​នៅ​ក្នុង​សមុទ្រ”។

លោក​បាន​បន្ថែម​ថា ក្រុម​មន្ត្រី​ខេត្ត​មាន​ផែនការ​ដោះ​ស្រាយ​បញ្ហា​នេះ​នៅ​ពេល​ខាង​មុខ។

លោក​បាន​និយាយ​ថា “នៅ​ពេល​ណា​ការ​រីក​សាយ​នៃ​សារាយ​លេច​ឡើង មន្ត្រី​របស់​យើង​នឹង​បើក​កាណូត​កាត់​វា ដើម្បី​បំបែក​វា ធ្វើ​ដូច្នេះ​មិន​មាន​ការ​ថយ​ចុះ​អុកស៊ីហ្សែន ហើយ​ជីវិត​នៅ​ក្នុង​សមុទ្រ​មិន​ងាប់​ទេ”។

លោក សត្ថា បាន​និយាយ​បន្ថែម​ថា ជា​ធម្មតា​ភ្ញៀវ​ទេសចរ​ប្រហែល​៥.០០០​នាក់​មក​លេង​កែប​ក្នុង​មួយ​សប្តាហ៍ ប៉ុន្តែ​តួលេខ​នេះ​បាន​ធ្លាក់​ចុះ​ក្រោម​២.០០០​នាក់​កាលពី​សប្តាហ៍​មុន។

លោក ហេង សុធារិទ្ធ អ្នក​គ្រប់គ្រង​ភោជនីយដ្ឋាន Holy Crab នៅ​ផ្សារ​ក្តាម​ខេត្ត​កែប បាន​និយាយ​ថា នៅ​ពេល​លោក​បាន​ឮ​ដំបូង​អំពី​កំណើន​ជាតិ​ពុល​ដែល​អាច​មាន លោក​សម្រេច​ថា​នឹង​បិទ​ហាង​មួយ​សប្តាហ៍ ប៉ុន្តែ​លោក​បាន​បើក​វិញ​កាលពី​ថ្ងៃ​សៅរ៍។

ទោះ​ជា​យ៉ាង​នេះ​ក្តី លោក​បាន​និយាយ​ថា ការ​រកស៊ី​មិន​ទាន់​វិល​មក​ភាព​ធម្មតា​វិញ​ទេ។

លោក​បាន​និយាយ​ថា “តាម​ធម្មតា​យើង​មាន​មនុស្ស​ប្រហែល​២០​ទៅ​២៥​នាក់​ក្នុង​មួយ​ពេល ប៉ុន្តែ​ថ្ងៃ​នេះ​យើង​មាន​ភ្ញៀវ​តែ​៦​នាក់​ប៉ុណ្ណោះ”៕ និត

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស