28 C
Phnom Penh

លោក ហ៊ុន សែន ៖ គ្មាន​​​​ការ​ប្រើ​​​​ប្រាស់​​​​អភ័យ​ឯក​សិទ្ធិ​​សម្រាប់​តំណាង​រាស្ត្រ​​ដែល​ជាប់​ពន្ធនា​​​គារ​​

ដោយ ឌឹ ខេមបូឌា ដេលី

បទវិភាគ

កាលពី​ម្សិលមិញ លោក ហ៊ុន សែន បាន​ចេញ​​​មុខ​​​ការ​ពារ​​​ការ​ចាប់​ខ្លួន​លោក អ៊ុំ សំអាន ​​​តំណាង​រាស្ត្រ​គណបក្ស​សង្គ្រោះ​​ជាតិ​​កាលពី​ថ្ងៃ​ច័ន្ទ ទាក់​ទិន​សារ​បង្ហោះ​តាម​ហ្វេសប៊ុក​​​រាប់​ខែ​ ដោយ​បញ្ជាក់​​​​​​​ថា លោក​មិន​ត្រូវ​បាន​ការ​ពារ​ដោយ​​អភ័យឯកសិទ្ធិ​​​​​​តំណាង​​​​​​រាស្ត្រ​​​​​ឡើយ​ ​​​ពីព្រោះ​​​​​​​​​បើ​​​​​​​តាម​លក្ខណៈ​បច្ចេកទេស​​គឺលោក​​​​​ត្រូវ​បាន​​ចាប់​ខ្លួន​ពេល​កំពុង​ប្រព្រឹត្ត​បទ​ល្មើស​។

លោក អ៊ុំ សំអាន ត្រូវ​បាន​ចាប់​ខ្លួន​​កាលពី​​ពេល​​រំលង​អធ្រាត្រ​ឈាន​ចូល​ព្រឹក​ថ្ងៃ​ច័ន្ទ​​បន្ទាប់ពី​​​​​​​​វិល​​​​​​​​​ត្រឡប់ពី​​​​​​​​​​​​សហរដ្ឋអាមេរិក វិញ​​​ក្រោយ​​​​និរទេស​ខ្លួន​អស់​រយៈ​ពេល​ជាច្រើន​ខែ​​ និង​ត្រូវ​បាន​ចោទ​ប្រកាន់​កាលពី​ព្រឹក​ម្សិល​​​​មិញ​ពីបទ “​ញុះញង់​ឲ្យ​ប្រព្រឹត្ត​បទល្មើស​ បង្ក​ចលា​ចល​ដល់​សន្តិសុខ​សង្គម​” និង​​​​បទ “​ញុះ​ញង់​ឲ្យ​មាន​ការ​​រើស​អើង​” ថ្វីបើ​​​លោក​មាន​អភ័យ​ឯកសិទ្ធិ​ក្ដី​។

ដីកា​មួយ​​ដែល​ចុះ​ហត្ថលេខា​ដោយ​ចៅ​ក្រម​​​​ស៊ើបសួរ តុប ឈុនហេង​ នៃសាលា​ដំបូង​​​​​​​រាជធានី​ភ្នំពេញ ដែល​បង្គាប់​ឲ្យ​ឃុំខ្លួន​លោក អ៊ុំ ​​​​សំអាន ជា​បណ្ដោះ​អាសន្ន​នៅ​ពន្ធនា​​​គារ​ព្រៃស​ ​​​ក្នុង​រាជធានី​ភ្នំពេញ បញ្ជាក់​​​​​​​ថា លោក​ ​​​​​​​អ៊ុំ សំអាន ​​​​បាន​ប្រព្រឹត្ត​បទល្មើស​​ “​នៅ​ថ្ងៃទី១០ ​​​ខែ​មេសា ក្នុង​ប្រទេស​កម្ពុជា​” ជា​ថ្ងៃ​ដែល​លោក​​​​​​​វិល​ត្រឡប់​​​​​​មក​ពី​សហរដ្ឋ​អាមេរិក​វិញ​។ ទោះ​ជាយ៉ាង​ណា​ មន្ត្រី​និយាយ​ថា ការ​អះអាង​​​ទាំង​​​នេះ​​​ប្រឆាំង​លោក អ៊ុំ សំអាន ពាក់​ព័ន្ធ​​សារដែល​​​​​​​​​​លោក​បាន​​​បង្ហោះ​​​តាម​អុីនធឺណិត​​​​ពី​សហរដ្ឋ​អាមេរិក​កាលពី​ឆ្នាំ​មុន​ ​ដែល​ចោទ​ប្រកាន់​គណបក្ស​ប្រជាជន​កម្ពុជា​ថា ប្រើ​ប្រាស់​ផែនទី​វៀតណាម ​សម្រាប់​ការ​កំណត់ព្រំដែន​ និង​អះអាង​ថាខ្លួន​​​​​​មាន​ផែនទី​​ដែល​ត្រឹម​ត្រូវ​។

ថ្លែង​ក្នុង​ពិធី​​មួយ​​រៀបចំ​ឡើង​សម្រាប់​​យោធិន​​​ពិការ​នៅ​ខេត្ត​សៀមរាប​​កាលពី​ម្សិល​​មិញ លោក ហ៊ុន សែន បាន​ព្យាយាម​បក​ស្រាយ​​​​ពីភាព​ខុស​គ្នា​នេះ​។

លោក​ថ្លែង​ថា សារ​ដែល​​​​​លោក​ អ៊ុំ សំអាន បាន​បង្ហោះ​តាម​បណ្ដាញ​ទំនាក់​​ទំនង​សង្គម​កាលពី​​៦​ខែ​មុន​ មិន​ដែល​ត្រូវ​​​​បាន​លុប​ចោល​ទេ ហើយ​គឺនៅ​តែ​​​ដដែល ​មាន​ន័យ​ថា តំណាង​រាស្ត្រ​រូប​នេះ​​កំពុង​​​បន្ត​​​​ប្រព្រឹត្តស​បទល្មើស​។

លោក​បាន​​​មាន​ប្រសាសន៍​ថា “​កុំ​និយាយ​ថា លោក​ឯង​មាន​អភ័យ​ឯកសិទ្ធិ​​ ​ហើយ​គេ​មិន​អាច​ចាប់​ខ្លួន​លោក​ឯង​បាន​​​នោះ ព្រោះ​វា​ជា​បទល្មើស​ជាក់​ស្ដែង​។ ពេល​នេះ​​ម៉ោង​នេះ ​​ទំព័រ​​របស់​លោក​ឯង​នៅ​តែ​និយាយ​អំពី​ផែន​ទី​ក្លែង​ក្លាយ​នៅ​ឡើយ​ទេ”។

បម្រាម​​​ក្នុង​​​រដ្ឋធម្មនុញ្ញ​លើការ​ចាប់​ខ្លួន​តំណាង​រាស្ត្រ​​ដោយ​គ្មាន​ការ​យល់​ព្រម​​​​​​​ដោយ​​​​​សំឡេង​​២ភាគ៣នៃ​រដ្ឋសភា លើក​លែង​សម្រាប់​​​ករណី​ ”​បទ​ល្មើស​​ជាក់​ស្ដែង” ឬ​​ត្រូវ​បាន​ចាប់ខ្លួន​ពេល​កំពុង​ប្រព្រឹត្ត​បទ​ល្មើស​ ហើយ​លោក​នាយក​រដ្ឋមន្ត្រី​ថ្លែង​ថា លោក អ៊ុំ សំអាន គួរ​តែ​ដឹង​រឿង​នោះ​។

លោក​បាន​បន្ត​ថា “ខ្ញុំ​មិន​ខ្វល់​ថា​លោក​ឯង​ជា​សមាជិក​សភា​ ឬ​សមាជិក​ព្រឹទ្ធសភា​នោះ​ទេ។ វា​ជា​បទល្មើស​ជាក់​ស្ដែង​ ព្រោះ​វា​ជា​ការ​ញុះញង់​ឈាន​ទៅ​រក​មហន្តរាយ​សម្រាប់​ប្រទេស​​​ជាតិ​​​​។ កុំ​អះអាង​ថា លោក​ឯង​មាន​អភ័យ​ឯកសិទ្ធ​​​ិឲ្យ​​​​​​សោះ ​ពេល​លោក​ឯង​ប្រព្រឹត្ត​​​បទល្មើស​ជាក់​ស្ដែង​”។

លោក សុន ឆ័យ តំណាងរាស្ត្រគណបក្សសង្គ្រោះជាតិ អមដោយតំណាងរាស្ត្រពីររូបទៀត ថ្លែងអំឡុងសន្និសីទកាសែតនៅទីស្នាក់ការកណ្ដាលរបស់គណបក្សនេះ ក្នុងរាជធានីភ្នំពេញ កាលពីម្សិលមិញ។ រូបថតដោយ ស៊ីវ ចាន់ណា / ឌឹ ខេមបូឌា ដេលី
លោក សុន ឆ័យ តំណាងរាស្ត្រគណបក្សសង្គ្រោះជាតិ អមដោយតំណាងរាស្ត្រពីររូបទៀត ថ្លែងអំឡុងសន្និសីទកាសែតនៅទីស្នាក់ការកណ្ដាលរបស់គណបក្សនេះ ក្នុងរាជធានីភ្នំពេញ កាលពីម្សិលមិញ។ រូបថតដោយ ស៊ីវ ចាន់ណា / ឌឹ ខេមបូឌា ដេលី

លោក​ ហ៊ុន សែន ​លើក​ឡើង​ទៀត​ថា ការ​​​ចាប់​ខ្លួន​លោក អ៊ុំ សំអាន ​តាម​មាត្រា​​ស្ដីពី​ “​បទល្មើស​ជាក់​ស្ដែង​” មាន​ន័យ​ថា គណបក្ស​ប្រជាជន​កម្ពុជា​ មិន​ចាំបាច់​​ស្វែង​រក​​សំឡេង​២​ភាគ៣នៅ​ក្នុង​រដ្ឋសភា​ ដើម្បី​​ដក​អភ័យ​ឯក​សិទ្ធិ​របស់​​​លោក​​ឡើយ​។ ការ​ដក​អភ័យ​ឯកសិទ្ធិ​​​​​របស់​​​អ្នក​នយោ​បាយ​​​​បក្ស​ប្រឆាំង​ គឺ​ជា​ស្នៀត​ដែល​គណបក្ស​ប្រជាជន​កម្ពុជា ​ចូល​ចិត្ត​ប្រើ​ក្នុង​អាណត្តិ​កន្លង​មក។

ប៉ុន្តែ​ចាប់​តាំង​ពី​ឆ្នាំ​២០១៣​មក គណ​បក្ស​​​​​​នេះ​​​លែង​ទទួល​បាន​សំឡេង​​​​​ភាគ​​​ច្រើន​លើស​​​លប់​នៅ​ក្នុង​សភា ​ដើម្បី​ធ្វើ​ដូច្នេះ​ទៀត​ហើយ ​​នៅ​​​ពេល​​​​ខ្លួន​ទទួលបាន​តែ​៦៨​នៃ​​​​​អាសនៈ​​​​​​ទាំង​​​​​​​១២៣​អាសនៈ​របស់​រដ្ឋសភា​ ខណៈ​គណបក្ស​សង្គ្រោះ​ជាតិ​​ទទួល​បាន​​៥៥​អាសនៈ​។

លោក ហ៊ុន សែន ​បាន​មាន​ប្រសាសន៍​ថា “​រដ្ឋ​សភា​នឹង​មិន​និយាយ​អំពី​ការ​ដក​អភ័យ​ឯកសិទ្ធិ​របស់​លោក​ឯង​ទេ ពីព្រោះ​លោក​ឯង​​​​ត្រូវ​បាន​ចាប់​ខ្លួន​ពីបទល្មើស​ជាក់​ស្ដែង​។ យើង​​​​​គ្រាន់​តែ​​​​ត្រូវ​​​ស្នើ​ទៅ​រដ្ឋសភា​​​​​​ថា តើ​យើង​​​​​​​​ដំណើរ​ការ​ក្ដី​​នេះ​ទៅ​មុខ​ទៀត​ឬ​អត់​​?”។

ជំហរ​របស់​លោក​នាយក​រដ្ឋមន្ត្រី​​កម្រ​មាន​​​​ការ​ប្រឆាំង​ពី​គណបក្ស​របស់​លោក​​​​ជា​​​​​​សាធា​រណៈ​​​​​​ណាស់ ហើយ​តំណាង​រាស្ត្រ​៦៣​រូប​ក្នុង​ចំណោម​តំណាង​រាស្ត្រ​ទាំង​អស់​របស់​ខ្លួន​នៅ​ក្នុង​រដ្ឋសភា​កាល​ពី​ពេល​រសៀល បាន​បោះ​ឆ្នោត​ជាមួយ​លោក​​ដើម្បីអនុញ្ញាត​​​​​​ឲ្យ​​​​​បន្ត​​​ដំណើរ​ការ​ករណី​អភ័យ​ឯកសិទ្ធិ​របស់​លោក អ៊ុំ សំអាន។

លោក ហេង សំរិន ប្រធាន​រដ្ឋសភា​​បាន​មាន​ប្រសាសន៍​បន្ទាប់ពី​ការ​បោះ​ឆ្នោត​ថា ​”​ខ្ញុំ​សូម​ប្រកាស​ជា​សាធារណៈ​ថា សម័យ​ប្រជុំ​សភា​បាន​អនុម័ត​ឲ្យ​ក្រសួង​ពាក់​ព័ន្ធ​​ធ្វើ​ការ​ចោទ​ប្រកាន់​ ចាប់​ខ្លួន​ និង​ឃុំខ្លួន​ឯក​ឧត្ដម​ អ៊ុំ សំអាន ចាប់ពី​ពេល​នេះ​តទៅ​”។

ការ​បោះ​ឆ្នោត​នេះ​ត្រូវ​បាន​​តំណាង​រាស្ត្រ​​ទាំង​៥៥​រូប​របស់​គណបក្ស​សង្គ្រោះ​​ជាតិ ​ធ្វើ​ពហិការ​។

លោក សម រង្ស៊ី ប្រធាន​គណបក្ស​ប្រឆាំង​​​​ដែល​កំពុង​​និរទេស​ខ្លួន​​​នៅ​​​​​​​​​បរទេស​​​​​​​ដើម្បី​គេចវេះ​​ពី​​​​​​​​​​ការ​​​ជាប់​​​ទោស​​​​ព្រហ្មទណ្ឌ​នៅ​​​​កម្ពុជា ​​បាន​ថ្លែង​​ថា ​​​ការ​​​​​​​សម្រេច​​​​​​​​​​​​ធ្វើ​​​​​​​​ពហិការ​​​​​​នេះ​​​​គឺ​​​​ដើម្បី​​​​​​​​​ជំទាស់​​​ការ​ចាប់​​​​​​ខ្លួន​​​​​​លោក ​អ៊ុំ សំអាន។

លោក​បាន​បន្ត​ថា ”​គណបក្ស​ប្រជាជន​​ចង់​​​​​​បញ្ជាក់​​​​​​​​​ថា ការ​ឃុំខ្លួន​លោក អ៊ុំ សំអាន គឺជា​​​​​​​​​​​​​​​រឿង​​​​​​សម​​​​​​ហេតុ​​​​​​ផល​​​។ ប៉ុន្តែ​លោក អ៊ុំ សំអាន មិន​​​​​គួរ​ត្រូវ​បាន​ចាប់​ខ្លួន​តាំង​ពី​ដំបូង​​​​ម៉្លេះ” ដោយ​អះអាង​ថា ​គណបក្ស​ប្រជាជន​កម្ពុជា ​​​ចាំ​​​​​​បាច់​​​ត្រូវ​​ទទួល​បាន​សំឡេង​​គាំទ្រ​២ភាគ៣​ដើម្បី​ដក​អភ័យ​ឯកសិទ្ធិ​របស់​លោក។

ទោះ​ជាយ៉ាង​ណា ការ​ឃុំខ្លួន​​តំណាង​រាស្ត្រ​​គណបក្ស​ប្រឆាំង​ដោយគ្មាន​សំឡេង​​គាំទ្រ​ភាគច្រើន ​​​បាន​​​​​​ក្លាយ​​​​​​ជា​​​​​​ករណី​​​​​​​​​យុត្តិសាស្ត្រ​​​កាល​​​​​​ពី​ពេល​ថ្មីៗ​នេះ​។

លោក ហុង សុខហួរ សមា​ជិក​​​​​ព្រឹទ្ធសភា​មក​ពី​គណបក្ស​ សម រង្ស៊ី ​ត្រូវ​បាន​ដាក់​ពន្ធនាគារ​កាលពី​ខែ​សីហា ពាក់​ព័ន្ធ​វីដេអូ​​​​មួយ​ដែល​បង្ហោះ​តាម​ប្រព័ន្ធ​អុីនធឺណិត​។

គណបក្ស​ប្រជាជន​កម្ពុជា​ មាន​សំឡេង​២​ភាគ៣នៅ​​ក្នុង​ព្រឹទ្ធសភា​ដើម្បី​ដក​អភ័យ​ឯក​សិទ្ធិ​របស់​លោក ប៉ុន្តែ​​​គណបក្ស​នេះ​​​​បាន​សម្រេច​​​​​មិន​ដក​​ទេដោយ​អះអាង​ថា ​​​ការ​​​​​​​​​​​​បង្ហោះ​​​​​​​​​​​​​វីដេអូ​​​​​​​នោះ​​​តាមអុីនធឺណិត​​គឺ​ជា “បទ​ល្មើស​ជាក់​​​​​ស្ដែង​”។

បណ្ដា​អ្នក​វិភាគ​នយោ​បាយ​​​​​បាន​លើក​ឡើង​ថា ការ​បក​ស្រាយ​​ដ៏ទូលំ​ទូលាយ​​​នេះ​លើ​ករណី​លើក​លែង​ ធ្វើ​ឲ្យ​អភ័យ​ឯក​សិទ្ធិ​តំណាង​​​​រាស្ត្រ​គ្មាន​ន័យ​។

លោក សុន ឆ័យ តំណាង​រាស្ត្រ​គណបក្ស​សង្គ្រោះជាតិ ​​បាន​ធ្វើ​សន្និសីទ​កាសែត​នៅ​ទីស្នាក់​ការ​កណ្ដាល​​របស់​គណបក្ស​នេះក្នុង​រាជធានី​ភ្នំពេញ ​កាលពី​ព្រឹកម្សិលមិញ​ ដើម្បី​បញ្ចេញ​ទស្សនៈ​បែប​​​​​​ចង្អៀត​​​ជុំវិញ​អ្វី​ដែល​ហៅ​ថា “​បទល្មើស​ជាក់​ស្ដែង​”។

លោក​​បាន​ថ្លែង​ថា “​តាម​ដែល​ខ្ញុំ​ដឹង បុគ្គល​​​​តំណាង​រាស្ត្រ​អាច​​​​​​ត្រូវ​​​​ចាប់​ខ្លួន​ ​​​ប្រសិន​បើ​គាត់​​​សម្លាប់​មនុស្ស​។ យើង​ត្រូវ​បញ្ឈប់​គាត់​ ពីព្រោះ​​​​​​គាត់​នឹង​សម្លាប់​មនុស្ស​បន្ថែម​ទៀត ​ប្រសិន​បើ​​​យើង​រង់ចាំ​ដក​អភ័យ​ឯកសិទ្ធិ​របស់​គាត់​” ហើយ​​​​​ក៏​បាន​ច្រាន​ចោល​ការ​លើក​ឡើង​​ថា លោក​ អ៊ុំ សំអាន ​​បាន​ប្រព្រឹត្ត​បទល្មើស​​ផង​ដែរ​។

លោក​បាន​បន្ត​ថា “​លោក អ៊ុំ សំអាន មិន​បាន​ធ្វើ​អ្វី​ល្មើស​ច្បាប់​ទេ ពីព្រោះ​គាត់​គ្រាន់​តែ​​បញ្ចេញ​មតិ​ក្នុង​តួនាទី​របស់​លោក​​ជា​តំណាង​រាស្ត្រ​ប៉ុណ្ណោះ ហើយ​សមត្ថកិច្ច​មិន​អាច​បញ្ឈប់​​​​សិទ្ធិ​បញ្ចេញ​មតិ​នេះ​បាន​ទេ”។

ទោះ​ជាយ៉ាង​ណា លោក ហ៊ុន សែន​ ដែល​​​​ថ្លែង​សុន្ទរកថា​នៅ​ខេត្ត​សៀមរាប ​ក្នុង​ពេល​តំណាល​គ្នា​​នឹង​សន្និសីទ​កាសែត​របស់​លោក សុន ឆ័យ មិន​យល់​ស្រប​តាមឡើយ​។

លោក​បាន​ប្រកាស​ថា អ្នក​ណា​​ដែល​​​​​ប្រព្រឹត្ត​​​​តាម​បទល្មើស​របស់​លោក អ៊ុំ សំអាន នឹង​ត្រូវ​​​​ប្រឈម​​​​​​ជោគ​វាសនា​ដូច​គ្នា​។ លោក​​បញ្ជាក់​ថា “​បើ​លោក​ឯង​និយាយ​ពី​ផែន​ទី​ក្លែង​ក្លាយ​ ខ្ញុំ​នឹង​ចាប់​ខ្លួន​លោក​ឯង​ភ្លាម”៕ សុខុម (រាយការណ៍​បន្ថែម​ដោយ Alex Willemyns)​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស