កញ្ញា ស៊ន សៀវម៉ី ជើងឯកតេក្វាន់ដូកម្ពុជា បានសាងប្រវត្តិសាស្ត្រជាថ្មីម្តងទៀត កាលពីថ្ងៃសៅរ៍ បន្ទាប់ពីឈ្នះមេដាយមាសក្នុងការប្រកួតជម្រុះជើងឯកតេក្វាន់ដូទ្វីបអាស៊ីនិងបានក្លាយជាកីឡាការិនីទី១មិនធ្លាប់មានពីមុនមកដែលមានលក្ខណៈសម្បត្តិគ្រប់គ្រាន់សម្រាប់ការចូលរួមប្រកួតអូឡាំពិកហ្គេម។
ជ័យជម្នះ ផ្នែកកីឡាការិនីទម្ងន់ជាង៦៧គីឡូក្រាមក្នុងការប្រកួតជម្រុះនៅប្រទេសហ្វីលីពីន បានផ្តល់សិទ្ធិជាស្វ័យប្រវត្តិដល់កីឡាការិនីវ័យ២០ឆ្នាំរូបនេះ ដើម្បីចូលរួមប្រកួតនៅអូឡាំពិកហ្គេម ដែលនឹងចាប់ផ្តើមនៅទីក្រុង រីយូ៉ ដឺ ហ្សាណេរ៉ូ នៅខែសីហា។
កញ្ញា ស៊ន សៀវម៉ី បាននិយាយក្នុងវីដេអូ មួយបង្ហោះតាមហ្វេសប៊ុកថា “ឆ្នាំនេះ ខ្ញុំមិនបានចូលរួមសប្បាយចូលឆ្នាំថ្មីទេ ប៉ុន្តែខ្ញុំមានអារម្មណ៍សប្បាយជាងនោះ និងជាងការឈ្នះឆ្នោត៦ខ្ទង់ទៅទៀត”។
យោងតាមលោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជាឲ្យដឹងថា ថ្វីបើប្រទេសកម្ពុជាបានចូលរួមការប្រកួតកីឡាអូឡាំពិកហ្គេមរដូវក្តៅ៨លើកមកហើយចាប់តាំងពីឆ្នាំ១៩៥៦មក រួមទាំងការប្រកួតកីឡាអូឡាំពិកក្រុងឡុងដ៍ឆ្នាំ២០១២ផងក្តី ក៏អ្នកចូលរួមប្រកួតមុនៗសុទ្ធតែប្រកួតក្នុងនាមជាអ្នកទទួលបានសិទ្ធិអនុគ្រោះ មិនមែនតាមរយៈការឈ្នះការប្រកួតជម្រុះមុនការប្រកួតនោះទេ។
ដោយបានបង្កើតប្រវត្តិសាស្ត្ររួចហើយជាអ្នកទទួលមេដាយមាសទី១របស់ប្រទេសកម្ពុជានៅអាស៊ីហ្គេមជាមួយជ័យជម្នះរបស់ខ្លួននៅឆ្នាំ២០១៤នោះ កញ្ញា ស៊ន សៀវម៉ី បាននិយាយថា កញ្ញាមិនមានផែនការផ្សព្វផ្សាយវីដេអូអំពីជ័យជម្នះចុងក្រោយរបស់កញ្ញាទេ ព្រោះខ្លាចគូប្រជែងនាពេលអនាគតមើលដឹងបច្ចេកទេសរបស់កញ្ញា។
កញ្ញាបាននិយាយក្នុងវីដេអូបង្ហោះតាមហ្វេសប៊ុកថា ”ខ្ញុំមានវីដេអូអំពីការប្រកួតរបស់ខ្ញុំ ប៉ុន្តែ ខ្ញុំមិនបានបង្ហោះវាទេ ពីព្រោះ ខ្ញុំមិនចង់ឲ្យគូប្រកួតរបស់ខ្ញុំមើល ហើយឃើញចំណុចខ្សោយរបស់ខ្ញុំ។ ប៉ុន្តែប្រសិនបើខ្ញុំមានឱកាស ខ្ញុំនឹងបង្ហោះវាឲ្យអ្នកទាំងអស់គ្នាមើល”។
លោក ចំរើន បាននិយាយកាលពីម្សិលមិញថា បន្ទាប់ពីការប្រកួតវគ្គផ្តាច់ព្រ័ត្រកាលពីថ្ងៃសៅរ៍ គណៈកម្មាធិការជាតិអូឡាំពិកកម្ពុជាបានសម្រេចឲ្យ កញ្ញា សៀវម៉ី ធ្វើជាអ្នកតំណាងរបស់ប្រទេសកម្ពុជាទៅចូលរួមការប្រកួតនៅអូឡាំពិកក្រុងរីយ៉ូ។
លោកបាននិយាយថា ”គណៈកម្មាធិការអូឡាំពិកមានផែនការរួចហើយនៅឆ្នាំ២០១២ខិតខំរកឲ្យបានកីឡាករមានលក្ខណៈសម្បត្តិគ្រប់គ្រាន់ ដើម្បីឲ្យសុបិនរបស់យើងក្លាយជាការពិត”។
លោក ចំរើន និយាយថា ប្រទេសកម្ពុជានៅមានឱកាសមានកីឡាករពីររូបដែលមានលក្ខណៈសម្បត្តិគ្រប់គ្រាន់ដើម្បីតំណាងប្រទេសនៅក្រុងរីយ៉ូ ប្រសិនបើកីឡាករបោកចំបាប់ដែលត្រូវប្រកួតក្នុងវគ្គជម្រុះបោកចំបាប់អូឡាំពិកអាស៊ីនៅក្រុងអីុស្ថានប៊ុលនាខែឧសភា ទទួលបានជ័យជម្នះ៕ និត