អាជ្ញាធរមូលដ្ឋានបាននិយាយកាលពីម្សិលមិញថា នគរបាលកំពុងសម្របសម្រួលរកដំណោះស្រាយក្រៅប្រព័ន្ធតុលាការរវាងអ្នកបើកបររថយន្តពីរនាក់ដែលជាប់ពាក់ព័ន្ធការបើកបរក្នុងល្បឿនលឿនបង្កគ្រោះថ្នាក់ចរាចរណ៍ក្នុងខេត្តកំពង់ធំកាលពីថ្ងៃសៅរ៍ រួមទាំងបុរសម្នាក់ដែលបានរត់គេចពីកន្លែងកើតហេតុបន្ទាប់ពីដោះស្លាកលេខនគរបាលចេញពីរថយន្តតូយ៉ូតាទំនើបមួយគ្រឿងជាកម្មសិទ្ធិរបស់មន្ត្រីក្រសួងមហាផ្ទៃមួយរូបផងដែរ។
យោងតាមលោក រស់ សំអាង ស្នងការនគរបាលខេត្តបានឱ្យដឹងថា រថយន្តឡង់គ្រីស័រនេះបើកបរក្នុងល្បឿនលឿនកាត់ក្រុងស្ទឹងសែនកាលពីព្រឹកថ្ងៃសៅរ៍ ស្រាប់តែពេលនោះរថយន្តតូយ៉ូតាភីកអាប់មួយគ្រឿងដែលបើកបរក្នុងល្បឿនលឿនដែរនោះ បានបុកពីចំហៀងតែម្តង។
លោកបានថ្លែងថា “ដោយសារគ្មាននរណាម្នាក់ស្លាប់ យើងមិនបញ្ជូនពួកគេទៅតុលាការចំពោះការបើកបរក្នុងល្បឿនលឿននេះទេ ប៉ុន្តែផ្ទុយទៅវិញយើងបានជួយពួកគេឱ្យឈានដល់ការព្រមព្រៀងគ្នា។ ប្រសិនបើពួកគេមិនយល់ព្រម ករណីនេះនឹងត្រូវបញ្ជូនទៅតុលាការ”។
លោក រស់ សំអាង ថ្លែងថា រថយន្តឡង់គ្រីស័រនេះជាកម្មសិទ្ធិរបស់កូនប្រុសលោក យូ ស៊ុនឡុង រដ្ឋលេខាធិការក្រសួងមុខងារសាធារណៈ ជាមន្ត្រីក្រសួងមហាផ្ទៃម្នាក់ដែលលោកអះអាងថា មិនស្គាល់ឈ្មោះ ប៉ុន្តែថារថយន្តនេះត្រូវបានបើកដោយបុរសម្នាក់ទៀត ដែលបានចាកចេញពីកន្លែងកើតហេតុជាមួយស្ត្រីម្នាក់ដែលគេមិនស្គាល់ឈ្មោះ បន្ទាប់ពីដោះស្លាកលេខនគរបាលចេញពីរថយន្ត។
លោក ជឹម សុង នាយប៉ុស្តិ៍សង្កាត់ព្រៃតាហ៊ូបានមានប្រសាសន៍ថា លោក និងមន្ត្រីនគរបាលបួនប្រាំនាក់ទៀតនៅកន្លែងកើតហេតុនៅពេលអ្នកបើកបររថយន្តរូបនេះបានដោះស្លាកលេខនោះ។
លោកបានមានប្រសាសន៍ថា “ខ្ញុំមិនបានអនុញ្ញាតឱ្យអ្នកបើកបររូបនេះដោះស្លាកលេខទេ ប៉ុន្តែខណៈដែលខ្ញុំកំពុងធ្វើចរាចរណ៍ ដើម្បីឱ្យមនុស្សម្នាឆ្លងកាត់បាននោះ ខ្ញុំបានឃើញអ្នកបើកបររូបនេះដោះស្លាកលេខ ហើយដើរចេញទៅបាត់តែម្តង”។
យោងតាមច្បាប់ចរាចរណ៍បានឱ្យដឹងថា អ្នកដែលជាប់ពាក់ព័ន្ធក្នុងគ្រោះថ្នាក់ចរាចរណ៍មិនត្រូវចាកចេញពីកន្លែងកើតហេតុ ឬប្តូរទីតាំងវត្ថុតាងឡើយ ព្រោះអាជ្ញាធរមិនអាច ”កំណត់អត្តសញ្ញាណអ្នកដែលទទួលខុសត្រូវចំពោះគ្រោះថ្នាក់បានឡើយ”។
អ្នកបើកបររថយន្តភីកអាប់ឈ្មោះ ខាំ សំ អាយុ៣៩ឆ្នាំ បានចោទអ្នកបើបររថយន្តឡង់គ្រីស័រថា ស្រវឹងស្រា និងបើកបរខុសគន្លងផ្លូវ។ លោកបានថ្លែងថា មានតែការផ្តល់ប្រាក់សំណងចំនួន៥.០០០ដុល្លារប៉ុណ្ណោះទើបគាត់មិនដាក់ពាក្យបណ្តឹងទៅសាលាដំបូងខេត្ត។
លោក យូ ស៊ុនឡុង មន្ត្រីក្រសួងមុខងារសាធារណៈបានអះអាងថា រថយន្តនេះជាកម្មសិទ្ធិរបស់កូនប្រុសលោក ដែលលោកបានលើកឡើងថា បានបម្រើការងារនៅអគ្គស្នងការដ្ឋាននគរបាលជាតិក្នុងរាជធានីភ្នំពេញ ប៉ុន្តែបានបដិសេធមិនប្រាប់ឈ្មោះទេ។ លោកបានមានប្រសាសន៍ថា ក្មួយប្រុសរបស់លោក ដែលលោកក៏បានបដិសេធមិនបង្ហាញអត្តសញ្ញាណដែរនោះ ជាអ្នកបើកបររថយន្តនេះនៅពេលមានគ្រោះថ្នាក់នោះ។
លោកបានថ្លែងថា “ក្មួយប្រុសរបស់ខ្ញុំបានដោះស្លាកលេខចេញ ពីព្រោះយើងមិនចង់ឱ្យមនុស្សម្នាដឹងថារថយន្តនេះជារបស់នគរបាល។ ប៉ុន្តែ អាជ្ញាធរមូលដ្ឋានទាំងអស់ក្នុងខេត្តកំពង់ធំសុទ្ធតែដឹងថា រថយន្តនេះជារបស់កូនប្រុសខ្ញុំ”៕សារុន