យោងតាមតំណាងសហជីពនិងមន្ត្រីក្រសួងការងារឲ្យដឹងថា បុគ្គលិកជាង១០នាក់ដែលត្រូវបណ្តេញចេញពីភោជនីយដ្ឋានមួយកន្លែងក្នុងក្រុងភ្នំពេញកាលពីថ្ងៃច័ន្ទបន្ទាប់ពីមានជម្លោះមួយទាក់ទិននឹងប្រាក់ខែនៅថ្ងៃបុណ្យចូលឆ្នាំថ្មីនោះ ត្រូវបានឲ្យចូលធ្វើការវិញកាលពីថ្ងៃអង្គារ ក្រោយពីមានការតវ៉ាដែលជំរុញឲ្យមានការចរចាជាមួយថៅកែរបស់ខ្លួន។
បុគ្គលិកទាំងនោះបាននិយាយថា បុគ្គលិកចំនួន១៦នាក់នៅភោជនីយដ្ឋានអាហារសមុទ្រ ស៊ាវ ស៊ាវ ក្នុងខណ្ឌដូនពេញ បាននិយាយថា ពួកខ្លួនបានយកការឈប់សម្រាកមួយសប្តាហ៍សម្រាប់ចូលឆ្នាំថ្មី។ នៅពេលពួកខ្លួនត្រឡប់មកធ្វើការវិញនៅថ្ងៃច័ន្ទ ថៅកែរបស់ខ្លួនឈ្មោះ តាង សុខ លាង បានប្រាប់ពួកខ្លួនថា ពួកខ្លួនលែងមានការងារធ្វើហើយ។
ក្រុមនេះអះអាងថា ពួកខ្លួនត្រូវបានបណ្តេញចោលដោយមិនត្រឹមត្រូវ នៅពេលពួកខ្លួនមានសិទ្ធិយកការឈប់សម្រាកនៅអំឡុងពេលថ្ងៃបុណ្យជាតិ។ ទោះជាយ៉ាងនេះក្តី លោក សុខ លាង បាននិយាយថា លោកបានឲ្យពួកគេឈប់សម្រាកបីថ្ងៃនៅថ្ងៃបុណ្យចូលឆ្នាំចិន តាមការព្រមព្រៀងដែលចែងក្នុងកិច្ចសន្យានេះ ពួកគេត្រូវធ្វើការនៅថ្ងៃបុណ្យចូលឆ្នាំខ្មែរវិញ។
យឿន សារុន អាយុ២៤ឆ្នាំ ដែលបាននិយាយថា នាងបានធ្វើការ៨៤ម៉ោងក្នុងមួយសប្តាហ៍នៅភោជនីយដ្ឋាននេះ គឺស្ថិតក្នុងចំណោមបុគ្គលិកដែលបានតវ៉ានៅខាងក្រៅភោជនីយដ្ឋាននោះកាលពីថ្ងៃអង្គារ បានអះអាងថា ប្រាក់ខែរបស់នាងត្រូវបានកាត់ ហើយការបណ្តេញនាងចេញពីការងារគឺមិនត្រឹមត្រូវទេ។
នាងបាននិយាយថា “ខ្ញុំគ្រាន់តែចង់បានប្រាក់ខែរបស់ខ្ញុំ បន្ទាប់មកខ្ញុំនឹងទៅផ្ទះវិញ។ បើទោះជាគេឲ្យយើងចូលធ្វើការវិញក៏ដោយ ក៏អាចនឹងមានបញ្ហាដដែលនេះទៀតដូចដែលកំពុងកើតឡើងនៅពេលនេះ”។
លោក សុខ លាង បាននិយាយថា លោកបានធ្វើកិច្ចព្រមព្រៀងជាក់លាក់ជាមួយបុគ្គលិកធ្វើការនៅពេលបុណ្យចូលឆ្នាំខ្មែរជាថ្នូរនឹងប្រាក់បន្ថែម១៥ដុល្លារក្នុងមួយថ្ងៃឬមិនធ្វើការក៏បាន តែត្រូវកាត់ប្រាក់ខែ។ បើទោះជា លោកបានអះអាងថាបានធ្វើតាមច្បាប់ការងារក៏ដោយ លោកបានសម្រេចកាលពីថ្ងៃអង្គារឲ្យបុគ្គលិកចូលធ្វើការវិញ។
លោកបាននិយាយថា “ខ្ញុំបានសម្រេចយកពួកគេវិញ ពីព្រោះពួកគេយល់ការងារ។ បើខ្ញុំជួលអ្នកផ្សេង ខ្ញុំនឹងខាតពេលបង្ហាត់បង្រៀនពួកគេ”។
ហ៊ុន គឹមសេង មេដឹកនាំសហព័ន្ធសហជីពកម្មករចំណីអាហារនិងសេវាកម្ពុជា បាននិយាយថា លោករីករាយនឹងការសម្រេចរបស់លោ សុខ លាង ក្នុងការទទួលយកបុគ្គលិកទាំងនោះវិញ ហើយឲ្យពួកគេឈប់សម្រាកបួនថ្ងៃក្នុងមួយខែ ប៉ុន្តែថា ជម្លោះនេះនឹងមិនកើតឡើងជាថ្មីទៀតទេ។
លោកបាននិយាយថា “លក្ខខណ្ឌការងារគួរយកមកប្រើតាំងពីមុន។ ប្រសិនបើភោជនីយដ្ឋាននេះមានលក្ខខណ្ឌនេះពីមុនមក បញ្ហានេះប្រហែលមិនកើតឡើងទេ”៕ និត