សាក្សី​​​​​បញ្ជាក់​​​ថា ​​​របាយការណ៍​​​គ្រោះ​​​ថ្នាក់​​​​​​ចរាចរណ៍​​​ផ្លូវ​​​ការ​​​​​​គឺ​​​ខុស​​​

សាក្សី​​​បី​​​នាក់​​​​​​ដែល​​​បាន​​​ឃើញ​​​គ្រោះ​​​ថ្នាក់​​​ចរាចរណ៍​​​ដល់​​​មាន​​​មនុស្ស​​​​​​ស្លាប់​​​​​​នៅ​​​ក្នុង​​​ខេត្ត​​​កណ្តាល​​​​​​កាល​​​ពី​​​សប្តាហ៍​​​មុន​​​​​​​​​ដែល​​​ទាក់​​​ទង​​​នឹង​​​​​​មន្ត្រី​​​ក្រសួង​​​ទេសចរណ៍​​​ជាន់​​​ខ្ពស់​​​​​​មួយ​​​រូប​​​​​​បាន​​​ទាត់​​​ចោល​​​​​​របាយការណ៍​​​នរគបាល​​​​​​ចំពោះ​​​អ្វី​​​ដែល​​​បាន​​​កើត​​​ឡើង ដោយ​​​អះអាង​​​ថា គ្មាន​​​រថយន្ត​​​ទី​​​បី​​​​​​អាថ៌កំបាំង​​​​​​ដែល​​​អាជ្ញាធរ​​​​​​​​​បន្ទោស​​​​​​ថា​​​ជា​​​អ្នក​​​បង្ក​​​ទេ។​​​

យោង​​​តាម​​​នគរ​​​បាល​​​​​​ឲ្យ​​​ដឹង​​​ថា លោក នួន សុមេធ អនុរដ្ឋ​​​លេខា​​​ធិការ​​​​​​នៅ​​​ក្រសួង​​​​​​ទេសចរណ៍​​​និង​​​អតីត​​​​​​អភិបាល​​​រង​​​ក្រុង​​​ភ្នំពេញ​​​​​​បាន​​​បើក​​​​​​រថ​​​យន្ត​​​​​​តូយូតា ឡង់គ្រីស័រ​​​​​​របស់​​​លោក​​​នៅ​​​ថ្ងៃ​​​ទី​​​១២ ខែ​​​មេសា ដោយ​​​បើក​​​តាម​​​ផ្លូវ​​​ជាតិ​​​លេខ​​​មួយ​​​​​​ឆ្ពោះ​​​មក​​​ក្រុង​​​ភ្នំពេញ​​​ នៅ​​​ពេល​​​ដែល​​​​​​ឡានកូរ៉េ​​​​​​មួយ​​​គ្រឿង​​​​​​មក​​​ពី​​​មុខ​​​​​​បើក​​​តាម​​​​​​គំនូស​​​កណ្តាល​​​បាន​​​ទង្គិច​​​នឹង​​​​​​រថយន្ត​​​ស៊ូវ​​​នៅ​​​ខាង​​​ឆ្វេង​​​ដៃ​​​។​​​​​​

លោក ព្រំ សំណាង អធិការ​​​រង​​​ស្រុក​​​កៀន​​​ស្វាយ បាន​​​មាន​​​ប្រសាសន៍​​​កាល​​​ពី​​​ថ្ងៃ​​​ចន្ទ​​​ថា ការ​​​ប៉ះ​​​ទង្គិច​​​​​​បាន​​​ធ្វើ​​​ឲ្យ​​​​​​រថយន្ត​​​ស៊ូវ​​​​​​របស់​​​លោក សុមេធ ​​​​​​បែក​​​កង​​​់​​​មុខ​​​ខាង​​​ឆ្វេង ដែល​​​ធ្វើ​​​ឲ្យ​​​លោក​​​​​​គ្រប់​​​គ្រង​​​រថ​​​យន្ត​​​ពុំ​​​បាន ហើយ​​​ក៏​​​វេរ​​​​​​​​​ចូល​​​ទៅ​​​ផ្លូវ​​​គេ ហើយ​​​​​​បាន​​​បុក​​​ម៉ូតូ​​​មួយ​​​គ្រឿង​​​។​​​​​​​​​

លោក មិត្ត សុធា អាយុ​​​៣៨​​​ឆ្នាំ ដែល​​​កំពុង​​​បើក​​​ម៉ូតូ​​​ បាន​​​ស្លាប់​​​ភ្លាមៗ​​​នៅ​​​កន្លែង​​​កើត​​​ហេតុ។ ប្រពន្ធ​​​របស់​​​គាត់​​​ ឈ្មោះឃន យ៉េត កំពុង​​​សង្គ្រោះ​​​បន្ទាន់​​​ក្នុង​​​មន្ទីរ​​​កាល់​​​ម៉ែត​​​ក្នុង​​​ក្រុង​​​ភ្នំពេញ​​​កាល​​​ពី​​​ថ្ងៃ​​​អង្គារ​​​ដោយ​​​​​​សារ​​​តែ​​​របួសធ្ងន់​​​ពេក។​​​

កាល​​​ពី​​​ថ្ងៃ​​​ចន្ទ លោក លឹម សុគន្ធា ព្រះរាជ​​​អាជ្ញា​​​​​​តុលាការ​​​ខេត្ត​​​កណ្តាល បាន​​​មាន​​​ប្រសាសន៍​​​ថា ក្រុម​​​គ្រួសារ​​​លោក សុមេធ  បាន​​​បង់​​​ប្រាក់​​​៥.៥០០​​​ដុល្លារ​​​អាមេរិក​​​ឲ្យ​​​គ្រួសារ​​​​​​លោក មិត្ត​​​ សុធា។ លោក​​​បាន​​​បញ្ជា​​​ឲ្យ​​​ដោះ​​​លែង​​​លោក​​​អនុរដ្ឋ​​​លេខា​​​ធិការ​​​​​​ពី​​​ការ​​​ឃុំ​​​​​​របស់​​​នគរ​​​បាល​​​នៅ​​​ពេល​​​យប់​​​នោះ ដោយ​​​ហេតុ​​​​​​ថា​​​ការ​​​ប៉ះ​​​​​​គ្នា​​​​​​​ជាមួយ​​​ឡាន​​​កូរ៉េបាន​​​ធ្វើ​​​ឲ្យ​​​លោក​​​រួច​​​ទោស។​​​​​​

លោក សំណាង បាន​​​មាន​​​ប្រសាសន៍​​​ថា របាយការណ៍​​​នគរ​​​បាល​​​​​​គឺ​​​ផ្អែក​​​លើ​​​​​​កិច្ច​​​សម្ភាស​​​ជា​​​មួយ​​​​​​សាក្សី​​​​​​ពីរ​​​នាក់​​​ ហើយ​​​ថា​​​តាម​​​ការ​​​ចោទ​​​​​​ អ្ន​​​ក​​​​​​បើក​​​ឡាន​​​កូរ៉េ​​​​​​ដែល​​​បាន​​​បង្ក​​​ការ​​​បុក​​​គ្នា​​​បាន​​​​​​បើក​​​ឡាន​​​គេច​​​ចេញ​​​ពី​​​កន្លែង​​​កើត​​​ហេតុ ហើយ​​​​​​នៅ​​​តែ​​​គេច​​​ខ្លួន​​​នៅ​​​ឡើយ។​​​​​​​​​

ទោះ​​​ជាយ៉ាង​​​នេះ​​​ក្តី កាល​​​ពី​​​ថ្ងៃ​​​អង្គារ មាន​​​សាក្សី​​​បី​​​នាក់​​​ក្នុង​​​ហេតុការណ៍​​​​​​គ្រោះ​​​ថ្នាក់​​​នោះ​​​បាន​​​ផ្តល់​​​នូវ​​​ការ​​​រៀប​​​រាប់​​​ដូច​​​ៗ​​​គ្នា​​​​​​នៃ​​​អ្វី​​​ដែល​​​បាន​​​កើត​​​ឡើង ដោយ​​​ផ្ទុយ​​​គ្នា​​​នឹង​​​​​​របាយការណ៍​​​នគរ​​​បាល​​​ទៅ​​​វិញ។ សាក្សី​​​ទាំង​​​បី​​​នាក់​​​​​​បាន​​​និយាយ​​​ជាមួយ​​​អ្នក​​​យក​​​ព័ត៌មាន​​​​​​ក្នុង​​​លក្ខខណ្ឌ​​​មិន​​​ប្រាប់​​​ឈ្មោះ​​​​​​ព្រោះភ័យ​​​​​​ខ្លាច​​​ពី​​​សុវត្ថិភាព។​​​​​​​​​

យោង​​​តាម​​​សាក្សី​​​ទាំង​​​បី​​​ឲ្យ​​​ដឹង​​​ថា រថយន្ត​​​លោក សុមេធ​​​ មិន​​​​​​​​​បាន​​​បុក​​​នឹង​​​ឡាន​​​កូរ៉េ​​​ទេ ហើយ​​​បើក​​​បរ​​​ចូល​​​ទៅ​​​ក្នុង​​​ផ្លូវ​​​គេ​​​ ​​​ពេល​​​ដែល​​​រថយន្ត​​​នោះ​​​បាន​​​បុក​​​ម៉ូតូ។

សាក្សី​​​ម្នាក់​​​បាន​​​និយាយ​​​ថា “​​​ខ្ញុំ​​​កំពុង​​​អង្គុយ​​​​​​​​​ក្នុង​​​ហាង​​​ជួស​​​ជុល​​​ម៉ូតូ​​​នៅ​​​ថ្ងៃ​​​ដែល​​​​​​វា​​​​​​កើត​​​ឡើង។​​​ ខ្ញុំ​​​បាន​​​ឃើញ​​​​​​​​​ឡាន​​​បុក​​​​​​យ៉ាង​​​ខ្លាំង​​​នឹង​​​ម៉ូតូ​​​​​​ដែល​​​ដឹក​​​មនុស្ស។ អត់​​​​​​មាន​​​ឡាន​​​​​កូរ៉េ​​​​​​មក​​​បុក​​​ឡាន​​​តូច​​​​​​ដូច​​​ប៉ូលិស​​​និយាយ​​​នោះ​​​ទេ”។​​​

បុរស​​​ជា​​​សាក្សី​​​​​​រូប​​​នេះ​​​និយាយ​​​ថា”​​​ខ្ញុំ​​​​​​​​​ឃើញ​​​ឡាន​​​បុក​​​ម៉ូតូ​​​នៅ​​​ខាង​​​ឆ្វេង​​​ដៃ អ៊ីចឹង​​​ឡាន​​​នោះ​​​ខុស​​​ហើយ”។

សាក្សី​​​ទី​​​ពីរ​​​បាន​​​​​​និយាយ​​​ថា “​​​អត់​​​មាន​​​ឡាន​​​កូរ៉េ​​​បុក​​​ឡាន​​​តូច​​​នោះ​​​ទេ។ មាន​​​តែ​​​ឡាន​​​តូច​​​ទៅ​​​បុក​​​​​​ម៉ូតូ​​​តែ​​​ម្តង ព្រោះ​​​​​​ពេល​​​នោះ​​​​​​​​​ស្ងាត់​​​​​​ណាស់។​​​ អត់​​​មាន​​​ឡាន ឬ​​​ម៉ូតូ​​​ផ្សេង​​​​​​​​ទៀត​​​បើក​​​​ទេ”។

សាក្សី​​​ទី​​​បី​​​បាន​​​និយាយ​​​ដូច​​​គ្នា​​​ដែរ​​​ថា “​​​ខ្ញុំ​​​ឃើញ​​​តែ​​​ឡាន​​​បុក​​​ម៉ូតូ គឺ​​​ខ្ញុំ​​​អត់​​​បាន​​​ឃើញ​​​​​​ឡាន​​​ផ្សេង​​​ទៀត​​​​​​បើក​​​នៅ​​​ពេល​​​​​​មាន​​​គ្រោះ​​​ថ្នាក់​​​បាន​​​កើត​​​ឡើង​​​ទេ”។​​​

crash carរូប​​​ថត​​​នៃ​​​កន្លែង​​​កើត​​​ហេតុ​​​​​​ដែល​​​ថត​​​ដោយ​​​អ្នក​​​កាសែត​​​​​​ក្នុង​​​ស្រុក​​​ម្នាក់​​​​​​ភ្លាមៗ​​​​​​បន្ទាប់​​​ពី​​​គ្រោះ​​​ថ្នាក់​​​បាន​​​កើត​​​ឡើង​​​ បង្ហាញ​​​ថា រថយន្ត​​​ឡង់គ្រីស័រ​​​​​​ផ្អៀង​​​ទៅ​​​​​​ឆ្វេង​​​ដៃ​​​​​​នៅ​​​ក្រោម​​​ចិញ្ចើម​​​ថ្នល់​​​។​​​ ចំហៀង​​​មុខ​​​ខាង​​​ឆ្វេង​​​​​​ខុប​​​ចូល​​​គ្នា ប៉ុន្តែ​​​​​​កង់​​​មុខ​​​ខាង​​​ឆ្វេង​​​​​​​​​មិន​​​​​​ទំនង​​​ជា​​​​​​បែក​​​កង់​​​​​​ដូច​​​នគរ​​​បាល​​​បាន​​​អះ​​​អាង​​​ទេ។​​​ កង់​​​​​​ទំនង​​​ជា​​​ធូរ​​​នៅ​​​ក្នុង​​​រូប​​​ថត​​​​​​​​មួយ​​​ទៀត​​​ដែល​​​ថត​​​ក្រោយ​​​មក​​​​​​នៅ​​​ឯ​​​​​​ស្ថានីយ​​​នគរ​​​បាល​​​ស្រុក។​​​​​​​​​

ទាក់​​​ទង​​​កាល​​​ពី​​​ថ្ងៃ​​​​​​អង្គារ​​​ លោក សំណាង អធិការ​​​រង​​​ស្រុក បាន​​​អះ​​​អាង​​​តាម​​​​​​រ​​​បាយការណ៍​​​ដើម​​​​​​​​​របស់​​​លោក។​​​

អធិការ​​​រង​​​ស្រុក​​​រូប​​​នេះ​​​បាន​​​និយាយ​​​ថា “ឡាន​​​របស់​​​ឯកឧត្តម [​​​លោក សុមេធ​​​] គឺ​​​បុក​​​ដោយ​​​ឡានកូរ៉េ ដែល​​​បណ្តាល​​​ឲ្យ​​​ឡាន​​​នោះ​​​ទៅ​​​បុក​​​ម៉ូតូ​​​ ព្រោះ​​​​​​យើង​​​បាន​​​ឃើញ​​​ថា ឡាន​​ផ្នែក​​​ខាង​​​ឆ្វេង​​​​​​គឺ​​​ត្រូវ​​​ខូច​​​ធ្ងន់​​​ធ្ងរ។ ប្រសិន​​​បើ​​​ឡាន​​​បុក​​​ម៉ូតូ​​​ផ្ទាល់​​​ គឺ​​​ឡាន​​​របស់​​​គាត់​​​​​​នឹង​​​មិន​​​ខូច​​​ធ្ងន់​​​​​​ធ្ងរ​​​​​​​​​ដល់​​​ថ្នាក់​​​ហ្នឹង​​​ទេ”។

លោក សំណាង បាន​​​មាន​​​ប្រសាសន៍​​​កាល​​​ពី​​​ព្រឹក​​​ថា លោក​​​នឹង​​​ហៅ​​​​​​ទូរស័ព្ទ​​​មក​​​អ្នក​​​យក​​​ព័ត៌មាន​​​វិញ ​​​​​​ដើម្បី​​​ឲ្យ​​​​​​​​​​​​ឈ្មោះ​​​​​​សាក្សី​​​​​​ដែល​​​លោក​​​អះអាង​​​ថា​​​បាន​​​ប្រាប់​​​នគរបាល​​​​​​​​​អំពី​​​ឡាន​​​កូរ៉េ​​​​​​នោះ។​​​ អធិការ​​​រង​​​រូប​​​នេះ​​​មិន​​​បាន​​​ហៅ​​​ទូរស័ព្ទ​​​មក​​​វិញ​​​ទេ ហើយ​​​នៅ​​​ពេល​​​ទាក់​​​ទង​​​​​​ពេល​​​រសៀល​​​ លោក​​​បាន​​​និយាយថា លោក​​​មិន​​​ចាំ​​​ឈ្មោះ​​​សាក្សី​​​ទេ ហើយ​​​​​​មិន​​​អាច​​​រក​​​​​​ឈ្មោះ​​​បាន​​​ទេ ព្រោះ​​​លោក​​​​​​បាន​​​ចាក​​​ចេញ​​​ពី​​​ការិយាល័យ​​​​​​ហើយ។​​​

ចំពោះ​​​កង់​​​មុខ​​​ខាង​​​ឆ្វេង​​​​​​នៃ​​​រថយន្ត​​​ស៊ូវ លោក សំណាង​​​បាន​​​មាន​​​ប្រសាសន៍​​​ថា “អ្នក​​​ជំនាញ”​​​បាន​​​កំណត់​​​ថា វា​​​ប្រាកដ​​​ជា​​​បែកកង់​​​ ​​​​​​មុន​​​នឹង​​​​​​បុក​​​​​​ម៉ូតូ។​​​

អធិការ​​​រង​​​ស្រុក​​​រូប​​​នេះ​​​បាន​​​និយាយ​​​ថា “​​​​​​ខ្ញុំ​​​មិន​​​បាន​​​ឃើញ​​​ឡាន​​​នោះ​​​ភ្លាមៗ​​​ក្រោយ​​​ពី​​​គ្រោះ​​​ថ្នាក់​​​ទេ ប៉ុន្តែ​​​​​​យោង​​​តាម​​​អ្នក​​​វិនិច្ឆយ​​​​​​និង​​​អ្នក​​​ជំនាញ យើង​​​បាន​​​សន្និដ្ឋាន​​​ថា ​​​កង់​​​រថយន្ត​​​បាន​​​បែក។ នៅ​​​ពេល​​​យើង​​​បាន​​​ឃើញ​​​​​​ឡាន​​​នោះ​​​ ពេល​​​គេ​​​យក​​​មក​​​ដល់​​​​​​ស្ថានីយ​​​​​​ប៉ូលិស​​​ស្រុក កង់​​​វា​​​បែក”។

សាក្សី​​​ទី​​​មួយ​​​​​​ដែល​​​បាន​​​សម្ភាស​​​កាល​​​ពី​​​ម្សិល​​​មិញ​​​​​​ក៏​​​បាន​​​និយាយ​​​ថា ​​​បន្ទាប់​​​ពី​​​​​​គ្រោះ​​​ថ្នាក់​​​ភ្លាម​​​​​​ គាត់​​​បាន​​​ឮ​​​អ្នក​​​ជិះ​​​ម្នាក់​​​ក្នុង​​​ឡាន​​​​​​ឡង់គ្រីស័រ​​​ ជា​​​បុរស​​​វ័យ​​​ក្មេង​​​​​​បាន​​​ស្តី​​​បន្ទោស​​​​​​អ្នក​​​បើក​​​​​​​​រថយន្ត​​​ស៊ូវ​​​ ដោយសារ​​​តែ​​​​​​មិន​​​ស្តាប់​​​សម្តី​​​គាត់​​​​​​​​នៅ​​​​​​តែ​​​បើក​​​ពេល​​​ស្រវឹង។​​​

សាក្សី​​​នោះ​​​បាន​​​និយាយ​​​ថា “​​​ខ្ញុំ​​​គិត​​​ថា អ្ន​​​ក​​​បើក​​​ [ឡាន​​​ស៊ូវ]​​​ស្រ​​​វឹង​​​ស្រា បាត់​​​ស្មារតី ហើយ​​​ក៏​​​បង្ក​​​គ្រោះ​​​ថ្នាក់​​​”។​​​

លោក សំណាង បាន​​​និយាយ​​​ថា មិន​​​មាន​​​ឧបករណ៍​​​ធ្វើ​​​តេស្ត​​​កម្រិត​​​ជាតិ​​​អាកុល​​​ក្នុង​​​ឈាម​​​លោក សុមេធ​​​ នៅ​​​ថ្ងៃ​​​​​​​​​គ្រោះ​​​ថ្នាក់​​​នោះ​​​ទេ ប៉ុន្តែ​​​​​​ថា​​​មន្ត្រី​​​រូប​​​នោះ​​​មិន​​​ទំនង​​​ជា​​​ស្រវឹង​​​​​​ស្រា​​​ទេ​​​ នៅ​​​ពេល​​​គាត់​​​​​​បាន​​​មក​​​ដល់​​​ស្ថានីយ​​​នគរ​​​បាល​​​ស្រុក។​​​

លោក​​​បាន​​​និយាយ​​​ថា “​​​ខ្ញុំ​​​​​​ដឹង​​​ថា គាត់​​​មិន​​​ស្រវឹង​​​ទេ ព្រោះ​​​​​​យើង​​​​​​ឃើញ​​​ថាគាត់​​​ធ្វើ​​​ធម្មតា​​​ ពេល​​​គាត់​​​និយាយ​​​ជាមួយ​​​យើង ហើយ​​​អត់​​​មាន​​​ធុំ​​​ក្លិន​​​​​​ជាតិ​​​អាកុល​​​ទេ។ គាត់​​​ក៏​​​បាន​​​ប្រាប់​​​យើង​​​ថា ​​​គាត់​​​មិន​​​បាន​​​ហូប​​​ស្រា​​​ទេ”។​​​​​​

លោក សុមេធ មិន​​​អាច​​​ទាក់​​​ទង​​​​​​សុំ​​​ការ​​​អត្ថាធិប្បាយ​​​​​​កាលពី​​​ថ្ងៃ​​​អង្គារ​​​បាន​​​ទេ។​​​ លោក​​​បាន​​​ចុច​​បិទ​​​ទូរស័ព្ទ​​​ ពេល​​​ទាក់​​​ទង​​​​​​កាលពី​​​​​​​​​​​​ថ្ងៃ​​​ចន្ទ។​​​

លោក សារុំ សុខា ជា​​​ក្មួយ​​​ប្រុស​​​របស់​​​លោក មិត្ត​​​ សុធា អ្នក​​​បើក​​​ម៉ូតូ​​​ដែល​​​ស្លាប់​​​ក្នុង​​​គ្រោះ​​​ថ្នាក់​​​ បាន​​​និយាយ​​​​​កាល​​​ពី​​​ថ្ងៃ​​​អង្គារ​​​ថា អ្នកស្រី​​​ យ៉េត កំពុង​​​​​​ជួយ​​​សង្គ្រោះ​​​បន្ទាន់​​​នៅ​​​ឡើយ​​​​​​ក្នុង​​​មន្ទីរ​​​ពេទ្យ​​​កាល់​​​ម៉ែត។ លោក សុខា បាន​​​និយាយ​​​ថា បន្ថែម​​​លើ​​​​​​​​​ការ​​​បាក់​​​ឆ្អឹង​​​ក​​​ វេជ្ជ​​​បណ្ឌិត​​​​​​និយាយ​​​ថា ជើង​​​ឆ្វេង​​​និង​​​ដៃ​​​ឆ្វេង​​​​​​របស់​​​អ្នក​​​ស្រី​​​ក៏​​​បាក់​​​ដែរ ហើយ​​​ថា អ្នកស្រី​​​ប្រហែល​​​ជា​​​ពិការ​​​មួយ​​​ជីវិត។​​​​​​

លោក សុខា បាន​​​និយាយ​​​ថា ក្រុម​​​គ្រួសារ​​​​​​បានព្រម​​​ទទួល​​​យក​​​​​​ប្រាក់​​​៥.៥០០​​​ដុល្លារ​​​ ដែល​​​មាន​​​កិច្ច​​​សន្យា​​​ថា​​​មិន​​​​​​ប្តឹង​​​ផ្តល់​​​​​​ទេ ពី​​​ព្រោះ​​​​​​ពួកគេ​​​​​​ត្រូវ​​​ការ​​​ប្រាក់​​​កាស់​​​ ដើម្បី​​​បង់​​​​​​ថ្លៃ​​​ពេទ្យ។​​​

ក្រុម​​​សិទ្ធិ​​​មនុស្ស​​​បាន​​​និយាយ​​​ថា ពលរដ្ឋ​​​ខ្មែរ​​​ក្រី​​​ក្រ​​​​​​ជាញឹក​​​ញាប់​​​​​​យល់​​​ព្រម​​​​​​ដោះ​​​ស្រាយ​​​ក្រៅ​​​ប្រព័ន្ធ​​​តុលាការ​​​ ពីព្រោះ​​​​​​ពួកគេ​​​​​​មាន​​​សង្ឃឹម​​​តិច​​​តួច​​​​​​លើ​​​ការ​​​ឈ្នះ​​​ក្តី​​​​​​ទល់​​​នឹង​​​អ្នក​​​មាន​​​ទ្រព្យ​​​ធន​​​និង​​​មាន​​​ខ្នង​​​ក្រាស់ ​​​ដោយ​​​សារ​​​តែ​​​ប្រព័ន្ធ​​​តុលាការ​​​ពុក​​​រលួយ​​​របស់​​​ប្រទេស​​​នេះ។

សាក្សី​​​ម្នាក់​​​ដែល​​​ឃើញ​​​គ្រោះ​​​ថ្នាក់​​​ចរាចរណ៍​​​កាល​​​ពី​​​សប្តាហ៍​​​មុន​​​បាន​​​និយាយ​​​ថា “​​​នៅ​​​ពេល​​​រឿង​​​កើត​​​ឡើង អ្នកមាន​​​លុយ​​​គឺ​​​ឈ្នះ។ អ្នក​​​ក្រ​​​នឹង​​​បាន​​​អយុត្តិធម៌”៕

 

© 2016, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.