ពេលខ្សែអាត់សំឡេងដែលគេអះអាងថា លោក កឹម សុខា អនុប្រធានគណបក្សប្រឆាំង សន្ទនាជាមួយស្រីកំណាន់ផ្សេងៗលេចឡើងតាមអីុនធឺណិតកាលពីពីរខែកន្លងមក នោះខ្សែអាត់សំឡេងទាំងនេះត្រូវបានច្រានចោលដោយគណបក្សសង្គ្រោះជាតិដែលថា វាជាការនិយាយអេចអូចកំបិុកកំប៉ុកគ្មានតម្លៃនឹងឆ្លើយតប។
ប៉ុន្តែបន្ទាប់មកមានសកម្មនជនយោបាយវ័យក្មេងម្នាក់ដែលគេបានលើកឡើងនៅក្នុងខ្សែអាត់សំឡេងទាំងនោះ បានដាក់ពាក្យបណ្តឹង ពីបទបរិហារកេរ្តិ៍ទៅកាន់សាលាដំបូងរាជធានីភ្នំពេញ ហើយករណីនេះត្រូវបានយកចិត្តទុកដាក់យ៉ាងខ្លាំងដោយស្ថាប័នផ្សេងៗរបស់រដ្ឋាភិបាលដឹកនាំដោយគណបក្សប្រជាជនកម្ពុជា ជាពិសេសនោះគឺនាយកដ្ឋាននគរបាលប្រឆាំងភេរវកម្មនៃក្រសួងមហាផ្ទៃ។
ខុម ចាន់តារាទី អាយុ២៥ឆ្នាំជាស្រីកំណាន់ ដែលរងការចោទប្រកាន់ម្នាក់បានក្លាយជាចំណុចស្នូលនៃការសើុបអង្កេតដែលចេះតែមានសភាពកើនឡើងខ្លាំង ដោយព្រះរាជអាជ្ញាបានសាកសួរនាងអស់រយៈពេល៤ម៉ោងកាលពីថ្ងៃអង្គារ មុនពេលប្រកាសជាសាធារណៈថា នាងទីបំផុតបានសារភាពចំពោះរឿងសហាយស្មន់នេះ។
ទោះជាយ៉ាងណា នាងមិនត្រូវបានសាកសួរជុំវិញបណ្តឹងបរិហារកេរ្តិ៍ទេ។ នគរបាលប្រឆាំងភេរវកម្មដែលតួនាទីរបស់ខ្លួនក្នុងការសើុបអង្កេតមិនទាន់ត្រូវបានពន្យល់នោះបានដាក់ការចោទប្រកាន់ពីបទពេស្យាចារនិងផ្តល់សក្ខីកម្មមិនពិត បន្ទាប់ពីជជីកសួរកញ្ញា ចាន់តារាទី ពាក់ព័ន្ធខ្សែអាត់សំឡេងនៅស្នងការដ្ឋានក្នុងរាជធានីភ្នំពេញកាលពីខែមុន ជាពេលដែលនាងបានបដិសេធថា នៅក្នុងខ្សែអាត់សំឡេងនោះមិនមែនជាសំឡេងរបស់នាងទេ។
លោក អីុ សុខឃី នាយនគរបាលប្រឆាំងភេរវកម្មបានលើកឡើងកាលពីខែមុនថា នាយកដ្ឋានរបស់លោកត្រូវបានចាត់តាំងឲ្យទទួលបន្ទុកករណីនេះដោយអគ្គស្នងការដ្ឋាននគរបាលជាតិដែលធ្វើតាមបង្គាប់របស់សាលា ដំបូងរាជធានីឲ្យសើុបអង្កេតករណីនេះ។ តុលាការកំពុងសើុបអង្កេតយ៉ាងយកចិត្តទុកដាក់លើបណ្តឹងពីបទបរិហារកេរ្តិ៍ប្តឹងដោយសកម្មជននយោបាយ ឈ្មោះ ធី សុវណ្ណថា ។
ការពន្យល់ចុះឡើងៗធ្វើឲ្យមនុស្សជាច្រើនមិនពេញចិត្តឡើយ។
លោក អំ សំអាត អ្នកគ្រប់គ្រងបច្ចេកទេស សើុបសង្កេតនៅអង្គការសិទ្ធិមនុស្សលីកាដូបានលើកឡើងថា “បណ្តឹងពីបទបរិហារកេរ្តិ៍មិនគួរត្រូវបានបញ្ជូនទៅកាន់នាយកដ្ឋានប្រឆាំង ភេរវកម្មនិងបទល្មើសឆ្លងដែនឡើយ”។
លោកបានលើកឡើងទៀតថា “វាជាលើក ដំបូងហើយដែលខ្ញុំបានឃើញករណីនេះហើយវាពិតជាចម្លែកណាស់”។ ទោះជាយ៉ាងណា លោកបានបន្ថែមថា មានការកើនឡើងនៅក្នុងការប្រើប្រាស់អំណាចតុលាការតាមទំនើងចិត្តនៅក្នុងសំណុំរឿងពាក់ព័ន្ធគណបក្សប្រឆាំង។
លោកស្រី ធីតា ឃឹះ ដែលជាអ្នកតស៊ូមតិសិទ្ធិមនុស្សដ៏លេចធ្លោ និងជាអ្នកនិយាយគាំទ្រកញ្ញា ចាន់តារាទី ក៏មានការច្របូកច្របល់ ចំពោះការចាត់តាំងនេះដែរ។
លោកស្រីបាននិយាយទាំងទឹកមុខមុតមាំថា “វាចម្លែកណាស់។ ពួកគេកំពុងប្រើប្រាស់នាយកដ្ឋានខុសនៅក្នុងការសើុបអង្កេតបញ្ហាបែបនេះ”។ លោកស្រីបានបន្ថែមថា ការពាក់ ព័ន្ធរបស់នគរបាលប្រឆាំងភេរវកម្មគឺជាចំណែកដំបូងនៅក្នុងភ័ស្តុតាងដែលចេះតែកើនឡើង និងដែលកញ្ញា ចាន់តារាទី ជាជនរងគ្រោះនៅក្នុងល្បែងនយោបាយ ដែលត្រូវបានរំលោភបំពានដោយប្រព័ន្ធតុលាការ ពុករលួយ និងស្ថិតក្រោមឥទ្ធិពលនយោបាយ។
លោកស្រីបានថ្លែងថា “វាអាចត្រូវបានប្រើប្រាស់ដើម្បីប្រឆាំងអ្នកក្នុងគោលបំណងបង្កើតស្ថានភាពមួយដែលអាចបង្ខិតបង្ខំអ្នក”។លោកស្រីបានបន្ថែមថា ការដែលករណីនេះត្រូវបានបន្តគឺវាខុសគ្នាទាំងស្រុងពីករណីមួយចំនួនដែលពាក់ព័ន្ធនឹងបទល្មើសធ្ងន់ធ្ងរជាងនេះទៅទៀត។
លោកស្រីបានថ្លែងបន្តថា “មានករណីធ្ងន់ធ្ងរជាច្រើនត្រូវចាប់អារម្មណ៍ និងត្រូវស៊ើបអង្កេត។ ករណីនេះគ្មានមូលដ្ឋានទេ”។
ការតាមធ្វើទុក្ខបុកម្នេញកញ្ញា ចាន់តារាទីឥតឈប់ឈរ ដោយមានទាំងការអំពាវនាវពីមន្ត្រីថ្នាក់កំពូលរបស់គណបក្សប្រជាជនឲ្យលោក កឹម សុខា ឆ្លើយសំណួរពាក់ព័ន្ធជីវិតស្នេហារបស់គាត់ផងនោះ បានបន្សល់ទុកនូវការចោទសួរមួយចំនួនថា តើករណីនេះមានជាប់ពាក់ព័ន្ធរឿងនយោបាយឬយ៉ាងណា។
លោកនាយករដ្ឋមន្ត្រី ហ៊ុន សែន បានចូលមកពាក់ព័ន្ធក្នុងករណីនេះកាលពីខែមីនា ដោយអះអាងថា លោកមានរូបភាពជាភ័ស្តុតាងស្តីអំពីសហាយស្មន់នេះដែលលោកបានរក្សាទុកនៅក្នុងទូរស័ព្ទរបស់លោក ដោយបានបន្តរិះគន់កញ្ញា ចាន់តារាទី ចំពោះការបដិសេធមិនទទួលស្គាល់ ហើយបាននិយាយឡកឡាយ លោក កឹម សុខា ។
ការលាក់ពុតរបស់គណបក្សប្រជាជនកម្ពុជាពាក់ព័ន្ធនឹងករណីនេះគេចមិនផុតពីក្រសែភ្នែករបស់អ្នកអង្កេតការណ៍នយោបាយឡើយ ដោយសារប្រវត្តិផ្ទាល់របស់គណបក្សនេះដែលមន្ត្រីថ្នាក់ខ្ពស់របស់ខ្លួនក៏មានលេចឮពាក្យចចាមអារ៉ាមពាក់ព័ន្ធរឿងអាស្រូវផ្លូវភេទដែរនោះ។
លោក ហ៊ុន សែន ខ្លួនលោកផ្ទាល់ត្រូវបានគេសង្ស័យថា មានជាប់ពាក់ព័ន្ធរឿងសហាយ ស្មន់ជាមួយតារាភាពយន្ត ពិសិដ្ឋ ពីលិកា ដែល ត្រូវបានបាញ់សម្លាប់ដោយខ្មាន់កាំភ្លើងបិទមុខម្នាក់ក្នុងឆ្នាំ១៩៩៩នៅក្នុងករណីមួយដែលមិនទាន់ត្រូវបានដោះស្រាយនៅឡើយទេ ទោះបីជាមានសម្ពាធជាខ្លាំងពីសាធារណ ជនក៏ដោយ។
ទស្សនាវដ្ដី L’Express របស់បារាំងបានចុះផ្សាយអត្ថបទមួយស្តីអំពីសៀវភៅកំណត់ហេតុដែលសរសេរកត់ត្រាទុកដោយ ពិសិដ្ឋពីលិកា មុនពេលគាត់ត្រូវគេបាញ់សម្លាប់ ក្នុងនោះគាត់បាននិយាយថា គាត់ត្រូវគេព្រមានថា ប្រពន្ធរបស់លោក ហ៊ុន សែន គឺលោកស្រី ប៊ុន រ៉ានី មានកំហឹងយ៉ាងខ្លាំង ហើយមានផែនការសម្លាប់រូបគាត់ចោល។ ទាំងលោក ហ៊ុន សែន និងស្ត្រីទី១រូបនេះសុទ្ធតែបដិសេធ យ៉ាងដាច់អហង្ការចំពោះការអះអាងនេះ។
ការប្រើប្រាស់ធនធានសំខាន់ៗរបស់រដ្ឋាភិបាលនៅក្នុងករណីនោះទំនងជាដើម្បីបដិសេធការអះអាងនោះ ចំណែកឯមន្ត្រីដែលពាក់ព័ន្ធនឹងការសើុបអង្កេតរឿងអាស្រូវផ្លូវភេទរបស់លោក កឹម សុខា បានខិតខំយ៉ាងខ្លាំងដើម្បីផ្តល់រឿងរ៉ាវលម្អិតនូវអ្វីដែលខ្លួនបានរកឃើញ។
លោក សៀង សុខ ព្រះរាជអាជ្ញារងអមសាលាដំបូងរាជធានីភ្នំពេញមិនទុកពេលឲ្យកន្លងផុតទៅដោយឥតប្រយោជន៍នោះទេកាលពីថ្ងៃច័ន្ទ ដោយបានថ្លែងប្រាប់អ្នកយកព័ត៌មានយ៉ាងលម្អិតអំពីការសារភាពរបស់កញ្ញា ចាន់តារាទី ក្នុងនោះតុលាការក៏បានចេញសេចក្តីប្រកាស មួយផងដែរកាលពីម្សិលមិញ ដោយផ្តល់ព័ត៌មានលម្អិតទាក់ទិនការសើុបអង្កេតកំពុងបន្ត ព្រោះសាធារណជនកំពុងចាប់អារម្មណ៍ក្នុងករណីនេះ។
កាលពីថ្ងៃច័ន្ទ ការិយាល័យព្រះរាជអាជ្ញាសាលាដំបូងរាជធានីបានផ្សព្វផ្សាយសេចក្តីប្រកាសមួយទៀតដោយលើកឡើងថា កញ្ញា ចាន់តារាទី “បានសារភាពថា នាងពិតជាមានទំនាក់ទំនងជាមួយលោក កឹម សុខា មែន ហើយបានទទួលស្គាល់ថា សំឡេងនៅក្នុងខ្សែអាត់នោះគឺជាសំឡេងរបស់នាង។ នាងបានបដិសេធថា មិនមែនជាសំឡេងរបស់នាងពីមុនមក ព្រោះនាងត្រូវលោក កឹម សុខា ណែនាំឲ្យធ្វើដូច្នេះ”។
ដោយចាត់ទុកសេនារីយ៉ូទាំងមូលនេះថា “ជារឿងគួរឲ្យអស់សំណើច” លោកស្រី ចក់ សុភាព ប្រធានមជ្ឈមណ្ឌលសិទ្ធិមនុស្សកម្ពុជាបានលើកឡើងថា ការខិតខំធ្វើឲ្យករណីនេះស្ថិតក្នុងខ្សែភ្នែករបស់សាធារណជនគឺជាចំណាត់ការយុទ្ធសាស្ត្រ។
លោកស្រីបានលើកឡើងតាមរយៈអីុម៉េល មួយថា “ខ្ញុំជឿថា ពលរដ្ឋខ្មែរយល់ដឹងគ្រប់គ្រាន់អំពីល្បែងដ៏ថោកទាបទាំងនេះដែលគេបង្កើតឡើងដើម្បីបោកបញ្ឆោតយើងឲ្យភ្លេចអំពីបញ្ហារំលោភបំពានសិទ្ធិមនុស្សដ៏ធ្ងន់ធ្ងរដែលកំពុងញាំញីប្រទេសកម្ពុជា”។
លោកស្រីបន្ថែមថា ”នេះគឺជារឿងឯក ជន ហើយការដែលធនធានរដ្ឋជាច្រើនត្រូវបានប្រើប្រាស់នៅក្នុងការសើុបអង្កេតនេះបង្ហាញ ឲ្យឃើញយ៉ាងច្បាស់ថា រឿងនេះ គ្មានអ្វីក្រៅពីរឿងនយោបាយនោះឡើយ”៕ស៊ុយឈាង