34 C
Phnom Penh

ការ​ដេញ​តាម​រថយន្ត​ចាប់​បាន​ឈ្មួញ​ឈើ​ល្បី​ឈ្មោះ

ដោយ ឌឹ ខេមបូឌា ដេលី

បទវិភាគ

កាលពី​ម្សិលមិញ នគរបាល​នៅ​ខេត្ត​មណ្ឌលគិរី ចាប់​បាន​អតីត​មន្ត្រី​រាជ​អាវុធហត្ថ​ម្នាក់ តាម​ដីកា​មិន​ទាន់​អនុវត្ត​ពីរ បន្ទាប់ពី​ដេញ​តាម​រថយន្ត SUV របស់​គាត់ និង​រក​ឃើញ​ឈើ​ប្រណិត​ដែលបាន​ដោយ​ខុស​ច្បាប់​លាក់​ក្នុង​រថយន្ត។

សមត្ថកិច្ច​កំពុង​ស្វែងរក​ឈ្មោះ ស៊ូ ម៉ារិទ្ធ អាយុ​៣៧​ឆ្នាំ ជាច្រើន​ខែ​មក​ហើយ​ទាក់ទិន​នឹង​ការ​ពាក់ព័ន្ធ​របស់​ជន​នេះ​ក្នុង​ការ​ជួញ​ឈើ​ខុស​ច្បាប់ រួម​ទាំង​ឧប្បត្តិ​ហេតុ​មួយ​ដែល​គាត់​បាន​ភ្ជង់​ក្បាល​អភិបាល​ស្រុក​កែវ​សីមាផង។

កាលពី​ថ្ងៃ​ពុធ លោក សូ សំអាត មេបញ្ជាការ​កង​កម្លាំង​រាជ​អាវុធហត្ថ​ស្រុក​អូររាំង បាន​និយាយ​ថា មន្ត្រី​របស់​លោក​កំពុង​ល្បាត ស្រាប់តែ​ពេល​នោះ​បាន​ប្រទះ​ឃើញ​រថយន្ត ឡិចស៊ិស អេសយូវី របស់​លោក ម៉ារិទ្ធ កំពុង​បើក​តាម​ផ្លូវ​ជាតិ​លេខ​៧៦ នៅ​ម៉ោង​ប្រហែល​៥​និង​៣០​នាទី។ បន្ទាប់មក​​ពួកគេ​បាន​កត់​សម្គាល់​ឃើញ​ថា រថយន្ត​នោះ​កំពុង​បើកបរ​គួរ​ឲ្យ​សង្ស័យ ពៀប​ទៅ​នឹង​ដី ហាក់បីដូចជា​វា​កំពុង​ដឹក​អ្វី​ធ្ងន់​ប្លែក​អ៊ីចឹង ហើយ​ក៏​បាន​ព្យាយាម​ឲ្យ​សញ្ញា​រថយន្ត​ឈប់ ដើម្បី​ឲ្យ​ពួកគេ​អាច​ពិនិត្យ​វា។

លោក សំអាត បាន​និយាយ​ថា “យើង​បាន​ព្យាយាម​ឆែក​រថយន្ត​នោះ ប៉ុន្តែ​ពួកគេ​មិន​បាន​ឈប់​ទេ​នៅ​តែ​បើក​ទៅ​មុខ ដូច្នេះ​នគរបាល​របស់​យើង​បាន​ដេញ​តាម​ពួកគេ”។ លោក​បាន​និយាយ​ថា ប៉ុន្តែ​ក្រុម​មន្ត្រី​មិន​បាន​ដេញ​តាម​ទេ តែ​ពួកគេ​បាន​បោះ​ដៃ​ទៅ​ឲ្យ​គ្នា​របស់​ពួកគេ​នៅ​កែវសីមា ដែល​រថយន្ត SUV បើក​ឆ្ពោះ​ទៅ។

លោក​បាន​និយាយ​ថា “វា​មិន​ងាយ​ស្រួល​ចាប់​ឈ្មួញ​ឈើ​ទាំង​នោះ​ទេ។ យើង​បាន​ដេញ​តាម​ពួកគេ​ពី​ក្រោយ ហើយ​កម្លាំង​រាជ​អាវុធហត្ថ​ផ្សេងទៀត​នៅ​ស្រុក​កែវសីម៉ា បាន​រាំង​ផ្លូវ​ពួកគេ​ពី​មុខ។ ពេល​នោះ​ទើប​យើង​អាច​ចាប់​ពួកគេ​បាន”។

លោក​មេបញ្ជាការ សំអាត បាន​និយាយ​ថា គេ​បាន​ឃើញ​លោក ម៉ារិទ្ធ បើក​រថយន្ត SUV របស់​គាត់ ហើយ​អ្នក​ដំណើរ​បី​នាក់​ផ្សេងទៀត រួម​ជាមួយ​នឹង​ឈើ​ធ្នង់​៨​កំណាត់​ផង ដែល​អាច​មាន​តម្លៃ​រាប់​ពាន់​ដុល្លារ​ក្នុង​មួយ​ម៉ែត្រ​គូប។ គេ​បាន​បញ្ជូន​មនុស្ស​និង​ឈើ​ទៅ​ទីបញ្ជាការ​រាជ​អាវុធហត្ថ​ខេត្ត​ហើយ។

កង​កម្លាំង​រាជ​អាវុធហត្ថ​ខេត្ត​មិន​អាច​ទាក់ទង​សុំ​ការ​អត្ថាធិប្បាយ​បាន​ទេ។

លោក ជុយ សុឃាង ​នាយ​ខណ្ឌ​រដ្ឋបាល​ព្រៃ​ឈើ​ខេត្ត​មណ្ឌលគិរី ដែល​បាន​សួរ​បុរស​ទាំង​នោះ បាន​និយាយ​ថា លោក​នឹង​បន្ត​សាកសួរ​ពួកគេ​នៅ​ថ្ងៃ​នេះ មុន​ពេល​បញ្ជូន​ពួកគេ​ទៅ​តុលាការ។ លោក​បាន​និយាយ​ថា អ្នក​ដំណើរ​បី​នាក់​ឈ្មោះ ព្រៀង ម៉ាណែត អាយុ​៣៤​ឆ្នាំ ព្រំ ម៉ានី អាយុ​១៧ និង សេង ពុត្រា អាយុ​២៩​ឆ្នាំ សុទ្ធ​តែ​ជា​ជាង​ឈើ។

មុន​ពេល​ឈាន​ដល់​ការ​ចាប់​ខ្លួន​នៅ​ថ្ងៃ​ពុធ លោក ម៉ារិទ្ធ ក៏​ត្រូវ​គេ​តាម​ចាប់​ខ្លួន​ដែរ​ពាក់ព័ន្ធ​នឹង​ឧប្បត្តិហេតុ​ពីរ​ដោយ​ឡែក​ពី​គ្នា។

នៅ​ឆ្នាំ​២០១៤ តាម​ចោទ​ថា គាត់​បាន​ភ្ជង់​ក្បាល​លោក ស៊ិន វ៉ាន់វុធ អភិបាល​ស្រុក​កែវ​សីម៉ា ក្នុង​បំណង​ជួយ​ដោះ​លែង​អ្នក​បើកបរ​រថយន្ត SUV ម្នាក់ ដែល​លោក​អភិបាល​បាន​ឃាត់​ឲ្យ​ឈប់ ដោយសារតែ​ដឹក​ឈើ​ប្រណិត​ខុស​ច្បាប់។ ហើយ​នៅ​ខែ​កុម្ភៈ លោក ម៉ារិទ្ធ តាម​ចោទ​ថា​ បាន​បាញ់​មន្ត្រី​កម្លាំង​រាជ​អាវុធហត្ថ​និង​មន្ត្រី​ព្រៃ​ឈើ ដែល​បាន​ដេញ​តាម​រថយន្ត​ដឹក​ឈើ​ទៅ​ផ្ទះ​របស់​គាត់ បន្ទាប់មក​បាន​គេច​ខ្លួន​ពី​កន្លែង​កើត​ហេតុ​ទៅ​បាត់។

លោក ស៊ុន ប៊ុនធឿន អធិការ​នគរបាល​ស្រុក​កែវសីម៉ា បាន​និយាយ​ថា លោក ម៉ារិទ្ធ ត្រូវ​គេ​តាម​ចាប់​ពី​បទ​គំរាម​កំហែង​ចំពោះ​បទល្មើស​ពីមុន និង​ការ​ស្តុក​ឈើ​ខុស​ច្បាប់។

លោក​បាន​និយាយ​ថា “យើង​សប្បាយ​ចិត្ត​ណាស់ ដែល​គេ​អាច​ចាប់​ខ្លួន​ជនសង្ស័យ​នៅ​ពេល​នេះ។ តុលាការ​បាន​ចេញ​ដីកា​ចាប់​ខ្លួន​យូរ​ហើយ ប៉ុន្តែ​មិន​អាច​ចាប់​គាត់​បាន ទើប​តែ​ចាប់​បាន​នៅ​ថ្ងៃ​នេះ”៕ និត

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស