លោក ប៉ាវ ស៊ីណា​​​  ដាក់​​​ពាក្យ​​​បណ្តឹង​​​ចំនួន​​​ពីរ​​​ដោយសារ​​​​​​ការ​​​សរសេរ​​​ឈ្មោះ​​​ខុស​​​

មួយ​​​ថ្ងៃ​​​បន្ទាប់​​​ពី​​​រង​​​បណ្តឹង​​​បរិហារកេរ្តិ៍​​​ពី​​​ក្រសួង​​​ការ​​​ងារ​ លោក ប៉ាវ សីុណា ប្រធាន​​​សហ​​​ ជីព​​​បាន​​​បង្ហាញ​​​ខ្លួន​​​នៅ​​​សាលា​​​ដំបូង​​​រាជ​​​ធានី​​​ភ្នំពេញ​​​កាល​​​ពី​​​ម្សិលមិញ ជុំ​​​វិញ​​​បណ្តឹង​​​មិន​សំខាន់​មួយ​​​បន្ថែម​​​ទៀត​​​។

លោក ប៉ាវ ស៊ីណា បាន​​​លើក​​​ឡើង​​​ថា ​​​លោក​​​​​​ទទួល​​​បាន​​​ច្បាប់​​​ចម្លង​​​នៃ​​​ដីកា​​​កោះ​​​កាល​​​​​​ពី​​​ថ្ងៃ​​​ពុធ​​​ ពាក់​​​ព័ន្ធ​​​នឹង​​​បណ្តឹង​​​របស់​​​ក្រសួង​​​ ដែល​​​ចោទ​​​ប្រកាន់​​​លោក និង​​​មន្ត្រី​សម្ព័ន្ធ​សហជីព​​​​ចលនា​​​កម្មករ​​​៣នាក់​​​ផ្សេង​​​ទៀត​​​ទាក់ទិន​​​​បទ​​​ល្មើស​​​មួយ​​​ចំនួន​​​។

លោក​​​បាន​​​ថ្លែង​​​ថា “ពួក​​​គេ​​​បាន​​​ដាក់​​​ពាក្យ​​​ប្តឹង​​​ខ្ញុំ​​​ និង​​​មន្ត្រី​​​៣​​​នាក់​​​ទៀត​​​របស់​​​ខ្ញុំ​​​​​​ពី​​​បទ​​​បរិហារ​​​កេរ្តិ៍​​​ជា​​​សាធារណៈ​​​ ប្រមាថ​​​មន្ត្រី​​​រាជ​​​ការ​​​សាធារណៈ និង​​​បិទ​​​ផ្លូវ​​​សាធារណៈ​​​”។

លោក ហេង សួគ៌ អ្នកនាំ​​​ពាក្យ​​​ក្រសួង​​​ ការ​​​ងារ​​​បាន​​​បញ្ជាក់​​​ថា ពិត​​​ជា​​​មាន​​​ការ​​​ដាក់​​​ពាក្យ​​​ប្តឹង​​​លោក ប៉ាវ ស៊ីណា និង​​​សហការី​​​របស់​​​គាត់​​​មែន​​​ ប៉ុន្តែ ថា វា​​​ស្រេច​​​តែ​​​តុលាការ​​​ទេ​​​ក្នុង​​​ការ​​​សម្រេច​​​ថា តើ​​​ត្រូវ​​​បន្ត​​​ ឬ​​​មិន​​​បន្ត​​សំណុំ​រឿង​​​នោះ​​​។

លោក​​​បាន​​​មាន​​​ប្រសាសន៍​​​ថា “ប្រសិន​​​បើ​​​គ្មាន​​​ភ័ស្តុ​​​តាង​​​ និង​​​ព័ត៌មាន​​​គ្រប់​​​គ្រាន់​​​ទេ​​​ ខ្ញុំ​​​ជឿ​​​ថា ព្រះរាជអាជ្ញា​​​មិន​​​បន្ត​​​សំណុំ​​​រឿង​​​នេះ​​​ឡើយ​​​”។

លោក​​​ ហេង សួគ៌ បាន​​​បង្វែរ​​​សំណួរ​​​បន្ថែម​​​ ទៅ​​​លោក​​​ ស្រី ម៉ាក់នី ព្រះរាជ​​​អាជ្ញារង​​​ដែល​​​ចេញ​​​ដីកា​​​កោះ​​​ហៅ​​​ និង​​​ដែល​​​​មិន​​​អាច​​​ទាក់​​​ទង​​​បាន។ មន្ត្រី​​​នៅ​​​ក្នុង​​​នាយក​​​ដ្ឋាន​​​ដោះ​​​ស្រាយវិវាទ​​​នៃ​​​ក្រសួង​​នេះ​​​ដែល​​​ដាក់​​​ពាក្យ​​​បណ្តឹង​​​​​​​ក៏​​​មិន​​​អាច​​​ទាក់​​​ទង​​​​​​​ដើម្បី​​​សុំ​​​ការ​​​ធ្វើ​​​អត្ថាធិប្បាយ​​​បាន​​​ដែរ។

កាលពី​ខែ​​​កុម្ភៈ​​​ លោក ប៉ាវ ស៊ីណា បាន​​​ធ្វើ​​​សន្និសីទ​​​កាសែត​​​មួយ​​​នៅ​ខាង​​​ក្រៅ​​​ក្រសួង​​​ការ​​​ងារ​​​ដោយ​​​ស្នើ​​​ឲ្យ​​​ក្រសួង​​​នេះ​​​ធ្វើ​​​អន្ត​​​រា​​​គមន៍​​​ដើម្បី​​​ឲ្យ​​​តុលាការ​​​លើក​​​លែង​​​ការ​​​ចោទ​​​ប្រកាន់​​​លើ​​​សមាជិក​​​សហជីព​​​៥​​​នាក់​​​ផ្សេង​​​ទៀត​​​របស់​​​លោក ដែល​​​បាន​​​ព្យាយាម​​​ជួយ​​​កម្មករ​​​ធ្វើ​​​កូដ​​​កម្ម​​​នៅ​​​រោង​​​ចក្រ​​​ Agile Sweater ​​​ក្នុង​​​ខេត្ត​​​កំពង់​​​ស្ពឺ​​​​​​មួយ​​​ខែ​​​មុន​​​រង​​​ការ​​​​​​ចោទ​​​ប្រកាន់​​​។​​​ លោក ប៉ាវ ស៊ីណា​​​ បាន​​​មាន​​​ប្រសាសន៍​​​ ថា “នាយក​​​ដ្ឋាន​​​ដោះ​​​ស្រាយ​​​វិវាទ​​​​​​មិន​​​ចង់​​​ឲ្យ​​​ខ្ញុំ​​​រិះ​​​គន់​​​សកម្ម​​​ភាព​​​របស់​​​ពួក​​​គេ​​​ ឬ​​​ក៏​​​ស្នើ​​​ឲ្យ​​​ពួក​​​គេ​​​ដោះ​​​ស្រាយ​​​បញ្ហា​​​សម្រាប់​​​កម្មករ​​​”។ ​​​លោក​​​​​​​​​បាន​​​បន្ថែម​​​ថា លោក​​​នៅ​​​មិន​​​ទាន់​​​រក​​បាន​​​​ព័ត៌​​​មាន​​​លម្អិត​​​ពាក់​​​ព័ន្ធ​​​បណ្តឹង​​​របស់​​​ក្រសួង​​​នៅ​​​ឡើយ​​​ទេ។

លោក​​​បាន​​​មានប្រសាសន៍​​​បន្ថែម​​​ទៀត​ថា “ពួក​​​គេ​​​ធ្វើ​​​ដូច្នេះ​​​ [ដាក់​​​ពាក្យ​​​បណ្តឹង] ​​​​​​​​​ព្រោះ​​​​​​ ពួក​​​គេ​​​ចង់​​​បំបាក់​​​ស្មារតី​​​របស់​​​យើង​​​ដើម្បី​​​កុំ​​​ឲ្យ​​​យើង​​​ហ៊ាន​​​រិះ​​​គន់​​​ពួកគេ​​​ធ្ងន់​​​ៗ និង​​​តវ៉ា​​​ប្រឆាំង​​​ពួក​​គេ”​​​។

លោក ប៉ាវ ស៊ីណា​​​ បាន​​​ទៅ​​​សាលា​​​ដំបូង​​​រាជធានី​​​កាល​​​ពី​​​ម្សិលមិញ​​​ជុំ​​​វិញ​​​ដីកា​​​កោះ​​​ដាច់​​​​​​ដោយ​​​ឡែក​​​ពាក់​​​ព័ន្ធ​​​នឹង​​​បណ្តឹង​​​​​​ប្តឹង​​​ដោយ​​​រោង​​​ចក្រ​​​កាត់​​​ដេរ​​​ Southland ដែល​​​មាន​​​ជម្លោះ​​​ជា​​​ច្រើន​​​ឆ្នាំ​​​មក​​​ហើយ​​​ជាមួយ​​​មន្ត្រី​​​សម្ព័ន្ធ​សហជីព​​​​​ចលនា​​​កម្មករ​​​ដែល​​​ព្យាយាម​​​បង្កើត​​​​​​សហជីព​​​នៅ​​​ទី​​​នោះ​​​។

រោង​​​ចក្រ Southland បាន​​​ចោទ​​​ប្រកាន់​​​លោក ប៉ាវ ស៊ីណា ពី​​​បទ​​​ក្លែង​​​បន្លំ​​​លិខិត​​​ និង​​​ផ្តល់​​​ព័ត៌​​​មាន​​​មិន​​​ពិត​​​ដោយសារ​​​សរសេរ​​​ឈ្មោះ​​​​​​របស់​​​បុគ្គលិក​​​រោង​​​ចក្រ​​​២​​​នាក់​​​ខុស​​​នៅ​​​ក្នុង​​​ឯកសារ​​​ដែល​​​ជូន​​​ដំណឹង​​​ដល់​​​គណៈគ្រប់​​​​​គ្រង​​​រោង​​​ចក្រ​​​ថា បុគ្គលិក​​​ទាំង​​​​​​២​​​នាក់​​​នេះ​​​មាន​​​គម្រោង​​​ចូល​​​រួម​​​ជា​​​មួយ​​​សហជីព​​​របស់​​​លោក​​​។

នៅ​​​ក្នុង​​​ការ​​​ឆ្លើយ​​​តប​​​នឹង​​​បញ្ហា​​​ដែល​​​មិន​​​គួរ​​​កើត​​​នេះ​​​ លោក ប៉ាវ ស៊ីណា​​​ បាន​​​បដិសេធ​​​មិន​​​ឆ្លើយ​​​សំណួរ​​​ទេ​​​នៅ​​​ក្នុង​​​តុលាការ​​​កាល​​​ពី​​​ម្សិល​​​មិញ​​​ ព្រោះគេ​ក៏សរសេរ​​​​ឈ្មោះ​​​របស់​​​លោក​​​​​​ខុសដែរ​​​​នៅ​​​ក្នុង​​​ដីកា​​​កោះ​​​ និង​​​ពាក្យ​​​បណ្តឹង​​​ដែល​​​ប្តឹង​​​ដោយ​​​រោង​​​ចក្រ​​​។

លោក​​​បាន​​​​​​ថ្លែង​​​ថា “ខ្ញុំ​​​បដិសេធ​​​មិន​​​ឆ្លើយ​​​ព្រោះ​​​ពួក​​​គេ​​​ក៏​​​សរសេរ​​​ឈ្មោះ​​​របស់​​​ខ្ញុំ​​​ខុស​​​ដែរ​​​”។ លោក​​​បាន​​​បន្ថែម​​​ថា លោក​​​នឹង​​​ដាក់​​​ពាក្យ​​​បណ្តឹង​​​តបវិញ​ឲ្យ​​​ដូច​​​នឹង​បណ្តឹង​ដែល​​​រោង​​​ចក្រ​​​បាន​​​ប្តឹង​​​លោក​​​​​​។

លោក​​​​​​ថ្លែង​​​បន្ត​​​ថា “ខ្ញុំ​​​គិត​​​ថា នេះ​​​គឺ​​​ជា​​​កំហុស​​​ តូច​​​តាច​​​ ប៉ុន្តែ ពួក​​​គេ​​​ចោទ​​​ប្រកាន់​​​ខ្ញុំ​​​ហើយ​​​ដាក់​​​​​​ពាក្យ​​​ប្តឹង​​​ខ្ញុំ​​​។ ខ្ញុំ​​​​​​នឹង​​​ដាក់​​​ពាក្យ​​​ប្តឹង​​​រោង​​​ចក្រ​​​នូវ​​​​បទ​​​ល្មើស​​​ដូច​​​គ្នា​​​ដែល​​រោង​​​ចក្រ​​​ប្តឹង​​​ខ្ញុំ​​​”។

ព្រះរាជអាជ្ញា​​​រង ​​​ខាំ សុផារី ដែល​ទទួល​​​បន្ទុក​​​នៅ​​​ក្នុង​​​សំណុំ​​​រឿង​​​ “ក្លែង​​​បន្លំ​​​លិខិត​​​” និង​​​តំណាង​​​រោង​​​ចក្រ​​​ Southland មិន​​​អាច​​​ទាក់​​​ទង​​​បាន​​​ទេ​​​កាល​​​ពី​​​ម្សិលមិញ៕ ស៊ុយឈាង​