32.9 C
Phnom Penh

អង្គការ​អាដហុក​ដក​ខ្លួន​​ចេញពី​ស្ត្រី​ដែល​​​​ត្រូវ​គេ​ចាប់​អារម្មណ៍ទាក់​ទិន​នឹង​រឿង​អាស្រូវ​ផ្លូវ​ភេទ

ដោយ ឌឹ ខេមបូឌា ដេលី

បទវិភាគ

ក្នុង​ការ​ប្រែប្រួល​ចុង​ក្រោយ​​ក្នុង​រឿង​អាស្រូវ​ខូច​សីលធម៌​ពាក់​ព័ន្ធនឹង​លោក កឹម សុខា ​មេដឹកនាំ​គណបក្ស​ប្រឆាំង​ និង​ស្រី​កំណាន់​​ដែល​គេ​ចោទ​ប្រកាន់​ថា​របស់​លោក អង្គការ​សិទ្ធិ​មនុស្ស​​ដែល​បាន​ផ្ដល់​ប្រឹក្សា​ផ្នែក​ច្បាប់​ និង​តំណាង​ស្ត្រី​​ដែល​ស្ថិត​ក្នុង​ការ​ចាប់​អារម្មណ៍​នៃ​រឿង​ក្ដី​នេះ បាន​ដក​ខ្លួន​ចេញពី​​ករណី​នេះ ដោយ​និយាយ​ថា នាង​លែង​​ “​ស្ថិត​ក្នុង​​ការ​គំរាម​កំហែង​​​ធ្ងន់​​ធ្ងរ​ទៀត​ហើយ”។

អង្គការ​អាដហុក​បាន​គាំទ្រ​​កញ្ញា ខុម ចាន់តារ៉ាទី ហៅ​ស្រីមុំ ចាប់​តាំង​ពី​ការ​សន្ទនា​តាម​ទូរស័ព្ទ​​​​ដែល​គេ​អះអាង​ថា ធ្វើ​ឡើង​រវាង​នាង​ និង​លោក កឹម សុខា ​បាន​លេចធ្លាយ​តាម​បណ្ដាញ​អុីនធឺណិត​កាលពី​ខែ​កុម្ភៈ ​​ប៉ុន្តែ​ក្នុង​សេចក្ដី​ថ្លែងការណ៍​កាលពី​ថ្ងៃ​សុក្រ ​អង្គការ​នេះ​បាន​និយាយ​ថា ​ពីព្រោះ​​តុលាការ​ក្រុង​ភ្នំពេញ​​​លែង​ចាត់ទុក​នាង​ជា​ “​ជន​សង្ស័យ​​” ទៀត​ហើយ​។ អង្គការ​នេះ​​បាន​ដក​ជំនួយ​របស់​ខ្លួន​។

កញ្ញា ចាន់តារ៉ាទី គឺ​​ស្ថិត​ក្នុង​ការ​ចាប់​អារម្មណ៍​នៃ​រឿង​ក្ដី​ពីរ​​ដាច់​ដោយ​ឡែក​ពី​គ្នា​ ប៉ុន្តែទាក់​ទង​នឹង​តុលាការ​ គឺ​ករណី​បរិហារកេរ្តិ៍​ប្ដឹង​ដោយ​កញ្ញា ធី សុវណ្ណថា ដែល​ជា​សកម្មជន​​​លេចធ្លោ​​ប្រឆាំង​រដ្ឋាភិបាល​ក្នុង​ការ​បោះ​ឆ្នោត​ឆ្នាំ​២០១៣ មុន​ពេល​ងាក​ចេញពី​គណបក្ស​សង្គ្រោះ​ជាតិ​ ហើយ​ត្រូវ​គេ​លើក​ឈ្មោះ​​មក​និយាយ​ក្នុង​ការ​សន្ទនា​​ដែល​គេ​លួច​ថត​ និង​ករណី​មួយទៀត​​គឺ​ចោទ​កញ្ញា ចាន់តារា៉ទី ពីបទ​អំពើ​​ពេស្យាចារ និង​ផ្ដល់​សក្ខីកម្ម​ក្លែង​ ដែល​ប្ដឹង​ដោយ​នគរ​បាល​ប្រឆាំង​ភេរវកម្ម។

កាលពី​ថ្ងៃ​អង្គារ បន្ទាប់ពី​កញ្ញា ចាន់តារ៉ាទី ​ត្រូវ​បាន​សាកសួរ​ក្នុង​នាម​ជា​ “​ជន​សង្ស័យ” ក្នុង​ករណី​ទី២ ហើយ​​បាន​សារភាព​ថា មាន​ស្នេហា​លួច​លាក់​ជាមួយ​លោក កឹម សុខា ​នោះ តុលាការ​បាន​ចេញសេចក្ដី​ថ្លែងការណ៍​មួយ​ ដោយ​ចាត់ទុក​ជា​ថ្មី​​ថា​នាង​ជា​បុគ្គល​សំខាន់​ក្នុង​ការ​ផ្ដល់​ព័ត៌មាន” ​គឺ​ជា​ការ​កែប្រែ​មួយ​ដែល​អង្គការ​អាដហុក​យល់​ឃើញ​ថា ជា​មូល​ហេតុ​​ដែល​ត្រូវ​ដក​ខ្លួន​ពី​តំណាង​​រូប​នាង​។

អង្គការ​សិទ្ធិមនុស្ស​នេះ​បាន​និយាយ​ថា “​យើង​គិត​ថា ស្រីមុំ ​គឺ​មិន​មែន​​ស្ថិត​ក្នុង​ស្ថានភាព​​គំរាម​​កំហែង​ធ្ងន់ធ្ងរ​ និង​គួរ​ឲ្យ​ព្រួយ​បារម្ភ​ទៀត​ទេ ព្រោះ​…ចំពោះ​​ករណី​ផ្ដល់​សក្ខីកម្ម​ក្លែង​ និង​មាន​អំពើ​ពេស្យាចារ​ អាដហុក​យល់​ថា ​នីតិវិធី​បន្ត​កញ្ញា ស្រីមុំ អាច​គ្រាន់​តែ​ជា​សាក្សី​តែ​ប៉ុណ្ណោះ”។

សេចក្ដី​​ថ្លែងការណ៍​នោះ​បាន​បន្ថែម​ថា អង្គការ​អាដហុក​លែង​​ពាក់​ព័ន្ធ​ក្នុង​ករណី​បរិហារកេរ្តិ៍​​ទៀត​ហើយ ព្រោះ​វា​ “​​ជា​រឿង​រវាង​បុគ្គល​សាមញ្ញ​ពីរ​នាក់​ ហើយ​មិន​ស្ថិត​ក្នុង​អាណត្តិ​របស់​សមាគម​​អាដហុក​​ទេ​”។

លោក នី សុខា ប្រធាន​ផ្នែក​ស៊ើបអង្កេត​សមាគម​អាដហុក​ បាន​បញ្ជាក់​ថា ដំបូង​ឡើយ​​អង្គការ​សិទ្ធិ​មនុស្ស​នេះ​បាន​ផ្ដល់​ជំនួយ​​ដល់​កញ្ញា ចាន់តារ៉ាទី ពីព្រោះ​​​នាង​មាន​ “ការ​តក់​ស្លុត​ និង​ភ័យ​ខ្លាច​ជា​ខ្លាំង​” បន្ទាប់ពី​នាង​ទទួល​បាន​លិខិត​អញ្ជើញ​​ពី​នាយកដ្ឋាន​ប្រឆាំង​ភេរវកម្ម និង​ឧក្រិដ្ឋកម្ម​ឆ្លង​ដែន​នៃ​​ក្រសួង​មហាផ្ទៃ​ ប៉ុន្តែ​នៅ​ពេល​នេះ​​នាង​មិន​ស្ថិត​ក្នុង​​ស្ថានភាព​​គំរាម​កំហែង​ទៀត​ទេ។

ការ​ស៊ើបអង្កេត​​​លើ​ការ​សាសង​តាម​ទូរស័ព្ទ​ដែល​បែកធ្លាយ​ដែល​​ធ្វើ​ឡើង​​​ដោយ​នគរ​បាល​ប្រឆាំង​ភេរវកម្ម​ តុលាការ​ក្រុង​ភ្នំពេញ​​ និង​អង្គភាព​ប្រឆាំង​អំពើពុករលួយ​​ បាន​ទទួល​រង​ការ​រិះគន់​​យ៉ាង​ខ្លាំង​ពី​សំណាក់​អង្គការ​សិទ្ធិ​មនុស្ស​ និង​ក្រុម​អ្នក​សង្កេត​ការណ៍​​ថា ជា​យុទ្ធនាការ​​បង្ខូច​​កេរ្តិ៍​ឈ្មោះ​​ដែល​មិន​ពាក់​ព័ន្ធ​ទៅ​នឹង​សាធារណជន ឬ​មាន​តម្លៃ​​សម​នឹង​ធ្វើ​​នោះ​ទេ។ មជ្ឈដ្ឋាន​ខ្លះ​យល់​ថា រឿង​អាស្រូវ​នេះ​ត្រូវ​បាន​រៀបចំ​ដើម្បី​កេង​ចំណេញ​នយោបាយ​ ដោយ​​ធ្វើ​ឲ្យ​ខូច​កេរ្តិ៍​ឈ្មោះ​​កញ្ញា ចាន់តារ៉ាទី។

លោក កែម ឡី អ្នក​វិភាគ​នយោបាយ​បាននិយាយ​កាលពី​ថ្ងៃ​សុក្រ​ថា “​តាម​​យោបល់​របស់​ខ្ញុំ នេះ​មិន​មែន​ជា​រឿង​ក្ដី​​សម្រាប់​តុលាការ​បន្ត​នីតិវិធី​ទេ”។

លោក​បាន​និយាយ​ថា “គេ​បាន​នាំ​មនុស្ស​ស្លូត​ត្រង់​ម្នាក់​មក​ឈ្លេច​​សួរ​​ដើម្បី​ចង់​បាន​អ្វី​ដែល​គេ​ចង់​បាន​។ ​នេះជា​ល្បែង​នយោបាយ​ស្មោកគ្រោក​ដែល​មិន​គួរ​លេង​នៅ​សម័យ​នេះ​ទេ​”។

​ក្នុង​ការ​បង្ហោះ​ហ្វេសប៊ុក​កាលពី​ថ្ងៃ​សុក្រ កញ្ញា សុវណ្ណថា ​ថ្លឹង​ថ្លែង​លើករណី​ដែល​នាង​មិន​ពាក់​ព័ន្ធ​ ដោយ​លើក​ឡើង​ថា ការ​ធ្វើ​ដំណើរ​​របស់​លោក​ សុខា បាន​ទៅ​ប្រទេស​ថៃ​ជាមួយ​កញ្ញា ចាន់តារ៉ា​ទី ​គឺ​អាច​ធ្វើ​ឲ្យ​អនុប្រធាន​គណបក្ស​ប្រឆាំង​នេះ​ជាប់​ពន្ធនាគារ​បាន​។

​កញ្ញា​បាន​សរសេរ​ថា “​កឹម សុខា បាន​ប្រព្រឹត្ត​ជាក់​ស្ដែង​នូវ​បទល្មើស​​ជួញដូរ​ផ្លូវ​ភេទ​ ហើយ​អាច​ជាប់​ពន្ធនាគារ​ពី​៥ឆ្នាំ​ទៅ​១០​ឆ្នាំ​”៕ និត​​​​​​​​​​​​​​​​​​​​​​​​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស