បន្ទាប់ពីផែនការបញ្ចាំងភាពយន្តឯកសារស្តីអំពីលោក ឈុត វុទ្ធី សកម្មជនបរិស្ថានដែលត្រូវគេធ្វើឃាត នៅផ្ទះមេត្តា (Meta House) ក្នុងក្រុងភ្នំពេញ ត្រូវបានលុបចោលតាមសំណើរបស់ក្រសួងវប្បធម៌កាលពីសប្តាហ៍មុនមក មន្ត្រីក្រសួងម្នាក់បាននិយាយកាលពីចុងសប្តាហ៍ថា ភាពយន្តនេះមិនអាចដាក់បញ្ចាំងជាសាធារណៈនៅគ្រប់ទីកន្លែងទាំងអស់ក្នុងប្រទេស។
លោក ស៊ិន ច័ន្ទសាយ៉ា ប្រធាននាយកដ្ឋានភាពយន្តនិងផ្សព្វផ្សាយវប្បធម៌ នៃក្រសួងវប្បធម៌និងវិចិត្រសិល្បៈ បាននិយាយថា ផលិតករភាពយន្តរួមទាំងម្ចាស់រោងណាដែលបញ្ចាំងភាពយន្ត “ខ្ញុំគឺ ឈុត វុទ្ធី” គឺជាការរំលោភច្បាប់”។
លោក ច័ន្ទសាយ៉ា បាននិយាយក្នុងអីុម៉េលថា “ជាការបំភ្លឺ ខ្ញុំសូមបញ្ជាក់ថា ភាពយន្តដែលមានចំណងជើងថា “ខ្ញុំគឺ ឈុត វុទ្ធី” មិនបានទទួលការអនុញ្ញាតណាមួយសម្រាប់ការបញ្ចាំងក៏ដូចជាទិដ្ឋាការសម្រាប់ការបញ្ចាំងពីអាជ្ញាធរខ្មែរមុនពេលដាក់បញ្ចាំងជាសាធារណៈនៅឡើយទេ”។
លោក ច័ន្ទសាយ៉ា បាននិយាយថា ផលិតករភាពយន្តគឺ ហ្វ្រង់ ឡាមប្រិក (Fran Lambrick) មិនដែលបានទទួលការអនុញ្ញាតឲ្យថតភាពយន្តឯកសារក្នុងប្រទេសកម្ពុជាពីមុនមកទេ។
លោកបាននិយាយថា “យោងតាមច្បាប់ ផលិតករភាពយន្តត្រូវដាក់ពាក្យដើម្បីទទួលបានការអនុញ្ញាតសម្រាប់ការថតភាពយន្ត ដូច្នេះប្រសិនបើគ្មានការអនុញ្ញាតឲ្យថត ក៏គ្មានទិដ្ឋាការសម្រាប់ដាក់បញ្ចាំងដែរ”។
កាលពីខែធ្នូឆ្នាំ២០១៤ ភាពយន្តនេះបានបញ្ចាំងដំបូងនៅផ្ទះមេត្តាដែលមានអ្នកទស្សនាពេញ។
អ្នកស្រី ឡាមប្រិក មិនអាចទាក់ទងសុំការអត្ថាធិប្បាយបានទេកាលពីថ្ងៃអាទិត្យ ប៉ុន្តែយោងតាមទំព័រហ្វេសប៊ុក “ខ្ញុំគឺ ឈុត វុទ្ធី” ភាពយន្តនេះត្រូវបានបញ្ចាំងជាថ្មីក្នុងក្រុងភ្នំពេញកាលពីថ្ងៃសៅរ៍នៅកន្លែងមួយដែលគេមិនប្រាប់ឲ្យដឹង។
ការបង្ហោះនោះបាននិយាយថា “អរគុណអ្នកគ្រប់គ្នាដែលបានមកទស្សនាការបញ្ចាំងជាឯកជននៅថ្ងៃអាទិត្យក្នុងក្រុងភ្នំពេញ! នេះជាការបញ្ចាំងលើកដំបូងចាប់តាំងពីមានបម្រាម ហើយនឹងមានច្រើនលើកទៀត” និងបានបន្ថែមទៀតថា អ្នកណាដែលចង់ទទួលបញ្ចាំងផ្ទាល់ខ្លួន សូមទាក់ទងមក។
រោងភាពយន្ត ជាបណ្តាញនៃកន្លែងបញ្ចាំងភាពយន្តមាននៅក្នុងក្រុងភ្នំពេញ ក៏បានរៀបរាប់ក្នុងការបង្ហោះមួយលើហ្វេសប៊ុកថា គេនឹងបញ្ចាំងភាពយន្តនេះនៅថ្ងៃអង្គារ ជាខួបទី៤នៃមរណភាពរបស់លោក ឈុត វុទ្ធី ប៉ុន្តែមិនបានប្រាប់ឲ្យដឹងអាសយដ្ឋានសម្រាប់”ការបញ្ចាំងជាឯកជននេះទេ”។ អ្នកបញ្ចាំងភាពយន្តនេះមិនអាចទាក់ទងសុំការអត្ថាធិប្បាយបន្ថែមបានទេ៕ និត