35 C
Phnom Penh

សកម្មជន​បញ្ចេញ​យោបល់​ប្រឆាំង​ផែនការ​រដ្ឋាភិបាល​សម្រាប់​ព្រៃ​ឡង់

ដោយ ឌឹ ខេមបូឌា ដេលី

បទវិភាគ

កាលពី​ម្សិលមិញ សមាជិក​នៃ​បណ្តាញ​សហគមន៍​ព្រៃ​ឡង់​បាន​ជំរុញ​រដ្ឋាភិបាល​ឲ្យ​ធ្វើ​សេចក្តី​ព្រាង​ថ្មី​របស់​ខ្លួន​ឡើង​វិញ​ក្នុង​ការ​ប្រែក្លាយ​ព្រៃ​នេះ​ទៅ​ជា​តំបន់​ការពារ ដោយ​តវ៉ា​ថា កន្លែង​ស្នើ​ឡើង​នោះ​មាន​ទំហំ​តូច​ពេក និង​មិន​បាន​ដាក់​បញ្ចូល​ដី​ណាមួយ​ក្នុង​ខេត្ត​ព្រះវិហារ​ទេ។

បណ្តាញ​នេះ ដែល​ជា​សមាគម​នៃ​សហគមន៍​ដែល​រស់​នៅ​ក្នុង​និង​ជំុវិញ​ព្រៃ​ឡង់ បាន​និង​កំពុង​ដើរ​ល្បាត​ព្រៃ​ស្រោង​ខៀវ​គ្រប់​រដូវ​នេះ ដែល​ជា​ព្រៃ​ធំ​ជាង​គេ​បំផុត​នៅ​សល់​ក្នុង​តំបន់​អាស៊ី​អាគ្នេយ៍ ច្រើន​ឆ្នាំ​មក​ហើយ ដោយ​បាន​ព្យាយាម​រារាំង​ពួក​កាប់​ឈើ​ខុស​ច្បាប់​និង​ការ​ទន្ទ្រាន​យក​ដី​ធ្វើ​ចម្ការ​កៅស៊ូ​មិន​ឲ្យ​ចូល​បំផ្លាញ​ព្រៃ។ ពួកគេ​បាន​និយាយ​នៅ​ឯ​សិក្ខាសាលា​មួយ​ក្នុង​ក្រុង​ភ្នំពេញ​ដែល​រៀបចំ​ដោយ​ក្រសួង​បរិស្ថាន​ដើម្បី​ប្រមូល​ព័ត៌មាន​ទាក់ទិន​នឹង​ផែនការ​របស់​ខ្លួន​បន្ថែម​ព្រៃ​ប្រាំ​កន្លែង​ទៀត ក្នុង​នោះ​មាន​ព្រៃ​ឡង់​ដែរ ចូល​បញ្ជី​នៃ​តំបន់​ការពារ​ផ្លូវការ​របស់​ប្រទេស​នេះ។

រដ្ឋាភិបាល​មាន​ផែនការ​ប្រែក្លាយ​ព្រៃ​ឡង់​ទៅ​ជា​តំបន់​ការពារ​ច្រើន​ឆ្នាំ​ហើយ ហើយ​បាន​រង​ការ​រិះគន់​ចំពោះ​ផែនការ​មុន​នោះ ដែល​ផ្តល់​ឋានៈ​ការពារ​ទៅ​លើ​ព្រៃ​តែ​៤៧៥.០០០​ហិកតា​ប៉ុណ្ណោះ ដែល​ដំបូង​ឡើយ​មាន​ផ្ទៃ​ដី​ទំហំ​ជាង​៦០០.០០០​ហិកតា​ឯ​ណោះ។ សំណើ​ដែល​បញ្ចេញ​ឲ្យ​ដឹង​នៅ​ឯ​សិក្ខាសាលា​កាលពី​ថ្ងៃ​ច័ន្ទ​បាន​កាត់​បន្ថយ​តំបន់​នោះ​មក​នៅ​ប្រហែល​៣០០.០០០​ហិកតា និង​មិន​បាន​រាប់​បញ្ចូល​ព្រៃ​ភាគ​ច្រើន​បំផុត​នៃ​ព្រៃ​ភាគ​ខាង​ជើង​ទេ។

នោះ​ជា​ដំណឹង​អាក្រក់​សម្រាប់​សហគមន៍​ក្នុង​តំបន់​នោះ​ដែល​នៅ​តែ​ពឹង​ផ្អែក​លើ​ព្រៃ​ដើម្បី​គ្រាន់តែ​រស់ ហើយ​ពួកគេ​ភាគ​ច្រើន​ជា​ក្រុម​ជនជាតិ​ដើម​ភាគ​តិច។

លោក ថាយ ប៊ុនលាង សមាជិក​បណ្តាញ​ម្នាក់​ដែល​បាន​ចូលរួម​ក្នុង​សិក្ខាសាលា​បាន​និយាយ​ថា “ព្រៃ​ឡង់​គ្រប​ដណ្តប់​លើ​ផ្ទៃ​ដី​៦១០.០០០​ហិកតា​នៅ​បួន​ខេត្ត។ ឥឡូវ​នេះ​យើង​ស្នើ​ឲ្យ​បញ្ចូល​៤៧០.០០០​ហិកតា​ក្នុង​តំបន់​ការពារ​នេះ ពីព្រោះ​វា​ប៉ះពាល់​ដល់​ប្រជាពលរដ្ឋ​ដែល​រស់​នៅ​ក្នុង​ភូមិ​នានា​ជុំវិញ​ព្រៃឡង់”។

សមាជិក​បណ្តាញ​ម្នាក់​ទៀត​ដែល​មិន​ប្រាប់​ឈ្មោះ​របស់​ខ្លួន​បាន​និយាយ​ថា “យើង​ចង់​ដាក់​បញ្ចូល​ខេត្ត​ព្រះវិហារ​ក្នុង​តំបន់​ការពារ​នេះ”។ សមាជិក​រូប​នេះ​ក៏​បាន​ជំរុញ​អាជ្ញាធរ​ឲ្យ​បិទ​រោង​អារ​ឈើ​ដែល​បើក​នៅ​ក្នុង​ព្រៃ​នោះ​ដែរ។

“ព្រៃឡង់​កំពុង​ត្រូវ​កាប់​បំផ្លាញ​ពីព្រោះ​មាន​រោង​អារ​ឈើ​ច្រើន​នៅ​ក្នុង​ព្រៃ​នេះ។ ដូច្នេះ​ខ្ញុំ​ស្នើ​ឲ្យ​បិទ​រោង​អារ​ឈើ​ទាំង​នោះ បើ​ពុំ​ដូច្នោះ​ទេ ការ​កាប់​ឈើ​ខុស​ច្បាប់​នឹង​បន្ត​ក្នុង​ព្រៃ​ឡង់”។

រូបភាព​នៃ​ប្រទេស​កម្ពុជា​ពី​ផ្កាយ​រណប​អាមេរិក​បង្ហាញ​ថា​ការ​កាប់​បំផ្លាញ​ព្រៃ​ឈើ​កំពុង​បំផ្លាញ​ព្រៃ​ឡង់​ពី​គ្រប់​ទិស​ទាំង​អស់ ជាពិសេស​នៅ​ទិស​ខាង​ត្បូង​និង​ទិស​ខាង​លិច។ រូបភាព​ដដែល​បង្ហាញ​ថា​ប្រទេស​នេះ​មាន​អត្រា​ខ្ពស់​បំផុត​នៃ​ការ​បាត់​បង់​ព្រៃ​ឈើ​ក្នុង​ពិភព​លោក ពោល​គឺ​ការ​បាត់​បង់​ភាគ​ច្រើន​បំផុត​គឺ​ដោយសារ​ចម្ការ​កសិ​ឧស្សាហកម្ម​ដែល​កាប់​ឈើ​អស់​នៅ​ខាង​ក្នុង​តំបន់​ការពារ​នានា។

រដ្ឋាភិបាល​បាន​អញ្ជើញ​បណ្តាញ​ព្រៃ​ឡង់​និង​ក្រុម​ស្រដៀង​គ្នា​នេះ​ឲ្យ​ចូល​រួម​ជាមួយ​អាជ្ញាធរ ក្នុង​ការ​ជួយ​សង្គ្រោះ​តំបន់​ការពារ​ថ្មី​ប្រាំ​កន្លែង។ ទោះ​ជា​យ៉ាង​នេះ​ក្តី នៅ​សិក្ខាសាលា​កាលពី​ថ្ងៃ​ច័ន្ទ លោក សៅ សុភាព អ្នកនាំពាក្យ​ក្រសួង​បរិស្ថាន បាន​និយាយ​ថា បណ្តាញ​នេះ​នឹង​លែង​ទទួល​បាន​ការ​អនុញ្ញាត​ឲ្យ​ប្រតិបត្តិការ​ដោយ​ឯករាជ្យ​ទៀត​ហើយ ហើយ​នឹង​តម្រូវ​ឲ្យ​ចូលរួម​នឹង​ក្រុមល្បាត​រដ្ឋាភិបាល​វិញ។

ប៉ុន្តែ​ក្រុម​ជាច្រើន​ដូចគ្នា​ទាំង​នោះ​ជឿជាក់​ថា អាជ្ញាធរ​ចូល​ដៃ​នឹង​ពួក​កាប់​ឈើ​ខុស​ច្បាប់ ហើយ​ជឿ​ថា ឯករាជ្យ​ភាព​របស់​ពួកគេ​គឺ​ធ្វើ​ឲ្យ​មាន​ប្រសិទ្ធភាព។

សមាជិក​បណ្តាញ​ព្រៃ​ឡង់ លោក ហឿន សុភាព បាន​និយាយ​ថា “យើង​មិន​អាច​ទទួល​យក​បម្រាម​នេះ​បាន​ទេ ហើយ​យើង​នឹង​បន្ត​ធ្វើ​កិច្ចការ​របស់​យើង​ដូច​ដែល​យើង​បាន​ធ្វើ​ពី​មុន។ រដ្ឋាភិបាល​ចង់​បញ្ឈប់​យើង ពីព្រោះ​មិន​ចង់​ឲ្យ​សហគមន៍​មើល​ឃើញ​ឧក្រិដ្ឋកម្ម​ព្រៃ​ឈើ​ទេ”។

សិក្ខាសាលា​នេះ​ជា​សិក្ខាសាលា​សាធារណៈ​លើក​ដំបូង​ដើម្បី​ពិនិត្យ​មើល​ផែនការ​ថ្មី​របស់​រដ្ឋាភិបាល​សម្រាប់​ព្រៃ​ឡង់ និង​ព្រៃ​បួន​កន្លែង​ផ្សេង​ទៀត ដែល​ខ្លួន​បម្រុង​ប្រែ​ក្លាយ​ទៅ​ជា​តំបន់​ការពារ។

ក្រុម​អង្គការ​ក្រៅ​រដ្ឋាភិបាល​បាន​ស្នើ​សុំ​ពេល​បន្ថែម​ទៀត​ដើម្បី​ពិនិត្យ​ផែនការ​និង​ផ្តល់​មតិ​ត្រឡប់​វិញ។

លោក ចាយ សាមិត្ត អគ្គនាយកដ្ឋាន ការពារ​និង​អភិរក្ស​ធម្មជាតិ នៃ​ក្រសួង​បរិស្ថាន បាន​ធានា​អះអាង​នឹង​ពួកគេ​ថា ការ​ពិភាក្សា​នេះ​នឹង​បន្ត។ ប៉ុន្តែ​មជ្ឈដ្ឋាន​មួយ​ចំនួន​ជឿ​ថា រដ្ឋាភិបាល​បាន​សម្រេច​រួច​ហើយ ហើយ​ថា​សិក្ខាសាលា​នេះ​គ្រាន់តែ​ធ្វើ​ឲ្យ​ល្អ​មើល​ប៉ុណ្ណោះ។

លោក សោម ចាន់មុនី មេដឹកនាំ​ក្រុម​នៃ​អង្គការ​ស្ពាន​សន្តិភាព ដែល​ធ្វើ​ការ​ជាមួយ​បណ្តាញ​ព្រៃ​ឡង់ បាន​និយាយ​ថា “ក្រសួង​បរិស្ថាន​គ្រាន់តែ​ចង់​ឲ្យ​សហគមន៍​ព្រៃ​ឡង់​ចូលរួម​ក្នុង​សិក្ខាសាលា​នេះ ប៉ុន្តែ​ក្រសួង​នេះ​មិន​ចង់​បាន​គំនិត ឬ​មតិ​របស់​សហគមន៍​ទេ ពីព្រោះ​ខ្លួន​បាន​សម្រេច​រួច​ហើយ”។

លោក ច័ន្ទ ប៊ុនហ៊ន ដែល​បាន​ចូលរួម​ក្នុង​បណ្តាញ​នេះ​នៅ​ពេល​ល្បាត​ជា​ច្រើន​លើក និង​បាន​ឃើញ​កង្វះ​ការ​អនុវត្ត​ច្បាប់​នៅ​ព្រៃ​ឡង់​ផ្ទាល់ បាន​និយាយ​ថា លោក​មិន​ជឿ​ថា រដ្ឋាភិបាល​ប្ដេជ្ញា​បញ្ឈប់​ពួក​កាប់​ឈើ​ខុស​ច្បាប់​ទេ ហើយ​ថា ការ​បង្ក្រាប​ជា​បន្ត​លើ​ជំនួញ​ឈើ គឺ​គ្រាន់តែ​ធ្វើ​ឲ្យ​មាន​ការ​ចាប់​អារម្មណ៍​ជា​សាធារណៈ​ប៉ុណ្ណោះ។

លោក​មិន​អើពើ​នឹង​ការ​ព្យាយាម​របស់​អ្នក​រៀបចំ​ព្រឹត្តិការណ៍​នេះ​ដើម្បី​ឲ្យ​គាត់​ស្ងាត់​មាត់​នៅ​ពេល​វគ្គ​សួរ​ឆ្លើយ​សំណួរ​ខ្លីៗ​ទេ។

លោក ប៊ុនហ៊ន បាន​និយាយ​ថា “ខ្ញុំ​សុំ​សួរ ហេតុអ្វី​អាជ្ញាធរ​មូលដ្ឋាន​មិន​បាន​បញ្ឈប់​ការ​កាប់​ឈើ​ខុស​ច្បាប់ ហើយ​ហេតុអ្វី​ឧក្រិដ្ឋកម្ម​ព្រៃ​ឈើ​នៅ​តែ​បន្ត​មក​ដល់​សព្វ​ថ្ងៃ​នេះ? ខ្ញុំ​សុំ​សួរ [នាយករដ្ឋមន្ត្រី] ហ៊ុន សែន។ ហេតុអ្វី​គាត់​មិន​បាន​បញ្ឈប់​ឧក្រិដ្ឋកម្ម​ព្រៃ​ឈើ​នេះ?”។

“លោក ហ៊ុន សែន បាន​ចេញ​បញ្ជា​ដល់​អាជ្ញាធរ​មូលដ្ឋាន​ឲ្យ​បញ្ឈប់​ឧក្រិដ្ឋកម្ម​ព្រៃ​ឈើ ហើយ​មួយ​ម៉ោង​ក្រោយ​មក គេ​រក​ឃើញ​គំនរ​ឈើ​ដ៏​ធំ​ក្នុង​ព្រៃ។ ខ្ញុំ​គិត​ថា រដ្ឋាភិបាល​គ្មាន​បំណង​ពិត​ប្រាកដ​ដើម្បី​បញ្ឈប់​ការ​កាប់​ឈើ​ខុស​ច្បាប់​ទេ។ បើ​គេ​ចង់​ធ្វើ វា​មិន​លំបាក​ទេ”។

លោក​បាន​ច្រាន​ចោល​ការ​អះអាង​ពី​មន្ត្រី​រដ្ឋាភិបាល​តាម​រយៈ​សិក្ខាសាលា​នោះ​ថា​អ្នក​ភូមិ​ដែល​កាប់​ឆ្ការ​ព្រៃ​ធ្វើ​ចម្ការ​តូចៗ​គឺ​ជា​ការ​គំរាម​ដ៏​ធំ។

លោក​បាន​និយាយ​ថា “បញ្ហា​មិន​មែន​អ្នក​ភូមិ​ក្រីក្រ​ទេ។ គឺ​ជា​ក្រុម​អង្គការ​ចាត់​តាំង​ដែល​យក​ឈើ​ទាំង​ឡាន​ធំៗ​ចេញ​ពី​ព្រៃ”។

ប៉ុន្តែ​ក្រុម​អភិរក្ស​មិន​ត្រឹមតែ​សង្ស័យ​លើ​ឆន្ទៈ​របស់​រដ្ឋាភិបាល​ប៉ុណ្ណោះ​ទេ។ ពួកគេ​មិន​ជឿ​ជាក់​ថា រដ្ឋាភិបាល​មាន ឬ​នឹង​រក​បាន​ប្រាក់​និង​កម្លាំង​ពល​កម្ម​ដើម្បី​ការពារ​ទីតាំង​ថ្មី​ប្រាំ​កន្លែង​នោះ​ទេ។

ក្រសួង​បរិស្ថាន​បាន​និយាយ​ថា ព្រៃ​ប្រាំ​កន្លែង​នោះ​នឹង​គ្រប់​ដណ្តប់​លើ​ផ្ទៃ​ដី​ទាំង​អស់​ជិត​មួយ​លាន​ហិកតា​នៅ​ពេល​ដែល​ព្រំប្រទល់​ព្រៃ​កំណត់​ហើយ។ ទំហំ​នេះ​នឹង​បន្ថែម​ផ្ទៃ​ដី​ជិត​មួយ​ភាគ​បី​ទៀត​ទៅ​ឲ្យ​ក្រសួង​គ្រប់គ្រង ដែល​បាន​ទទួល​ស្គាល់​ថា ខ្លួន​មាន​ឧទ្យានុរក្ស​មិន​គ្រប់គ្រាន់​តាម​ការ​ជាក់​ស្តែង។

ក្រុម​អភិរក្ស​សង្ឃឹម​ថា ឋានៈ​ទទួល​បាន​ការ​ការពារ​នេះ​នឹង​បង្ខំ​មន្ត្រី​រដ្ឋាភិបាល​ឲ្យ​ជំរុញ​ផ្តល់​មូលនិធិ​បន្ថែម ទន្ទឹម​នឹង​ធ្វើ​ឲ្យ​ម្ចាស់​ជំនួយ​អន្តរជាតិ​ជឿ​ជាក់​ដើម្បី​បន្ថែម​ជំនួយ​របស់​ពួកគេ។

លោក ដេវិដ អាសវែល អ្នក​អភិរក្ស​ជើង​ចាស់​ដែល​មាន​វត្តមាន នៅ​ពេល​ដែល​ប្រព័ន្ធ​តំបន់​ការពារ​ទំនើប​របស់​កម្ពុជា​បាន​លេច​ចេញ​ជា​រូបរាង​នៅ​ទសវត្សរ៍​ឆ្នាំ​១៩៩០ បាន​និយាយ​ថា លោក​មាន​សុទិដ្ឋិ​និយម។

លោក​បាន​និយាយ​ថា “ក្នុង​នាម​ជា​អ្នក​រួម​ចំណែក​យូរ​អង្វែង​ចំពោះ​ផ្នែក​នេះ​នៅ​កម្ពុជា ខ្ញុំ​ពិត​ជា​ជឿ​ថា នេះ​ជា​ឱកាស​ប្រវត្តិសាស្ត្រ​មួយ។ វា​មាន​ភាព​ស្រដៀង​គ្នា​ច្រើន​ទៅ​នឹង​អ្វី​ដែល​យើង​បាន​ជួប​ប្រទះ​នៅ​ដើម​និង​ពាក់​កណ្តាល​ទសវត្សរ៍​ឆ្នាំ​៩០។ ភាព​ខុស​គ្នា​ចម្បង​នោះ​គឺ​ថា មាន​សមត្ថភាព​ច្រើន​ជាង​នៅ​ពេល​នេះ។ មាន​សមត្ថភាព​រដ្ឋាភិបាល មាន​សមត្ថភាព​ក្រៅ​រដ្ឋាភិបាល​ច្រើន និង​មាន​សមត្ថភាព​សហគមន៍​ច្រើន។

រដ្ឋាភិបាល​បាន​និយាយ​ថា ខ្លួន​សង្ឃឹម​ថា​នឹង​មាន​តំបន់​ការពារ​ថ្មី​ចំនួន​ប្រាំ​ត្រូវ​បង្កើត​ឡើង​នៅ​ចុង​ឆ្នាំ​នេះ៕ និត

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស