អាជ្ញាធរក្នុងក្រុងតាខ្មៅ ខេត្តកណ្ដាលបានហាមឃាត់គណបក្សសង្គ្រោះជាតិមិនឲ្យដំឡើងអង់តែនទូរទស្សន៍នៅលើដីដែលពួកគេបានទិញនៅទីនោះទុកសម្រាប់ស្ថានីយទូរទស្សន៍គាំទ្រគណបក្សប្រឆាំងលើកដំបូងក្នុងប្រទេសកម្ពុជា ជាផ្នែកដ៏សំខាន់នៃកិច្ចព្រមព្រៀងនយោបាយខែកក្កដា ឆ្នាំ២០១៤។
លោក ហេង ធៀម អភិបាលក្រុងតាខ្មៅបានមានប្រសាសន៍ថា អាជ្ញាធរបានសម្រេចហាមឃាត់នេះបន្ទាប់ពីមានការដាក់ពាក្យបណ្តឹងកាលពីថ្ងៃទី១៩ ខែកុម្ភៈ ដោយប្រជាពលរដ្ឋ២១គ្រួសារដែលរស់នៅជុំវិញដីដែលទុកសម្រាប់ដំឡើងអង់តែន “ទូរទស្សន៍ព្រះអាទិត្យ”របស់គណបក្សសង្គ្រោះជាតិនៅក្នុងក្រុងនេះ ដែលស្ថិតនៅប៉ែកខាងត្បូងរាជធានីភ្នំពេញ។
លោក ហេង ធៀម បានមានប្រសាសន៍ថា ”យើងបានសម្រេចមិនផ្ដល់ការអនុញ្ញាតដល់គណបក្សសង្គ្រោះជាតិដំឡើងអង់តែនសម្រាប់ស្ថានីយទូរទស្សន៍របស់ខ្លួន ពីព្រោះមានប្រជាពលរដ្ឋតវ៉ាពីរឿងនេះ។ វាមិនពាក់ព័ន្ធនយោបាយឡើយ”។
លោកបន្ថែមថា “ប្រជាពលរដ្ឋក្នុងមូលដ្ឋានតវ៉ាជំទាស់នឹងគម្រោងដំឡើងអង់តែនទូរទស្សន៍នេះ ពីព្រោះគ្រួសារទាំងនេះរស់នៅជុំវិញដីដែលគ្រោងដំឡើងអង់តែននេះ ហើយពួកគាត់បារម្ភថា ពួកគាត់នឹងទទួលរងជាតិវិទ្យុសកម្មដែលអាចប៉ះពាល់ដល់សុខភាពរបស់ពួកគាត់”។
លោកបានមានប្រសាសន៍ថា ”គ្រួសារទាំងនោះទាមទារឱ្យគណបក្សនេះស្វែងរកកន្លែងផ្សេងស្ថិតក្នុងទីវាលឆ្ងាយពីលំនៅដ្ឋានរបស់ពួកគាត់”។ លោកបានបន្ថែមថា អាជ្ញាធរក្រុងនឹងអនុញ្ញាតឲ្យទូរទស្សន៍របស់គណបក្សសង្គ្រោះជាតិដំឡើងអង់តែនបាន “ក្នុងករណីដែលពួកគេស្វែងរកការសម្រុះសម្រួលជាមួយក្រុមអ្នកតវ៉ាតែប៉ុណ្ណោះ”។
លោក យឹម សុវណ្ណ អ្នកនាំពាក្យគណបក្សសង្គ្រោះជាតិបានមានប្រសាសន៍ថា លោកមានការភ្ញាក់ផ្អើលដោយឃើញអាជ្ញាធរអើពើខ្លាំងចំពោះក្រុមអ្នកតវ៉ា ហើយបានសួរពីមូលហេតុដែលមន្ត្រីទាំងនោះមិនអើពើចំពោះការតវ៉ាធំៗពាក់ព័ន្ធបញ្ហាផ្សេងទៀតក្នុងពេលកន្លងមក។ លោកបានថ្លែងថា លោកសង្ឃឹមថា នឹងស្វែងរកដំណោះស្រាយដើម្បីដំឡើងអង់តែនតាមការគ្រោងទុក។
លោក យឹម សុវណ្ណ បានមានប្រសាសន៍ថា ”ខ្ញុំចង់និយាយទៅកាន់អាជ្ញាធរអំពីបញ្ហានេះ។ វាពិតជាចម្លែកណាស់ ព្រោះមានប្រជាពលរដ្ឋតែពីរបីគ្រួសារប៉ុណ្ណោះតវ៉ា ហើយពួកគេលុបចោលសំណើនេះ។ ប្រសិនបើដូចនេះមែន សូមក្រឡេកមើលការតវ៉ាទាំងអស់នៅទូទាំងប្រទេស”។
លោកបានសួរថា ”ប្រសិនបើប្រជាពលរដ្ឋតែពីរបីគ្រួសារតវ៉ាធ្វើឲ្យពួកគេលុបចោលសំណើនោះ ហេតុអ្វីបានជាយើងមិនលុបចោលដីសម្បទានទាំងអស់ដែលមានប្រជាពលរដ្ឋរាប់ម៉ឺននាក់តវ៉ាច្រើនឆ្នាំមកហើយនោះទៅ?”។
លោក យឹម សុវណ្ណ បានបន្ថែមថា មានអង់តែនទូរទស្សន៍ច្រើនទៀត ដូចជាអង់តែនទូរទស្សន៍មួយរបស់ទូរទស្សន៍អប្សរាដែលគាំទ្រគណបក្សប្រជាជនកម្ពុជាស្ថិតក្នុងសង្កាត់បឹងកេងកង១ ខណ្ឌចំការមន បានផ្សព្វផ្សាយច្រើនឆ្នាំមកហើយចេញពីកណ្ដាលរាជធានីភ្នំពេញ។
លោក យឹម សុវណ្ណ បានមានប្រសាសន៍ថា ”បើយើងក្រឡេកមើលបង្គោលអង់តែនទូរទស្សន៍ទាំងអស់នៅក្នុងរាជធានីភ្នំពេញ យើងឃើញថា អង់តែនទូរទស្សន៍អប្សរាស្ថិតចំកណ្ដាលក្រុងតែម្ដង ដែលមានផ្ទះមន្ត្រីជាន់ខ្ពស់ជាច្រើននៅជុំវិញនោះ”។
លោកបានបន្ថែមថា “មិនត្រឹមតែអង់តែនមួយនោះទេ មានអង់តែនច្រើនទៀតក្នុងក្រុង ហើយមិនដែលមានការតវ៉ាពីរឿងនេះឡើយ។ ហេតុអ្វីមានការតវ៉ាចំពោះតែទូរទស្សន៍ព្រះអាទិត្យមួយ?”។
ទូរទស្សន៍ដែលជាប្រភពដ៏សំខាន់នៃការផ្ដល់ព័ត៌មានដល់ប្រជាជនខ្មែរនោះ បច្ចុប្បន្ននេះស្ថិតក្រោមការគ្រប់គ្រងរបស់គណបក្សកាន់អំណាច។ ច្រើនឆ្នាំមកហើយ គណបក្សប្រឆាំងបានត្អូញត្អែរចំពោះការហាមឃាត់មិនឱ្យខ្លួនធ្វើការផ្សព្វផ្សាយតាមទូរទស្សន៍ បើពុំដូច្នោះទេនឹងត្រូវចាត់ទុកថាជាឧក្រិដ្ឋជន។ គណបក្សបានស្នើសុំបង្កើតស្ថានីយទូរទស្សន៍ផ្ទាល់ខ្លួនជាយូរមកហើយ ហើយបានស្វះស្វែងរកអាជ្ញាប័ណ្ណជាផ្នែកនៃកិច្ចព្រមព្រៀងនយោបាយខែកក្កដា ឆ្នាំ២០១៤។
កិច្ចព្រមព្រៀងនេះបានបញ្ចប់ការធ្វើពហិការរដ្ឋសភារយៈពេល១ឆ្នាំរបស់គណបក្សសង្គ្រោះជាតិ បន្ទាប់ពីការបោះឆ្នោតឆ្នាំ២០១៣ដ៏ចម្រូងចម្រាស ហើយបានឈានដល់ការសម្រេចបាន “វប្បធម៌សន្ទនា” រវាងគណបក្សទាំងពីរ ជាការរៀបចំដែលត្រូវបានបោះបង់ចោលតាំងពីរយូរមកហើយ ដោយសមាជិកសភាគណបក្សសង្គ្រោះជាតិត្រូវបានចាប់ដាក់ពន្ធនាគារ ហើយលោក សម រង្ស៊ី មេដឹកនាំគណបក្សប្រឆាំងនិរទេសខ្លួនដោយខ្លួនឯងដើម្បីគេចពីការផ្ដន្ទាទោស។
លោក ខៀវ កាញារីទ្ធ រដ្ឋមន្ត្រីក្រសួងព័ត៌មានមិនបានឆ្លើយតបចំពោះសំណើសុំអត្ថាធិប្បាយអំពីការដំឡើងអង់តែនទូរទស្សន៍របស់គណបក្សសង្គ្រោះជាតិទេ។ ប៉ុន្តែលោក សុខ ឥសាន អ្នកនាំពាក្យគណបក្សប្រជាជនកម្ពុជា ដែលពីមុនជាអគ្គនាយកទូរទស្សន៍អប្សរាបានមានប្រសាសន៍ថា អាជ្ញាធរមិនបានអនុវត្តស្ដង់ដារពីរឡើយ។
លោក សុខ ឥសាន បានមានប្រសាសន៍ថា ”បញ្ហាដំឡើងអង់តែនមិនពាក់ព័ន្ធការរើសអើងទេ ពីព្រោះមានការតវ៉ាពីសំណាក់អ្នកភូមិក្នុងមូលដ្ឋាន ដូច្នេះហើយអាជ្ញាធរមូលដ្ឋានត្រូវថ្លឹងថ្លែងអំពីបញ្ហានេះ។ ដូច្នេះលោក យឹម សុវណ្ណ គួរយល់ពីបញ្ហានេះ ហើយកុំមានគំនិតអវិជ្ជមានអំពីរឿងនេះ”។
លោកបានថ្លែងថា ”ហេតុអ្វីបានជាគាត់ប្រៀបធៀបករណីនេះជាមួយទូរទស្សន៍អប្សរា ដោយលើកឡើងថា ទូរទស្សន៍អប្សរាស្ថិតនៅកណ្ដាលរាជធានីទៅវិញ?។ អង់តែនទូរទស្សន៍អប្សរាត្រូវបានដំឡើងតាំងពីឆ្នាំ១៩៩៦មកម្លេ៉ះ ដូច្នេះវាជាពេលវេលាខុសគ្នាទាំងស្រុង។ វាខុសគ្នា២០ឆ្នាំឯណោះ”។
លោកបានបន្ថែមថា “គាត់លើកឡើងខុសហើយ ពីព្រោះឆ្នាំ២០១៦មិនអាចយកមកប្រៀបធៀបជាមួយឆ្នាំ១៩៩៦បានឡើយ។ នៅពេលនោះ វាគ្មានបញ្ហាទេចំពោះការដំឡើងអង់តែននៅកន្លែងណាក៏ដោយ ព្រោះមានមនុស្សតិចតួច លើកលែងតែនៅម្តុំព្រះបរមរាជវាំង។
លោក សុខ ឥសាន បានបន្ថែមថា ប្រសិនបើគណបក្សសង្គ្រោះជាតិដោះស្រាយជាមួយអ្នកជិតខាងរបស់ខ្លួនបាន គ្មានបញ្ហាឡើយ។ លោកថ្លែងថា “ប្រសិនបើការដំឡើងអង់តែនធ្វើឲ្យប្រជាពលរដ្ឋសប្បាយចិត្ត វាមិនអីទេ”។
លោក គល់ បញ្ញា នាយកប្រតិបត្តិគណៈកម្មាធិការដើម្បីការបោះឆ្នោតដោយសេរី និងយុត្តិធម៌បានស្នើឲ្យគណបក្សប្រជាជនកម្ពុជាសម្របសម្រួលការពិភាក្សារវាងគណបក្សសង្គ្រោះជាតិ និងគ្រួសារដែលធ្វើការតវ៉ា ដើម្បីផលប្រយោជន៍ការបោះឆ្នោតដែលអាចទទួលយកបាននៅឆ្នាំ២០១៧ និង២០១៨។
លោកបានមានប្រសាសន៍ថា ”ទូរទស្សន៍គឺសំខាន់ណាស់ដើម្បីធានាថា ការប្រកួតប្រជែងមានតុល្យភាពរវាងគណបក្សកាន់អំណាច និងគណបក្សប្រឆាំង។ ប្រជាពលរដ្ឋជាច្រើននៅមិនទាន់មានអុីនធឺណិតប្រើប្រាស់នៅឡើុយ ប៉ុន្តែពួកគាត់អាចមើលទូរទស្សន៍បាន ហើយពួកគាត់អាចមើលទូរទស្សន៍របស់គណបក្សប្រឆាំង។
លោក គល់ បញ្ញា មានប្រសាសន៍ថា “ឥឡូវនេះ មានតែគណបក្សកាន់អំណាចប៉ុណ្ណោះគ្រប់គ្រងទូរទស្សន៍ ហើយយ៉ាងហោចណាស់គួរមានទូរទស្សន៍មួយសម្រាប់គណបក្សមិនកាន់អំណាច។ ដូច្នេះហើយ ពួកគេត្រូវតាំងចិត្តជួយគ្នាទៅវិញទៅមក។ បញ្ហានេះស្ថិតក្នុងកិច្ចព្រមព្រៀងរបស់ខ្លួន ហើយពួកគេគួរកសាងទំនុកចិត្តទៅវិញទៅមក”។
លោកបានមានប្រសាសន៍បន្ថែមទៀតថា ទាំងគណបក្សកាន់អំណាច និងគណបក្សមិនកាន់អំណាចត្រូវរីករាយចំពោះដំណើរការនេះ ”ប្រសិនបើយើងចង់បានការបោះឆ្នោតត្រឹមត្រូវ “៕ សារុន