កាលពីម្សិលមិញ ក្រសួងយុត្តិធម៌បានច្រានចោលការជំទាស់របស់គណបក្សសង្គ្រោះជាតិដែលបដិសេធការសាកសួររបស់ព្រះរាជអាជ្ញាធរជុំវិញរឿងអាស្រូវផ្លូវភេទរបស់លោក កឹម សុខា អនុប្រធានគណបក្ស ដោយហៅការអះអាងរបស់គណបក្សនេះថាជា “ការមួលបង្កាច់” ផ្ទុយរដ្ឋធម្មនុញ្ញ”។
គណបក្សប្រឆាំងទទួលបានការគាំទ្រលើសលប់ពីសង្គមស៊ីវិលដែលហៅការស៊ើបអង្កេតរបស់រដ្ឋាភិបាលលើរឿងស្នេហាលួចលាក់នោះថា ជាការវាយប្រហារនយោបាយដោយឥតលាក់លៀម។
កាលពីថ្ងៃពុធ គណបក្សសង្គ្រោះជាតិបានលើកឡើងថា សាលាដំបូងរាជធានីភ្នំពេញ មិនមានសិទ្ធិកោះហៅលោក កឹម សុខា និងតំណាងរាស្ត្រគណបក្សពីររូបទៀតមកសាកសួរពាក់ព័ន្ធស្នេហាលួចលាក់របស់អនុប្រធានគណបក្សរូបនេះជាមួយអ្នកធ្វើសក់ម្នាក់ឡើយ ពីព្រោះអភ័យឯកសិទ្ធិស្របច្បាប់ត្រូវបានធានាចំពោះតំណាងរាស្ត្រទាំងអស់ដោយរដ្ឋធម្មនុញ្ញ។ គណបក្សនេះបានបន្តថា ក្នុងចំណោមអ្នកទាំងបីគ្មាននរណាម្នាក់គោរពដីកាកោះហៅដែលត្រូវបានចេញកាលពីថ្ងៃអង្គារឡើយ។
កាលពីម្សិលមិញ ក្រសួងយុត្តិធម៌បានចេញសេចក្តីថ្លែងការណ៍របស់ខ្លួន ច្រានចោលជំហររបស់គណបក្សប្រឆាំង។
សេចក្តីថ្លែងការណ៍នេះមានខ្លឹមសារថា “អ្នកនាំពាក្យក្រសួងយុត្តិធម៌មានការសោកស្តាយយ៉ាងខ្លាំងដែលក្រុមសមាជិកគណបក្សសង្គ្រោះជាតិដែលជាអ្នកធ្វើច្បាប់ បានធ្វើការបកស្រាយដោយខ្វះការយល់ដឹងត្រឹមត្រូវអំពីច្បាប់ និងនីតិវិធីរបស់អង្គការអយ្យការ និងតុលាការ”។
សេចក្តីថ្លែងការណ៍ដដែលនេះបន្ថែមថា “ពួកគេបានធ្វើការចោទប្រកាន់ដោយមិនត្រឹមត្រូវ និងមានលក្ខណៈជាការមួលបង្កាច់ទៅលើស្ថាប័នអនុវត្តច្បាប់ដែលបានអនុវត្តការងារ និងសមត្ថកិច្ចរបស់ខ្លួនស្របតាមច្បាប់និងនីតិវិធីជាធរមាន” ដោយហៅជំហររបស់គណបក្សសង្គ្រោះជាតិថា ជា “សកម្មភាពដែលដាក់សម្ពាធលើតុលាការ”។
នៅក្នុងសេចក្តីថ្លែងការណ៍របស់ខ្លួន ក្រសួងយុត្តិធម៌បានលើកឡើងថា រដ្ឋធម្មនុញ្ញការពារតំណាងរាស្ត្រពីការចាប់ខ្លួន និងការឃុំខ្លួនតែប៉ុណ្ណោះ តែមិនការពារពីការសាកសួរឡើយ។មាត្រា៨០នៃរដ្ឋធម្មនុញ្ញចែងថា តំណាងរាស្ត្រត្រូវបានការពារពីការចោទប្រកាន់ ការចាប់ខ្លួន ការឃាត់ខ្លួន និងការឃុំខ្លួន។ វាមិនបានលើកឡើងពីការសាកសួរដោយព្រះរាជអាជ្ញាឡើយ។
នៅពេលទាក់ទងកាលពីម្សិលមិញ លោក សុន ឆ័យ តំណាងរាស្ត្រគណបក្សសង្គ្រោះជាតិបានប្រកាន់តាមជំហររបស់គណបក្សដដែល។ លោកមានប្រសាសន៍ថា “សេចក្តីថ្លែងការណ៍របស់យើងបានបញ្ជាក់ហើយថា ការកោះហៅតំណាងរាស្ត្រដែលមានអភ័យឯកសិទ្ធិមកសាកសួរគឺជាការខុសច្បាប់។ យើងមិនបានមួលបង្កាច់ទេ យើងបានធ្វើផ្អែកតាមមាត្រា៨០នៃរដ្ឋធម្មនុញ្ញ”។
លោកមានប្រសាសន៍ថា “យើងគ្រាន់តែរំឭកពួកគេថា យើងជាតំណាងរាស្ត្រ។ យើងជាអ្នកធ្វើច្បាប់។ យើងមិនអាចអនុញ្ញាតឱ្យពួកគេប្រើច្បាប់ជាការលេងសើចបានឡើយ។ យើងចង់រំឭកប្រាប់ពួកគេថា អ្វីដែលពួកគេបានធ្វើគឺខុសច្បាប់។ យើងបានប្រាប់ពួកគេថា យើងមិនអាចបង្ហាញខ្លួនទេ ហើយទុកឱ្យពួកគេបន្តរំលោភបំពានច្បាប់ទៀតចុះ”។
ប៉ុន្តែ នៅពេលសួរអំពីការលើកឡើងរបស់ក្រសួងយុត្តិធម៌ លោក សុន ឆ័យ បានបន្ទន់ជំហររបស់លោក ដោយទទួលស្គាល់ថា តុលាការអាចចេញដីកាកោះហៅបាន។
លោកបានថ្លែងថា “ពួកគេអាចកោះហៅពួកយើងបាន ប៉ុន្តែយើងមានសិទ្ធិមិនបង្ហាញខ្លួន។ រដ្ឋធម្មនុញ្ញមិនបានហាមឃាត់ការកោះហៅឡើយ ប៉ុន្តែករណីនោះត្រូវតែជាបទល្មើសជាក់ស្តែង”។
មាត្រា៨០មិនបានញែកឱ្យដាច់រវាងបទឧក្រិដ្ឋ ឬបទមជ្ឈិមឡើយ។ មាត្រានោះចែងថា តំណាងរាស្ត្រអាចត្រូវបានចោទប្រកាន់ ចាប់ខ្លួន ឬឃាត់ខ្លួន ទោះជាពួកគេមានអភ័យឯកសិទ្ធិក៏ដោយ បើបទល្មើសនោះជា “បទល្មើសជាក់ស្តែង” ឬ ចាប់ពេលកំពុងប្រព្រឹត្តបទល្មើស។
ដោយច្រានចោលការចោទប្រកាន់របស់ក្រសួងយុត្តិធម៌ ជាថ្នូរលោក សុន ឆ័យ បានចោទក្រសួងនេះថា បានជ្រៀតជ្រែកការងារតុលាការ។
លោកបានមានប្រសាសន៍ថា “នៅពេលក្រសួងយុត្តិធម៌ការពារ [ព្រះរាជអាជ្ញា] ឬចោទប្រកាន់យើងដូចនេះ វាមានន័យថា ក្រសួងយុត្តិធម៌ជ្រៀតជ្រែកក្នុងឯករាជភាពរបស់តុលាការ”។
លោក សុន ឆ័យ បានលើកឡើងថា គណបក្សសង្គ្រោះជាតិបានផ្ញើលិខិតមួយច្បាប់ជូនប្រធានរដ្ឋសភាកាលពីថ្ងៃពុធ សុំឱ្យលោកកោះហៅលោក អង្គ វង្សវឌ្ឍានា រដ្ឋមន្ត្រីក្រសួងយុត្តិធម៌មកសាកសួរនៅចំពោះមុខសម័យប្រជុំសភាពេញអង្គ៕សារុន