មនុស្ស​​ប្រាំបី​នាក់​​​​ត្រូវ​សមត្ថ​កិច្ច​​​ចាប់​​ខ្លួន​កាលពី​ម្សិល​មិញ​​ពាក់​ព័ន្ធ​ការ​តវ៉ា​ “ថ្ងៃច័ន្ទពណ៌​ខ្មៅ​”​​

មន្ត្រី​អង្គការ​សិទ្ធិ​មនុស្ស​​ និង​សកម្មជន​​​ប្រាំបី​នាក់​​​​ដែល​ស្លៀក​ពាក់​ពណ៌​ខ្មៅ ត្រូវបាន​ចាប់​ខ្លួន​កាលពីម្សិលមិញ អំឡុង​ការ​តវ៉ា​ “ថ្ងៃច័ន្ទ​ពណ៌​ខ្មៅ” ក្នុង​រាជធានី​ភ្នំពេញ ​ជា​ការ​តវ៉ា​ដំបូង​​​ក្នុង​យុទ្ធនាការ​​មួយ​ដើម្បី​​ទាម​ទារ​ឲ្យ​​ដោះលែង​មន្ត្រី​​​​អង្គការ​​​​​សិទ្ធិ​មនុស្ស​បួន​រូប និង​មន្ត្រី​ គ.ជ.ប. ​​មួយ​រូប​ដែល​​ត្រូវបាន​​ដាក់​ពន្ធនាគារ​កាលពី​ចុង​ខែ​មុន​​តាម​បទ​ចោទ​ប្រកាន់​​ដែល​​មជ្ឈដ្ឋាន​ទូទៅ​​​​​ជឿ​​ថាជាហេតុ​ផល​នយោ​បាយ​។

មន្ត្រី​និយាយ​ថា ក្រុម​​​​នេះត្រូវ​បាន​ចាប់​ខ្លួន​​​​ខណៈធ្វើ​ដំណើរ​ឆ្ពោះ​​​​ទៅ​កន្លែង​តវ៉ា​​តាម​ការ​គ្រោង​ទុក​នៅ​ពន្ធនាគារ​ព្រៃស ទីដែល​​​​មន្ត្រី​បួន​រូប​មកពី​សមាគម​អាដហុក​ ត្រូវ​បាន​​ឃុំខ្លួន ​​​ប៉ុន្តែ​​​ត្រូវ​បាន​ដោះលែង​​តាម​ក្រោយ​។ ​​អ្នក​​ដែល​ត្រូវ​បាន​ចាប់​ខ្លួន​ទាំង​នោះរួម​មាន ​មន្ត្រី​អង្គការ​សិទ្ធិ​មនុស្ស​​​កម្ពុជាពីររ​ូប សហ​​​ការី​​​បរទេស​​​ពីរ​រូប​ និង​​​​​​​​សកម្មជន​សិទ្ធិ​ដីធ្លី​៤​​​រូប​​​ទៀត។

លោក អុី សារ៉ុម ​នាយក​ប្រតិបត្តិ​​សមាគម​ធាងត្នោត ដែល​ជា​​អង្គការ​សិទ្ធិ​​​​​​លំនៅដ្ឋាន​​​និង​​​​​​លោក ថាវ គឹមសាន អនុប្រធាន​ផ្នែក​តស៊ូ​មតិ​នៅ​អង្គការ​សិទ្ធិ​មនុស្ស​លីកាដូ ​ត្រូវ​បាន​​​​​​​គេ​​​រុញ​​ចូល​រថយន្ត​​នគរ​បាល​​នៅ​ម៉ោង​​​ប្រហែល​​​​៨និង​១៥​នាទី​ព្រឹក ក្រោយ​​ពីប្រកែក​គ្នា​ជាមួយ​​​​​​​មន្ត្រី​​​ខណ្ឌ​ដង្កោ​នៅ​ចំណុច​​ឆែកឆេរ​​មួយ​​ជិត​ពន្ធនាគារ​។

21B8578លោក ខៀវ សុភ័គ អ្នក​នាំពាក្យ​ក្រសួង​មហាផ្ទៃ​បាន​មាន​ប្រសាសន៍​ថា ​អ្នក​តវ៉ា​បី​នាក់​​​មក​ពី​តំបន់​បឹងកក់ ក្នុង​រាជធានី​ភ្នំពេញដូច​ជា​ ប៉ូវ សោភា ​គង់ ចន្ថា ស៊ង ស្រីលាភ និង​ សរ ស៊ន មក​​​ពី​​​​​​បុរីកីឡា​ ត្រូវ​​​បាន​​​​​​​​​ចាប់​​​ខ្លួន​​​នៅ​​​ខណ្ឌ​​​ដង្កោ និង​​​ខណ្ឌ​​​ដូនពេញ​​​​​​​​​នៅមុនម៉ោង៩​ព្រឹក​បន្តិច​។

​លោក អ៊ុក ហៃសិលា ​ប្រធាន​នាយកដ្ឋាន​​​ស៊ើប​អង្កេត​​​​នៃ​​​អគ្គនាយកដ្ឋាន​​​អន្តោប្រវេសន៍​​​មាន​ប្រសាសន៍ថា ​​​នៅ​​​ម៉ោង​ប្រហែល​​​​​១១​និង​៣០​នាទីព្រឹក លោក​ មើធៀស ហ្វេហ្វើ ​(Mathias Pfeifer) ​​​ជាជន​ជាតិ​អាល្លឺម៉ង់​​​ ជាទីប្រឹក្សា​​​​​របស់​អង្គការ​សិទ្ធិ​មនុស្ស​​ក្នុង​ស្រុក​លីកាដូ​ និង​​​​លោក​ស្រី អេណា ម៉ារៀ ផេធើសុន (Anna Maria Petterson) ​ជាជន​ជាតិ​ស៊ុយអ៊ែត ជា​ទីប្រឹក្សា​​​​​របស់​អង្គការ​នេះ សុទ្ធ​​​តែ​​​​ត្រូវ​បាន​​ឃាត់​ខ្លួន និង​នាំ​​​​​​​ខ្លួន​​​ទៅ​នាយកដ្ឋាន​អន្តោប្រវេសន៍​​​​​​នៃ​ក្រសួង​មហាផ្ទៃ​​បន្ទាប់ពីគេ​​​ប្រទះ​ឃើញ​ពាក់​​អាវ​យឺត​ពណ៌ខ្មៅ​។

របាំង​​រាំង​​​​ផ្លូវ​ត្រូវ​បាន​​​ដាក់ឡើង​នៅ​​​ពេល​​​ព្រឹក​​​​​​តាម​​​​​​បណ្តោយ​​​ផ្លូវ​ឆ្ពោះ​ទៅ​​​​កាន់​​​ពន្ធនា​គារ​ព្រៃស ដើម្បី​​​​​​ធានា​​​ឃាត់​​​​អ្នក​តវ៉ា​​​​​​ស្លៀក​​​ពាក់​​​​​​​​​ពណ៌​​​ខ្មៅ ​​​និង​​ព្រះសង្ឃឲ្យ​នៅ​ឆ្ងាយ​ពី​ពន្ធនា​គារ​។ ​​សាធារណជន​​​​​ក៏​​​ត្រូវ​​​​​​បាន​​​​​​​​​​​​នគរ​​​បាល​​​​​​​​​​​​ទាញ​​​​​​​​​​​​​ឲ​្យ​​​ចូល​​​​​​ខាង​​​ និង​​​​​​សួរ​​​​​​​នាំ​​​​​​ថា​​​​​​ហេតុ​​​អ្វី​​​បាន​​​ជា​​​​​​​​​ពួកគេ​​​​​​​​ស្លៀក​​​ពាក់​​​ខ្មៅ​​​។​​

ឧត្ដម​សេនីយ៍ទោ ​អ៊ុក ហៃសិលា បាន​មាន​ប្រសាសន៍​ថា ជន​សង្ស័យ​​​​​បរទេស ​ផេធើ​សុន និង​​ ហ្វេហ្វឺ ​ត្រូវ​បាន​ចាប់​ខ្លួន​​​​​​ចំពោះ​​​​​​ការ​​​​​​​ពាក់​អាវ​យឺត​ពណ៌​ខ្មៅ ប៉ុន្តែ​​ត្រូវ​​​បាន​​បញ្ជូន​ទៅនាយកដ្ឋាន​​​​​​​អន្តោប្រវេសន៍​​ចំពោះ​ការ​​​​​​មិន​បង្ហាញ​លិខិត​ឆ្លង​ដែន​​​​​​របស់​​​​​​​​​​​ខ្លួន។

លោក​​​​​​​​​​​​​​បាន​​​លើក​​​ឡើង​​​​​​​​​​​​ទៀត​​​ថា ”​ពួកគេ​​ពាក់​អាវ​​ខ្មៅ​ ហើយ​មិន​បង្ហាញ​លិខិត​ស្នាម ​ដូច្នេះ​នគរ​បាល​​ក៏​សម្រេច​បញ្ជូន​ពួកគេ​​​​​​​ទៅ​​​សាក​​​សួរ​​​​​​​​នៅ​​​​នាយកដ្ឋាន​អន្តោប្រវេសន៍​”។

លោក អំ សំអាត ​អ្នក​គ្រប់គ្រង​ផ្នែក​បច្ចេក​​ទេស​ស៊ើបអង្កេត​​​នៅ​​​​​​​​​​​​​​​អង្គ​​​ការ​​​លីកាដូ​​​​​​​​​ ​​​បាន​​​មាន​​​​​​ប្រសាសន៍​​​​​​​​​​ថា ពួកគាត់​​​​​​ទាំង​ពីរ​ត្រូវ​បាន​ដោះ​លែង​​​វិញ​​​​​នៅ​ម៉ោង​ប្រហែល​៧​យប់​។មន្ត្រី​​​សិទ្ធិ​​​មនុស្ស និង​សកម្មជន​កម្ពុជា ត្រូវ​​បាន​​ដោះ​​លែង​វិញ​នៅ​ម៉ោង​​​​​ប្រហែល​​​៦និង​៣០​នាទី។

លោក ឃួង ស្រេង អភិបាល​រង​រាជធានី​ភ្នំពេញ​ បាន​​​ថ្លែង​​​ថា តាម​​​​​​លក្ខណ​​ៈ​​​បច្ចេក​​​​​​ទេស​​​​​​នគរ​បាល​មិន​​​​​បាន​​​​ចាប់​ខ្លួន​​​​អ្នក​​​ណាម្នាក់​​​ទេ។ “​យើង​បាន​​ដោះលែង​ពួកគេ​ឲ្យ​ត្រឡប់​​ទៅ​ផ្ទះ​វិញ​ហើយ។ យើង​​ដោះលែង​ពួកគេ ​បន្ទាប់ពី​យើង​​​​​​ធ្វើ​​​​​​កំណត់​​​​​​​​ហេតុ​​​​​​​​​រួច​​​។ យើង​​​មិន​​​បាន​​​​​​ចាប់ខ្លួន​​​ពួកគេទេ យើងគ្រាន់​​​តែ​​​ឃាត់ខ្លួន​​​​​ពួកគេសាកសួរ​​​ប៉ុណ្ណោះ​​​ ហើយ​​​​​​បន្ទាប់​​​មក​​​ក៏​​​​​​ដោះ​​​លែង​​​​​​ពួកគេ​​​វិញ​​​​​​ក្នុង​​​​​​ថ្ងៃ​​​​​​ដដែល”។

ការ​ចាប់​ខ្លួន​​ចុង​ក្រោយ​នេះ​​កើត​មាន​ឡើង​​ខណៈ​​​រដ្ឋាភិបាល​​បង្កើន​ការ​ស៊ើបអង្កេត​របស់​​ខ្លួន​លើ​រឿង​អាស្រូវ​ផ្លូវ​ភេទ​​ពាក់​ព័ន្ធ​លោក កឹម ​​សុខា អនុប្រធាន​គណបក្ស​ប្រឆាំង។ មន្ត្រី​សមាគម​អាដហុក​បួន​រូប រួម​ជាមួយ​លោក នី ចរិយា អគ្គលេខាធិការ​រង​​គណៈកម្មាធិការ​​ជាតិ​រៀបចំ​ការ​បោះ​ឆ្នោត​ (គ.ជ.ប.) ត្រូវ​បាន​ដាក់​​ពន្ធនាគារ​​​កាលពី​សប្ដាហ៍​មុន​ពីបទ​សម​គំនិតគ្នា​​​​​​​សូកប៉ាន់​ស្រីកំណាន់​វ័យ​២៥​ឆ្នាំ​​​​​​របស់​​​​​​លោក កឹម សុខា ដើម្បី​ឲ្យ​នាង​បដិសេធ​ស្នេហា​លួច​លាក់​​​​របស់​​​​​​ខ្លួន។

មន្ត្រី​អង្គការ​សហប្រជាជាតិ​​​មួយ​រូប​ក៏​ត្រូវ​បាន​តុលាការ​ចោទ​ប្រកាន់​​ដោយ​កំបាំង​មុខ​ដែរ​​​ក្នុង​សំណុំរឿង​នេះ ចំណែក​ឯ​មេឃុំ​គណ​បក្ស​ប្រឆាំង​មួយ​រូបទៀត​​​​ត្រូវ​បាន​​ដាក់​ពន្ធនា​គារ​ពីបទ​ប្រគល់​ប្រាក់​​ឲ្យ​ម្ដាយ​របស់​​​ស្រី​កំណាន់​។ លោក កឹម សុខា និង​តំណាង​រាស្ត្រ​គណបក្ស​ប្រឆាំង​ពីរ​រូប​​ទៀត​ត្រូវ​បាន​កោះ​ហៅ​ឲ្យ​​​​​​ចូល​​​​​​​​​ខ្លួន​​​​​​​​​ទៅ​​​​​​ទៅ​សាលា​ដំបូង​រាជធានី​ភ្នំពេញ​ សម្រាប់​ការ​សាកសួរ​​ពាក់​ព័ន្ធ​រឿង​អាស្រូវ​នេះ​។

​កាលពី​ថ្ងៃ​អាទិត្យ រដ្ឋាភិបាល​បាន​និយាយ​ថា ​ការ​តវ៉ា​ថ្ងៃ​ច័ន្ទ​ពណ៌​ខ្មៅ​​ នឹង​ត្រូវ​​​​បាន​​​ចាត់​ទុក​​ជា​ការ​បះបោរ​ និង​ជាការ​ប៉ុនប៉ង​ធ្វើ​ “បដិ​វត្តន៍ពណ៌”។

​សមត្ថកិច្ច​​​ចាប់ខ្លួន​​​ស្ត្រី​​​ចំណាស់​​​​​​​​ម្នាក់​​​​រុញ​​​ឡើង​​​លើ​​​រថយន្ត​​​នគរ​​​បាល​​​ កាល​​​ពី​​​ព្រឹក​​​ម្ស្ិលមិញ នៅ​​​ក្នុង​​​ខណ្ឌ​​​ដង្កោ​​​ រាជ​​​ធានីភ្នំពេញ​​​ នៅ​​​ពេល​​​ព្យាយាម​​​ធ្វើ​​​ការ​​​តវ៉ា​​​នៅ​​​ខាង​​​ក្រៅ​​​ពន្ធនាគារ​​​ព្រៃ​​​ស ដើម្បី​​​ទាម​​​ទារ​​​ឲ្យ​​​ដោះ​​​លែង​​​មន្ត្រី​​​សិទ្ធិ​​​មនុស្ស​​​។ រូបថតៈ ស៊ីវ ចាន់ណា/ឌឹ ខេមបូឌា ដេលី
​សមត្ថកិច្ច​​​ចាប់ខ្លួន​​​ស្ត្រី​​​ចំណាស់​​​​​​​​ម្នាក់​​​​រុញ​​​ឡើង​​​លើ​​​រថយន្ត​​​នគរ​​​បាល​​​ កាល​​​ពី​​​ព្រឹក​​​ម្ស្ិលមិញ នៅ​​​ក្នុង​​​ខណ្ឌ​​​ដង្កោ​​​ រាជ​​​ធានីភ្នំពេញ​​​ នៅ​​​ពេល​​​ព្យាយាម​​​ធ្វើ​​​ការ​​​តវ៉ា​​​នៅ​​​ខាង​​​ក្រៅ​​​ពន្ធនាគារ​​​ព្រៃ​​​ស ដើម្បី​​​ទាម​​​ទារ​​​ឲ្យ​​​ដោះ​​​លែង​​​មន្ត្រី​​​សិទ្ធិ​​​មនុស្ស​​​។ រូបថតៈ ស៊ីវ ចាន់ណា/ឌឹ ខេមបូឌា ដេលី

ពេល​​​ទាក់​​​ទង​​​តាម​​​ទូរស័ព្ទ​​​កាល​​​ពី​​​ម្សិល​មិញ មុន​​​ពេល​​​មាន​​​ការ​​​ដោះ​​​លែងមន្ត្រី​​​សិទ្ធិ​​​មនុស្ស​​​នៅ​ថ្ងៃ​ម្សិលមិញ​ដដែលនោះ​ ឧត្តម​​​សេនីយ៍​​​ ខៀវ សុភ័គ​​​ បាន​​​និយាយ​​​ការពារ​កា​​​រ​​​ចាប់​​​ខ្លួន​​​នេះ ហើយ​​​បាន​​​រិះគន់​​​អង្គការ​​​សិទ្ធិ​​​មនុស្ស​​​ដែល ”ក្រអើត​ក្រអោង​​”។

លោក​​​បាន​​​​មាន​ប្រសាសន៍​ថា ”ដូច​​ដែល​លោក​អ្នក​ដឹង​​​ហើយ​​​ ក្រុម​​​របស់​​​ពួក​​​គេ​​​បាន​​​ផ្សព្វ​​​ផ្សាយ​​​ដើម្បី​​​ញុះ​​​ញង់​​​ប្រជា​​​ពល​​​រដ្ឋ​​​ឲ្យ​​​ស្លៀក​​​ពាក់​​​ខ្មៅ​​​នៅ​​​ថ្ងៃ​​​ច័ន្ទ​​ដើម្បី​​​ទាម​​​ទារ​​​ឲ្យ​​​ដោះ​​​លែង​​​មន្ត្រី​សិទ្ធិមនុស្ស​។ ពួក​​​គេ​​​ឆ្កួត​វង្វេង​​​​​​​នឹង​​​សេរីភាព​​​បញ្ចេញ​​​មតិ​​​។ ពួក​​​គេ​​​មិន​​​បាន​​​គិត​​​ថា ខ្លួន​​​ស្ថិត​​​ក្រោម​​​ច្បាប់​​​ដែល​​​គ្រប់​​​គ្រង​​​ពួក​​​គេ​​​ឡើយ។ ​ពួក​​​គេ​​​គឺជា​​​មនុស្ស​​​ដែល​​​រំលោភ​​​បំពាន​​​ច្បាប់​​​”។

បន្ទាប់​​​មក​​​ទៀត​​​ ឧត្តម​​​សេនីយ៍ ខៀវ ​សុភ័គ ​​​បាន​​​ធ្វើ​​​ការ​​​ប្រៀប​​​ធៀប​​​ការ​​​តវ៉ា​​​ដោយ​​​សន្តិវិធី ​និង​​​សង្គ្រាម​​​សីុវិល​​​ដែល​​​បាន​​​កើត​​​ឡើង​​​យ៉ាង​​​ធ្ងន់​​​ធ្ងរ​​​នៅ​ក្នុង​​​ប្រទេស​​​ស៊ីរី និង​​​លីប៊ី ចាប់​​​តាំង​​​ពី​​​បដិវត្ត​​​​ន៍​ផ្កាម្លិះ​​​បាន​​​រាល​​​ដាល​​​ទូទាំង​​​តំបន់​​​មជ្ឈិម​​​​​​បូពា៌​​​កាល​​ពី​​​ឆ្នាំ​​​២០១១​​​មក។

​​​​​​​​​ដោយ​​​បន្ត​​​រិះ​​​គន់​​​ខ្លាំងៗ​លើ​អង្គការ​​​សិទ្ធិ​​​មនុស្ស​​​ដែល​​​រៀប​​​ចំ​​​ការ​​​តវ៉ា​​​នេះ​​​ លោក​​​បាន​​​សួរ​​​ថា “តើ​​​ចង់​​​ឲ្យ​​​វា​​​ដូច​​​​​​​ប្រទេស​​​ស៊ីរី​​​ឬ? តើ​​​ចង់​​​ឲ្យ​​​វា​​​ដូច​​​ប្រទេស​​​លីប៊ីឬ?”។

លោក​​​បាន​​​មាន​​​ប្រសាសន៍​​​បន្ថែម​​​ថា ​”អស់​លោក​ទទួល​​​បាន​​​ប្រាក់​​​បន្តិច​​​បន្តួច​​​ពី​​​បរទេស​​​ហើយ​​​មក​​​ក្រអើត​ក្រអោង​។​​​​ អស់​​លោក​កំពុង​​​តែ​​​​ឈ្លក់​វង្វេង​​​​នឹង​​​សិទ្ធិ​​​មនុស្ស​​​ ហើយ​​​នាំ​​​សង្គ្រាម​​​​​​​ចូល​​​មក​​​ក្នុង​​​ប្រទេស​​​។ វា​​​មិន​​​អាច​​​ទៅ​​​រួច​​​ទេ ​​​សូម​​​ទៅ​​​ដេក​​​ក្នុង​គុក​​​ទៅ​​​”។

ការ​​​ចាប់​​​ខ្លួន​​​នេះ​​​បាន​​​ធ្វើ​​​ឲ្យ​​​មាន​​​ការ​​​ព្រួយ​​​បារម្ភ​​​ និងមាន​ការ​​​ថ្កោល​​​ទោស​​​ទាំង​​​នៅ​​​ក្នុង​​​ប្រទេស​​​កម្ពុជា និង​​​ក្រៅ​​​ប្រទេស​​​។

លោក​​​ ភៀល រ៉ូបឺត​​​សុន (Phil Robertson)​​​អនុប្រធាន​​​អង្គការ​​​ឃ្លាំ​​​មើល​​​សិទ្ធិ​​​មនុស្ស​​(Human Rights Watch) ប្រចាំ​​​​តំបន់​​​អាស៊ី​​​បាន​​​មាន​​​ប្រសាសន៍​​​ថា “វា​​​គ្មាន​​​អ្វី​​​ភ្ញាក់​​​ផ្អើល​​​ទេ​​​ដែល​​​​​​លោក​​​នាយក​​​រដ្ឋ​​​មន្ត្រី ហ៊ុន សែន និង​​​គណ​បក្ស​​​ប្រជាជន​​​កម្ពុជា​​​ទី​​​បំផុត​​​​​​បាន​​​បង្ហាញ​​​សារ​ជាតិ​ផ្តាច់​​​ការ​​​ពិត​​​ប្រាកដ​​​របស់​​​ខ្លួន​​​ដោយ​​​ធ្វើ​​​ការ​​​បង្ក្រាប​​​យ៉ាង​​​ចាស់​​​ដៃ​​​បែប​​​នេះ​​​លើ​​​អ្នក​​​តវ៉ា​​​ដោយ​​​សន្តិវិធី​​​”។

លោក​​​ ម៉ៃណា គីអៃ (Maina Kiai) អ្នក​​​រាយការណ៍​​​ពិសេស​​​របស​​​់អង្គការ​​​សហ​​​ប្រជា ជាតិ​​​​​​ទទួលបន្ទុក​សិទ្ធិ​​​សេរីភាព​​​នៃ​​​ការ​​​ជួប​​​ជុំ​​​ដោយ​​​សន្តិវិធី និង​​​សិទ្ធិ​បង្កើត​សមាគម​ បាន​​​​​​មាន​ប្រសាសន៍​ថា លោក​​​មាន​​​ការ​​​ព្រួយ​​​បារម្ភ​​​ដោយ​​​​សារ​​​ការ​​​លើក​​​ឡើង​​​របស់​​​លោក ផៃ ​ស៊ីផាន ​អ្នក​​​នាំ​​​ពាក្យ​​​រាជរដ្ឋាភិបាល​​​កាល​​​ពី​​​ថ្ងៃ​​​​អាទិត្យ​​​​​​ ដែល​​​ថា ការ​​​តវ៉ា​​​ស្មើ​​​នឹង​​​ “ការ​​​បះ​បោរ​​​​​​​ក្នុង​​​ទី​​​ក្រុង”។

លោក​​​បាន​​​សរសេរ​​​ថា ”ការ​​​អនុញ្ញាត​​​ឲ្យ​​​មាន​​​ការ​​​តវ៉ា​​​ដោយ​​​សន្តិវិធី​​​ ការ​​​បញ្ចេញ​​​មតិ​​​ការ​​​ជួប​​​ជុំ ប្រមូលផ្តុំ​មិន​​​មែន​​​ត្រឹម​តែ​​​ជា​​​កាតព្វ​កិច្ច​​​របស់​​​រាល់​​​រដ្ឋាភិបាល​​​ក្រោម​​​ច្បាប់​​​អន្តរ​​​ជាតិ​​​នោះ​ទេ​​​ តែវា​​​ក៏​​​កាត់​​​បន្ថយ​​​លទ្ធភាព​​​នៃ​​​ការ​​​បះបោរ​​​ដ៏​​​ហិង្សា​​​ផង​​​ដែរ​​​ ដោយ​​​បង្កើត​​​ឲ្យ​​​មាន​​​សង្គម​​​កាន់​​​តែ​​​ទូលំទូលាយ​​​មួយ​​​”។

លោក​​​បាន​​​សរសេរ​​​បន្ត​​​ថា “វា​​​ជា​ការ​​​ព្រួយ​​​​បារម្ភ​​​​​​ដែល​ឃើញ​​​​​​កម្ពុជា​​​​​​​​​​​​ដើរ​​លើ​ផ្លូវ​ខុស​​​សម្រាប់​ថ្ងៃច័ន្ទ​​​ពណ៌​​​ខ្មៅ”។

ពេល​​​​ឈរ​​​ក្នុង​​​ចំណោម​​​អ្នក​​​តវ៉ា​​​នៅ​​​ប៉ុស្តិ៍​​​ត្រួតពិនិត្យ​​​​របស់​​​នគរ​​​បាល​​​ក្នុង​​​ខណ្ឌ​​​ដង្កោ​​​ត្រឹម​​​​​​តែ​​​ប៉ុន្មាន​​​នាទី​​​ មុន​​​ពេល​​​លោក អីុ សារ៉ុម ​​​និង​​​លោក​​​ ថាវ គឹមសាន ត្រូវ​​​បាន​​​ចាប់​​​ខ្លួន​​​នោះ​​​លោក​​​ស្រី​​​ ណាលី ពីឡូក​​​ នាយិកា​​​អង្គការ​​​សិទ្ធិ​​​មនុស្ស​​​លីកាដូ​​​បាន​​​មាន​​​ប្រសាសន៍​​​ពាក់​​​ព័ន្ធ​​​ស្ថានភាព​លំបាក​ដែល​​​កើត​​​ចេញ​​​ពី​​​ការ​​​រឹត​​​បន្តឹង​​​របស់​​​រដ្ឋាភិបាល​​​លើ​​​នយោបាយ​​​ និង​​​សង្គម​​​ស៊ីវិល​​​។

លោក​​​ស្រី​​​បាន​​​ថ្លែង​​​ថា ”វា​​​ជា​​​រឿង​​​គួរ​​​ឲ្យ​​​ចាប់​​​អារម្មណ៍​​​ក្នុង​​​ការ​​​គូស​​​បញ្ជាក់​​​ថា មនុស្ស​​​ទាំង​​​អស់​​​ដែល​​​ស្លៀក​​​ពាក់​​​ខ្មៅ​​​សុទ្ធ​​​តែ​​​ត្រូវ​​​បាន​​​ហាម​​​ឃាត់​​​ ហើយ​​​ពួក​​​គាត់​​​ភាគ​​​ច្រើន​​​មិន​​​មែន​​​ជា​​​ផ្នែក​​​នៃ​​​យុទ្ធនាការ​​​នេះ​​​ទេ​​​។ វា​​​ពិត​​​ជា​​​លំបាក​​​ណាស់​​​ ពេល​​​កង​​​កម្លាំង​​​នគរ​​​បាល​​​រឹត​​​បន្តឹង​​​ប្រជា​​​ពល​​រដ្ឋ​​​មិន​​​ឲ្យ​​​ដើរហើរ​​​​ដោយ​​​សារ​​​តែ​​​ពណ៌​​​ដែល​​​ពួក​​​គាត់​​​ជ្រើស​​​រើស​​​ស្លៀក​​​ពាក់​​​នោះ​”។

លោកស្រី​​​បាន​​​បន្ថែម​​​ថា ”តើ​​​ពួក​​​គេ​​​ខ្លាច​​​ស្អី​​​​​​ទៅ​​​? តើ​​​រដ្ឋាភិបាល​​​របស់​​​យើង​​​ខ្លាច​​​ស្អី? ​យើង​​​ជា​​​អ្នក​​​បោះ​​​ឆ្នោត​​​ ពួក​​​គេ​​​ចាំ​​​បាច់​​​ត្រូវ​​​តែ​​​បម្រើ​​​យើង​​​ ហើយ​​​យើង​​​​​​គ្រាន់​​​តែ​​​ជា​​​មនុស្ស​​​មួយ​​​ចង្កោម​​​ដែល​​​រាប់​​​បញ្ចូល​​​នៅ​​​ក្នុង​​​សង្គម​​​ស៊ីវិល​​​​ដែល​​​ស្លៀក​​​ពាក់​​​ពណ៌​​​ខ្មៅ​​​ប៉ុណ្ណោះ​​​ លើក​​​លែង​​​តែ​​​ព្រះ​​​សង្ឃ​​​”។​​​​​​

លោកស្រី​​​បាន​​​បន្ថែម​​​ទៀត​​​ថា ” តើ​​​នេះ​​​គឺជា​​​ប្រជា​​​ធិបតេយ្យ ឬគ្រាន់​​​តែ​​​ជា​​​ប្រជា​​​ធិប​តេយ្យ​​​តែសម្បក​​​ក្រៅ បើ​​​គេ​​​​រារាំង​​​យើង​មិន​​​ឲ្យ​​​ស្លៀក​​​ពាក់​​​ពណ៌​​​​​​ដែល​​​យើង​​​ចង់ស្លៀកពាក់​​អ៊ីចឹង​​នោះ​​​”៕សុខុម និងស៊ុយឈាង​

 

 

© 2016, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.