29 C
Phnom Penh

​គេ​មិន​ជឿលើ​ការ​អះ​អាង​របស់​លោក​រដ្ឋមន្ត្រីក្រសួង​បរិស្ថាន

ដោយ ឌឹ ខេមបូឌា ដេលី

បទវិភាគ

កាលពីម្សិលមិញ លោក សាយ សំអាល់ រដ្ឋមន្ត្រីក្រសួងបរិស្ថានបានប្រកាសបញ្ចប់ការកាប់ឈើទ្រង់ទ្រាយធំនៅក្នុងប្រទេសកម្ពុជាភាគបូពា៌ ហើយបានលើកឡើងថា ភាគច្រើនបំផុតនៃវិវាទដីធ្លីបង្កឡើងដោយការចាប់យកដីពីសំណាក់ក្រុមហ៊ុនចម្ការអំពៅត្រូវបានដោះស្រាយហើយ ប៉ុន្តែអង្គការមិនមែនរដ្ឋាភិបាលមួយចំនួនមិនបានយល់ស្របឡើយ។

កាលពីពាក់កណ្ដាលខែមករា រដ្ឋាភិបាលបានបង្កើតក្រុមការងារពិសេសមួយដើម្បីលុបបំបាត់ការស្តុកឈើខុសច្បាប់ទូទាំងខេត្តភាគបូពា៌នេះ ហើយបានបញ្ជាឲ្យមានការបញ្ឈប់ភ្លាមៗនូវការនាំឈើចេញទាំងអស់ទៅប្រទេសវៀតណាម ជាការទទួលស្គាល់ថា ភាគច្រើននៃឈើទាំងនោះគឺខុសច្បាប់។

លោក សាយ សំអាល់ រដ្ឋមន្ត្រីក្រសួងបរិស្ថាន (ឆ្វេង) និងលោក ហង់ ជួន ណារ៉ុន រដ្ឋមន្ត្រីក្រសួងអប់រំ (ស្តាំ) ដើរមើលការតាំងពិពណ៌ទំនិញ អំឡុងព្រឹត្តិការណ៍អបអរទិវាបរិស្ថានពិភពលោក ក្នុងរាជធានីភ្នំពេញ កាលពីម្សិលមិញ។ រូបថតៈ ហ្វេសប៊ុក
លោក សាយ សំអាល់ រដ្ឋមន្ត្រីក្រសួងបរិស្ថាន (ឆ្វេង) និងលោក ហង់ ជួន ណារ៉ុន រដ្ឋមន្ត្រីក្រសួងអប់រំ (ស្តាំ) ដើរមើលការតាំងពិពណ៌ទំនិញ អំឡុងព្រឹត្តិការណ៍អបអរទិវាបរិស្ថានពិភពលោក ក្នុងរាជធានីភ្នំពេញ កាលពីម្សិលមិញ។ រូបថតៈ ហ្វេសប៊ុក

នៅក្នុងសុន្ទរកថាអបអរដល់ទិវាបរិស្ថានពិភពលោកក្នុងរាជធានីភ្នំពេញ កាលពីម្សិលមិញ លោក សាយ សំអាល់ បានអះអាងថា ការខិតខំប្រឹងប្រែងរបស់រដ្ឋាភិបាលធ្វើយ៉ាងណាបញ្ចប់ការកាប់ឈើ “ទ្រង់ទ្រាយធំ” និងការនាំឈើចេញទាំងអស់ប្រកបដោយប្រសិទ្ធភាព។ លោកបានមានប្រសាសន៍ថា “ថ្ងៃនេះ ខ្ញុំអាចនិយាយនៅទីនេះ នៅម៉ោងនេះថា ការកាប់ឈើទ្រង់ទ្រាយធំដែលយើងធ្លាប់ឃើញត្រូវបានបញ្ចប់ទាំងស្រុង ហើយយើងបានបិទច្រកព្រំដែនកម្ពុជា-វៀតណាម។ ខ្ញុំអាចនិយាយបានថា ការកាប់ឈើទ្រង់ទ្រាយធំបានបញ្ចប់ និងនៅសល់តែការកាប់ឈើទ្រង់ទ្រាយតូចប៉ុណ្ណោះ ដូចជាការកាប់ឈើលក្ខណៈគ្រួសារជាដើម”។

ទិន្នន័យគយវៀតណាមដែលទទួលបានដោយអង្គការ Forest Trends ជាអង្គការការពារបរិស្ថានអាមេរិកបង្ហាញពីការថយចុះគួរឱ្យកត់សម្គាល់ក្នុងការនាំឈើចូលចាប់តាំងពីមានបម្រាមមក។ ប៉ុន្តែវាក៏បានបង្ហាញផងដែរថា ឈើក្នុងចំនួនដ៏ច្រើននៅតែឆ្លងកាត់ដដែល ហើយថា ការចរាចរនេះឃើញមានការកើនឡើងវិញជាថ្មីម្ដងទៀត។

យោងតាមទិន្នន័យគយបានឲ្យដឹងថា ការនាំឈើចេញរបស់ប្រទេសកម្ពុជាទៅប្រទេសវៀតណាមបានថយចុះពី៣៤.០០០ម៉ែត្រគូបមក៥.០០០ម៉ែត្រគូបចាប់ពីខែមករា ដល់ខែកុម្ភៈ ប៉ុន្តែបានកើនឡើងជាថ្មីម្ដងទៀតកាលពីខែមីនាដោយឡើងដល់១០.០០០ម៉ែត្រគូបដែលគិតជាទឹកប្រាក់ស្មើនឹង៩លានដុល្លារ។

របាយការណ៍ពីរថយន្តធុនធំដែលដឹកឈើត្រូវបានឃាត់នៅព្រំដែន ហើយជួនកាលបានឆ្លងកាត់រួច ក៏នៅតែមានផងដែរ។

កាលពីចុងខែមុន រថយន្តធុនធំមួយគ្រឿងផ្ទុកឈើប្រណីតទម្ងន់១១តោនត្រូវចាប់បាននៅច្រកព្រំដែនក្នុងខេត្តត្បូងឃ្មុំ។ ក្រុមមន្ត្រីរដ្ឋបាលព្រៃឈើក្នុងខេត្តស្វាយរៀងជាប់គ្នានោះ កាលពីសប្ដាហ៍មុនមិនបានឃាត់រថយន្តធុនធំបីគ្រឿងដែលដឹកដើមអាកាស្យាពីច្រកព្រំដែនចូលទៅប្រទេសវៀតណាមទេ ពីព្រោះនគរបាលព្រំដែនកម្ពុជាបានបដិសេធមិនផ្តល់ជំនួយ។

អ្នកភូមិរស់នៅតាមបណ្តោយព្រំដែនក៏បានរាយការណ៍ថាបានឃើញក្រុមជួញដូរឈើដោះស្រាយជាមួយបម្រាមនាំឈើចេញនេះ ដោយការផ្លាស់ប្ដូរចរាចរពីប៉ុស្តិ៍ឆែកឆេរធំៗទៅប៉ុស្តិ៍ឆែកឆេរតូចៗទីដែលការអនុវត្តច្បាប់មានការធូររលុងជាង។

លោក ប៉ែន បុ៊ណ្ណារ៍ អ្នកស៊ើបអង្កេតជាន់ខ្ពស់នៅសមាគមសិទ្ធិមនុស្សអាដហុកក៏មានមន្ទិលសង្ស័យអំពីសេចក្ដីប្រកាសរបស់លោក សាយ សំអាល់ ដែរ ដោយកត់សម្គាល់ថា វាជាល្បិចកលធម្មតាក្នុងចំណោមឈ្មួញរកស៊ីឈើក្នុងការបំបែកទំនិញរបស់ខ្លួនទៅជាផ្នែកតូចៗដើម្បីក្លែងជាអ្នកជួញដូរទ្រង់ទ្រាយតូច។

លោកបានមានប្រសាសន៍ថា ”ឈ្មួញរកស៊ីឈើតែងតែធ្វើពុតជាអ្នកដឹកឈើលក្ខណៈគ្រួសារទៅប្រទេសវៀតណាម។ ដូច្នេះ មិនថាជាលក្ខណៈគ្រួសារ ឬលក្ខណៈជាពាណិជ្ជកម្មឡើយ ពួកគេត្រូវតែឃាត់ទាំងអស់ បើមិនដូច្នោះទេ  ព្រៃឈើនឹងនៅតែរងការកាប់បំផ្លាញដដែល”។

អំឡុងសុន្ទរកថាកាលពីម្សិលមិញ លោក សាយ សំអាល់ ក៏បានអះអាងផងដែរថា វិវាទដីធ្លីជាច្រើនពាក់ព័ន្ធចម្ការអំពៅដែលត្រូវបានរងការចោទប្រកាន់ថា បានរំលោភយកដីស្រែចម្ការរបស់អ្នកភូមិមូលដ្ឋាននោះ ត្រូវបានដោះស្រាយជិតរួចរាល់ហើយ ហើយបានចោទអង្គការសិទ្ធិមនុស្សថាព្យាយាមរារាំងខ្លួន។

ចម្ការអំពៅនៅទូទាំងប្រទេសកម្ពុជាដែលភាគច្រើនកាន់កាប់ដោយលោក លី យ៉ុងផាត់ សមាជិកព្រឹទ្ធសភាគណបក្សប្រជាជនកម្ពុជា និងមួយចំនួនទៀតផ្គត់ផ្គង់ដល់ក្រុមហ៊ុនចំណីអាហារ និងភេសជ្ជៈធំៗនៅក្រៅប្រទេសនោះ ត្រូវបានចោទប្រកាន់ថា បានបង្ខំប្រជាជនរាប់ពាន់គ្រួសារឲ្យចាកចេញពីផ្ទះសំបែង ឬស្រែចម្ការរបស់ពួកគាត់។ អង្គការសិទ្ធិមនុស្សមួយចំនួនបានហៅការផ្គត់ផ្គង់ស្ករសរបស់ប្រទេសកម្ពុជាថា ជា “ស្ករឈាម” ហើយបានអំពាវនាវកុំឲ្យមានការទិញ។

រដ្ឋមន្ត្រីក្រសួងបរិស្ថានបានលើកឡើងថា ”នៅពេលយើងនិយាយថា ស្ករនេះជាស្ករឈាម វាហាក់ដូចជាយើងវាយបំបែកឆ្នាំងបាយរបស់យើងអ៊ីចឹង។ ឧស្សាហកម្មនេះត្រូវបានកសាងឡើងដើម្បីបង្កើតការងារដល់ប្រជាពលរដ្ឋ ដូច្នេះប្រសិនបើពួកគាត់ហៅថាជាស្ករឈាមនោះ យើងមិនអាចលក់ស្ករនេះបានទេ ហើយវាដូចជាយើងវាយបំបែកឆ្នាំងបាយរបស់យើងអ៊ីចឹង”។

លោកបានមានប្រសាសន៍ថា “ប៉ុន្តែខ្ញុំអាចនិយាយបានថា យើងស្ទើរតែបានដោះស្រាយបញ្ហានេះទៅហើយ។ បញ្ហាដីធ្លីស្ទើរតែបញ្ចប់ហើយ ដូចជានៅក្នុងខេត្តព្រះវិហារ និងខេត្តកោះកុង ស្ទើរតែបញ្ចប់ហើយ”។

ទោះជាយ៉ាងណា លោក អៀង វុទ្ធី ប្រធានអង្គការសមធម៌កម្ពុជាដែលបានជួយដល់សហគមន៍ដែលរងផលប៉ះពាល់មួយចំនួនតស៊ូនឹងក្រុមហ៊ុននានាបានមានប្រសាសន៍ថា លោករដ្ឋមន្ត្រីលើកឡើងមិនត្រឹមត្រូវទេ។

លោកបាននិយាយដល់សុន្ទរកថារបស់លោក សាយ សំអាល់ ថា “ខ្ញុំមិនគិតថា នេះជាការវាយតម្លៃត្រឹមត្រូវឡើយ។

លោកបានថ្លែងថា អ្នកភូមិប្រហែល២០០គ្រួសារនៅខេត្តកោះកុងដែលប្ដឹងក្រុមហ៊ុន Tate & Lyle ជាក្រុមហ៊ុនស្ករសអាមេរិកនៅក្នុងទីក្រុងឡុងដ៍នោះ មិនទាន់ដោះស្រាយវិវាទរបស់ខ្លួន ហើយអ្នកភូមិរាប់រយគ្រួសារនៅក្នុងខេត្តឧត្តរមានជ័យត្រូវបានបណ្ដេញចេញដើម្បីបើកផ្លូវសម្រាប់ចម្ការអំពៅដែលកាន់កាប់ដោយជនជាតិថៃមិនដែលត្រូវបានដោះស្រាយទេ ក៏កំពុងរង់ចាំការផ្ដល់សំណងសមរម្យផងដែរ។

សូម្បីនៅក្នុងខេត្តកំពង់ស្ពឺ ដែលក្នុងនោះលោក សាយ សំអាល់ លើកឡើងថា ជារឿងជោគជ័យនោះ អ្នកភូមិ១៦០គ្រួសារដែលតស៊ូជាមួយចម្ការអំពៅក្នុងមូលដ្ឋានមួយ កំពុងតែចរចាអំពីសំណងជាមួយក្រុមហ៊ុននេះនៅឡើយ។

លោក អៀង វុទ្ធី បានថ្លែងថា “នេះជាមូលហេតុដែលខ្ញុំនិយាយថា បញ្ហាកំពុងតែកើតមាននៅទីនេះនៅឡើយ”៕ សារុន (រាយការណ៍បន្ថែមដោយ Zsombor Peter)

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស