39.8 C
Phnom Penh

លោក ហ៊ុន សែន មិន​ខ្វល់​​​ចំពោះ​​​ទង្វើ​របស់​លោក កឹម សុខា​

ដោយ ឌឹ ខេមបូឌា ដេលី

បទវិភាគ

កាលពីម្សិលមិញ លោកនាយករដ្ឋមន្ត្រី ហ៊ុន សែន ទំនងជាបានរិះគន់លោក កឹម សុខា អនុប្រធានគណបក្សប្រឆាំងចំពោះការសម្ងំលាក់ខ្លួននៅក្នុងទីស្នាក់ការកណ្តាលរបស់គណបក្សសង្គ្រោះជាតិ ហើយបានប្រើអ្នកគាំទ្រឱ្យការពារ “សកម្មភាពខុសច្បាប់” របស់ខ្លួន ដោយលើកឡើងថា ទោះជាយ៉ាងណាលោកមិនខ្វល់ចំពោះការធ្វើបែបហ្នឹងទេ។

លោក កឹម សុខា ស្ថិតនៅក្នុងទីស្នាក់ការកណ្តាលគណបក្សរបស់លោកក្នុងរាជធានីភ្នំពេញចាប់តាំងពីថ្ងៃទី២៦ខែឧសភាមកនៅពេលនគរបាលប្រដាប់អាវុធបានមកដល់ទីស្នាក់ការនេះស្ថិតក្នុងខណ្ឌមានជ័យ ដោយអះអាងថា មានដីកាចាប់ខ្លួនរូបលោកចំពោះការមិនទៅបង្ហាញខ្លួននៅតុលាការ។

លោក ហ៊ុន សែន បានមានប្រសាសន៍អំឡុងសុន្ទរកថា ក្នុងពិធីបញ្ចុះខណ្ឌសីមាវត្តមួយក្នុងខេត្តតាកែវ ដោយមិនបានចេញឈ្មោះអនុប្រធានគណបក្សសង្គ្រោះជាតិដោយចំៗថា ”អ្នកឯងចង់ទៅដេកកន្លែង៤ម៉ែត្រ៤ជ្រុងទៅដេកទៅ។ គ្មានអាណាគេថាអី”។

លោក ហ៊ុន សែន បានមានប្រសាសន៍ថា ប្រជាពលរដ្ឋនឹងយល់ហើយថា នរណាដែលលោកនិយាយអំពីនោះដោយសារហេតុការណ៍កាលពីពេលថ្មីៗនេះ។

លោក ហ៊ុន សែន បានថ្លែងថា “ខ្ញុំកូណាខ្ញុំក៏ជឿជាក់យ៉ាងដូច្នេះដែរថា អង្គការចាត់តាំងនយោបាយ ឬអង្គការចាត់តាំងមនុស្សធម៌មួយចំនួនក៏មិនគួរទុកឲ្យបុគ្គលម្នាក់ ឬពីរនាក់បំផ្លាញនូវបក្សនយោបាយមួយ ឬបំផ្លាញនូវអង្គការចាត់តាំងនយោបាយមួយតាមរយៈនៃការការពារអំពើខុសច្បាប់របស់បុគ្គលណានោះទេ”។

លោកបន្ថែមថា”ព្រោះអ្នកខុសត្រូវចេញមុខទទួលខុស។ដូចជាព្រះសង្ឃបរាជិក ត្រូវទទួលស្គាល់ថា ខ្លួនបរាជិក កុំយកវត្តទាំងមូលមកការពារ អាហ្នឹងវានាំស្អុយឈ្មោះវត្តទៅទៀត”។

តំណាងរាស្ត្រគណបក្សប្រឆាំង និងអ្នកគាំទ្រមានការប្រុងប្រយ័ត្ននៅខាងក្រៅទីស្នាក់ការគណបក្សសង្គ្រោះជាតិក្នុងការខិតខំប្រឹងប្រែងដើម្បីការពារលោក កឹម សុខា បើទោះជាមិនមានការព្យាយាមចាប់ខ្លួនទៀតក៏ដោយ។

លោក ខៀវ សុភ័គ អ្នកនាំពាក្យក្រសួងមហាផ្ទៃ បានមានប្រសាសន៍កាលពីសប្តាហ៍មុនថា នគរបាលមិនបានចាប់ខ្លួនលោក កឹម សុខា ដោយខ្លាចការបង្កចលាចលសង្គម ហើយអាចសម្រេចមិនចាប់ខ្លួនគាត់ ប្រសិនបើពួកគេបារម្ភថា បញ្ហានេះអាចឈានដល់ការបង្ហូរឈាម។

ប៉ុន្តែ ក្រុមមន្ត្រីជាន់ខ្ពស់គណបក្សសង្គ្រោះជាតិបានលើកឡើងថា ពួកគាត់មិនជឿការលើកឡើងនោះថាជាសញ្ញាដែលរដ្ឋាភិបាលដកថយពីការចាប់ខ្លួនអនុប្រធានរបស់ខ្លួនឡើយ។

ការសម្រេចស្ថិតនៅក្នុងប្រទេសកម្ពុជារបស់លោក កឹម សុខា នៅពេលប្រឈមការគំរាមចាប់ខ្លួនផ្ទុយពីការសម្រេចរបស់លោក សម រង្ស៊ី មេដឹកនាំគណបក្សប្រឆាំងកាលពីខែវិច្ឆិកាដើម្បីគេចខ្លួនទៅប្រទេសបារាំងបន្ទាប់ពីរដ្ឋាភិបាលបានសើរើឡើងវិញនូវការផ្តន្ទាទោសចាស់ឲ្យលោកជាប់ពន្ធនាគាររយៈពេលពីរឆ្នាំ។

ក្រុមអ្នកសង្កេតការណ៍មានការខ្វែងគំនិតគ្នាជុំវិញបញ្ហាថា តើរដ្ឋាភិបាលពិតជាធ្វើតាមការគំរាមកំហែងរបស់ខ្លួន ហើយលោក សម រង្ស៊ី បានប្តេជ្ញាប្រឈមមុខ មុនពេលប្រកាសនៅនាទីចុងក្រោយថា លោកនឹងមិនត្រឡប់មកវិញឡើយឬយ៉ាងណា។

លោក យឹម សុវណ្ណ អ្នកនាំពាក្យគណបក្សសង្គ្រោះជាតិមិនអាចទាក់ទងបានទេកាលពីម្សិលមិញ៕ សារុន

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស