31 C
Phnom Penh

លោកនាយក​​​រដ្ឋ​​​មន្ត្រី​​​ ហ៊ុន សែន សម្រេច​​​ នៅ​​​ពេល ‘នីតិរដ្ឋ’ អនុវត្ត​​​

ដោយ ឌឹ ខេមបូឌា ដេលី

បទវិភាគ

ចាប់ខ្លួនសកម្មជន។ ផ្តន្ទាទោសពួកគេឲ្យ ជាប់ពន្ធនាគារក្នុងរយៈពេលយូរជាងទោសដែលសម្រេចដាក់លើឃាតករ ជនចាប់រំលោភ ឬអ្នកជួញដូរគ្រឿងញៀន។ បន្ទាប់មកបានធ្វើឲ្យពួកគេចុះខ្សោយតាមរយៈការឃុំឃាំងខណៈមានការស្វះស្វែងរកការសម្រុះសម្រួលពីគណបក្សប្រឆាំង។

Kem Sokha, leader of the Cambodia National Rescue Party (CNRP), gestures during an interview with Reuters at the CNRP headquarter in Phnom Penh, June 23, 2016. Picture taken June 23, 2016. To match Interview CAMBODIA-POLITICS/ REUTERS/Samrang Pring

ការគំរាមកំហែងដោយបើកចំហពីសំណាក់តុលាការពុករលួយ ដែលត្រូវបានប្រើប្រាស់ដើម្បីប្រឆាំងអ្នករិះគន់រដ្ឋាភិបាល ធ្វើឲ្យអ្នករិះគន់ដែលមិនសូវលុះមិនហ៊ាននិយាយស្តីអ្វីឡើយ។ ពេលណាមានការអំពាវនាវឲ្យដោះលែងអ្នកទោស តែងតែបដិសេធយ៉ាងដាច់អហង្ការថាគ្មានការគ្រប់គ្រងលើតុលាការទេ ហើយលើកឡើងពី “នីតិរដ្ឋ” ។

ការប្រើប្រាស់សារពីរបែបនេះ ដែលបំភ័យគូប្រជែងនយោបាយដោយការចាប់ដាក់ពន្ធនាគារ ហើយវាផ្ទុយនឹងរដ្ឋធម្មនុញ្ញបើមានការដោះលែងនោះ ធ្លាប់បានផ្តល់ផលប្រយោជន៍យ៉ាងច្រើនសម្រាប់គណបក្សប្រជាជនកម្ពុជានាឆ្នាំកន្លងៗមក ដោយជារឿយៗបានធ្វើឲ្យគណបក្សប្រឆាំងចុះខ្សោយ។

ប៉ុន្តែ សារមិនសីុគ្នាទាំងពីរនេះកម្របង្ហាញឲ្យឃើញជាក់លាក់ណាស់ ទើបតែសប្តាហ៍មុនប៉ុណ្ណោះ ពេលលោកនាយករដ្ឋមន្ត្រី ហ៊ុន សែន ប្រើពាក្យគំរាមចាប់លោក កឹម សុខា អនុប្រធានគណបក្សប្រឆាំងដាក់ពន្ធនាគារអស់មួយជីវិត និងបដិសេធថា គ្មានឥទ្ធិពលណាមួយក្នុងសំណុំរឿងនេះនោះ។

លោក កឹម សុខា បានសម្ងំលាក់ខ្លួនក្នុងទីស្នាក់ការកណ្តាលរបស់គណបក្សសង្គ្រោះជាតិក្នុងរាជធានីភ្នំពេញ ចាប់តាំងពីនគរបាលប្រដាប់អាវុធព្យាយាមចាប់ខ្លួនលោកនៅទីនោះកាលពីថ្ងៃទី២៦ខែឧសភាមកម្លេ៉ះ ជាផ្នែកនៃការតាមដានសើុបអង្កេតរាប់ខែរបស់រដ្ឋាភិបាលលើរឿងស្នេហាលួចលាក់របស់លោក។

លោក ហ៊ុន សែន បានមានប្រសាសន៍ថា “អាម្សៀនេះកំពុងតែភ័យ មិនទាំងហ៊ានចុះមកក្រោមខ្លាចគេទៅចាប់ទៀត ហើយមកថា លោក ហ៊ុន សែន ភ័យ។ ខ្ញុំសុំផ្តាំទៅលោកឯង ជាប់គុកចេញអត់រួចទេ អញប្រាប់ឲ្យហើយ អាគុក! កុំព្រហើនហ្អាស”។

បន្ទាប់មកលោក ហ៊ុន សែន បានព្រមានអ្នកទាំងឡាយណាដែលគិតថា លោកកំពុងតែធ្វើទុកបុកម្នេញគូប្រឆាំងដ៏សំខាន់របស់លោកនៅក្នុងប្រទេស។

ដោយលើកឡើងពីសហភាពអឺរ៉ុបចំពោះសេចក្តីថ្លែងការណ៍ក្នុងពេលថ្មីៗដែលប្រើពាក្យធ្ងន់ៗថា សំណុំរឿងប្រឆាំងលោក កឹម សុខា គឺជាការវាយប្រហារផ្នែកនយោបាយលើគណបក្សប្រឆាំងនោះ លោក ហ៊ុន សែន បានមានប្រសាសន៍ថា “អឺរ៉ុបតែងតែទទួលព័ត៌មានអត់ច្បាស់”។

លោកបានបន្ថែមថា “សូមអ្នកការទូតទាំងឡាយ ហើយប្រជាពលរដ្ឋ ខ្ញុំបញ្ជាក់ម្តងទៀតកុំប្រើរឿងបុគ្គលទៅជារឿងនយោបាយរវាងគណបក្ស និងគណបក្ស”។

លោក ហ៊ុន សែន ក៏បានលើកឡើងកាលពីខែមុនផងដែរថា មិនអាចមានការពិភាក្សា ណាមួយរវាងគណបក្សប្រជាជនកម្ពុជា និងគណបក្សសង្គ្រោះជាតិអំពីស្ថានការណ៍ដ៏លំបាករបស់លោក កឹម សុខា  ឡើយ “ព្រោះប្រសិនបើមានការចរចា វានឹងមានឥទ្ធិពលលើដំណើរការរបស់តុលាការ” ទាំងនៅក្នុងសំណុំរឿងរបស់លោក កឹម សុខា និងសំណុំរឿងរបស់ឥស្សរជនគណបក្សប្រឆាំងដែលជាប់ពន្ធនាគារផ្សេងៗទៀត។

លោក យឹម សុវណ្ណ អ្នកនាំពាក្យគណបក្សសង្គ្រោះជាតិបានលើកឡើងថា ចំនួននៃអ្នករិះគន់គណបក្សប្រជាជនកម្ពុជាដែលជាប់ពន្ធនាគារ ក្នុងនោះមានជាង២០នាក់ត្រូវបានបញ្ជូនទៅពន្ធនាគារកាលពីឆ្នាំមុន និង មន្ត្រីសមាគមសិទ្ធិមនុស្សអាដហុក៤នាក់ ព្រមទាំងមន្ត្រីជាន់ខ្ពស់របស់គណៈកម្មាធិការជាតិរៀបចំការបោះឆ្នោត (គ.ជ.ប.) មួយរូបផងនោះ បង្ហាញឲ្យឃើញយ៉ាងច្បាស់ពីឥទ្ធិពលរបស់គណបក្សប្រជាជនកម្ពុជា។

លោកបានមានប្រសាសន៍ថា “គណបក្សប្រជាជនកម្ពុជាតែងតែលើកឡើងថា តុលាការ ឯករាជ្យ ប៉ុន្តែ ប្រទេសទាំងមូល និងពិភពលោកទាំងមូលសុទ្ធតែដឹងថា វាស្ថិតក្រោមការគ្រប់គ្រងរបស់គណបក្សកាន់អំណាច”។

លោកបានបន្ថែមថា “សមាជិកព្រឹទ្ធសភា និងសមាជិកសភា ព្រមទាំងសកម្មជនផងសុទ្ធតែជាប់ពន្ធនាគារ ក៏ដូចជាមន្ត្រីសិទ្ធិមនុស្សតំណាងអង្គការមិនមែនរដ្ឋាភិបាល និងអគ្គលេខាធិការរង គ.ជ.ប. ផងដែរ។ នេះគឺជាការបង្ក្រាបលើសកម្មជនប្រជាធិបតេយ្យ។ វាជារឿងនយោបាយ”។

តាមពិត បេសកកម្មរបស់សហភាពអឺរ៉ុបក្នុងរាជធានីភ្នំពេញ គួរតែត្រូវបានអត់ឱនឲ្យចំពោះការជឿថាគណបក្សប្រជាជនកម្ពុជាជាអ្នករៀបចំសំណុំរឿងនេះប្រឆាំងសកម្មជនគណបក្សប្រឆាំងដែលកំពុងជាប់ពន្ធនាគារទាំងនោះ ដោយហេតុថា មន្ត្រីជាន់ខ្ពស់របស់រដ្ឋាភិបាលម្នាក់បានប្រាប់ពួកគេនូវការពិតកាលពីពីរខែមុននេះ។

ពេលថ្លែងនៅក្នុងកិច្ចប្រជុំគណៈកម្មាធិការចម្រុះសហភាពអឺរ៉ុប-កម្ពុជាលើកទី៩នៅក្នុងរាជធានីភ្នំពេញកាលពីថ្ងៃទី៤ ខែឧសភា លោក អ៊ូច ប៉ូរិទ្ធ រដ្ឋលេខាធិការក្រសួងការបរទេសបានប្រាប់មន្ត្រីការទូតសហភាពអឺរ៉ុបថា គណបក្សប្រជាជនកម្ពុជា”គ្មានជម្រើស”ក្រៅពីចាប់ខ្លួនអ្នករិះគន់ខ្លួននោះឡើយ។

លោកបានមានប្រសាសន៍មុនពេលរិះគន់គណបក្សសង្គ្រោះជាតិថា មានចារិតបង្កជម្លោះ និងគ្មានក្រមសីលធម៌ ព្រមទាំងញុះញង់ឲ្យមានការប្រឆាំងគណបក្សប្រជាជនកម្ពុជានោះថា “ប្រវត្តិតែមួយគត់របស់យើងគឺធ្វើឲ្យ ‘មានសន្តិភាពនិងស្ថិរភាព’ ជាតម្លៃស្នូលដែលត្រូវតែរក្សាការពារទោះបីជាមានអ្វីកើតឡើងក៏ដោយ” នេះបើយោងតាមការលើកឡើងនៅក្នុងសុន្ទរកថារបស់លោក។

លោកបានមានប្រសាសន៍បន្ថែមថា “វាគួរឲ្យសោកស្តាយខ្លាំងណាស់ដែលគណបក្សសង្គ្រោះជាតិរំលោភបំពានឥតឈប់ឈរលើ ‘វប្បធម៌សន្ទនា’ ជាហេតុធ្វើឲ្យគណបក្សប្រជាជនកម្ពុជាគ្មានជម្រើសអ្វីក្រៅពីប្រើប្រាស់ដំណោះស្រាយផ្លូវច្បាប់ដើម្បីពង្រឹងនីតិរដ្ឋនៅកម្ពុជានោះឡើយ”។

ឥទ្ធិពលយ៉ាងច្បាស់ក្រឡែតរបស់គណបក្សប្រជាជនកម្ពុជាលើតុលាការក៏បានបង្ហាញឲ្យឃើញផងដែរកាលពីខែកក្កដា ឆ្នាំ២០១៤ ពេលតំណាងរាស្ត្រគណបក្សសង្គ្រោះជាតិចំនួន៧រូបត្រូវបានដោះលែងពីពន្ធនាគារភ្លាមៗត្រឹមតែប៉ុន្មានម៉ោងប៉ុណ្ណោះ បន្ទាប់ពីលោក សម រង្ស៊ី មេដឹកនាំគណបក្សប្រឆាំងបានចុះកិច្ចព្រមព្រៀងជាមួយលោក ហ៊ុន សែន បញ្ចប់ការធ្វើពហិការមិនចូលសភាជិតមួយឆ្នាំ។

លោក កែម ឡី ប្រធានក្រុមតស៊ូមតិនយោបាយមូលដ្ឋាន “ខ្មែរដើម្បីខ្មែរ” បានលើកឡើងថា វាច្បាស់ណាស់ថា លោក ហ៊ុន សែន រីករាយក្នុងការឲ្យប្រជាពលរដ្ឋយល់ថា លោកបានបង្គាប់ឲ្យតុលាការចាប់ខ្លួនអ្នកប្រឆាំងនឹងរូបលោក សូម្បីតែខណៈពេលលោកលើកឡើងថា លោកគ្មានអំណាចបែបនេះក៏ដោយ។

លោកបានមានប្រសាសន៍ទាក់ទិននឹងឱកាសដែលប្រជាពលរដ្ឋអាចឃើញពីឥទ្ធិពលរបស់លោក ហ៊ុន សែន នៅពីក្រោយការចាប់ខ្លួនថា “គាត់មិនខ្វល់អំពីបញ្ហានេះទេ។ ពលរដ្ឋគ្រប់រូបសុទ្ធតែដឹង សូម្បីតែកូនក្មេងក៏ដឹងដែរថា អ្វីៗគឺសុទ្ធតែស្ថិតក្នុងដៃបុរសខ្លាំងបែបនេះ”។

លោកបានបន្ថែមថា “គឺលោកនាយករដ្ឋមន្ត្រីដែលផ្តល់ភ័ស្តុតាងបង្ហាញថារដ្ឋាភិបាលជ្រៀតជ្រែកក្នុងតុលាការ។ ពាក្យសម្តីរបស់គាត់មុនការវិនិច្ឆ័យ មុនការចាប់ខ្លួន និងមុនការបើកសវនាការ ឬក៏ការគំរាមបញ្ជូននរណាម្នាក់ទៅពន្ធនាគារអស់មួយជីវិតនេះទាំងនេះគឺជាភ័ស្តុតាងជាក់ស្តែងបង្ហាញពីការជ្រៀតជ្រែក”។

លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រីដែលជាបុគ្គលមួយរូបក្នុងចំណោមបុគ្គលដែលខិតខំផ្សព្វផ្សាយបំផុតរបស់គណបក្សប្រជាជនកម្ពុជាសម្រាប់ “នីតិរដ្ឋ” បានលើកឡើងថា វាគ្មានអីដែលថា មិនស៊ីគ្នាទេ ចំពោះការដែលលោក ហ៊ុនសែន គំរាមចាប់លោក កឹម សុខា ដាក់ពន្ធនាគារអស់មួយជីវិត ហើយអះអាងថាគ្មានឥទ្ធិពលលើសំណុំរឿងរបស់អនុប្រធានគណបក្សសង្គ្រោះរូបនេះនោះ។

លោកបានមានប្រសាសន៍ថា “គណបក្សប្រឆាំងលម្អៀង ហើយតែងតែស្វែងរកបញ្ហា បែបនេះ”។ លោកបានបន្ថែមថា វាគ្មានអ្វីខុសទេដែលលោកនាយករដ្ឋមន្ត្រីជម្រាបលោក កឹម សុខា អំពីផលលំបាកដោយសារទង្វើល្មើសរបស់លោកនោះ។

លោកបានមានប្រសាសន៍ថា “ប្រសិនបើពួកគេមិនមកបង្ហាញខ្លួនក្នុងតុលាការ ឬគោរពតុលាការទេនោះ ពួកគេនឹងជាប់គុកអស់មួយជីវិត។ ប៉ុន្តែ ចៅក្រមមានឆន្ទានុសិទ្ធិ  ហើយមិនមែនដោយសារនាយករដ្ឋមន្ត្រីនិយាយបែបហ្នឹងនោះទេ”។

លោកបានបន្ថែមថា “ចៅក្រមរូបណា ដែលរំលោភបំពានច្បាប់ក្រោមសម្ពាធពីនរណាម្នាក់ ពួកគេក៏នឹងមានបញ្ហាដែរ”៕ ស៊ុយឈាង

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស