27.6 C
Phnom Penh

រដ្ឋាភិបាល និង​​​ក្រុម​ហ៊ុន​សម្បទានបន្ទោស​គ្នា​​​​​ទាក់ទិន​​វិវាទ​ដីធ្លី

ដោយ ឌឹ ខេមបូឌា ដេលី

បទវិភាគ

កាលពីម្សិលមិញ អ្នកគ្រប់គ្រងចម្ការកសិឧស្សាហកម្មដ៏ចម្រូងចម្រាសបំផុតមួយចំនួននៅក្នុងប្រទេសកម្ពុជា បានទម្លាក់កំហុសវិវាទដីធ្លីជាច្រើនរបស់ខ្លួនទៅលើរដ្ឋាភិបាល ដោយចោទប្រកាន់ថា មន្រ្តីមិនបានអប់រំសហគមន៍ឱ្យយល់ពីអត្ថប្រយោជន៍ចម្ការធំៗរបស់ខ្លួន។

cam-photo-rubberបណ្តាអង្គការសិទ្ធិមនុស្សបន្ទោសសម្បទានដីសេដ្ឋកិច្ច (ELC) ថាបាននាំឱ្យមានបញ្ហាអាក្រក់បំផុតមួយចំនួននៅប្រទេសកម្ពុជា ក្នុងនោះរួមមានទាំងការកាប់បំផ្លាញព្រៃឈើយ៉ាងរាលដាល និងការបណ្តេញប្រជាពលរដ្ឋទ្រង់ទ្រាយធំចេញពីដីធ្លីផងដែរ។ ប៉ុន្តែនៅពេលក្រសួងកសិកម្មរៀបចំសិក្ខាសាលាមួយកាលពីម្សិលមិញ ដើម្បីពន្យល់ប្រាប់ក្រុមអ្នកគ្រប់គ្រងសម្បទានដីសេដ្ឋកិច្ចអំពីអ្វីដែលរដ្ឋាភិបាលកំពុងធ្វើដើម្បីជួយពួកគេ ក្រុមអ្នកគ្រប់គ្រងបែរជាឆ្លៀតឱកាសនេះដើម្បីសម្តែងការមិនពេញចិត្តរបស់ខ្លួនទៅលើរដ្ឋាភិបាលទៅវិញ។

លោក លឹម ហេង នាយកក្រុមហ៊ុន អាន ម៉ាឌី គ្រុប ដែលមានចម្ការកៅស៊ូទូទាំងប្រទេសមានប្រសាសន៍ថា រដ្ឋាភិបាលលឿនពេកនៅក្នុងការចោទប្រកាន់ថា សម្បទានដីសេដ្ឋកិច្ចល្មើសច្បាប់។ កាលពីពេលថ្មីៗនេះ រដ្ឋាភិបាលទើបតែបញ្ចប់ការដកហូតកិច្ចសន្យាសម្បទានដីសេដ្ឋកិច្ចរាប់សិប ឬកាត់បន្ថយទំហំដីរបស់ពួកគេទុកជាការពិន័យចំពោះការល្មើសច្បាប់មួយចំនួន និងការចាប់យកដីធ្លីក្នុងចំណោមពួកគេជាដើម។

ចម្ការចំនួន ៣ របស់ក្រុមហ៊ុន អាន ម៉ាឌី គ្រុប ស្ថិតនៅក្នុង ឬជុំវិញដែនជម្រកសត្វព្រៃបឹងពែរ កន្លែងដែលសហគមន៍ជនជាតិដើមភាគតិចចោទប្រកាន់ក្រុមហ៊ុននេះថា បានឈូសឆាយព្រៃសហគមន៍ដែលពួកគាត់បានពឹងផ្អែកជាច្រើនជំនាន់មកហើយ។

ប៉ុន្តែលោក លឹម ហេង បានលើកឡើងថា បញ្ហានានារបស់ក្រុមហ៊ុនគឺជាកំហុសរបស់រដ្ឋាភិបាល ដោយសាតែរដ្ឋាភិបាលមិនបានប្រាប់អ្នកភូមិមូលដ្ឋានអំពីការងារថ្មីៗដែលក្រុមហ៊ុនផ្តល់ជូន។

លោកបានមានប្រសាសន៍ទៀតថា “យើងមានវិវាទដីធ្លីជាច្រើនជាមួយប្រជាពលរដ្ឋមូលដ្ឋាន ដោយសារតែរដ្ឋាភិបាលមិនជួយប្រជាពលរដ្ឋមូលដ្ឋានឱ្យយល់ពីអត្ថប្រយោជន៍នៃសម្បទានដីសេដ្ឋកិច្ច។ ការវិនិយោគគឺដើម្បីសេដ្ឋកិច្ចជាតិ និងដើម្បីប្រជាពលរដ្ឋមូលដ្ឋាន។ ខ្ញុំសុំស្នើឱ្យក្រសួងកសិកម្មជួយប្រជាពលរដ្ឋមូលដ្ឋានឱ្យយល់ថា សម្បទានដីសេដ្ឋកិច្ចនឹងបង្កើតការងារសម្រាប់ពួកគាត់”។

រដ្ឋាភិបាលបានសរសើរសម្បទានដីសេដ្ឋកិច្ចថា ជាវិធីមួយដើម្បីទាញសហគមន៍ជនបទនានាចេញពីភាពក្រីក្រតាមរយៈការផ្តល់ឱកាសឱ្យពួកគាត់ផ្លាស់ប្តូរពីការធ្វើចម្ការពនេចរ និងសម្រាប់តែចិញ្ចឹមក្រពះ ទៅជាការងារកាប់អំពៅ ឬជាជ័រកៅស៊ូជាដើម។ ប៉ុន្តែរដ្ឋាភិបាលមិនបានបង្ហាញថា វាកំពុងឱ្យផលនោះទេ។ ការសិក្សាឯករាជ្យមួយចំនួនទៅលើផលប៉ះពាល់ដែលសម្បទានដីសេដ្ឋកិច្ចបង្កឡើងទៅលើប្រជាពលរដ្ឋមូលដ្ឋានបង្ហាញថា សហគមន៍ទាំងមូលគ្មានជីវភាពធូរធារនោះទេ ហើយក្នុងករណីខ្លះមានជីវភាពកាន់តែយ៉ាប់ជាងមុនទៅទៀត បន្ទាប់ពីដោះដូរដីចម្ការ និងដីព្រៃរបស់ខ្លួនជាថ្នូរនឹងការងារតាមរដូវដែលទទួលបានថ្លៃពលកម្មទាប។

លោក ឡេង រិទ្ធី នាយកគ្រប់គ្រងប្រចាំប្រទេសនៃក្រុមហ៊ុនចម្ការកៅស៊ូ Vietnam Rubber Group (VRG) គ្រប់គ្រងដោយរដ្ឋដែលចម្ការរបស់ខ្លួននៅក្នុងប្រទេសកម្ពុជា គ្របដណ្ដប់លើផ្ទៃដីប្រមាណ១០០.០០០ហិកតា បានបន្ទោសក្រសួងកសិកម្មចំពោះការមិនបានជួយដោះស្រាយវិវាទដីធ្លីរបស់ខ្លួននៅតាមបណ្ដាខេត្តឆ្ងាយៗ។

លោកមានប្រសាសន៍ថា “យើងមិនអាចពឹងផ្អែកលើមន្ត្រីក្រសួងកសិកម្មនៅភ្នំពេញបានទេ ព្រោះពួកគាត់ធ្វើការក្នុងម៉ាស៊ីនត្រជាក់ ដូច្នេះហើយពួកគាត់មិនដឹងពីបញ្ហាពិតប្រាកដរវាងក្រុមហ៊ុន និងប្រជាពលរដ្ឋមូលដ្ឋានឡើយ។ យើងត្រូវការជំនួយពីអាជ្ញាធរមូលដ្ឋាន ព្រោះពួកគាត់យល់ពីបញ្ហាទាំងនោះ”។

កាលពីឆ្នាំមុន ក្រុមហ៊ុន VRG ត្រូវបានបណ្ដេញចេញពីក្រុមប្រឹក្សាការពារព្រៃឈើ (Forest Stewardship Council) ជាអង្គការមួយមានមូលដ្ឋាននៅសហរដ្ឋអាមេរិក ដែលមានមុខងារចេញវិញ្ញាបនបត្រជូនក្រុមហ៊ុននានាសម្រាប់ការគ្រប់គ្រងព្រៃឈើប្រកបដោយនិរន្តរភាព ដោយសារតែអ្វីដែលអង្គការនេះនិយាយថា ជាការកាប់ឈើខុសច្បាប់ និងការរំលោភសិទ្ធិមនុស្សពីសំណាក់ក្រុមហ៊ុននេះនៅក្នុងប្រទេសកម្ពុជា។

លោក វ៉េង សុខុន រដ្ឋមន្ត្រីក្រសួងកសិកម្មដែលត្រូវបានតែងតាំងកាលពីខែមីនា បានបន្ទោសទៅលើសម្បទានដីសេដ្ឋកិច្ចវិញ។ លោកថ្លែងថា “ក្រុមហ៊ុនបន្ទោសរដ្ឋាភិបាល ប៉ុន្តែពួកគេតែងតែលាក់បាំងទង្វើមិនល្អរបស់ខ្លួន”។

លោកបានបន្តទៀតថា គឺក្រុមហ៊ុនទៅវិញទេដែលគួរប្រាប់សហគមន៍មូលដ្ឋានថាខ្លួនចង់ធ្វើអ្វី មិនមែនរដ្ឋាភិបាលលនោះទេ។ លោកមានប្រសាសន៍ថា “ខ្ញុំគិតថា ក្រុមហ៊ុនគួរតែលើកស្លាកសម្បទានដីសេដ្ឋកិច្ចរបស់ខ្លួនដើម្បីជូនដំណឹងដល់ប្រជាជនក្នុងមូលដ្ឋានអំពីផែនការវិនិយោគរបស់ខ្លួន។ ក្រុមហ៊ុនត្រូវធ្វើសកម្មភាពមុន ព្រោះវាពាក់ព័ន្ធជាមួយប្រជាពលរដ្ឋមូលដ្ឋាន យើងអាចស្វែងរកដំណោះស្រាយរួមគ្នាបាន”។

លោករដ្ឋមន្ត្រីក៏បានចោទអ្នកគ្រប់គ្រងសម្បទានដីសេដ្ឋកិច្ចថា និយាយកុហកអំពីផ្ទៃដីដែលខ្លួនបានឈូសឆាយដើម្បីគេចវេះការបង់ថ្លៃពាក់ព័ន្ធនានា ហើយបានស្នើឲ្យមានការពិនិត្យតាមដានតឹងរ៉ឹង។

លោកបានលើកឡើងទៀតថា “ខ្ញុំគិតថា នេះជាកំហុសធំមួយរបស់ក្រុមហ៊ុន ហើយបើបញ្ហានេះលេចឮដល់អ្នកកាសែត គេនឹងសរសេរចុះផ្សាយអំពីបញ្ហាមួយដែលមិនគួរកើតឡើង ហើយវានឹងប៉ះពាល់ដល់ក្រសួងកសិកម្មយ៉ាងខ្លាំង”។

លោក ឡាត់ គី អ្នកគ្រប់គ្រងកម្មវិធីដីធ្លី និងធនធានធម្មជាតិនៅសមាគមសិទ្ធិមនុស្សអាដហុក បានមានប្រសាសន៍ថា ភាគីទាំងពីរសុទ្ធតែត្រូវស្ដីបន្ទោសដូចគ្នា។ ពេលទាក់ទងតាមក្រោយដើម្បីសាកសួរអំពីសិក្ខាសាលានេះ លោកមានប្រសាសន៍ថា លោក “ភ្ញាក់ផ្អើល” ដែលក្រុមហ៊ុនទាំងនេះបន្ទោសរដ្ឋចំពោះបញ្ហារបស់ខ្លួន។ លោកគូសបញ្ជាក់ថា “តាមពិតក្រុមហ៊ុនមិនគោរពសិទ្ធិមនុស្សទេ។ នោះគឺជារឿងសំខាន់បំផុត”។

លោកបានមានប្រសាសន៍ថា ជាញឹកញាប់ក្រុមហ៊ុនជាអ្នកខុសដែលមិនបានអនុវត្តតាមគោលនយោបាយ “ស្បែកខ្លា” របស់រដ្ឋាភិបាលដែលចែងថា សហគមន៍ដែលរស់នៅលើដីក្នុងតំបន់សម្បទានសេដ្ឋកិច្ចត្រូវរក្សាទុកឲ្យនៅដដែល ហើយរដ្ឋាភិបាលខុសដោយសារមិនបានធ្វើឲ្យប្រាកដថាវាមិនប្រែប្រួល។

លោកបានបន្តថា ក្នុងរយៈពេលប៉ុន្មានឆ្នាំដែលលោកឃ្លាំមើលផលប៉ះពាល់របស់សម្បទានដីសេដ្ឋកិច្ចនៅក្នុងប្រទេស លោកមិនធ្លាប់ឃើញសម្បទានណាដែលមិនប៉ះពាល់ដល់ប្រជាពលរដ្ឋមូលដ្ឋានសូម្បីតែម្តង។ “ខ្ញុំមិនដែលឮរឿងល្អដូចនោះទេ”៕ សុខុម

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស