32 C
Phnom Penh

គ្រូ​គង្វាល​​​ខេត្ត​​​សៀមរាប​​​​​​​​ត្រូវ​​​​ចាប់​ខ្លួន​​​​​​ដោយសារ​​​ការអះអាង​​​​​​​ថា​​​​រំលោភ​​​​​ផ្លូវ​ភេទ​​​​​

ដោយ ឌឹ ខេមបូឌា ដេលី

បទវិភាគ

នគរបាលក្រុងសៀមរាបបានចាប់ខ្លួនគ្រូគង្វាលជនជាតិកូរ៉េខាងត្បូងម្នាក់ដែលជាប់ចោទថា រំលោភក្មេងស្រីប្រាំបីនាក់ជាច្រើនលើកកាលពីបីបួនឆ្នាំមុន ហើយបានទិញអង្ករ ម៉ូតូនិងឲ្យលុយពួកគេនិងគ្រួសាររបស់គេ។

លោកស្រី ដួង ថាវរី នាយការិយាល័យនគរបាលប្រឆាំងការជួញដូរមនុស្សខេត្តសៀមរាបបាននិយាយកាលពីថ្ងៃព្រហស្បិ៍ថា លោក ផាក យោល (Park Youl) អាយុ ៦២ឆ្នាំត្រូវបានចាប់ខ្លួនកាលពីព្រឹកថ្ងៃពុធ ក្រោយពីហៅមកសាកសួរដោយផ្អែកតាមការឲ្យការណ៍។លោកស្រីនិយាយថា មានជនរងគ្រោះម្នាក់ក្នុងចំណោមជនរងគ្រោះទាំងអស់បានរាយការណ៍ទៅប៉ូលិស ពីព្រោះនាងខឹងនឹងគ្រូគង្វាលមិនព្រមឲ្យម៉ូតូដល់នាងដូចអ្នកផ្សេងទៀត។

លោកស្រី ថាវរី បាននិយាយថា”ក្មេងស្រីនោះបាននិយាយថា គ្រូគង្វាលបានបញ្ចុះបញ្ចូលនាងឱ្យរួមភេទជាមួយគាត់ច្រើនដង។ យើងបានអញ្ជើញជនសង្ស័យមកសាកសួរ ហើយក៏នាំក្មេងៗដែលកំពុងរស់នៅជាមួយគាត់នៅព្រះវិហារមកដែរ។ពេលនោះទើបបទល្មើសត្រូវលាតត្រដាង”។

នាយការិយាល័យនគរបាលរូបនេះបាននិយាយថា ជងរងគ្រោះស្រីទាំងប្រាំបីនាក់បានបញ្ជាក់អត្តសញ្ញាណរួចហើយមកដល់ពេលនេះ រួមទាំងក្មេងស្រីទាំងប្រាំមួយនាក់ដែលកំពុងរស់នៅជាមួយគ្រូគង្វាលនៅព្រះវិហារ ដែលលោកស្រីបាននិយាយថា វាគ្មានឈ្មោះ។ លោកស្រីបាននិយាយថា លោក ផាក បានរំលោភពួកគេម្នាក់ៗយ៉ាងហោចណាស់ប្រាំឆ្នាំមកហើយ ហើយពួកគេពេលនេះមានអាយុពី១៣ដល់២១ឆ្នាំ។

លោកស្រីបាននិយាយថា “ជនសង្ស័យបានសារភាពថាបានរំលោភក្មេងស្រីខ្លះដោយផ្តល់របស់ខ្លះដូចជាកង់ លុយកាក់សម្រាប់រៀនសូត្រជាដើម”។

លោកស្រី ថាវរី បាននិយាយថា គ្រូគង្វាលត្រូវបានសាកសួរដោយតុលាការខេត្តសៀមរាបកាលពីថ្ងៃព្រហស្បតិ៍ ប៉ុន្តែមិនទាន់បានចោទប្រកាន់នៅឡើយទេ។លោកស្រីបានបដិសេធមិនពិភាក្សាអំពីលក្ខណៈនៃការរំលោភទេ ប៉ុន្តែលោកស្រីបាននិយាយថា លោកស្រីភ្ញាក់ផ្អើល ព្រោះរឿងនេះបានកើតឡើងយូរមកហើយ។

លោកស្រីបាននិយាយថា “ជនរងគ្រោះមិនបានគិតថា វាជាការរំលោភបំពានទេ។គេគិតថាគេបានស្រឡាញ់គ្រូគង្វាល ហើយគេមិនបានគិតដល់ការដាក់ពាក្យបណ្តឹងទេ។ ហើយគ្រូគង្វាលក៏តែងតែឲ្យរបស់ផ្សេងៗដល់គ្រួសាររបស់គេ។ពួកគេមកពីគ្រួសារក្រីក្រ”។

លោកស្រី ថាវរី បាននិយាយថា ក្មេងស្រីនិងស្ត្រីទាំងប្រាំមួយនាក់បានយកទៅដាក់នៅមន្ទីរសង្គមកិច្ចខេត្ត ហើយពីរនាក់ទៀតបានបញ្ជូនទៅផ្ទះវិញ។

លោកស្រីបាននិយាយថា នគរបាលកំពុងតែស៊ើបអង្កេត ហើយមិនបានរកឃើញភ័ស្តុតាង នៃការរំលោភបំពាននៅព្រះវិហារទីពីរ ដែលលោក ផាក គ្រប់គ្រងនៅក្នុងស្រុកប្រាសាទ បាគងទេ។

ក្នុងសេចក្តីថ្លែងការណ៍ដែលចេញផ្សាយកាលពីថ្ងៃព្រហស្បតិ៍ អង្គការសកម្មភាពដើម្បីកុមារហៅកាត់ថា APLE និយាយថាមានការចាប់ខ្លួនដោយសារតែខ្លួន។អង្គការនេះបាននិយាយថាខ្លួនបានស៊ើបអង្កេតព្រះវិហារ ចាប់តាំងពីខ្លួនបានទទួលដំណឹងអំពីការចោទប្រកាន់កាលពីខែកុម្ភៈ ឆ្នាំមុន ហើយបានរាយការណ៍ទៅនគរបាលមូលដ្ឋាន។ អង្គការនេះបាននិយាយថាមានជនរងគ្រោះប្រាំបួននាក់ដែលមានអាយុពី១១ឆ្នាំដល់១៦ឆ្នាំ។

លោកស្រី ថាវរី បាននិយាយដោយទទូចថា ពួកគេមានអាយុពី១៣ឆ្នាំដល់២១ឆ្នាំ ហើយនិយាយថា មានម្នាក់ក្នុងចំណោម៩នាក់ដែលលើកឡើងដោយអង្គការ មិនមែនជាជនរងគ្រោះទេ៕ មាំ វិបុល

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស