35 C
Phnom Penh

សាលា​រាជធានី​មិន​ឱ្យ​​បូជាសព​លោក​ ប៉ែន សុវណ្ណ​ ​នៅ​ទី​​​សាធារណៈ

ដោយ ឌឹ ខេមបូឌា ដេលី

បទវិភាគ

កាលពីម្សិលមិញ អ្នកនាំពាក្យសាលារាជធានីភ្នំពេញបានមានប្រសាសន៍ថា លោក ប៉ែន សុវណ្ណ អតីតនាយករដ្ឋមន្ត្រីដែលបានទទួលមរណភាពកាលពីថ្ងៃសៅរ៍ នឹងមិនទទួលបានការអនុញ្ញាតឲ្យបូជាសពនៅកន្លែងសាធារណៈដែលគណបក្សសង្គ្រោះជាតិចង់បាននោះឡើយ ពីព្រោះកន្លែងនេះទុកសម្រាប់តែមន្ត្រីជាន់ខ្ពស់ប៉ុណ្ណោះ។

Pen Sovann walks onto a stage at a Cambodia National Rescue Party election rally to mark the return of opposition leader Sam Rainsy to Cambodia in July 2013. Sovann , who was Cambodia's first prime minister after the fall of the Khmer Rouge, died on Saturday, October 29, 2016.

ជាសមាជិកស្ថាបនិកនៃក្រុមផ្តាច់ខ្លួនខ្មែរក្រហមដែលបានជួួយផ្តួលរំលំរបប ប៉ុល ពត ក្នុងឆ្នាំ១៩៧៩ លោក ប៉ែន សុវណ្ណ បានក្លាយជានាយករដ្ឋមន្ត្រីទី១នៃរដ្ឋាភិបាលដែលបានបង្កើតឡើងក្នុងឆ្នាំ១៩៨១។ ទោះបីជាយ៉ាងណា លោកត្រូវបានចាប់ខ្លួនបន្ទាប់ពីកាន់អំណាចបានតែប៉ុន្មានខែប៉ុណ្ណោះ ហើយបានចំណាយពេល១១ឆ្នាំនៅក្នុងពន្ធនាគារក្រុងហាណូយ និងការឃុំខ្លួនក្នុងផ្ទះ ដោយសារមិនព្រមស្ដាប់បង្គាប់តាមវៀតណាមដែលត្រួតត្រាលើរបបថ្មី។

ដោយមិនពេញចិត្តចំពោះរដ្ឋាភិបាលគណបក្សប្រជាជនកម្ពុជាដែលលើកបន្តុបដោយវៀតណាម លោកបានចូលរួមជាមួយគណបក្សប្រឆាំង នៅពេលលោកត្រឡប់មកប្រទេសកម្ពុជាវិញក្នុងទសវត្សរ៍ឆ្នាំ១៩៩០ ហើយបានជាប់ឆ្នោតជាតំណាងរាស្ត្រគណបក្សសង្គ្រោះជាតិក្នុងឆ្នាំ២០១៣។ លោកបានទទួលមរណភាពដោយរោគាពាធនៅស្រុកកំណើតរបស់លោកក្នុងខេត្តតាកែវ ក្នុងជន្មាយុ៨០ឆ្នាំ។

លោក នុត រំដួល តំណាងរាស្ត្រគណបក្សសង្គ្រោះជាតិបានមានប្រសាសន៍ថា គណបក្សបានដាក់សំណើទៅសាលារាជធានីភ្នំពេញកាលពីព្រឹកម្សិលមិញតាមរយៈរដ្ឋសភា ដើម្បីសុំបូជាសពលោកនៅថ្ងៃអាទិត្យនៅសួនច្បារមុខវត្តបទុមស្ថិតក្នុងកណ្តាលរាជធានីភ្នំពេញ។

លោក ប៉ុល ហំម តំណាងរាស្ត្រគណបក្សសង្គ្រោះជាតិដែលជាប្រធានគណៈកម្មការរៀបចំបុណ្យសពបានមានប្រសាសន៍ថា អតីតនាយករដ្ឋមន្ត្រីរូបនេះសមនឹងទទួលបានការបូជាសពនៅកន្លែងសាធារណៈ។

លោកបានមានប្រសាសន៍ថា “ប្រជាពលរដ្ឋទូទាំងប្រទេសដឹងថា លោកជានរណា។ លោកគឺជាអតីតនាយករដ្ឋមន្ត្រីមួយរូប។ លោកជាអ្នកស្នេហាជាតិ”។

លោក មាន ចាន់យ៉ាដា អ្នកនាំពាក្យសាលារាជធានី បានមានប្រសាសន៍ថា សំណើនេះត្រូវបានច្រានចោល   ពីព្រោះគ្រាន់តែជាតំណាងរាស្ត្រមិនមានគុណសម្បត្តិគ្រប់គ្រាន់សម្រាប់ការបូជាសពនៅកន្លែងសាធារណៈឡើយ។ លោកបានថ្លែងថា “សួនច្បារមុខវត្តបទុមទុកសម្រាប់តែអ្នកនយោបាយជាន់ខ្ពស់ប៉ុណ្ណោះ។ តំណាងរាស្ត្រមិនអនុញ្ញាតឱ្យធ្វើបុណ្យសពនៅទីនោះឡើយ”។

លោក នុត រំដួល បានមានប្រសាសន៍ថា គណបក្សសង្គ្រោះជាតិមានគម្រោងដង្ហែសពលោក ប៉ែន សុវណ្ណ ពីខេត្តតាកែវមកកាន់វត្តថាន់ក្នុងរាជធានីភ្នំពេញ នៅថ្ងៃពុធ។ លោកបានលើកឡើងថា ប្រសិនបើពួកគេមិនអាចបញ្ចុះបញ្ចូលរដ្ឋាភិបាលអនុញ្ញាតឲ្យបូជាសពនៅសួនមុខវត្តបទុមទេនោះ សពនឹងត្រូវធ្វើពិធីបូជានៅវត្តនេះ៕ សារុន

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស