លោក​ កឹម សុខា ក្លាយ​ជា​ប្រធាន​​​ក្រុម​​​សំឡេង​​​​​ភាគតិច​​ ពេល​លោក សម រង្ស៊ី មិន​នៅ​ក្នុង​ប្រទេស​

នៅក្នុងចំណាត់ការមួយដែលបន្តចាត់ទុកលោក សម រង្ស៊ី មេដឹកនាំគណបក្សប្រឆាំងមិនសូវសំខាន់ និងគំរាមកំហែងធ្វើឱ្យភាពប្រេះឆានៅក្នុងគណបក្សនេះធ្លាក់ចូលក្នុងស្ថានភាពមួយកាន់តែធ្ងន់ធ្ងរនោះ លោកនាយករដ្ឋមន្ត្រី ហ៊ុន សែន បានលើកឡើងថា លោក កឹម សុខា ប្រធានស្ដីទីគណបក្សសង្គ្រោះជាតិ នឹងជំនួសលោក សម រង្ស៊ី ក្នុងនាមជាដៃគូសន្ទនារបស់លោកនៅក្នុងគណបក្សប្រឆាំង។

ការប្រកាសនេះដែលកើតមានឡើងត្រឹមតែប៉ុន្មានថ្ងៃប៉ុណ្ណោះ បន្ទាប់ពីព្រះមហាក្សត្រ នរោត្តម សីហមុនី ទ្រង់ព្រះរាជទានលើកលែងទោសលោក កឹម សុខា នៅក្នុងសំណុំរឿង “សញ្ចរកម្ម” តាមសំណើរបស់លោក ហ៊ុន សែន នោះ ផ្ទុយពីសារតាមគេហទំព័រទ្វីតធ័ររបស់លោក សម រង្ស៊ី កាលពីថ្ងៃច័ន្ទ ដែលលើកឡើងថា លោកនឹងនៅតែជាប្រធានក្រុមសំឡេងភាគតិច។

លោក ហ៊ុន សែន បានមានប្រសាសន៍កាលពីម្សិលមិញថា ការផ្លាស់ប្ដូរឋានានុក្រមកើតចេញពីសំណើរបស់គណបក្សសង្គ្រោះជាតិកាលពីថ្ងៃច័ន្ទ ដែលស្នើសុំឱ្យលោក កឹម សុខា ជំនួសលោក សម រង្ស៊ី ជាប្រធាន “ក្រុមសំឡេងភាគតិច” នៅក្នុងសភា។

ដោយដកស្រង់មាត្រា៤៨នៃបទបញ្ជាផ្ទៃក្នុងរបស់រដ្ឋសភា លោក ហ៊ុន សែន បានមានប្រសាសន៍ថា “ប្រធានក្រុមសំឡេងភាគតិចរូបនេះ គឺជាដៃគូសន្ទនាជាមួយថ្នាក់ដឹកនាំរដ្ឋាភិបាលសម្រាប់កិច្ចការងារប្រទេសជាតិ។ ប្រធានក្រុមសំឡេងភាគតិចមានឋានៈស្មើនាយករដ្ឋមន្ត្រី”។

លោក កឹម សុខា ដែលមានទឹកមុខញញឹមបានលើកឡើងថា លោកសង្ឃឹមថា នឹងមានការពិភាក្សាដែលផ្ដល់ផលប្រយោជន៍ឱ្យគ្នាទៅវិញទៅមកជាមួយបុរសដែលថ្មីៗនេះ បានគំរាមចាប់លោកដាក់ពន្ធនាគារ  ”អស់មួយជីវិត” ពីបទចោទប្រកាន់ដែលមជ្ឈដ្ឋានទូទៅមើលឃើញថា  មានហេតុផលនយោបាយ ហើយលោកក៏បាននិយាយសម្រាលសារៈសំខាន់នៃតួនាទីថ្មីរបស់លោកជាប្រធានក្រុមសំឡេងភាគតិចផងដែរ។

នៅក្នុងកិច្ចប្រជុំជាមួយលោកនាយករដ្ឋមន្ត្រីអំឡុងពេលព្រឹក លោក កឹម សុខា បានលើកឡើងថា ពួកលោកទាំងពីរ “បានព្រមព្រៀងគ្នាលើបញ្ហាមួយចំនួនដូចជា ការបង្រួបបង្រួមជាតិដើម្បីស្ថិរភាព សន្តិភាព និងការអភិវឌ្ឍសម្រាប់ប្រទេសជាតិ និងពលរដ្ឋរបស់យើងជាដើម”។

លោកបានមានប្រសាសន៍បន្ថែមថា “ថ្ងៃនេះយើងមកទីនេះដើម្បីធ្វើដំណើរឆ្ពោះទៅកាន់គោលដៅដែលយើងមិនទាន់សម្រេចបាន។ អ្វីដែលយើងត្រូវធ្វើបន្ទាប់ គឺស្វែងរកឯកភាពជាតិដើម្បីធ្វើឱ្យប្រទេសជាតិរបស់យើងកាន់តែប្រសើរឡើង”។ លោកបន្ថែមថា លោកស្វាគមន៍ “ការរិះគន់ស្ថាបនាដោយមានគោលដៅបង្កើនការអភិវឌ្ឍរបស់យើង” ប៉ុន្តែមិនមែនការប្រមាថ ឬពាក្យឡកឡាយដែលអាចធ្វើឱ្យ “សង្គមបែកបាក់” នោះឡើយ។

លោក សម រង្ស៊ី ដែលបដិសេធមិនឆ្លើយសំណួរពាក់ព័ន្ធការអះអាងពីមុនរបស់លោកដែលថា លោកនឹងនៅតែជាប្រធានសំឡេងភាគតិចនោះ បានលើកឡើងថា លោកមិនខ្វាយខ្វល់ចំពោះចំណាត់ការនេះឡើយ។

លោកបានលើកឡើងតាមរយៈអុីម៉េលមួយថា “តំណែងមិនសំខាន់ទេ អ្វីដែលសំខាន់គឺភាពទៀងត្រង់ និងភាពថ្លៃថ្នូររបស់យើងម្នាក់ៗ។ ខ្ញុំសុខចិត្តធ្វើអ្វីៗទាំងអស់ឱ្យតែប្រទេសជាតិយើងបាននៅគង់វង្ស ហើយឈានទៅរកភាពរុងរឿង”។

ដោយលើកឡើងថា លោកត្រូវបានគេទាត់ចេញពីសភា ផ្ដន្ទាទោសឱ្យជាប់ពន្ធនាគារ ហើយថ្មីៗនេះត្រូវបានរារាំងមិនឱ្យចូលក្នុងប្រទេសទៀតនោះ លោក សម រង្ស៊ី បានមានប្រសាសន៍ថា គណបក្សប្រជាជនកម្ពុជាកំពុងតែបកស្រាយច្បាប់ តែទោះជាយ៉ាងណាគណបក្សរបស់លោកទទួលយកដោយការពេញចិត្ត។

លោកបានមានប្រសាសន៍ថា ”ប៉ុន្តែភាពស្មោះត្រង់របស់ខ្ញុំចំពោះប្រជារាស្ត្រខ្មែរនៅតែស្មោះត្រង់ជានិច្ចរហូតដល់ដង្ហើមចុងក្រោយរបស់ខ្ញុំ”។

លោកស្រី មូរ សុខហួរ តំណាងរាស្ត្រគណបក្សសង្គ្រោះជាតិបានលើកឡើងថា លោក សម រង្ស៊ី បានចូលរួមនៅក្នុងការបោះឆ្នោតរបស់គណៈកម្មាធិការអចិន្ត្រៃយ៍នៅក្នុងគណបក្សតាមរយៈ Skype ដែលក្នុងនោះលោកបានគាំទ្រសេចក្ដីសម្រេចឱ្យលោក កឹម សុខា ដឹកនាំតំណាងរាស្ត្រគណបក្សប្រឆាំង និងតំណាងពួកគេក្នុងការពិភាក្សាជាមួយលោក ស ខេង រដ្ឋមន្ត្រីក្រសួងមហាផ្ទៃ។

លោកស្រីបានមានប្រសាសន៍ថា “គ្មានការបែកបាក់នៅក្នុងគណបក្សទេ។ លោក សម រង្ស៊ី នៅតែជាបុគ្គលដែលពិភាក្សាជាមួយលោក ហ៊ុន សែន”។

ទោះជាយ៉ាងណា ព្រះអង្គម្ចាស់ ស៊ីសុវត្ថិ ធម្មិកោ សមាជិកដ៏លេចធ្លោនៅក្នុងគណៈកម្មាធិការអចិន្ត្រៃយ៍របស់គណបក្សសង្គ្រោះជាតិបានទទួលស្គាល់ថា គណបក្សនេះប្រហែលជាគ្មានជម្រើសទេនៅក្នុងបញ្ហានេះ។

ព្រះអង្គម្ចាស់បានមានបន្ទូលថា “បើនាយករដ្ឋមន្ត្រីនិយាយថា កឹម សុខា គឺជាដៃគូរបស់លោកទៅហើយ អ៊ីចឹងខ្ញុំគិតថា គ្មានអ្វីត្រូវនិយាយទៀតទេ”។

ដោយសារលោក ហ៊ុន សែន ចូលចិត្តបំបែកបំបាក់មេដឹកនាំគណបក្សប្រឆាំង ការព្យាករអំពីការរួបរួមសាមគ្គីគ្នារវាងមេដឹកនាំគណបក្សសង្គ្រោះជាតិទាំងពីររូបនេះមិនធានាថា ទំនាក់ទំនងនៅតែមានភាពសុខដុមរមនានោះឡើយ។

ព្រះអង្គម្ចាស់ ស៊ីសុវត្ថិ ធម្មិកោ បានមានបន្ទូលទៀតថា “យើងកំពុងរងការវាយប្រហារពីគណបក្សប្រជាជនកម្ពុជាម្ដងទៀតហើយ”។ ព្រះអង្គម្ចាស់បានបន្តថា ការវាយប្រហារនេះអាចបន្តធ្វើឱ្យមានការខ្វែងគំនិតគ្នាក្នុងបក្ស ប្រសិនបើមិនដោះស្រាយ។ “ខ្ញុំនៅតែខ្លាចថា យើងប្រហែលជាត្រូវគេបំបែកបំបាក់”។

លោក យឹម សុវណ្ណ អ្នកនាំពាក្យគណបក្សសង្គ្រោះជាតិបានលើកឡើងថា មេដឹកនាំគណបក្ស “មិនផ្ដោតលើតំណែងនៅលើក្រដាស “នោះឡើយ។

ប៉ុន្តែលោកបានជំទាស់ ពេលសួរថា ហេតុអ្វីបានជាលោក សម រង្ស៊ី សង្កត់ធ្ងន់ពីតំណែងរបស់លោកប៉ុន្មានថ្ងៃមុននេះ។

លោកបានមានប្រសាសន៍ថា “អ្នកទាំងអស់គ្នាអាចឃើញហើយថា នយោបាយគឺវាស្មុគស្មាញណាស់”។

ភាពស្មុគស្មាញទាំងនោះអាចគំរាមកំហែងធ្វើឱ្យបុគ្គលទាំងពីរនេះដែលសម្ពន្ធភាពដ៏ប្រេះស្រាំរបស់ពួកគាត់បានជួយឱ្យគណបក្សសង្គ្រោះជាតិរួបរួមគ្នានោះ បែកបាក់គ្នា នេះបើ យោងតាមលោក អៀ សុផល អ្នកនិពន្ធសៀវ  ភៅមានចំណងជើងថា ”ការពឹងផ្អែកលើ ជំនួយនៅក្នុងប្រទេសកម្ពុជា៖ វិធីដែលជំនួយបរទេសធ្វើឱ្យលទ្ធិប្រជាធិបតេយ្យទន់ខ្សោយ”។

លោកបានសរសេរនៅក្នុងអុីម៉េលមួយថា “យើងជិតឃើញហើយ ថាតើគណបក្សសង្គ្រោះជាតិនៅរស់រានឬយ៉ាងណា មែនទេ?។ ខ្ញុំគិតថា លោក សម រង្ស៊ី គ្មានជម្រើសនោះឡើយ។ តើគាត់នឹងត្រឡប់មកប្រទេសកម្ពុជាវិញ ហើយតស៊ូដើម្បីរក្សាតំណែងរបស់លោកជាមេគេឬ?  ការប្ដូរតំណែងជាមួយលោក កឹម សុខា គឺវាប្រសើរជាងត្រូវបានបណ្ដេញចេញទាំងស្រុង”។

លោក កឹម សុខា “មានឆន្ទៈចង់បានអំណាចខ្លាំង” ហេតុច្នេះហើយលោកប្រហែលចេះសម្របខ្លួនជាងលោក សម រង្ស៊ី ដើម្បីបានចូលទៅក្នុងរដ្ឋាភិបាលដែលមានការឯកភាពគ្នាជាមួយលោក ហ៊ុន សែន ទៅថ្ងៃអនាគត នេះបើយោងតាមលោក Markus Karbaum អ្នកវិទ្យាសាស្ត្រនយោបាយអាល្លឺម៉ង់ដែលផ្ដោតលើប្រទេសកម្ពុជា។

លោកបានលើកឡើងតាមរយៈអុីម៉េលមួយថា “នេះទំនងក្លាយជាជម្លោះដ៏ធំនៅក្នុងគណបក្សប្រឆាំងក្នុងរយៈពេល១ឆ្នាំកន្លះក្រោយ។ ខណៈលទ្ធផលរបស់ខ្លួនពិបាកនឹងព្យាករនៅក្នុងថ្ងៃនេះ វាពិតជាទិសដៅដែលលោក ហ៊ុន សែន ចង់បាន”។

លោក អ៊ូ វីរៈ អ្នកវិភាគនយោបាយ ដែលជាប្រធានអង្គការសិក្សាស្រាវជ្រាវនយោបាយនៅក្នុងរាជធានីភ្នំពេញ បានព្យាករថា លោកនាយករដ្ឋមន្ត្រីនឹង “អង្គុយចាំសើច” នៅពេលឃើញមានជម្លោះនៅក្នុងគណបក្សនេះ។

លោកបានមានប្រសាសន៍ថា ដើម្បីជម្នះបញ្ហានេះ និងការសាកល្បងសាមគ្តីភាពទៅថ្ងៃអនាគតនោះ គណបក្សសង្គ្រោះជាតិ “ចាំបាច់ត្រូវតែធ្វើឱ្យគណបក្សហ្នឹង កាន់តែមានលក្ខណៈសមជាគណបក្សមួយ ហើយកាត់បន្ថយការបង្ហាញថាមានបុគ្គលសំខាន់តែពីររូប”។ លោកបន្ថែមថា “ខ្ញុំមានមន្ទិលថា លោក សម រង្ស៊ី នឹងមិនអាចទប់អារម្មណ៍របស់លោកបានឡើយ ហើយលោកនឹងធ្វើការសម្រេចចិត្តមិនបានល្អដោយសារបញ្ហានេះ”៕ ស៊ុយឈាង