កាលពីម្សិលមិញ អាជ្ញាធររាជធានីភ្នំពេញបានចាប់ផ្ដើមវាស់វែងផ្លូវថ្មីមួយខ្សែដ៏ចម្រូងចម្រាសដែលត្រូវស្ថាបនានៅជាប់វិហារអុិស្លាមមួយកន្លែងស្ថិតក្នុងតំបន់បឹងកក់ ដោយច្រានចោលសំណើនៅនាទីចុងក្រោយរបស់សហគមន៍មូស្លីមនៅតំបន់នោះ ឱ្យរំកិលផ្លូវនេះចម្ងាយប្រាំម៉ែត្របន្ថែមទៀតពីអគារនេះ។
សហគមន៍នេះលើកឡើងថា ខ្លួនបារម្ភថាផ្លូវដែលគ្រោងស្ថាបនាកាត់តាមដីដែលមួយផ្នែកជាបរិវេណវិហារអុីស្លាមអាល់សឺកាលនោះ នឹងរំខានដល់ការថ្វាយបង្គំរបស់ពួកគេនៅទីនោះ ហើយបានស្នើឱ្យសាលារាជធានីធ្វើផ្លូវវាងទៅ។
ដោយមិនរាថយ កម្មករបានចាប់ផ្ដើមធ្វើការវាស់វែងនៅកន្លែងនោះកាលពីព្រឹក្សិលមិញ ដើម្បីរៀបចំការស្ថាបនា ហើយបានដាំបង្គោលរបងបណ្ដោះអាសន្នមុនពេលធ្វើការផ្អាកទៅវិញនៅពេលរសៀល ដើម្បីឱ្យក្រុមមន្ត្រីរៀបចំកិច្ចប្រជុំមួយទៀតជាមួយអ្នកពាក់ព័ន្ធ។
បន្ទាប់ពីកិច្ចប្រជុំ លោក ឃួង ស្រេង អភិបាលរងរាជធានីភ្នំពេញបានមានប្រសាសន៍ថា អាជ្ញាធរមិនអាចធ្វើតាមសំណើចុងក្រោយ របស់សហគមន៍បានទេ ពីព្រោះតម្រូវឱ្យធ្វើផ្លូវកោងខ្លាំងពេក។
លោកបានមានប្រសាសន៍ថា “ពួកគេស្នើឱ្យយើងរំកិលចេញប្រាំម៉ែត្រ ប៉ុន្តែយើងមិនអាចរំកិលបានទេ ហើយយើងនឹងធ្វើទៅតាមផែនការ។ ពួកគាត់មិនអាចរារាំងបានទេ។ ផ្លូវនេះត្រូវតែកើតឡើង”។
លោក ស្លេះ ណាហ្ស៊ី ដែលជាប្រធានមណ្ឌលផ្សព្វផ្សាយមូស្លីមកម្ពុជា ជាអង្គការមិនមែនរដ្ឋាភិបាលដែលលើកកម្ពស់ការអប់រំមូស្លីមសាសនា និងពុទ្ធសាសនាអំពីជំនឿទៅវិញទៅមកបានមានប្រសាសន៍ថា លោកមានការខកចិត្តពីការច្រានចោលរបស់សាលារាជធានី។
លោកបានថ្លែងថា “វាមិនមែនជាមហាវិថីទេ ដូច្នេះបើវាជាផ្លូវកោងនោះ ខ្ញុំគិតថា ក្រុមបច្ចេកទេសនឹងដឹងពីរបៀបស្ថាបនា ឬរបៀបដាក់ស្លាកសញ្ញាហើយ”។ លោកបានថ្លែងថា សមាជិកសហគមន៍នឹងពិភាក្សាថាតើនឹងត្រូវបន្តជំរុញពីបុព្វហេតុរបស់ខ្លួនយ៉ាងដូចម្តេច ។
ខណៈពេលចុះទៅពិនិត្យមើលការដ្ឋានកាលពីព្រឹកម្សិលមិញ លោក ឃួង ស្រេង បាននិយាយការពារតម្រូវការសម្រាប់ផ្លូវនេះ ថាជាវិធានការចាំបាច់ក្នុងការដោះស្រាយបញ្ហាកកស្ទះ។
លោកបានថ្លែងទៅកាន់អ្នកយកព័ត៌មានថា “សូមក្រឡេកមើលទីក្រុងទៅមើល។ បើយើងមានផ្លូវផ្សេង វាអាចកាត់បន្ថយការកកស្ទះចរាចរណ៍បានច្រើន”។
វិវាទជុំវិញការស្ថាបនាផ្លូវនេះបណ្ដាលឱ្យមានការផ្ដន្ទាទោសពីបទបរិហារកេរ្តិ៍កាលពីខែសីហា លើលោក អះម៉ាត់ យ៉ះយ៉ា រដ្ឋលេខាធិការក្រសួងសង្គមកិច្ចដែលបានចោទប្រកាន់លោក អូស្មាន ហាស្សាន់ រដ្ឋលេខាធិការក្រសួងការងារថាបានទទួលផលប្រយោជន៍ពីការស្ថាបនាផ្លូវនេះ៕ សារុន