ប្រធាននាយកប្រតិបត្តិនៃធនាគារអេស៊ីលីដា បានដាក់ពាក្យប្តឹងពីបទបរិហារកេរ្តិ៍ទៅនគរបាលកាលពីថ្ងៃច័ន្ទ ចំពោះមន្ត្រីក្រសួងមហាផ្ទៃម្នាក់ ដែលបានចោទធនាគារនេះថាបានឃុបឃិតជាមួយភរិយារបស់អភិបាលខេត្ត ដោយបង្កើតឯកសារពន្ធយានយន្តក្លែងបន្លំ។
លោក អិុន ចាន់នី ប្រធានធនាគារដ៏ធំបំផុតរបស់ប្រទេសនេះជាយូរមកហើយ បានដាក់ពាក្យប្តឹង លោក ផែង វណ្ណៈ ទៅអគ្គស្នងការនគរបាលជាតិ ដោយស្នើសុំឲ្យមានវិធានការផ្លូវច្បាប់ចំពោះមន្ត្រីរដ្ឋាភិបាលរូបនេះ ពីបទបង្ខូចកេរ្តិ៍ឈ្មោះរបស់ធនាគារតាមរយៈការអធិប្បាយ “មិនពិត” ដែលបង្ហោះតាមហ្វេសប៊ុក។
ពាក្យបណ្តឹងដែលចុះហត្ថលេខាដោយលោក អិុន ចាន់នី និងចុះកាលបរិច្ឆេទថ្ងៃច័ន្ទ មានខ្លឹមសារថា “សូមចាត់វិធានការចំពោះជនដែលបានផ្សព្វផ្សាយព័ត៌មាននេះ”។
លោក វណ្ណៈ បានអះអាងថា ឯកសារមួយដែលចេញដោយធនាគារនេះបានបង្ហាញថា ភរិយារបស់លោក ឃឹម ប៊ុនសុង អភិបាលខេត្តសៀមរាប បានបង់ប្រាក់ពន្ធមិនត្រឹមត្រូវ។ ប័ណ្ណបង់ពន្ធរថយន្តចំនួនពីរសន្លឹកដែលជាប្រភេទរថយន្តដូចគ្នា ប៉ុន្តែតម្លៃបង់ពន្ធខុសគ្នា ដោយរថយន្តមួយជារបស់ភរិយាលោក ឃឹម ប៊ុនសុង អភិបាលខេត្តសៀមរាបបង់២០០.០០០រៀល ចំណែករថយន្តមួយទៀតដែលម្ចាស់ជាប្រជាពលរដ្ឋធម្មតាបង់៦០០.០០០រៀល។
លោក វណ្ណៈ ដែលវត្តមានហ្វេសប៊ុកបង្កហេតុរបស់លោក បាននាំឲ្យលោកត្រូវផ្តន្ទាទោសកាលពីខែមីនា ពីបទបរិហារកេរ្តិ៍សមាជិកព្រឹទ្ធសភាម្នាក់ ដោយសារការផ្សព្វផ្សាយព័ត៌មានរឿងស្នេហាលួចលាក់ បាននិយាយថា ធនាគារនេះមានសិទ្ធិចោទប្រកាន់លោកពីបទផ្សព្វផ្សាយព័ត៌មានមិនពិត ហើយថាតាំងពីពេលនោះមក លោកបានដឹងថា លោកបានធ្វើខុស។
លោកបាននិយាយថា “បើគេគិតថា អ្វីដែលខ្ញុំបាននិយាយ គឺមិនពិត ហើយប៉ះពាល់ពួកគេ គឺសមហេតុផលហើយដែលគេប្តឹង”។
“ខ្ញុំនឹងទទួលខុសត្រូវ និងផ្តល់ការបំភ្លឺ…។ ខ្ញុំនឹងសុំទោសពួកគេ ហើយបើគេនៅតែមិនទទួល ខ្ញុំអាចត្រូវពិន័យ”។
លោកបាននិយាយទៀតថា “ខ្ញុំថា ធនាគារបានឃុបឃិតជាមួយគេ អ៊ីចឹងនិយាយដោយទទួលខុសត្រូវនិងយុត្តិធម៌ទៅ គឺខ្ញុំខុសហើយ”។
លោក វណ្ណៈ បាននិយាយថា សម្តីភាន់ច្រឡំរបស់លោកបានកើតមានឡើងដោយសារតែការភាន់ច្រឡំក្នុងរបាយការណ៍មួយ ដែលធ្វើឡើងដោយមន្ទីរសាធារណការខេត្តសៀមរាប។
លោកបាននិយាយថា “នៅមានកំហុសជាមួយស្ថាប័នរដ្ឋនៅឡើយ…ពីព្រោះវាបានដាក់ចំណាត់ថ្នាក់រថយន្តដោយមិនត្រឹមត្រូវ”៕