ប៉ែន ឡុង នៅចាំបានពេលដែលលោកបានឃើញ “យន្តហោះ” នៅលើមេឃជាលើកដំបូង។
វាគឺនៅក្នុងឆ្នាំ១៩៩៣ ហើយលោកប៉ែន ឡុង ដែលមានអាយុ៦ឆ្នាំនៅពេលនោះបានរត់ក្នុងចម្ងាយរាប់គីឡូម៉ែត្រដើម្បីឲ្យបានទៅដល់កន្លែងចុះចតនៅក្នុងខេត្តស្វាយរៀង។ នៅពេលលោកបានរត់ទៅដល់ យន្តហោះនោះដែលតាមពិតគឺជាឧទ្ធម្ភាគចក្រ ហៀបនឹងហោះឡើងទៅហើយ។
លោកបាននិយាយកាលពីម្សិលមិញថា “ខ្ញុំស្រឡាញ់យន្តហោះតាំងពីខ្ញុំឃើញវាដំបូងម្លេ៉ះ” ។ប៉ុន្តែ គឺប្រព័ន្ធដំណើរមេកានិកដែលធ្វើឲ្យគាត់ចាប់ចិត្តដិតអារម្មណ៍តាំងពីដើមទីមក ហើយការចាប់ចិត្តដិតអារម្មណ៍លើយន្តហោះនេះហើយ ដែលធ្វើឲ្យគាត់ចាប់យកការងារកម្សាន្តខុសប្លែកពីគេ គឺគាត់កំពុងបង្កើតយន្តហោះដោយខ្លួនឯង។
វាប្រហែលជាយានដ៏តូចល្មមមួួយ ប៉ុន្តែវាដូចយន្តហោះអ៊ីចឹង។ វាមានបណ្តោយ៤,៣ម៉ែត្រ និងមានស្លាបប្រវែង៨ម៉ែត្រ។ វាមានកៅអីតែមួយប៉ុណ្ណោះសម្រាប់អ្នកបើកបរ។តួនិងស្លាបយន្តហោះសុទ្ធតែធ្វើពីដែកធុងសាំង។
លោក ប៉ែន ឡុង បានលើកឡើងថា ប្រសិនបើអ្វីៗទាំងអស់នេះដំណើរការទៅមុខតាមការគ្រោងទុកមែន លោកអាចនឹងហោះហើរវាសាកល្បងជាលើកដំបូងនៅខែមេសា។
ប៉ុន្តែ វាគឺជាផ្លូវដ៏វែងឆ្ងាយសម្រាប់បុរសអាយុ៣០ឆ្នាំរូបនេះដែលប្រកបរបរចិញ្ចឹមជីវិតដោយធ្វើជាជាងមេកានិករថយន្តនៅ ក្នុងភូមិព្រៃឈរ ស្រុកកំពង់ត្របែក ខេត្តព្រៃវែង។ លោក ប៉ែន ឡុង បាននិយាយថា “បន្ទាប់ពីខ្ញុំធ្វើយន្តហោះនេះបានប្រហែល ២០ភាគរយ ខ្ញុំស្ទើរតែបោះបង់ចោលទៅហើយ”។ លោកបានបន្ថែមថា ដោយសារធនធានមានកំណត់ ការស្វែងរកសម្ភារ និងព័ត៌មានពាក់ព័ន្ធបច្ចេកវិទ្យាដើម្បីធ្វើឲ្យវាក្លាយជាទៅជាយន្តហោះនោះ មិនមែនជារឿងងាយស្រួលនោះទេ ប៉ុន្តែ លោកនៅតែបន្តទៅមុខ។
មានពេលមួយ គាត់បានជួបការលំបាកយ៉ាងខ្លាំងពាក់ព័ន្ធបញ្ហាបច្ចេកទេសដែលធ្វើឲ្យគាត់មិនអាចជម្នះទៅមុខបានឡើយបើរកមិនបានគ្រឿងមេកានិកសំខាន់ៗ។ ប៉ុន្តែ គាត់បានលើកឡើងថា គាត់បានរកឃើញ វានៅកន្លែងដែលគេទុកយន្តហោះចោលតាមបណ្តោយផ្លូវជាតិលេខ៣។
ដោយរៀបការរួចហើយនិងមានកូនពីរនាក់នោះ លោក ប៉ែន ឡុង បានជួបការលំបាកយ៉ាងខ្លាំងក្នុងការការស្វែងរកប្រាក់សម្រាប់គម្រោងនេះ។ តែទោះជាយ៉ាងណារហូតមកទល់ពេលនេះ គាត់អាចរកប្រាក់បានពាក់កណ្តាលហើយនៃប្រាក់ដែលត្រូវការចំនួន១០.០០០ដុល្លារ។
គម្រោងរបស់លោក ប៉ែន ឡុង នេះបានធ្វើឲ្យប្រជាពលរដ្ឋមួយចំនួននៅក្នុងភូមិរបស់លោកព្រួយបារម្ភយ៉ាងខ្លាំង ដោយចាប់ផ្តើមចេញពីប្រពន្ធរបស់គាត់ គឺអ្នកស្រី ហីុង មួយហេង តែម្តង។ ទោះជាយ៉ាងណា ការព្រួយបារម្ភរបស់ប្រពន្ធគាត់មិនមែនរឿងពេលវេលា ឬរឿងប្រាក់ដែលប្តីរបស់គាត់បានចំណាយនោះឡើយ ប៉ុន្តែ គឺរឿងសុវត្ថិភាពរបស់គាត់ផ្ទាល់តែម្តង ពេលលោកទីបំផុតព្យាយាមបើកសាកល្បងយន្តហោះនេះជាលើកដំបូង។
អ្នកស្រីបាននិយាយថា “ខ្ញុំបានសុំឲ្យប្តីរបស់ខ្ញុំបញ្ឈប់ជាច្រើនលើកមកហើយ ប៉ុន្តែ គាត់ចង់បង្ហាញថា គាត់ពិតជាអាចធ្វើបាន។ ឥឡូវនេះខ្ញុំជឿជាក់លើគម្រោងរបស់គាត់”។
អ្នកជិតខាងរបស់លោក ប៉ែន ឡុង គឺអ្នកស្រី លឹម សេង ដំបូងឡើយមិនជឿថា យន្តហោះរបស់បុរសរូបនេះអាចហោះហើរបាននោះឡើយ។ អ្នកស្រី លឹម សេង បាននិយាយថា “ខ្ញុំសួរគាត់ថា តើវាអាចហោះហើរបានមែនអត់ ហើយគាត់បានប្រាប់ខ្ញុំថា ប្រសិនបើមានការអត់ធ្មត់ រាល់គម្រោងនឹងមានដំណើរការទៅមុខ ហើយគាត់ជឿជាក់ថា វានឹងដំណើរការទៅមុខ”។ អ្នកស្រីបានបន្ថែមថា “ឥឡូវវាជិតជោគជ័យហើយ ហើយវាប្រហែលហោះហើរបានល្អ”។
លោក សេក ឃាង មេឃុំព្រៃឈរគាំទ្រគម្រោងរបស់លោក ប៉ែន ឡុង ដោយលើកឡើងថា មានមនុស្សម្នាក់មកពីឃុំរបស់លោកព្យាយាមធ្វើអ្វីដែលថ្មី ហើយប្លែកសមនឹងទទួលបានការគាំទ្រ។ លោកបានមានប្រសាសន៍ ថា “ខ្ញុំមិនដឹងថា តើយន្តហោះនេះអាចហោះបាន ឬមិនបាននោះទេ ប៉ុន្តែ យើងត្រូវរង់ចាំមើលសិន”។
កាលពីប៉ុន្មានសប្តាហ៍កន្លងមកនេះ គម្រោងរបស់លោក បែ៉ន ឡុង ត្រូវបានផ្សព្វផ្សាយចែករំលែកពាសពេញបណ្តាញទំនាក់ទំនងសង្គម ហើយលោក ជា សុមេធី អភិបាលខេត្តព្រៃវែងក៏បានចុះទៅជួបគាត់ដែរកាលពីរសៀលម្សិលមិញ។
ទោះជាយ៉ាងណា មានការផ្តែផ្តាំឲ្យប្រុងប្រយ័ត្នកាលពីម្សិលមិញ ពីលោក កែវ សីុវនអ្នកនាំពាក្យអាកាសចរណ៍សីុវិល។ លោកបានលើកឡើងថា ទោះបីវាជាគម្រោងដ៏អស្ចារ្យដែលគួរត្រូវបានលើកទឹកចិត្តក៏ដោយ តែលោក បែ៉ន ឡុង គួរតែឲ្យអ្នកជំនាញបច្ចេកទេសពិនិត្យ ជាមុនសិនមុនពេលព្យាយាមហោះហើរជាលើកដំបូងដើម្បីសុវត្ថិភាពផ្ទាល់ខ្លួនរបស់លោក។ លោកបានបន្ថែមថា ហើយដោយសារតែក្នុងករណីនេះ លោក ប៉ែន ឡុង មិនគួរព្យាយាមហោះហើរជិតយន្តហោះផ្សេងៗទៀតនោះឡើយនៅថ្ងៃសាកល្បង៕ ស៊ុយឈាង