31 C
Phnom Penh

ភ្លើង​​​ឆេះ​​​ដ៏​​​អាថ៌កំបាំងបំផ្លាញ​​​ឈើ​​​​រាប់រយម៉ែត្រ​​គូប​​​​ក្នុង​​​ខេត​​​្ត​​​មណ្ឌល​​​គិរី

ដោយ ឌឹ ខេមបូឌា ដេលី

បទវិភាគ

ក្រុមមន្ត្រីរដ្ឋាភិបាលនិយាយថា ពួកគេកំពុងស៊ើបអង្កេតរកមូលហេតុករណីភ្លើងឆេះពីរដាច់ដោយឡែកពីគ្នាកាលពីចុងសប្ដាហ៍ក្នុងខេត្តមណ្ឌលគិរី ដែលតាមព័ត៌មានថាបានឆេះបំផ្លាញឈើដ៏មានតម្លៃរាប់រយដុំ ដែលរដ្ឋាភិបាលបានលក់ទៅឱ្យពាណិជ្ជករម្នាក់បន្ទាប់ពីបានរឹបអូសឈើទាំងនេះនៅលើចម្ការកៅស៊ូចំនួនពីរ។

យោងតាមលោក សាក់ សារ៉ាង មេបញ្ជាការកងរាជអាវុធហត្ថខេត្តបានឱ្យដឹងថា ករណីភ្លើងឆេះទាំងពីរបានកើតឡើងកាលពីថ្ងៃសុក្រ ហើយភ្លើងបានរលត់ទៅវិញកាលពីថ្ងៃអាទិត្យដែលបានឆេះបំផ្លាញឈើប្រហែល៣០០ដុំនៅក្រុមហ៊ុនចម្ការកៅស៊ូដៃថាញ់ (Dai Thanh) ហើយឈើ២០០ដុំទៀតនៅលើដីដែលជាអតីតចម្ការកៅស៊ូខ្មែរអង្គរ។

ឧប្បត្តិហេតុនេះឆ្លុះបញ្ចាំងឱ្យឃើញពីករណីភ្លើងឆេះជាច្រើនទៀតដែលតាមព័ត៌មានថា បំផ្លាញឈើដែលរឹបអូសបានរាប់រយដុំនៅលើចម្ការកៅស៊ូមួយចំនួនទៀតកាលពីឆ្នាំមុន ក្នុងរយៈពេលតែប៉ុន្មានខែប៉ុណ្ណោះបន្ទាប់ពីរដ្ឋាភិបាលបានបង្កើតក្រុមការងារពិសេសដើម្បីបង្ក្រាបការកាប់ឈើខុសច្បាប់ និងការស្តុកឈើនៅក្នុងប្រទេសកម្ពុជាភាគឦសាន។

ទាក់ទិននឹងករណីទាំងនេះ លោក សាក់ សារ៉ាង មានប្រសាសន៍កាលពីម្សិលមិញថា ករណីភ្លើងឆេះថ្មីបំផុតនេះបានឈានដល់ឆេះឈើក្នុងព្រៃនៅជុំវិញនេះ ហើយថា អាជ្ញាធរមិនទាន់ដឹងថាតើករណីភ្លើងឆេះនេះកើតឡើងដោយចៃដន្យ ឬដោយចេតនានោះឡើយ។

cam-photo-woodឈើទាំងនេះស្ថិតក្នុងចំណោមឈើគ្មានអាជ្ញាប័ណ្ណចំនួន១២.៤៨៦ម៉ែត្រគូបដែលក្រុមការងារពិសេសបានរឹបអូសនៅលើដីចម្ការកៅស៊ូរបស់ក្រុមហ៊ុនដៃថាញ់ និងឈើគ្មានអាជ្ញាប័ណ្ណចំនួន១២.៨៣៣ម៉ែត្រគូបទៀតដែលរឹបអូសបាននៅលើដីអតីតចម្ការកៅស៊ូខ្មែរអង្គរ ដែលស្ថិតនៅចម្ងាយរាប់គីឡូម៉ែត្រឯណោះ។

រដ្ឋាភិបាលមិនបានដាក់ពាក្យបណ្ដឹងប្ដឹងក្រុមហ៊ុនណាមួយឡើយ ហើយបានលក់ឈើនេះកាលពីចុងឆ្នាំមុនទៅឱ្យលោក អុឹង ស៊ីតាតវីឡា ម្ចាស់ក្រុមហ៊ុន V. Energy Logistics ក្នុងតម្លៃរាប់លានដុល្លារ។

លោក សាក់ សារ៉ាង បានមានប្រសាសន៍ថា រដ្ឋាភិបាលមិនទទួលខុសត្រូវចំពោះការខាតបង់របស់គាត់ឡើយ។

លោកបានមានប្រសាសន៍ថា ”អាជ្ញាធររបស់យើងមិនទទួលខុសត្រូវចំពោះឈើដែលត្រូវបានឆេះបំផ្លាញនោះឡើយ។ ក្រុមហ៊ុនជាអ្នកទទួលខុសត្រូវ ពីព្រោះក្រុមហ៊ុនមានការធ្វេសប្រហែសក្នុងការការពារទ្រព្យសម្បត្តិរបស់ខ្លួន”។ លោក អឹុង ស៊ីតាតវីឡា មិនបានឆ្លើយតបចំពោះសំណើសុំអត្ថាធិប្បាយឡើយ។

លោក អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេសដែលទទួលបន្ទុកក្រុមការងារពិសេសមានប្រសាសន៍ថា  ករណីភ្លើងឆេះនេះបានបំផ្លាញឈើមួយចំនួនដែលរឹបអូសបាននៅលើចម្ការកៅស៊ូនីមួយៗផងដែរ ហើយថា ពេលនេះឡានទឹកនៅប្រចាំការនៅទីនោះក្នុងករណីមានភ្លើងឆេះបន្ថែមទៀត។

លោកបានមានប្រសាសន៍ថា មូលហេតុភ្លើងឆេះទាំងនេះកំពុងស្ថិតក្រោមការស៊ើបអង្កេត។ នៅពេលសួរអំពីការស៊ើបអង្កេតដែលបានធ្វើឡើងទាក់ទិនករណីភ្លើងឆេះដូចគ្នានេះកាលពីឆ្នាំមុន អ្នកនាំពាក្យរូបនេះបានមានប្រសាសន៍ថា លោកមិនបានដឹងពីលទ្ធផលណាមួយឡើយ។

រដ្ឋាភិបាលអះអាងថា ក្រុមការងារពិសេសបានទប់ស្កាត់ក្រុមជួញដូរឈើប្រកបដោយប្រសិទ្ធភាពនៅក្នុងខេត្តភាគឦសាន។ ប៉ុន្តែមន្ត្រីសិទ្ធិមនុស្ស ក្រុមសហគមន៍ និងអ្នកអភិរក្សនៅក្នុងតំបន់ច្រានចោលការអះអាងនេះ ដោយលើកឡើងថា ការជួញដូរឈើបានថយចុះបន្តិចបន្តួចប៉ុណ្ណោះ នៅដដែល ឬកើនឡើង៕ សារុន

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស