35 C
Phnom Penh

អ្នក​​​បើក​​​រថយន្ត​​​បុក​​​រះ​​​​បណ្ដាល​ឱ្យ​មនុស្ស​​​ស្លាប់​​​ស្ថិត​​​ក្នុង​​​ស្ថាន​​​ភាព​​​ធ្ងន់​​​ធ្ងរ

ដោយ ឌឹ ខេមបូឌា ដេលី

បទវិភាគ

អ្នកបើកបរម្នាក់ដែលបានបើករថយន្តបុកមនុស្សបីនាក់ស្លាប់កាលពីថ្ងៃច័ន្ទដោយបុករះអ្នកជិះម៉ូតូបន្ទាប់ពីព្យាយាមបើកគេចពីហេតុការណ៍បុកមួយផ្សេងទៀតនោះ ស្ថិតក្នុងស្ថានភាពធ្ងន់ធ្ងរខ្លាំងកាលពីម្សិលមិញ ក្រោយពីត្រូវមហាជនព្រួតវាយ ចំណែកជនរងគ្រោះផ្សេងទៀតបានធូរស្រាលបន្ទាប់ពីបញ្ជូនទៅព្យាបាលនៅមន្ទីរពេទ្យពីរក្នុងរាជធានីភ្នំពេញ។

ស្ត្រីពីរនាក់ និងបុរសម្នាក់បានស្លាប់ភ្លាមៗបន្ទាប់ពីអ្នកបើករថយន្តរូបនេះ ដែលបានបើកគេចពីគ្រោះថ្នាក់ចរាចរណ៍មួយផ្សេងទៀតហើយបានបុករះបណ្ដាលឱ្យសាកសពមនុស្សហោះប៉ើងនៅលើមហាវិថីព្រះមុនីវង្ស ខណៈបើកបញ្ច្រាសទិស។ មហាជនជាច្រើនានទាញជននេះចេញពីក្នុងរថយន្ត ហើយវាយស្ទើរស្លាប់។

ដោយដេកលើគ្រែក្នុងបន្ទប់សង្គ្រោះបន្ទាន់នៅមន្ទីរពេទ្យមិត្តភាពខ្មែរ-សូវៀត កាលពីម្សិលមិញ អ្នកបើកបររូបនេះដែលនគរបាល និងបុគ្គលិកមន្ទីរពេទ្យប្រាប់ថា ឈ្មោះ មាស សុខហេង អាយុ៣០ឆ្នាំ ជាអ្នកលក់ទូរស័ព្ទរស់នៅក្នុងខណ្ឌមានជ័យនោះ ស្ថិតក្នុង “ស្ថានភាពធ្ងន់ធ្ងរខ្លាំង” ក្រោយពីត្រូវមហាជនព្រួតវាយយ៉ាងដំណំ។

មាស សុខហេង ដែលកាលពីថ្ងៃច័ន្ទនគរបាលប្រាប់ខុសថាឈ្មោះ ណៃ ប៊ុនថន នោះស្ទើរតែមិនកម្រើកសោះ រីឯផ្ទៃមុខមានស្នាមជាំ ហើយឡើងហើមស្ទើរមើលមិនឃើញភ្នែក។

លោក ឆឹង យ៉ាវយ៉េន អនុប្រធានមន្ទីរពេទ្យនេះបានមានប្រសាសន៍ថា “ជននេះរងរបួសស្ទើរសព្វកន្លែង រួមទាំងក្បាល និងដងខ្លួនផង ហើយស្ថិតក្នុងស្ថានភាពធ្ងន់ធ្ងរខ្លាំង”។

ទិដ្ឋភាពគួរឱ្យរន្ធត់តក់ស្លុតក្រោយរថយន្តកាមរីឆ្លាមបើកបុករះម៉ូតូជាជួរលើកំណាត់មហាវិថីព្រះមុនីវង្ស នៅម៉ោងប្រហែល៦ល្ងាចម្សិលមិញ បណ្ដាលឱ្យមនុស្សបីនាក់ស្លាប់ និងជាច្រើននាក់ទៀតរងរបួស។ រូបថតៈ ស៊ីវ ចាន់ណា/ឌឹ ខេមបូឌា ដេលី
ទិដ្ឋភាពគួរឱ្យរន្ធត់តក់ស្លុតក្រោយរថយន្តកាមរីឆ្លាមបើកបុករះម៉ូតូជាជួរលើកំណាត់មហាវិថីព្រះមុនីវង្ស នៅម៉ោងប្រហែល៦ល្ងាចម្សិលមិញ បណ្ដាលឱ្យមនុស្សបីនាក់ស្លាប់ និងជាច្រើននាក់ទៀតរងរបួស។ រូបថតៈ ស៊ីវ ចាន់ណា/ឌឹ ខេមបូឌា ដេលី

ស្ថិតនៅចម្ងាយតែប៉ុន្មានម៉ែត្រប៉ុណ្ណោះពី មាស សុខហេង នៅក្នុងរបៀងដ៏ចង្អៀតមួយនៃបន្ទប់សង្គ្រោះបន្ទាន់ ប៉ាល់ សំបូរ អាយុ១៧ឆ្នាំដែលរងរបួសក្បាលធ្ងន់ធ្ងរនៅពេលត្រូវបានបុករះពេលធ្វើដំណើរទៅរៀនភាសាអង់គ្លេសនៅសាកលវិទ្យាល័យបញ្ញាសាស្ត្រ នោះ ស្ថិតក្នុងសភាពសន្លប់នៅឡើយ។

អ្នកស្រី ចាន់ ថាវី អាយុ៤៩ឆ្នាំ ជាម្ដាយរបស់យុវជននេះបាននិយាយថា  កូនប្រុសរបស់គាត់មានឈាមកកក្នុងខួរក្បាល ហើយស្ថិតក្នុងស្ថានភាពធ្ងន់ធ្ងរ។ អ្នកស្រីបាននិយាយថា  ”កូនប្រុសរបស់គាត់មិនទាន់ដឹងខ្លួននៅឡើយទេ ហើយគ្រូពេទ្យប្រាប់ថាមិនដឹងថាស្ថិតក្នុងសភាពបែបនេះប៉ុន្មានថ្ងៃទៀតឡើយ។ ខ្ញុំមិនដឹងថា ត្រូវនិយាយដូចម្ដេចឡើយ។ ខ្ញុំគ្រាន់តែចង់ឃើញកូនប្រុសរបស់ខ្ញុំធូរស្រាលតែប៉ុណ្ណោះ”។

មនុស្សបីនាក់ដែលបានរងរបួសនៅក្នុងហេតុការណ៍បុករះនោះ បានធូរស្រាលបន្តិចហើយក្នុងមន្ទីរពេទ្យកាល់ម៉ែតកាលពីម្សិលមិញ រួមមាន ជឹម រស្មី អាយុ១៦ឆ្នាំ ដែលរបួសត្រង់ក្បាល  និងជើងនៅក្នុងហេតុការណ៍នោះ។

យុវជនរូបនេះបាននិយាយថា “មានមនុស្សច្រើនណាស់នៅពេលនោះ ហើយចង្អៀតទៀត ដូច្នេះហើយយើងមិនដឹងថាត្រូវគេចដូចម្ដេចឡើយ។ អ្នកបើកបររថយន្តបានបុកម៉ូតូពីរបីគ្រឿងមុនពេលមកបុកម៉ូតូរបស់ខ្ញុំ”។ យុវជនរូបនេះបានបន្ថែមថា “វាសាហាវខ្លាំងណាស់។ ខ្ញុំមិនដែលឃើញហេតុការណ៍ដូចនេះទេ។ អ្នកបើករថយន្តបង្កគ្រោះថ្នាក់បើក បញ្ច្រាសទិសតែម្តង”។

លោក ទិន វណ្ណស៊ី ប្រធានផ្នែកវាស់វែងគ្រោះថ្នាក់ចរាចរណ៍បានប្រាប់អត្តសញ្ញាណអ្នកស្លាប់ថា ឈ្មោះ វ៉ង សុខណាក់ អាយុ៣៥ឆ្នាំ មកពីខេត្តកំពង់ចាម ដែលបានឌុបប្រពន្ធរបស់ខ្លួន ឈ្មោះ សេង អាន អាយុ២៥ឆ្នាំ និងក្មួយស្រីឈ្មោះ ណា ស្រីនីន អាយុ២៣ឆ្នាំ ដែលបានស្នាក់នៅក្នុងខណ្ឌចំការមន រាជធានីភ្នំពេញ។

បើទោះជា មាស សុខហេង គ្មានសង្ឃឹមធូរស្រាលពីមុខរបួសក៏ដោយ ក៏លោក ទិន វណ្ណស៊ី បានថ្លែងថា នគរបាលនៅតែមានគម្រោងដាក់ពាក្យបណ្ដឹងប្ដឹងជននេះទៅសាលាដំបូងរាជធានីភ្នំពេញដដែល។

លោកបានមានប្រសាសន៍ថា “មហាជនបានវាយត្រង់ក្បាលយ៉ាងដំណំបណ្ដាលឱ្យឈាមហូរចូលខួរក្បាល។មានសង្ឃឹមតិចណាស់ដែលគាត់នឹងធូរស្រាលនោះ”។

លោក ទិន វណ្ណស៊ី បានមានប្រសាសន៍ថា “បើទោះជាជននេះស្ថិតក្នុងស្ថានភាពធ្ងន់ធ្ងរក៏ដោយ ក៏ត្រូវប្រឈមវិធានការផ្លូវច្បាប់ដែរ។ យើងកំពុងរៀបចំសំណុំរឿងបញ្ជូនទៅតុលាការដើម្បីចាត់វិធានការតាមផ្លូវច្បាប់”៕ សារុន

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស