អ្នករកស៊ីទិញលក់ម៉ូតូពីរនាក់ត្រូវបានសម្លាប់កាលពីម្សិលមិញក្នុងខេត្តបាត់ដំបងក្នុងអ្វីដែលនគរបាលសនិ្ឋដ្ឋានថាជាការ “ពួនស្ទាក់ប្លន់” អំឡុងអំពើប្លន់ប្រដាប់អាវុធ។
យោងតាមគេហទំព័រនគរបាលជាតិបានឱ្យដឹងថា លោក ហួត ឈឿង អាយុ៤៥ឆ្នាំ និងបុរសម្នាក់ទៀតដែលប្រាប់អត្តសញ្ញាណត្រឹមតែថា ឈ្មោះ រិត អាយុ៣៥ឆ្នាំ បានដើររកទិញម៉ូតូដោយធ្វើដំណើរតាមផ្លូវលំមួយក្នុងឃុំខ្នាចរមាស ស្រុកបវេល ស្រាប់តែពេលនោះ អ្នកភូមិបានឮស្នូរកាំភ្លើងនៅម៉ោងប្រហែលជា៧ព្រឹក។
គេហទំព័រនេះបន្តថា លោក ហួត ឈឿងត្រូវបានបាញ់មួយគ្រាប់ចំដងខ្លួន រីឯឈ្មោះរិត នៅឃុំគោកឃ្មុំ ស្រុកថ្មគោល ត្រូវបានកាប់មួយពូថៅចំក្បាលផ្នែកខាងក្រោយ។
លោក ជេត វណ្ណី ស្នងការរងនគរបាលខេត្តបានមានប្រសាសន៍ថា នគរបាលកំពុងស្វែងរកជនសង្ស័យម្នាក់ ដែលគេបានស្គាល់អត្តសញ្ញាណហើយ ប៉ុន្តែលោកបានបដិសេធមិនផ្តល់ព័ត៌មានលម្អិតបន្ថែមឡើយ។
លោក ម៉ី គឹមសាន អធិការរងនគរបាលស្រុកបានចាត់ទុកអំពើមនុស្សឃាតនេះថា ជាការគិតទុកជាមុន ហើយបានថ្លែងថា ម៉ូតូមួយគ្រឿងជារបស់បុរសម្នាក់ក្នុងចំណោមបុរសទាំងពីរនាក់ដែលស្លាប់នោះ ត្រូវបានប្លន់យក។ លោក ម៉ី គឹមសាន បានបន្ត ថា “យើងបានចុះទៅសិក្សានៅកន្លែងកើតហេតុឃើញថា វាហាក់ដូជាមានការពួនស្ទាក់ប្លន់”។
លោកបានថ្លែងថា នគរបាលសង្ស័យថា ជនរងគ្រោះត្រូវបានទូរស័ព្ទទាក់ទង ហើយបញ្ចុះបញ្ចូលឱ្យមកកាន់កន្លែងនោះ “ព្រោះជនរងគ្រោះទាំងពីរនាក់មានមុខរបរជាអ្នករកស៊ីទិញលក់ម៉ូតូ”៕សារុន