កម្ពុជានិងចិនបានចាប់ផ្តើមធ្វើសមយុទ្ធយោធារួមគ្នាមួយដែលមានឈ្មោះថានាគមាសក្នុងខេត្តកំពង់ស្ពឺកាលពីថ្ងៃសៅរ៍។
សមយុទ្ធយោធារួមគ្នានេះផ្តោតសំខាន់ទៅលើការប្រឆាំងអំពើភេរវកម្ម និងប្រតិបត្តិការមនុស្សធម៌។
សមយុទ្ធយោធានេះបានបង្ហាញនូវការរឹតបន្តឹងចំណងមេត្រីភាពរវាងកម្ពុជានិងចិនបន្ថែម ខណៈដែលទំនាក់ទំនងកម្ពុជានិងអាមេរិកបានធ្លាក់ចុះខ្លាំងដោយសារលោកហ៊ុន សែន បានបំផ្លាញលទ្ធិប្រជាធិបតេយ្យនៅកម្ពុជា។
អគ្គមេបញ្ជាការយោធាកម្ពុជាប៉ុល សារឿននិង មេបញ្ជាការយោធាចិន លោកចាំងជៀន(Zhang Jian) បានបើកកម្មវិធីសមយុទ្ធយោធាដែលមានឈ្មោះនាគមាសឆ្នាំ ២០១៨ដែលមានយោធាខ្មែរចំនួន ២៨០ និងយោធាចិនចំនួន ២១៦នាក់ចូលរួម។
សមយុទ្ធយោធានេះ គឺដើម្បីរំលឹកខួប៦០ឆ្នាំនៃទំនាក់ទំនងការទូត និងនយោបាយរវាងប្រទេសទាំងពីរ។
ទីភ្នាក់ងារព័ត៌មាន(Reuters)ដកស្រង់សំដីរបស់លោកប៉ុល សារឿន ចុះផ្សាយថាកម្ពុជាបានទទួលផលប្រយោជន៍ជាច្រើនពីប្រទេសចិន។
លោកបន្តថាពាណិជ្ជកម្មនិងទេសចរណ៍ចិនកំពុងនាំមុខគេនៅកម្ពុជា ដែលនាំឲ្យកម្ពុជាមានការអភិវឌ្ឍន៍ទៅមុខ។
កម្ពុជានិងចិនបានធ្វើសមយុទ្ធយោធាជាលើកដំបូងកាលពីឆ្នាំ ២០១៦។
មួយឆ្នាំក្រោយមកកម្ពុជាបានសម្រេចផ្អាកសមយុទ្ធយោធាជាមួយសហរដ្ឋអាមេរិក ដោយយកលេសថាកម្ពុជាកំពុងជាប់រវល់ការពារបោះឆ្នោត។
ជាការឆ្លើយតបសហរដ្ឋអាមេរិកកាលពីដើមឆ្នាំ ២០១៨ បានសម្រេចផ្អាកជំនួយយោធា និងសេដ្ឋកិច្ចទាំងស្រុងដល់កម្ពុជាដោយសាររដ្ឋាភិបាលរបស់លោកហ៊ុន សែនបានចាប់មេដឹកនាំបក្សសង្គ្រោះជាតិ និងរំលាយគណបក្សប្រឆាំងជាដើម៕