ក្រុមព្រះរាជអាជ្ញាសាលាដំបូងរាជធានីភ្នំពេញ កាលពីម្សិលម៉ិញបានដឹកនាំកម្លាំងចម្រុះចុះអនុវត្តសាលដីកាដែលបង្ខំឱ្យកាសែតភ្នំពេញប៉ុស្តិ៍សងប្រាក់២៦ម៉ឺនដុល្លារអាមេរិកឲ្យទៅ លោក Chris Dawe អតីតអគ្គនាយកនៃកាសែតនេះ ពាក់ព័ន្ធនឹងករណីវិវាទការងារកាលពីពេលកន្លងទៅ។
ទោះជាយ៉ាងណាក៏ដោយក្រោយពីមានការចរចារួចតុលាការបានសំរេចទុកពេលឱ្យកាសែតភ្នំពេញប៉ុស្តិ៍មានរយៈពេល ២០ថ្ងៃដើម្បីទូទាត់សងប្រាក់ទាំងនេះទៅអោយលោក Chris Dawe ជាកំហិត។
អ្នកនាំពាក្យសាលាដំបូងរាជធានីភ្នំពេញលោកលី សុផាណាបានប្រាប់ក្រុមអ្នកសាព័ត៌មានកាលពីម្សិលម៉ិញថាសាលដីការបស់តុលាការនៅពេលនេះគឺជាករណីវិវាទផ្ទៃក្នុងរបស់កាសែតភ្នំពេញប៉ុស្តិ៍ប៉ុណ្ណោះ។
ការអនុវត្តសាលដីកានេះបានធ្វើឡើងបន្ទាប់ពីសាលាឧទ្ធរណ៍ បន្តសម្រេចឲ្យលោក Chris Dawe ឈ្នះក្ដីក្នុងសំណុំរឿងវិវាទការងារនៅកាសែតភ្នំពេញប៉ុស្តិ៍។
លោក Chris Dawe ធ្លាប់បម្រើការងារនៅកាសែតភ្នំពេញប៉ុស្តិ៍តាំងពីឆ្នាំ២០១២មកម្លេះមានតួនាទីជាអគ្គនាយកនៃកាសែតនេះ ប៉ុន្តែលោកត្រូវបានបណ្តេញចេញនៅក្នុងឆ្នាំ២០១៥។
កាលពីពេលថ្មីៗកាសែតភ្នំពេញប៉ុស្តិ៍ក៏ត្រូវអគ្គនាយកដ្ឋានពន្ធដា របស់លោកហ៊ុន សែន ធ្វើទុកបុកម្នេញករណីជំពាក់ពន្ធរដ្ឋជិត៤លានដុល្លារអាមេរិកផងដែរ។
ប៉ុន្តែថ្នាក់ដឹកនាំនៃកាសែតមួយនេះអះអាងថា កាសែតរបស់ខ្លួនមិនបានប្រឈមនឹងការបិទផ្សាយនោះទេ៕