គណៈកម្មាធិការជាតិរៀបចំការបោះឆ្នោត (គ.ជ.ប.) កាលពីម្សិលមិញបាន ព្រមានចាត់វិធានការតាមផ្លូវច្បាប់ចំពោះបុគ្គលណាដែលហ៊ានអំពាវនាវឲ្យពលរដ្ឋបោះបង់ការចូលរួមបោះឆ្នោត និងការអំពាវនាវមិនឱ្យអ្នកសង្កេតការណ៍ជាតិអន្តរជាតិចូលរួមសង្កេតការណ៍បោះឆ្នោតជាតិនាខែកក្កដា ខាងមុខ ។
គ.ជ.ប. ចាត់ទុកការអំពាវនាវទាំងនេះថា ជារឿងខុសច្បាប់ និងស្នើឱ្យបញ្ឈប់សកម្មភាពនេះជាបន្ទាន់។
គ.ជ.ប.អះអាងថា ដំណើរការរៀបចំការបោះឆ្នោតជាតិនាពេលខាងមុខនេះនឹង កំពុងដំណើរការយ៉ាងរលូនស្របតាមគោលការណ៍ច្បាប់ និងរដ្ឋធម្មនុញ្ញរបស់ប្រទេស។
ប្រតិកម្មរបស់គ.ជ.ប.ពេលនេះ ធ្វើឡើងក្រោយពីអតីតមេដឹកនាំបក្សប្រឆាំងលោក សម រង្ស៊ី អំពាវនាវឱ្យពលរដ្ឋខ្មែរកុំទៅបោះឆ្នោត ប្រសិនបើគ្មានការចូលរួមពីគណបក្សសង្គ្រោះជាតិ។
កាលពីសប្តាហ៍កន្លងទៅ នេះប្រធានអង្គការឃ្លាំមើលការបោះឆ្នោត ខុមហ្រ្វែល (COMFREL) លោក គល់ បញ្ញា បានជំរុញឲ្យ អ្នកសង្កេតការណ៍អន្តរជាតិ គប្បីពិចារណាឲ្យបានហ្មត់ចត់ជាងពេលណាៗទាំងអស់ មុននឹងឆ្លើយតបទៅនឹងការប្រកាសរកអ្នកសង្កេតការណ៍អន្តរជាតិឲ្យចូលរួមសង្កេតការណ៍បោះឆ្នោតជាតិនាខែកក្កដាខាងមុខ។
ទោះបីជាគ.ជ.ប. ប្រកាស ថា ដំណើរការបោះឆ្នោត ជាតិកំពុងប្រព្រឹត្តទៅដោយរលូនយ៉ាងណា ក្តី ប៉ុន្តែលទ្ធផលនៃការបោះឆ្នោតនាខែកក្កដាខាងមុខអាចនឹងគ្មានការទទួល ស្គាល់ពីសហគមន៍អន្តរជាតិ។
រហូតមកទល់ពេលនេះ សហគមន៍អឺរ៉ុប និងសហរដ្ឋអាមេរិកកំពុង ត្រៀមខ្លួនជាស្រេចក្នុងការដាក់ទណ្ឌកម្មសេដ្ឋកិច្ចដល់រដ្ឋាភិបាលលោក ហ៊ុន សែន ប្រសិនការបោះឆ្នោតជាតិនាពេលខាងមុខ ធ្វើឡើងដោយគ្មានគណបក្សសង្គ្រោះជាតិ៕