លោក ឈើយ ឧត្តមរស្មី កូនប្រុសច្បងរបស់លោក ឈុត វុទ្ធី សកម្មជនការពារធនធានធម្មជាតិ នឹងធ្វើពិធីរំឭកខួបរំឭកវិញ្ញាណក្ខន្ធ គម្រប់៦ឆ្នាំនៃមរណភាពឪពុករបស់លោកដែលត្រូវបានឃាតករដៃឆៅ បាញ់សម្លាប់ទាំងកណ្តាលថ្ងៃត្រង់ក្នុងខេត្តកោះកុង កាលពីឆ្នាំ២០១២។
លោក ឈើយ ឧត្តមរស្មី អះអាងថា នៅទីក្រុងស្តុកតុន រដ្ឋកាលីហ្វ័រញ៉ា នៅថ្ងៃទី២៩ ខាងមុខ នឹងមានពលរដ្ឋខ្មែរជាច្រើននាំគ្នាធ្វើពិធីរំឭកវិញ្ញាណក្ខន្ធមរណភាពឳពុករបស់លោក។
កូនប្រុសរបស់សកម្មជនការពារបរិស្ថានរូបនេះ អះអាងថា ក្នុងរយៈពេល៦ឆ្នាំមកនេះ ក្រុមគ្រួសាររបស់លោកនៅមិនទាន់ទទួលបានយុត្តិធម៌ ពីអំពើ ឧក្រិដ្ឋកម្មខ្នាតធំមួយនេះនៅឡើយ។
លោក ឈុត វុទ្ធី ត្រូវបានឃាតករបាញ់សម្លាប់កាលពីថ្ងៃទី២៦ ខែមេសា ឆ្នាំ២០១២ ក្នុងស្រុកមណ្ឌលសីមា នៅចន្លោះខេត្តកោះកុង និងពោធិសាត់។
ឃាតកម្មនេះកើតឡើង ក្រោយពីសកម្មជនការពារបរិស្ថាន ដែលហ៊ានរិះគន់ការកាប់បំផ្លាញព្រៃឈើនៅកម្ពុជាយ៉ាងឥតសំចៃមាត់រូបនេះ បានចុះស្រាវជ្រាវ និងស៊ើបអង្កេតការធ្វើអាជីវកម្មឈើប្រណិត របស់កម្ពុជាជាច្រើនទៅកាន់ប្រទេសវៀតណាម។
លោក ឈើយ ឧត្តមរស្មី អះអាងថា ក្នុងនាមលោកជាកូនប្រុសរបស់ សកម្មជនការពារព្រៃឈើដ៏ឆ្នើមរូបនេះ លោកនឹងបន្តវេនពីឳពុករបស់ លោកដើម្បីការពារ និងអភិរក្សសម្បត្តិធនធានធម្មជាតិរបស់ខ្មែរ ទោះត្រូវចំណាយអ្វីក៏ដោយ៕