33 C
Phnom Penh

មេដឹកនាំចលនាសង្គ្រោះ៖ វិនិយោគទុនចិននៅកម្ពុជាមិនបានផ្តល់ប្រយោជន៍ដល់ពលរដ្ឋខ្មែរទេ

ដោយ ឌឹ ខេមបូឌា ដេលី

បទវិភាគ

មេដឹកនាំចលនាសង្គ្រោះជាតិ គឺ លោក សម រង្ស៊ី អះអាងថា ក្រុមវិនិយោគទុនចិននៅកម្ពុជាញាំញីទៅដោយអំពើពុករលួយនិងអំពើនិទណ្ឌភាព។

សេចក្តីថ្លែងការណ៍របស់លោក សម រង្ស៊ី ដែលចេញផ្សាយជាសាធារណៈកាលពីថ្ងៃទីពុធ ទី២៥ ខែមេសា ម្សិលមិញ អះអាងថា ក្រុមអ្នកវិនិយោគទុនចិនបាននាំមកជាមួយនូវកម្មករជាច្រើន ពីប្រទេសចិន ដែលនាំឲ្យពលរដ្ឋខ្មែរមិនបានទទួលផលប្រយោជន៍អ្វីសោះឡើយពីការរកស៊ីរបស់ពួកគេនោះ។

ប្រតិកម្មរបស់លោក សម រង្ស៊ី ធ្វើឡើងក្រោយពេល ដែលលោក ហ៊ុន សែន អះអាងនៅក្នុងពិធីសម្ពោធសកលវិទ្យាល័យក្រចេះ ដែលឧបត្ថម្ភដោយរដ្ឋាភិបាលចិន កាលពីម្សិលមិញថា ពលរដ្ឋមិនត្រូវ ព្រួយបារម្ភ អំពីការធ្វើវិនិយោគទុនរបស់ជនជាតិចិន និងកម្មករចិន នៅកម្ពុជា នោះទេ។

លោកបន្តថា ចិនមកកម្ពុជាច្រើនបែបនេះដោយសារ កម្ពុជា នៅមិនទាន់មានធនធានមនុស្សគ្រប់គ្រាន់ សំរាប់តម្រូវការរបស់ក្រុម ហ៊ុនចិនទាំងនោះ ដូច្នេះហើយបានជាពួកគេត្រូវនាំអ្នកបច្ចេកទេស និងកម្មករដែលមានជំនាញមកធ្វើការនៅកម្ពុជា។

ប៉ុន្តែលោក សម រង្ស៊ី អះអាងថា ការធ្វើវិនិយោគទុនជាមួយចិនមិនដែលចំណេញដល់កម្ពុជានោះទេ។

ជារួម នយោបាយវិនិយោគទុនរបស់ចិនគឺជានយោបាយដែលដៃម្ខាងឲ្យជំនួយដល់កម្ពុជា ហើយដៃម្ខាងទៀតច្បាមយកធនធានរ៉ែ ព្រៃឈើ និងការទទួលសម្បទានដីសេដ្ឋកិច្ចពីរដ្ឋាភិបាលកម្ពុជាជាដើម។

លោក សម រង្ស៊ី បន្តថា លោក ហ៊ុន សែនត្រូវការប្រទេសចិនដើម្បីគាំទ្រដល់ការដឹកនាំរបស់លោក ដោយសារចិនមិនខ្វល់អំពីបញ្ហាប្រជាធិបតេយ្យ ការគោរពសិទ្ធិមនុស្ស និង នីតិរដ្ឋនោះឡើយ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស