ក្រសួងសុខាភិបាលទទួលខុសត្រូវលើវ៉ាក់សាំងជំងឺឆ្កែឆ្កួតខុសស្តង់ដារនាំចូលពី ប្រទេសចិន ក្រសួងសុខាភិបាល កាលពីចុងខែសីហា បានជូនដំណឹងថា ប្រភេទវ៉ាក់សាំងបង្ការជំងឺឆ្កែឆ្កួតឈ្មោះRabies Vaccine នេះត្រូវបានផលិត និងចែកចាយខុសលក្ខណៈស្តង់ដារ ហើយឱសថប្រភេទនេះកំពុងដាក់លក់នៅលើទីផ្សារកម្ពុជា។
រោងចក្រChangchun Changsheng Life Sciences Ltd.របស់ចិនជាអ្នកផលិតឱសថប្រភេទនេះ ហើយត្រូវបាននាំចូលមកកម្ពុជាដោយក្រុមហ៊ុនK-Man Co. Ltd.។
ក្រសួងសុខាភិបាលបានបញ្ជាឱ្យគ្រឹះស្ថានលក់ឱសថទាំងនោះបញ្ឈប់ការលក់វ៉ាក់សាំងនេះតទៅទៀត និងត្រូវប្រមូលវ៉ាក់សាំងប្រភេទនេះត្រឡប់ទៅប្រទេសចិនវិញ។
ក្រសួងក៏បានហាមរាល់មន្ទីរពេទ្យរដ្ឋគ្លីនិក និងសេវាសុខាភិបាលទាំងឡាយនៅកម្ពុជាមិនឱ្យប្រើប្រាស់វ៉ាក់សាំងប្រភេទនេះទៀតឡើយ ហើយបើក្រុមហ៊ុនណាហ៊ានល្មើស នោះក្រសួងនឹងចាត់វិធានការតាមផ្លូវច្បាប់។
ទោះជាយ៉ាងណាក៏ដោយក្រសួងសុខាភិបាលនៅមិនទាន់អាចបញ្ជាក់បាននៅឡើយទេ អំពីផលប៉ះពាល់ពីថ្នាំវ៉ាក់សាំងបង្ការជំងឺឆ្កែឆ្កួត ចំពោះសុខភាពរបស់អ្នកប្រើប្រាស់ដូចម្តេចនោះ។
ក្រុមអ្នកជំនាញខាងសុខភាពនិយាយថា បញ្ហានាំចូលថ្នាំវ៉ាក់សាំងនេះ ជាកំហុសរបស់ក្រសួងសុខាភិបាលដែលមិនបានត្រួតពិនិត្យឱ្យបានត្រឹមត្រូវជាមុនដែលនាំឲ្យពលរដ្ឋរងគ្រោះនៃការប្រើប្រាស់ឱសថក្លែងក្លាយនេះ៕